~~~~~~~~~~~~~~~~







2008年6月13日 星期五

紀漢醇 - 05 - 48吋的胸肌

紀漢醇 - 第五節 – 48吋的胸肌

Angela低聲問紀漢醇:「你…係咪…係咪gay架?」
點知俾全公司最八卦嗰位同事阿Ling聽到,
阿Ling突眼地尖聲問:「吓?乜阿Handsome哥,原來你係gay架?」
紀漢醇當然唔可以俾呢個謠言散播,立即發揮急才!
反駁說:「黐線!Angela問我部電腦……係咪『壞機』呀?」
Angela見紀漢醇肯幫自己換蒸餾水、又幫手check電腦,
當然唔會落井下石,連忙幫口向阿Ling解釋:「係呀!我問佢『係咪壞機呀?』妳聽錯咗啦!」
阿Ling見人證物證都不成立,無嘢可炒作,只好死死地氣,無癮行開。

紀漢醇見阿Ling走開後,在安全的環境下立即向Angela解釋,
昨夜在戲院只是被人認錯而鬧出誤會!自己都嚇到魂不附體。
Angela見紀漢醇對異性咁殷勤熱情,都唔相信佢係gay!

紀漢醇三扖兩撥,同Angela清理一吓電腦hard disc後,
Angela部電腦正常返哂!她笑瞇瞇多謝Handsome哥。
Angela說自己正想買一部Notebook電腦自用,
問紀漢醇既然咁熟識電腦,可否陪她一起去電腦商場挑選?
紀漢醇毫不猶豫,馬上提議明晚放工後,兩人一起去旺角電腦中心選購。
紀漢醇:「無問題!等我呢個『旺角機神』聽晚同妳揀部又靚又平嘅電腦吖!」

紀漢醇望著Angela,心裡考慮:是否應該現在就向Angela表明自已就是「韓信」呢?
但他想待明晚進一步確實Angela是雅典娜後,才表露身份也未算遲,
否則「撻錯朶」就是一件十分瘀爆的辦公室醜事!

晚上9時,趁太太在廳中看電視,紀漢醇在書房上網,
雅典娜經MSN 向他says Hi!
紀漢醇立即回覆:

雅典娜says:
你父母應該無事啩,明晚可否見面?


韓信says:
They fine. OK!where and when?

雅典娜says:
明晚7時銅鑼灣時代廣場Page One等,OK?

電腦屏幕前的紀漢醇,瞳孔即時擴張!
心諗:「吓?咁即係點呀?試吓我咁話呀?」
Angela約我明晚7時去旺角、雅典娜就約我明晚7時到銅鑼灣!
同一時間,一個喺九龍?一個喺香港島?
咁講:即係推反「Angela就是雅典娜」的假設!
隨非Angela識分身術,或者Angela搏我唔敢去銅鑼灣應約!
又或者Angela和雅典娜真的是兩個人。

紀漢醇腦筋一轉,決定應約見雅典娜,
但要改時間改地點,約雅典娜明晚9時於尖沙咀漢口道Starbucks等。
那麼明晚陪完Angela買電腦後,8時45分就由旺角趕去尖沙咀見雅典娜,
睇吓雅典娜是Angela,還是另有其人?
雅典娜回覆:改於9時在漢口道Starbucks等?一於無問題。

韓信says:
OK!how can I recognize you?

雅典娜says:
我會穿橙色猿人T-shirt,那你呢?

韓信says:
I will wear red colour Che Guevara T-shirt 

雅典娜says:
OK!不要再次放飛機呀!明晚見。

韓信says:
no problem!

第二天下午,紀漢醇致電淑芳,
藉詞阿祖約了他去旺角買手提電腦。
紀漢醇輕易撇下淑芳,今夜9時去應雅典娜的約。

放工時,他到Angela的部門找她,一起向旺角出發。
在乘搭地鐵的途中,紀漢醇問Angela今夜最遲幾多點需要回家?
Angela說無所謂,大約11點前回家便可以!
咦?難道Angela真的並非雅典娜?
紀漢醇暗中打算等到8時45分,便假扮屋企突然急call佢,
藉詞屋企有急事要鬆人,趕去尖沙咀見雅典娜!

