~~~~~~~~~~~~~~~~







2008年6月4日 星期三

紀漢醇 - 02 - 大Hang機

紀漢醇 - 第二節 – 大Hang機

「咯!咯!」淑芳站在書房門前:「阿醇!……你仲上網?好瞓啦!」
紀漢醇草草打字「see you tomorrow!」,之後隨即off line,
起身作賊心虛地說:「無!我上網bid嘢,趕喺deadline之前出價之嘛!」


紀漢醇步出書房,和淑芳回睡房;
紀漢醇臥在床上,望著天花板,良久未能入睡,
如小學生般,因為明天學校搞大旅行而緊張到失眠,
明天傍晚6:30,紀漢醇便可以一償跟雅典娜見面的心願!
他整夜在猜估雅典娜的樣貌身材,臨黎明時分,
他才朦朦朧朧地入睡…

紀漢醇早上7:45被淑芳叫醒,
兩人每天都是差不多8:30便出門口返工。
紀漢醇昨夜因睡得不好,需要一番爭扎後才能起床。
紀漢醇因今夜約了雅典娜見面,需要編一個藉口騙淑芳,
經驗告訴他,要到今天下午才好call淑芳,隔着電話說今晚有事,
因為如果今早面對面講,眼神交流會增加被識破的風險,
而且面對面講,淑芳便有機會追問,可能會露出馬腳。
紀漢醇如常梳洗更衣,他切忌打扮得過份刻意靚仔有型,
否則會引起淑芳的懷疑。
8:30分,兩人離家後,乘地鐵朝兩個相反的方向出發。

紀漢醇在地鐵車廂中瞌眼瞓,於9:25分回到公司,
他返回坐位後,第一時間就是看雅典娜的blog,咦!有新文章噃!
於昨夜3時posted上網誌,應該是和紀漢醇chat完後才寫。
雅典娜寫一段80年代的個人經驗,文章叫《見筆友》。
講十幾年前約筆友見面時那種忐忑緊張的心情,
紀漢醇覺得這篇文章是為他而寫,證明雅典娜也十分重視跟自己的約會。
他留言說了很多美滿良緣,都是從筆友開始,繼而開花結果成親的陳腔濫調。

紀漢醇的部門,只有兩位電腦技術員,
另一位技術員叫「大嚿」,
因為他愛健身,所以他的花名「大嚿」因此而起。
紀漢醇見到大嚿一返到辦公室,
馬上忍唔住向大嚿匯報,
紀漢醇:「喂!我噚晚約雅典娜出嚟見面吖!」
大嚿:「吓?咁佢制唔制呀?」
紀漢醇:「OK!約咗今晚見面!」
大嚿:「嘩!Handsome哥,你老婆知唔知吖?」
紀漢醇:「黐線!佢梗係唔知啦!」
大嚿:「你有冇諗過,其實...雅典娜...就係你老婆化名扮呀?」
紀漢醇:「挑!我梗係有諗過!不過我老婆一來唔識打中文,點寫個中文blog先?!二來,我同雅典娜傾MSN果陣,我老婆坐喺廳度睇緊電視,全屋得一部電腦放喺書房,佢搵乜同我chat呀?有超能力呀?!仲有,噚晚雅典娜三點鐘post篇文章上blog,我老婆成晚瞓喺我側邊,點post呀?」
大嚿:「係就最好啦!咁祝你溝到佢啦!」
紀漢醇:「希望佢係靚女就真!如果佢係豬扖,我就立即轉身閃架啦!」
大嚿:「超!可能佢見到你,佢閃先過你啦!」
紀漢醇:「哼!呢個情況嘅可能性係零!」

紀漢醇趁Lunch時候去附近apm商場,買了一件窄身麻質黑色西裝褸,
穿起後,貼身的cutting令他的身材看起來更修長高佻。
準備今晚要給雅典娜一個良好的第一印象!

下午3時,紀漢醇call淑芳,
他從不會用「公司加班」做藉口,因為如果淑芳晚間call到公司找不到紀漢醇,
便會露出破綻!
所以紀漢醇攞「阿祖」出嚟,阿祖是紀漢醇自小學至中學的同班死黨!
阿祖是基督徒,淑芳很放心紀漢醇跟阿祖去街,
很明顯,淑芳不明白「基督徒就算做了壞事,去辦告解便可獲恕免」的道理!
紀漢醇說約了阿祖去旺角星際城市買遊戲光碟,
他知道這個買碟節目,淑芳一定無興趣會一起跟來。
淑芳叫紀漢醇買完碟就早點返家。

紀漢醇收線後,望着手錶,還有三個半小時便可以見到雅典娜。
心裡猜想雅典娜會否應約?她是怎麼的模樣?她年輕嗎?她身材好嗎?
下午4時,雅典娜的MSN離線。
紀漢醇猜想:難道雅典娜也隆重其事?去了set頭裝身扮靚?
到5點鐘,雅典娜再次on line,
紀漢醇跟她confirm一次今夜的見面。

5:30分,離放工尚剩30分鐘,
紀漢醇辦公桌上的電話響起,他求神拜佛千祈唔好係電腦維修的request order!
好彩唔係!電話另一邊傳來Alma急促的聲音,
Alma通知紀漢醇,話淑芳食物中毒,入咗醫院急診室,叫紀漢醇放工後立即趕到醫院來。
紀漢醇:「吓!咁大劑!點解會咁架?」
Alma:「我下晝五點幾落廠睇布,路經淑芳公司,咪約佢去茶餐廳下午茶囉!點知佢食完碗車仔麵之後上吐下瀉,我咪送佢去急診室囉!」
紀漢醇:「咁妳無事吖嘛?」
Alma:「我無事!我食西多士,無食車仔麵呀!」
紀漢醇:「咁...我六點幾到啦!」

紀漢醇收線後大嘆命運作弄自己!
但老婆有事,焉能坐視不埋?唯有取消與雅典娜的見面。
因為沒有雅典娜的手電號碼,他只好用MSN通知雅典娜;

怎料連線失敗!身邊同事異口同聲話:「哎呀!上唔到網嘅?!」
弊家伙!屋漏兼逢夜雨!全公司上唔到網?server hang機!

紀漢醇不想第一次約會就讓雅典娜白等一場,而留下壞印象!
又要搶修電腦server!
淑芳正在醫院急診室!
個server整極都唔知道故障發生喺邊度?
又唔知幾時先整返好,等整返好果陣,雅典娜可能已經off line,
咁就失去聯絡,first date就爽約,認真大鑊! 

時間一分一秒的過去,時鐘分針已經踏正5:47分…


次回《咖啡杯邊的唇印》6月7日星期六2345

135 則留言:

  1. 哈哈哈哈....哈哈...!

    我好似開始 feel 到個故仔係 .....

    回覆刪除
  2. 喂!大佬
    我知你見微知著
    但係求你唔好爆響口
    否則我餘下8集唔使睇啦!
    please~~~~

    回覆刪除
  3. 我梗係唔會講啦,你估我痴線架咩!

    傻架你都。

    回覆刪除
  4. 不過話時話,個故仔,我睇第一集,無乜嘢,no question 。

    但睇到呢個第二集,故仔到呢度,我印象中,真人真事,係真人真事,除左唔係 msn 果 part 嗟,真係識有條友,有幾乎相同既遭遇!

    總之好頂癮。


    PS : 應該差唔多喇,啲客應該就快到喇,開定茶,叫定點心先。

    回覆刪除
  5. 好似有D內幕野喎。呵呵。細細聲話俾我知丫。

    真係吊人癮,仲未見到Athena。Alma就算唔係Athena,都應該有通水,邊有咁橋丫。

    唇印係咖啡杯好啦,唔好係其他地方。。。

    回覆刪除
  6. 大文

    嘻嘻~~
    「真係識有條友,有幾乎相同既遭遇!」
    你果位朋友咁橋?
    我諗...純粹巧合呱!

    世界真細小.

    回覆刪除
  7. 應該唔關事喎,如果 估 Alma 係雅典娜 ?

    咁,就算通水都無意思架, Handsome 無應約到場,咁 雅典娜都無得著架。

    係咪?邏輯問題嘛。

    回覆刪除
  8. eric

    如果唇印印喺白恤衫領口上, 應該點處理?

    >>>>>>>>>

    係將成件衫印滿佢, 當係恤衫print

    回覆刪除
  9. 卡 Zen :

    我指前 Part 類同嗟,不過就唔係用 msn 識女,而係另一種途徑之嘛。

    例如 blog 友聚會都有啦,仲勁過 msn 。

    回覆刪除
  10. diamond

    果然係明偵探----痀籃!
    法証先鋒,ER
    CSI, 24, Bones,
    prison break

    回覆刪除
  11. 如果有唇膏印在恤衫領。

    啊,好易嗟,去 7-11 買罐茄汁飲品,咋帝倒落恤衫領口,扮係飲用途中被人碰或自己卜街,成個領口都係,咁咪成件唔要,大條道理囉。

    回覆刪除
  12. blog 友聚會

    好緊張啊~~
    見到真人可能好失望
    文字上正正常常
    真身可能short short 地

    呀....嗚....呵....
    我要...水晶骷髏啊~~

    回覆刪除
  13. 咁handsome老婆,alma,athena夾埋試handsome真心嘛。Athena通水俾Alma,Alma話俾handsome嫂,作個古仔,睇下呀handsome點反應。

    不過我點諗都好,都係唔及呀大文兄知內幕架啦。。。哈哈。所以都係快D爆小小啦。

    回覆刪除
  14. 如果有唇膏印在恤衫領。

    好計!好計!
    我直情去屋邨樓下
    等M巾從天而降
    頂頭搥
    茄汁都慳番

    回覆刪除
  15. 我亂估嗟,唔會同你故仔一樣既,但當然我都唔會講我點估啦,講嚟做乜嗟,你估常識問答搶先㩒制咩。


    Blog 友聚會呢, Yahoo Blog 好興架,blog 同 msn 好唔同,msn 多o靚仔靚妹,又唔知對方係乜人,易遇上壞人嘛。

    blog 就唔同喇,有 photo ,合眼緣至 通電話,嗲兩咀至出嚟飲下茶,唱 K...

    blog 友,壞人機會率好少,而家好多人鍾意呢樣。

    安全緊要喎,大佬。

    回覆刪除
  16. eric

    真人真事
    一女性朋友知男朋友工作勁忙
    扮病睇吓男友會唔會放低工作睇佢?

    哼~~呢啲大話咪制呀!
    一次不忠, 百次不用!

    回覆刪除
  17. 「blog 友,壞人機會率好少,」
    我識一個喎!