兩人在旺角電腦中心行了一陣,
紀漢醇介紹什麼型號的電腦,Angela也嫌三嫌四,總之乜都話唔鐘意!
最終無電腦揀得啱,空手而回。
Angela:「算罷啦!今晚我都係揀唔到,不如我哋去食嘢囉?」
紀漢醇見個錶就快8點鐘,仲有大把時間,一於陪Angela「hea」多一陣。
兩人行到旺角一間餐廳前,Angela說這間餐廳的海南雞飯很聞名,
由於這間餐廳很出名,所以已有兩三個客人在門外排隊等候。
Angela拉紀漢醇的手臂,走到隊尾排隊。

紀漢醇驚悶親Angela,就說一些低能笑話和IQ題來逗她開心,
紀漢醇的其中一項溝女技能就是富幽默感,吹水高手。
講笑話講到興高彩烈之際,Angela撒嬌拍打紀漢醇的手臂:「好抵死呀你!」,行徑親蜜!

嘻嘻哈哈之際,一把怒氣沖沖的老牛聲音怒叫:「喂!」打破了兩人的溫馨場面,
兩名身高6呎、身穿黑色運動衣,擁有兩塊「嘭嘭聲」48吋胸肌的威猛大隻佬,企喺紀漢醇面前,
其中一名惡型惡相的大隻佬喝道:「Angela,呢條懵佬係乜水呀!?」
Angela驚惶失措,「阿Bill,佢…佢係…」
原來呢名大隻佬係Angela嘅現任男朋友,佢叫阿Bill,仲係一名健身教練!
兩名健身教練剛剛吃完晚飯後步出餐廳,見到Angela同紀漢醇卿卿我我,
阿Bill立即眼火爆,怒不可遏!一個戰步上前,
左手抽起紀漢醇的衣領,咬牙切齒:「你條粉腸吖!」
右手沙煲咁大嘅拳頭,朝向紀漢醇的心口,
一嘢揼落去……


次回《蛇蠍美人》6月16日星期一2345

71 則留言:

  1. hahhahahaa...咁迂迴曲折既~~
    D關係愈黎愈複雜!
    但究竟athena幾時先現身??等唔切啦!!!!

    回覆刪除
  2. MONA

    唉~妳同handsome一樣咁想見athena呀?
    佢都未見到,仲被人揼添!

    妳忍耐一吓
    6月內一定見到athena!

    回覆刪除
  3. 我都估到架啦,又有阻滯,又赴唔到約,真係無緣呀!
    不過,越係見唔到,就越恨見!
    好似L記手袋,D女人越係買唔到,就越恨擁有!市塲心理學。

    回覆刪除
  4. 巴黎旅客

    係囉!係囉!
    讀者愈想知邊個係athena
    我就愈係唔講,吹bb!

    不過下集明朗化少少

    回覆刪除
  5. 嘩,如果 handsome 咁樣被人 Dub ,好唔抵喎,仲係大隻佬男友,其實現實生活中,好奇怪,女仔成日【要好 Man 架】,但真係見到大隻佬,就好似見鬼咁,口講嗟。

    如果所謂大隻佬男友見人就打,咁呢啲人唔死無用喇,仲要係教練,正如教人功夫既,第一戒律就係要徒弟【嗱你唔好唸住打交下!】。

    大隻佬大隻打人,喺差館會好慘,被人玩到謝 ~

    期待下一集阿 handsome 點啦。

    回覆刪除
  6. 我反而好想睇阿【大舊】會唔會同....hanesome 老婆...有路 ~~~@@"~


    我真係好鍾意大舊呢類中場插科打混既角色架 ~

    回覆刪除
  7. 你唔好話......

    雅典娜就係....八妹 Ling ~~

    《但我好想係架 ~~》

    回覆刪除
  8. 今次寫咁少架……
    可唔可以唔好隔幾日先出一篇?
    等得好辛苦呀…

    回覆刪除
  9. 大文,

    「女仔成日【要好 Man 架】,但真係見到大隻佬,就好似見鬼咁,口講嗟」<---我好同意,我最清楚啦.

    妒忌...真係視乎每個男人的修為,
    喺酒吧被人眼望自己女友,就大打出手.