    仲話自己又壞又索(佢自己以為)
    介紹俾你識先
    包你多謝我

    回覆刪除
  18. eric :

    我特登神秘嗟,點估丫,真係話估就估咩。

    咁講番,試 handsome 真心,咁 handsome 都去睇老婆啦,一定真心喇,係咪?

    咁樣,下次 handsome 要見雅典娜,要見既,都會去嗟,如果個故仔有邏輯性既話,應該另有弔詭。


    卡 Zen :

    梗係唔係啦, blog 友,無 photo 果啲,唔會隨便見架,無 photo ,都會通通電話,幾次o岩傾,至會一班人約出嚟架,好有系統架。

    因為呢, msn 溝仔溝女,成人世界已經唔多用喇,實在太多無厘頭人、壞人嘛!

    msn 你都唔知對方係男定女,未通過電話,你敢唔敢去?

    我見 yahoo 好多 blogger 聚會,都有啲靚女架!

    回覆刪除
  19. 我都係八下掛,想知究竟係唔係珍人真事遮。呵呵。。我好八架。

    壞唔緊要,索就得啦。玫瑰花下死,做鬼也風流嘛。

    回覆刪除
  20. [ 一女性朋友知男朋友工作勁忙
    扮病睇吓男友會唔會放低工作睇佢...]


    喂!大佬,呢啲真係好屎橋喎,講真。

    咁話明係急症,試真心,都無用,正常嚟講都會飛去睇啦,係咪真心? who knows ?

    而且,【狼來了】故事呀! 唔好試太多呢!

    回覆刪除
  21. 我鍾意果個角色【大舊】喎。

    我,相信好多人都係,每在一家公司,就算同其他人幾唔夾都好,都總會有一個半個特別老死既友仔。

    通常呢類人呢,平平凡凡,但其實好心水清、低調、好傾得、無乜野心、屬於【信得過】之人。

    我在每家公司,都遇到呢類人。

    回覆刪除
  22. 大文

    哈哈!梗係【水簇】啦
    如果有好嘢
    我都自用啦!

    回覆刪除
  23. 拿,就係有D女仔會咁諗架。以為掂架。咪死得人多囉。

    回覆刪除
  24. eric
    玫瑰花下死,做鬼也風流嘛

    咁祝你離開呢個世界
    係採用我survey最後果個option啦!
    touch wood!

    回覆刪除
  25. 點解會唔交換電話號碼就見面架?真係憑衣著就認到?可能要以紅玫瑰做信物先得喎。

    回覆刪除
  26. 水簇.....

    痴線少少囉。其實我以局外人身份呢,我唔會理人乜乜架,但最好就咪....拖其他人落水之嘛。

    某程度上,水簇女,除左真係煩左少少,同顛左少少,只要唔好一日 N 個電話,都唔係咁難頂 。

    唉.......好多嘢既.....


    PS : 我地講緊攪生意既嘢喎。其他人唔明係應該既。 thank you.

    回覆刪除
  27. 好!一個鐘頭多D就有25個留言。離150不遠矣。

    回覆刪除
  28. 我正是投了馬上風的。哈哈。果然深得我心。

    回覆刪除
  29. 邊種club先,有無小姐坐台架。而家好齋喎。

    回覆刪除
  30. 孖瑩

    上回講到Athena唔俾tel.no
    handsome, 因為她老公唔鐘意!

    陌生人憑衣著相認
    好剌激架!
    妳都試吓啦!

    回覆刪除
  31. eric
    「邊種club先,有無小姐坐台架」
    我哋位紅牌小姐:soso
    今晚請假
    唔見人
    sorry~~~

    回覆刪除
  32. 大文
    「我地講緊攪水簇生意既嘢喎」

    係揾水魚同繁殖海龜蛋

    回覆刪除
  33. Jessie

    多謝!下集仲緊張!
    (街頭小販都係賣花讚花香)
    埋嚟睇,埋嚟揀!

    回覆刪除
  34. 除非著得好特別既啫,如果唔係好易認錯人架喎,到時真係尷尬死。

    呢d咁刺激既野唔係咁岩我,我寧願玩多幾轉過山車。

    回覆刪除
  35. 陌生人靠衣著相認真係幾刺激...


    一見唔對路.....即扮唔知唔知,走人也。

    回覆刪除
  36. 各方好友

    阿淑芳啱啱入嚟叫我瞓啦
    明天再嗲過
    good night

    回覆刪除
  37. [ 阿淑芳啱啱入嚟叫我瞓啦 ...]


    你自己爆架咋 ~~~~~~~~

    回覆刪除
  38. 我都lunch time蛇完王,要做野啦。今日又要殺生啦唉。

    回覆刪除
  39. Eric,

    殺咩? 白老鼠? 夜光嗰D??!! 綠色發光嗰D??!!

    回覆刪除
  40. Carson,

    阿淑芳啱啱入嚟叫你瞓?? 哈咁都得?

    回覆刪除
  41. 博客,可以透過佢地寫既文章,知道其為人,我諗,唔會寫一套做一套呀,邊可以成日扮野講大話呢。兩年裡,我見過幾個博友,分别住係巴黎、英國、香港,都變成朋友了,我相信自已既直覺、同埋人與人之間既緣份。

    雅典娜同Handsome第一次約會就失敗,會唔會係一個報局?

    回覆刪除
  42. *sigh* forgot to mention that my mom's name is actually 淑芳. 今次那我妈来写故事, 真的不知道该怎么说.....

    回覆刪除
  43. 愈來愈同我嘅 style 唔似,未爛晒,就唔好出去偷食;爛晒,就心安理得地出去明食!

    睇落又好似個傻佬比人玩緊喎!

    回覆刪除
  44. 孖螢

    「呢d咁刺激既野唔係咁岩我」
    吓!後生女
    攞啲冒險精神出嚟至得架!
    叔叔我..都唔驚囉, 嚟!瑩妹妹

    我們相約見面啦
    我會穿潛水衣孭水肺
    今晚企喺銅鑼灣sogo門口等妳
    我好易認啫
    今晚見

    回覆刪除
  45. Eric,

    原來你係「光子力研究所」的博士
    失敬!失敬!

    可唔可以將我變成hulk呀?
    我想慳番啲健身錢

    回覆刪除
  46. 好過癮!

    卡兄呢個故仔, 怕且有一成以上係真箇喎!?

    熱切期待《紀漢醇 03》!!

    回覆刪除
  47. desertfox

    吓?伯母咁橋叫淑芳呀?
    咁世伯唔會咁橋叫漢醇啩?

    最衰故事一早寫好
    已成定局
    如果唔係, 寫淑芳勁啲!
    生個仔叫沙漠狐
    讀完博士仲....

    回覆刪除
  48. 巴黎旅客

    冤枉呀!冤枉呀!
    係上集, 大家話如果我認咗係handsome
    就會提高睇小說的過癮程度
    我咪屈打成招囉!
    妳明察秋毫呀!

    係咪一個佈局?
    無鍺!
    睇我小說嘅人都墜入我的騙局
    呃咗你地啲寶貴時間嘛!

    回覆刪除
  49. 渣sir

    鬼馬呀你!!
    難道你的女朋友有個「娜」字?
    搞到你要....心照啦!

    下集唔揼波鐘,
    anthena一定蒲頭!
    信我!

    回覆刪除
  50. laulong

    「睇落又好似個傻佬比人玩緊喎!」
    唉~ 既然大家將我投射為handsome
    一於寫handsome俾人玩
    咁大家都睇得開心啲呀!

    回覆刪除
  51. 我其實係屠場做,係屠夫黎架。哈哈。

    回覆刪除
  52. ERIC
    你係屠夫黎架?
    ...先間後撒果隻?
    加國有多單連環謀殺案....

    回覆刪除
  53. 卡臣:

    第三次題外話:

    萬歷十五年有人飲咖啡同用手電嘅咩?:O

    Daniel.

    回覆刪除
  54. 卡臣兄:

    你希望用什麼方式離開呢個世界?

    要睇自己現在是甚麼年紀呢:)

    現在?為國捐軀

    40年後?睡夢中心臟病死

    Daniel.

    回覆刪除
  55. Daniel

    「萬歷十五年有人飲咖啡同用手電嘅咩?」
    哼~~何止咁簡單?
    仲陸續有嚟添呀!
    3日後又換相

    回覆刪除
  56. daniel

    現在?為國捐軀

    40年後?睡夢中心臟病死

    60年後,馬上風

    回覆刪除
  57. 唔理係咪巧合,呢個世界就係咁,有時D野真係timing問題.

    timing timing timing...

    回覆刪除
  58. 好啦,既然卡叔叔你盛意拳拳,我就唯有應邀相見啦。咦,你以海上裝束出現,我又使唔使著返件bikini黎襯返你呢。

    嘩,小心比阿淑芳睇到呀,我唔想搞到你妻離子散喎。

    回覆刪除
  59. MONA
    做乜感觸呀?
    timing問題?
    係咪約男朋友去街
    佢突然肚痛呀?
    可能係真嘅呢@@*

    回覆刪除
  60. 孖瑩

    難得妳咁賞面
    妳着bikin企喺SOGO危險呀!

    妳一於改穿LOLITTA!
    正~~~

    回覆刪除
  61. :(
    卡臣~你真係有d哥哥叔叔feel呀~~哈哈!
    in a good way ge..感覺好親切~

    哈哈..冇相干,因我現為single mode.不過..發現原來你會用呢d屎橋既~

    回覆刪除
  62. 真係慘,我諗我又估到故事大綱了...
    Handsome唔好得罪我,啍!如果唔係爆你大鍋。

    又:咪玩我啦!騎馬係唔會中風架,我騎馬總叻過打高爾夫。

    回覆刪除
  63. mona

    「因我現為single mode」
    嘩!不得了!
    妳咁講就手尾長啦,

    em.....em.....我有多張東成戲院嘅戲飛,
    唔知妳有無興趣一齊去睇呢.....

    回覆刪除
  64. HANA

    妳挑通眼眉
    梗係估到啦

    為存厚道
    妳姑且忍忍口
    不勝感激!

    「我騎馬總叻過打高爾夫。」
    好嘢!
    我只係試過減肥騎馬機咋!

    回覆刪除
  65. 萬曆十五年,即1587年,其實那時候係Ethiopia巳經有人飲咖啡,不過到咗17世紀先係歐洲廣泛發揚光大。
    唔通卡先生係「萬曆十五年」其中一個人物?請問,你係忠、抑或奸?
    唉我係到譯緊L記嘅市塲調查discussion,突然覺得佢地好儍。於是走過嚟卡先生這裡透透氣。

    回覆刪除
  66. >為存厚道妳姑且忍忍口不勝感激!