    有人練功為強身,也有人練功為打交

    回覆刪除
  10. 大文

    【大舊】會唔會同淑芳?

    話時話, 朋友妻呢家嘢真係好吊詭架
    成日一齊去玩,熟咗
    對阿嫂有歪念
    又要顧及友情..

    如果死黨老婆鐘意自己,仲大鑊!
    朋友妻喎!........更係咪走雞啦!

    你又啟發了我,又有新材料
    謝謝

    回覆刪除
  11. 阿ling係athena都幾好idea!

    一個OL把口唔停
    講是非,分享別人和自己秘密
    你講乜俾佢聽, 佢都揚開哂
    透明度極高

    偏偏佢跟一位神秘人交往就隻字不提..
    選擇性口密
    因為她知道一洩流,神秘人就會從此消失....

    嘩!你又啟發了我

    ps.我知道你替我撐場, 一次過留了三段言,
    在心中!

    回覆刪除
  12. karen

    多謝妳睇先

    而家隔三日一篇
    希望妳其間做其他嘢分散一吓注意力:
    例如去運動,唱k,砌puzzel,父親節飲茶,
    冥想,探訪孤兒院etc,.....
    咁時間快過啲
    好快就星期一晚,第六集架啦

    回覆刪除
  13. 卡臣兄:

    今次漢醇真係:

    索嘢索著火水,赤腳踩正榴槤

    P.S.你隻古龍水咩牌子,噴到你風流倜儻?:P

    Daniel.

    回覆刪除
  14. 上次gayman,今次大隻佬,handsome兄真係慘咯。
    大隻佬咁燥,會唔會日日拳頭問候Angela架。

    回覆刪除
  15. this handsome guy really deserve this, he just want to utilize every moment hanging out with different women to fulfill his desire. i wish he will never see that athena for the rest 5 episodes.

    回覆刪除
  16. 係囉!係囉!
    讀者愈想知邊個係athena
    我就愈係唔講,吹bb!

    其實我都唔係咁想見姐........
    @@

    回覆刪除
  17. 卡臣,不如你下次假設自己係個女仔去寫小說丫~應該會好過癮..

    回覆刪除
  18. 恕我直言,你呢幾集嘅情節唔係好似你以往啲作品咁;因為發姣男同志錯摸搞笑位,同巧遇大隻佬挨打嘅情節,似以前“精裝追女仔“多啲。

    希望嚟緊發展有突破!

    回覆刪除
  19. 48吋胸肌!我有點怕~~~
    其實男士身型balance就ok呢~~
    尤其是胸肌可以震震下果D仲驚添~~ >_<

    回覆刪除
  20. 「喺酒吧被人眼望自己女友,就大打出手」
    真係唔明點解要打,有人望,即係証明自己女友有吸引力,應該感到自豪!

    咁鍾意打人,第日都會打老婆!不過戀愛有時真係盲目嘅。

    蛇蠍美人?邊個呢?

    回覆刪除
  21. Daniel

    「你隻古龍水咩牌子,噴到你風流倜儻?」

    我呢隻係:黃道益活絡油,風濕發作,驅風呀!

    回覆刪除
  22. ERIC

    「大隻佬咁燥,會唔會日日拳頭問候Angela架」

    唉~一個願打,一個願捱
    SM 都無佢地辦法

    回覆刪除
  23. NOST

    題外話

    The Happening 勁!
    勁過Inconvenient truth & 11th Hour!
    嘩!地盆嗰幕....勁!
    ending又有意象(太太係廁所嗰幕)

    導演咁堅嘅故事都度到,叩個頭先!

    回覆刪除
  24. mona

    「不如你下次假設自己係個女仔去寫小說丫」

    唔~唔~好啦! 認承妳!
    下次我用女同性戀者心態,去寫點追女仔先!

    始終都係追女仔 @@"

    回覆刪除
  25. 歪歪

    「似以前“精裝追女仔“多啲。」

    哈哈, 其實王晶先係我追捧偶像
    佢地精裝追女仔,簡正是我的聖經.

    晶哥!應釆兒!小春!元秋!天林叔!