    慘慘!
    我...我唔厚道架喎!

    回覆刪除
  67. 巴黎旅客

    喺「萬曆十五年」舞台劇裡,
    我撈到一角三四線的閒角:深山大野人,
    行行企企咁
    即係活動佈景板

    「唉我係到譯緊L記嘅市塲調查discussion,突然覺得佢地好儍」
    走過嚟呢度都好架
    等妳知道呢個世界有人仲傻!
    低處未見低!

    回覆刪除
  68. Hana

    收買你? 咪玩啦!
    妳全身衣著金碼加埋
    已經可以去買樓落訂
    我邊有資格收買你?

    唯今之計
    我通宵將餘下8集寫過
    講男女主角乘麗星郵輪
    遇上titanic式災難
    最後遭外星人拯救....

    下集改叫《You 斟,I 針》
    各位留意

    回覆刪除
  69. 各方好友

    大文嘅新作【巧手.上集】
    已經上架

    嘩!個女主角好靚

    速看!

    回覆刪除
  70. 香港男女好多屎橋,和歐洲人or even大陸人不同吧,他們比較"鐘意就鐘意,唔鐘意就唔鐘意",係唔係都上左先講.其實香港人幾好,較保守.Handsome連婚外情都諗到咁清楚.

    回覆刪除
  71. 小妮

    「Handsome連婚外情都諗到咁清楚.」
    其實佢諗緊點樣可以見到athena先講.

    因為網上之特點是”not real/hidden"
    唔似我見到女同事, 心思思
    因為成個真女人放喺面前

    handsome仲係find out階段
    如果係靚女先搞婚外情
    如果唔靚就宣佈:我仍然愛淑芳

    回覆刪除
  72. 我唸,歐洲人...都唔駛仲要靠 msn 去溝仔 / 女...呱。

    我直覺上係覺得,係香港人至會囉。

    大陸都唔係好駛靠呢樣嘢呱....?



    PS : 多謝 promote 在下之一毫子小說。

    回覆刪除
  73. 大文

    點解香港人靠msn呢?
    唔鐘意出街消費?
    同一時間可以同幾個人chat?
    樣醜避重就輕?
    唔喜歡face to face溝通?

    你啲唔係一毫子小說
    係「一球錢小說」至真

    邪牌愛差人!

    回覆刪除
  74. Carson:
    "如果係靚女先搞婚外情
    如果唔靚就宣佈:我仍然愛淑芳"

    Good point..

    正如女人想,"有事業有一技之長搵食,當然可以consider做人世. 冇事業?????? 我地只適合做普通朋友.很普通的朋友"

    回覆刪除
  75. 卡:

    我果啲係【一舊屎】小說而已。

    講番,香港人唔少用 msn 去溝仔 / 女,你講得對,其中一個原因,係後生果班,溝通能力、表達能力不佳,你見佢地用好多火星文就知喇。

    連佢地自己都唔係好知自己想講乜既。

    又,msn 唔見樣,咪當冒險囉,我明白佢地o靚仔o靚妹,其實唔係要求遇上郎才女貌,只係想【識 friend 】,搵下伴而已,有不少例子,係樣麻麻的女,和茂利男,都可以走在一起。

    所以 msn 有佢既價值。

    你試唸下,莫講話o靚仔o靚妹,其實,好似我地呢類 3x 既在職人士,你話好易識女 / 識仔 又得,但話好難又得。

    無厘頭去識,點識呢? 唔通隨街識咩,無可能。

    舊同事、舊同學出嚟囉,有機會,但一時時咋喎,都係來來去去果一班,唔合眼緣既,又怕大家太熟,唔係幾方便。

    msn 有優點。 同樣, Blogger 都係,例如見一啲寫得較好的 blog ,直覺上會認為【 條友 / 條女】唔衰得去邊,起碼壞人既機會少好多,會放心。

    唸下?

    回覆刪除
  76. 補充:

    我果個小說,唔係講【邪牌愛差人】,因為再寫呢啲,講真啦,已經爛到無倫喇。

    果啲乜乜 純純的愛 、可歌可泣眼淚 love story 、正邪難分界、有錢女愛窮才子、乜乜暗戀乜乜七.....而家唔得喇,真係唔得。寫都嫌費事,睇都眼冤。


    我仲想講少少,關於 msn 呢,其實玩 msn 既人,都多屬常客,即係好識玩既人,通常都唔會未通過電話就出嚟,老實講,玩 msn 溝人既,唔會係【老實 3x 男 + 少女情懷】架囉。

    擺明係出嚟玩囉,都係知手續,起碼都要知道對方大約年紀,講電話都 OK 傾到計,至會出嚟既。

    否則,你點知對方唔係同性?真係大家呃大家咋喎,係咪?

    回覆刪除
  77. 小妮
    "有事業有一技之長搵食,當然可以consider做人世. 冇事業? 我地只適合做很普通的朋友"

    Good point..

    正如我之前問了一條愚蠢問題:
    「點解model咁保守?」
    原來model見你有$又靚仔,咪開放啲
    model見你有窮又醜樣,咪保守啲

    我是後者, 嗚~嗚~

    回覆刪除
  78. 大文

    說得甚對!