    回覆刪除
  26. 逍遙小妹

    「尤其是胸肌可以震震下果D仲驚添~~ 」

    我識震,但我唔會隨便亂震
    小妹, 唔使驚我uncle car架!

    回覆刪除
  27. 巴黎旅客

    「咁鍾意打人,第日都會打老婆!不過戀愛有時真係盲目嘅。」<---似乎妳接受家庭暴力喎,有sm味道,我有手扣皮鞭喎

    蛇蠍美人?邊個呢?
    貼士...她已經出咗場啦

    黎巴嫰旅客

    回覆刪除
  28. 我絕對 反對暴力!!!尤其最憎人打老婆,而d女人又任人打!打完離家出走,然後又番去比人再打!似乎有被虐狂。所以我話愛情係盲目嘅!

    手扣?你以前當差架?

    回覆刪除
  29. 巴黎旅客

    明白哂!明白哂!

    我有手扣,唔係因為我以前當差
    因為呢度係黎巴嫩嘛!

    我由黎巴嫩飛返嚟參加港男
    可惜唔入圍!
    嘥咗張機票

    回覆刪除
  30. 我又想睇Uncle Car波震!
    Uncle Car有冇去試下港男呀。今年miss左,唔緊要,下年一定得!

    回覆刪除
  31. ERIC

    嘩!好消息
    乜港男下年加「耆英姐」呀?
    我sure win!

    回覆刪除
  32. MONA

    「haha..卡臣參選港男一定支持...佢唔住啦~~~」

    回覆刪除
  33. 卡神,唔使咁謙啦,你係D記者面前震波,一定變大熱啦。

    回覆刪除
  34. eric

    唉~~香港港男(健美組)參加者,個個都識震波
    我真係行埋一邊

    加拿大有無「加男」選舉呀?
    你又參加丫

    回覆刪除
  35. "蛇蠍美人?邊個呢?貼士...她已經出咗場啦"

    好心急好心急, Athena 唔知係咪我心中果位呢! 係都幾抵死喎!

    好耐冇過呢鋪"追小說癮", 正呀! 十幾年前報紙都仲有七日完小說!

    卡兄每次都晌"高潮位"賣關子, 頂(癮)呀!

    出晒十集後, 會唔會輯埋一集(合訂本)?

    回覆刪除
  36. 渣sir

    你咁叻,一定估到邊個係蛇蠍美人啦!

    我多謝你篇「師奶復仇記」就真!
    你的實驗小說都正啫!

    我每次都晌"高潮位"停咗!其實係我身理結構
    唉~~陰公...

    「出晒十集後,會唔會輯埋一集(合訂本)?」<--- 一定會!
    只要各位將十集一次過睇哂咪得囉!

    回覆刪除
  37. 飛輪海既辰亦儒好似嬴過溫哥華既Sunshine Boyz(類似港男,不過冇咁騎呢)又好似有年齡限制(我太老啦)。

    回覆刪除
  38. 有冇攪錯,食餐飯都抦人,仲有皇法嘅,我...我...我報警!

    回覆刪除
  39. 卡臣 提到...
    Daniel

    「你隻古龍水咩牌子,噴到你風流倜儻?」

    我呢隻係:黃道益活絡油,風濕發作,驅風呀!

    仲以為係印度XX噃,用完就'發發'聲添,哈!:P

    Daniel.

    回覆刪除
  40. "The Happening" is only an average movie to me, the acting of the wife really sucks.

    Sorry, I cannot think of any special vision reflected in the toilet scene (the birth of the new life saves the couple?)

    回覆刪除
  41. Laulong

    我係警訊少年(好多年前)
    已經通知咗林嘉華啦!

    回覆刪除
  42. daniel

    印度神油揸落條頸度?
    頂頭搥呀?

    回覆刪除
  43. nost

    故事條橋掂喎,(to me)
    仲好過the signs

    有孩子(人類下一代)
    問題只是剛剛開始
    下一代點面對?

    回覆刪除
  44. 黎巴嫩旅客兼舊街坊:
    落選唔代表無料
    唔好放棄!

    你支香水?Bvlgari?
    Kenzo Homme唔錯喎,藍色樽彎彎地,味道很man很誘人。

    呀,我寫咗啦!

    回覆刪除
  45. 巴黎旅客兼舊街坊:

    我手持嘅係AK, sorry!係CK!

    妳個鬼古好可怕呀!
    uncle car寒一寒
    各位未看快看!
    French made ghost story!

    黎巴嫰旅客

    回覆刪除
  46. 卡臣 提到...
    eric

    算罷啦!我哋無後台,
    點都係輸!

    卡臣,唔緊要,用呢一年時間,識番個無X高層做契媽/爺,嗌聲honey,以你既本錢一定掂!

    回覆刪除
  47. 我又要睇Uncle Car震波!!!!!

    Hey Carson你呀...唔好寫到D大隻佬嘅image咁暴力啦。呢~你知啦...你都係嘛~ 其實大隻都唔錯架...好似郭富城咁都好大隻架佢。好man好型wo~ 我就覺得好過黎明嗰款男生wo~

    laulong- "有冇攪錯,食餐飯都抦人,仲有皇法嘅,我...我...我報警!"

    哈哈Carson, 你呢個故仔呀laulong睇到心驚驚。因為佢鐘意睇靚女。

    回覆刪除
  48. eric

    多謝提供

    我已經sent咗email俾陳智能同620
    等緊覆

    弊!amigo同王喜delete咗我個email呀!

    回覆刪除
  49. 素素

    「你都係嘛~ 其實大隻都唔錯架...」
    係呀!係呀!
    妳講番句公道說話啦!
    阿強,大嚿都同意!

    laulong九成同女同事去過mk揀電腦
    所以咬牙切齒!
    我哋明白嘅!

    回覆刪除
  50. send email 唔掂?夜晚親自去佢地屋企送外賣
    消夜咪得囉。呵呵。

    回覆刪除
  51. eric

    去佢地屋企送外賣?

    代價會唔會大咗啲啲?

    回覆刪除
  52. [去佢地屋企送外賣?
    代價會唔會大咗啲啲?]

    hahahhaa,如果你都enjoy的話就唔會.

    回覆刪除
  53. mona

    呀~~妳呢個miss呀.....講嘢....咁有道理嘅!
    既中肯又實際

    回覆刪除
  54. 今晚又係【幾 hanesome】既時間喇!!!!


    快喇快喇 ~~~

    回覆刪除
  55. 爸打文

    有心! 有心!
    今晚睇吓邊個係蛇蠍美人喇

    回覆刪除
  56. Brothers & Sisters

    ~ trailer ~

    今夜athena會現身!

    回覆刪除
  57. cool~~

    等我做呢個post既最後一位啦~

    回覆刪除
  58. 各位朋友:

    如果有人最先回應我此段留言,
    將獲本人送出神秘禮物.
    (只限首第一位)

    等着你/妳

    回覆刪除
  59. uncle car,

    其實亞anthea咪就係男主角老婆的朋友囉~~
    小妹可以參觀uncle car的車嗎?

    回覆刪除
  60. 逍遙小妹

    估唔到我呢個神秘遊戲
    得獎者咁快就產生

    係:逍遙小妹
    獎品係:妳提供一個男或女的名字
    將成為我下一次小說的主角名字

    就係咁架咋!

    我架車已經喺今年5月賣出
    而家出入搭公共交通工具

    回覆刪除
  61. 卡哥哥~~~

    多謝你給我這份禮物呢~~~

    至於男/女主角的名字,不如叫蕭逍遙,男女都用得,好似有D.....醎喎~~~哈哈!!

    熱烈期待下一個故事~~^^

    回覆刪除
  62. 逍遙小妹

    女主角真係叫蕭逍遙?
    認真?
    姓蕭?好搞嘢啫?!

    回覆刪除
  63. 卡哥哥~~~

    呢個名可以俾你多D空間去寫嘛,不好嗎?

    回覆刪除
  64. 逍遙小妹

    蕭逍遙....我過唔到自己果關
    又唔係色情小說

    有冇其他選擇呀?

    回覆刪除

LinkWithin

Blog Widget by LinkWithin