    最勁有共鳴--->「好似我地呢類 3x 既在職人士,你話好易識女 / 識仔 又得,但話好難又得。」

    我的社交圈子隨年齡增長而縮小
    同事,朋友的朋友

    我又唔係教友,義工,唔落disco(年紀太大)
    真係快變公園阿伯

    我的msn朋友都是我認識的
    方便約朋友去街, 吹吓水
    溝女....未試過

    回覆刪除
  79. 今時今日係咪single mode都可能唔重要了~睇下handsome guy就知~嘿嘿

    三、四日先有下一篇,真係頸都長!

    回覆刪除
  80. 大文
    我有時留言果陣
    神經刀,抽起條筋
    諗起乜就寫乜

    【邪牌愛差人】其實係我腦裡突然平衡聯想,
    跟【巧手】無直接關係.
    sorry!
    引起不必要的誤會

    msn...等待心儀對象login in
    好興奮架
    當然,果晚佢無login in
    就很失望

    回覆刪除
  81. Carson / Diamond - 你們可以上大陸,香港男人會很受歡迎的. 正如中國女生到歐洲一樣,在法國,意大利,只要女的是亞洲人,一定有男士主動讚她漂亮.又不是有什麼下聞,被讚漂亮的感覺多好.

    香港男士很會搵錢,而且有責任感,但始終不會像歐洲人般懂得令女人感到飄飄然(except those who eat soft rice).正如香港女人很努力為頭家,但不會溫柔.

    各有不同的優點.歐洲是個"渡假"的好地方.香港是個"生活"的好地方.

    回覆刪除
  82. mona

    「三、四日先有下一篇,真係頸都長!」
    無計啦
    我每月十篇
    真係要3,4 day 一篇架

    妳試吓去foxy search 吓
    可能有第三集啦

    補充:
    東成戲院,在灣仔區,已清拆
    曾經傳聞鬧鬼~~~

    回覆刪除
  83. 很多日本, 台灣妹"渡假"自己一個或有兩三個女性朋友去歐洲,話進修relax吓.回國就和日本仔台灣仔建設家庭...其實男女都是一樣... :p

    回覆刪除
  84. 痴線既你都, sorry 乜嘢,你估我成日唸埋一邊架咩,阿 Sir 。

    我都係根據市面上,真係好似好多小說,但得個擺字喎大佬,有好多小說,乜人都寫,但唔好睇,有要求既人唔會睇、但文字不佳既現代少年,又睇見咁多字都頭暈,因此我講下而已。

    愛情小說,好易寫又得,求其又可以,但要寫得真係好睇,非常難。

    今時今日係 Visual World ,係【視像官能時代】,如果係老土既愛情小品,你用來拍電影或劇集,反而 OK 喎,因為可以用女主角靚女 + 男角,來補足。

    好多日劇其實條橋都可以話叫做三毫子一擔,只係:鏡位 Short 、燈光氣氛、男女主角演技好、主題曲有 Feel 、綜合起來,咪好睇囉。


    但用純文字....大佬,其實係好難度高,要由一堆字、段落、去營造【文字上的張力】,講就易,做好難的。

    我可以幾乎肯定,而家少左好多人睇金傭,喂,唸下, 電影 Visual Effect ,好過你金傭萬字小說喎,係咪?

    就算衛斯理,以前覺得好科幻,但一到電影 Computer Effect ,乜都有,話之衛斯理,都唔夠一套 Star War 咁精彩啦。

    所以而家用文字做銷路,好難好難。

    回覆刪除
  85. 妳試吓去foxy search 吓
    可能有第三集啦

    ><我。。。完全唔知foxy係乜東東。

    補充:
    東成戲院,在灣仔區,已清拆
    曾經傳聞鬧鬼~~~

    嘿~我都估到係D唔係度的戲院了,皆因見到你之前話拎水X電話去整,又去皇后碼頭,又睇羅文演唱會。。。
    你一定一定一定唔好講話我同去睇戲,如果唔係....................

    回覆刪除
  86. 卡:

    最勁有共鳴--->「好似我地呢類 3x 既在職人士,你話好易識女 / 識仔 又得,但話好難又得。」


    *********

    你知嗎,就係因為我唔係以好 Personal 情感去寫港男港女,我係夾雜左類似新聞分析角度,所以我唔會好似市面上的只罵港女,乜乜港女九十宗罪、乜乜港女眼角高、港男好慘,無用既,問題根本唔係呢度!

    係曲解左。


    講番,我地呢類 3x 歲,話【少年】當然唔係,但老又有排都未算,係咪?

    一般嚟講,總有些少事業、有多少 $$$ 在銀行,營養好、企理、甚至有層普通但 OK Fine 的樓, right ?

    不過,如果要話溝女,唔要 LKF wet 妹
    、唔要 one night stand 女玩家、唔要幾丫歲中女.....要識 2x 歲 / 3字頭、同自己差唔多 Quali 既女人,點識呢?


    你唸下?點識先? 舊同事,未必有聯絡喎;舊同事一班人出嚟 friend 帶 friend ? 好多樣醜喎! 咁...點好呢?


    仲有最重要係,好多 3 字頭或 2 到尾既 HK Gal ,一見面即同你計數:

    你有無樓,咩樓?

    咩學歷,大學 OK good,但邊間 U 先?

    有事業,邊行先? 係咪寫字樓先?

    一切都 o k ,睇下你 ( 男 ) 有無情趣、品味、悶唔悶、你要有 fun 但低調、低調得來又要有 taste ,有 taste 得來又要 【行出嚟有款】。


    你話呢?問心丫,有無呢類人,有! 不過通常都有女伴喇、或好多女添。

    咁有咩渠道去識女仔,而係識啲好女仔?


    唔係無方法既,難啲囉,實有可能架。

    唸下我所講的?

    回覆刪除
  87. 小妮

    返大陸?
    正喎!
    我要去大西北開發呀!

    我而家知點解鬼佬愛賓妹啦!

    回覆刪除
  88. 嘩,半日無黎又多幾十個留言,卡叔叔真係勁。

    拿,點既先,而家結局係咪講男女主角遇難後比外星人拯救,最後同左外星人做friend先,玩科幻橋?
    (咦?究竟女主角係淑芳,定係雅典娜呢。)

    回覆刪除
  89. MONA

    「你一定一定一定唔好講話我同去睇戲,如果唔係....................鬼節就快到,一齊去燒街衣囉!」

    回覆刪除
  90. 小妮:

    妳話香港男士好識搵錢,但情感上不懂浪漫。

    係無辦法的,也很理所當然,為何我這樣說?


    你唸下香港係靠乜嘢?係靠【金股匯樓 + 識撈醒字派 + 華洋買辦貿易 + 肯捱】的,你唸下,同【浪漫情懷】,風馬牛不相及的。


    怎能期望住屋丁方四百呎、每月供樓萬九幾蚊、一日做 十九幾 hours 或以上、仲要時刻懂得大市動態既男人,會有咁 Q 得閒真係坐定定同妳聽 肅邦 + 莫扎特、或有閒情去品評一下【看!日落是多麼的美麗呵,好詩意囉】咁呢?

    日落都無得你睇啦,咁多屏風樓,係咪?


    你知唔知,如果香港 made in HK 有條友,竟然真係咁詩情畫意,會好慘,會俾人話【不務正業、不學無術、電車男、無出息、亞女呢啲男仔餓死老婆架】,咁架嘛。

    回覆刪除
  91. diamond

    「你要有 fun 但低調、低調得來又要有 taste ,有 taste 得來又要 【行出嚟有款】。」<------金句!!!


    「你有無樓,咩樓?咩學歷,大學 OK good,但邊間 U 先?有事業,邊行先? 係咪寫字樓先?」<---勁真實!!!

    有道理!
    唔係做老公, 就算做朋友都要被人scan一番

    唔俾人拒絕, 方法就是先拒絕別人
    我...懷疑自己好似患咗社交恐懼症

    回覆刪除
  92. 老實講丫,而家 HK 男上大陸,唔係講到咁吃香架,只有鄉下妹至會要垃圾男的。

    有少少質素、讀過下書既大陸女,都會好識揀男仔既,話之你香港男,唔係大晒。

    所以,現在好多上大陸娶老婆既,不少係有良好職業、有多少 $$$ 既正常 HK 青年,只有九十年代初至中期既垃圾窮老男,至娶少妻住天水圍。

    唔好太信古惑社工或八婆婦團吹水,佢地成日講到【北上娶妻 = 家庭悲劇】,梗係啦,綜緩 Case 係社工既飯碗嚟嘛。

    回覆刪除
  93. 「你要有 fun 但低調、低調得來又要有 taste ,有 taste 得來又要 【行出嚟有款】。」


    係由我手寫出嚟,但唔係我自己唸架。

    係由不同有大學學歷、但樣又未算靚、職位麻麻地、乜都麻麻既 HK Gal ,綜合而成架。


    有根據架,老細!

    回覆刪除
  94. 我同你講,Sir ~ 你地班 HK Man 係唔好彩 。


    係咪有廢男 : Yes 係有。

    係咪有餓男見女就 Yeah : 係,無錯。

    不過,就算你好仔人一個,都唔代表你就會受女士歡迎。

    **********


    你有料但唔夠含蓄: fail!

    你有樓但二手 OK ,但唔係大屋宛:fail!

    有大學 degree ,下? cheap U : Fail !

    HK U , good ,下?唔係外國返嚟架: 又 Fail !

    你工作忙,甩少少頭髮 ( 但高薪厚職) : Fail !醜女都會 buy 你既或者。


    女仔成日話男仔打機係廢柴表現,但如果男仔話自己【好憎打機】: Sorry ! Fail !


    點解? 因為你唔夠技巧,你要【我好憎乜乜,但要好曲線咁表露,唔可以直接講】,咁既。

    回覆刪除
  95. 咁快又過100呢個心理關口啦。

    睇完D留言,成個人灰晒囉。。。

    回覆刪除
  96. 卡臣兄:

    昨夜我在大文兄的巧手中問了一個問題,可能他不明白而delete了.

    問題如下:

    Anna是清插?還是渾插(提示:天下無賊的海報)?

    Daniel.

    回覆刪除
  97. 大文 / eric

    早晨!

    睇完大文果個HK Gal check list
    真係要寫個「服」字!

    男士好似工廠啲塑膠玩具
    被QC過品質驗證
    剩下的好貨
    聊聊無幾

    唔怪得ERIC咁灰
    你留喺加拿大算啦
    等我留喺呢度到最後一分鐘
    (因我走唔到啫)

    回覆刪除
  98. Daniel

    「Anna是清插?還是渾插」
    我估係獨行扖手,定係需要parter扖手啩?

    對於1990年出生的我
    唔係好知文雀啲術語

    回覆刪除
  99. 容我婆仔啲問句:

    soso
    妳係咪公司又有麻煩嘢?
    就快周末,會好啲!

    回覆刪除
  100. 卡臣兄:

    是問徒手還是用工具,嘻!:P

    Daniel.

    回覆刪除
  101. Carson - 香港女人其實都幾黑人憎.不單對男人,對女人也如是.好似X-ray眼scan你著咩衫,拿咩袋,又想知你住係邊,層樓供定租,為什麼你不結婚,結婚為什麼又不生仔,為什麼你老公長期係大陸,係咪又...

    我心想,"小姐,我其實唔想同你成為一家人..."

    可能是我們的教育問題,事事要認叻,做第一.但這樣的教育只會殺死人.

    回覆刪除
  102. 卡の Zen :

    人地 soso 唔係公司有麻煩嘢,係同...QC 仔....忙啲囉,咁,人地事務上忙嘛!

    好忙下架,要【業務發展】 架嘛。仲問...!

    回覆刪除
  103. 小妮:

    妳講呢種【香港女人乞人憎】,雖則大家明白並非每個 HK Gal 都如是,但好極端,一係就 nice 、一係就非常乞人憎白鴿眼。


    這有【寫字樓聖殿】文化裡,尤其顯著。

    回覆刪除
  104. daniel

    原來清插同渾插咁解
    對於後生的我來說, 真是大開眼界

    回覆刪除
  105. 大文

    哦!明白!

    素素同qc仔【業務發展】緊
    希望佢地公司加人
    一年一件咁

    回覆刪除
  106. 嘩第112個回應!
    卡卡(唔係踢波嗰個)說:
    「你有無樓,咩樓?咩學歷,大學 OK good,但邊間 U 先?有事業,邊行先? 係咪寫字樓先?」
    唔係個個禁現實勢利呀?

    其實,乜野環境就培育乜野人。試問在香港地,人擠車多,係銅鑼灣拍拖,有何浪漫可言?相反如果係法國,係風景如畫的塞納河沿岸漫步,如果對方唔係太醜樣、唔係太悶蛋,此情此景,眞係好容易墜入愛河!

    回覆刪除
  107. 不過,墜入愛河的香港男人會變得浪漫、細心、詩意、温情似水、總之,愛情魔力無窮,可以改變一個人。只是,這些浪漫日子,會隨着結婚後,漸漸消逝....

    回覆刪除
  108. 巴黎旅客

    「相反如果係法國,係風景如畫的塞納河沿岸漫步,...眞係好容易墜入愛河!」

    咁香港有Delifrance同城門河,
    可否將就一吓呀?

    「這些浪漫日子,會隨着結婚後,漸漸消逝....」<-----呀!要心要肺呀!
    妳點解可以咁準架?!

    回覆刪除
  109. NOST

    其實雅典那係男人<----你真係去foxy search到大結局呀?!

    soso

    妳終於再出現啦!
    我放心~~

    回覆刪除
  110. 燒衣都唔得.......
    你去皇后碼頭,又用大哥大,又睇羅文演唱會.同得你出街我咪會..................

    回覆刪除
  111. mona

    咁下次先啦!

    我而家去荔園玩
    之後去卜公碼頭
    返屋企睇歡樂今宵

    回覆刪除
  112. 喂,卡!

    有無睇今日天天日報呀,恆生指數突破左 1700 點喇!

    港督【麥理浩】聽日有宣布喎!



    幻海奇情之 : ~~~~~~~~~~

    日.......

    報.......



    醫生:陳大文! 返房訓啦!又唔食藥!

    回覆刪除
  113. 喂!文

    我原本買咗飛去珠江戲院睇《白毛女》
    點知今朝起身, 狂風大雨
    收音機話溫黛打到嚟!

    唔講住, 我屋頂漏水呀,

    回覆刪除
  114. 無呀,無落雨呀,你喺吉隆坡有雨咩?

    我而家係美國【衫番蝕士高】,都好好太陽呢。

    Sorry ,我約左..A,睇李小龍新戲呀。

    回覆刪除
  115. 阿MAN

    吓!吓!吓!

    你約咗A......


    你約咗名模Amanda S.呀!

    真係聽到都戥你興奮!

    特別消息

    黑雨警報,已於早上....

    更正: 紀漢醇03 今晚2345
    風雨不改

    回覆刪除
  116. 唔係 Amanda .S ,果個已經甩左喇。

    而家係 Anna. R 。





    醫生: Secure 唔該,幫呢個人打口針,好嚴重,有危險性,又用醫生房電腦玩 blog 喇。

    回覆刪除
  117. 護士: 醫生,等陣,呢個擬似病人真係識得Anna R!不如等佢叫咗Anna R嚟, 先同佢打懵仔針,

    醫生:仲唔快啲call!!

    回覆刪除
  118. 醫生,呢度有兩個自言自語又有嚴重幻覺既病人,影響到其他院友,我地應該點做?

    唔....將佢地綁起來做電擊治療,之後隔離一下再觀察。

    回覆刪除
  119. 醫生,呢度有三個嚴重思覺失調既病人,喺度玩口水同賴屎,我地應該點做?

    唔....呢三條友, 唔死都冇用,同我準備同佢地進行安樂死,

    快! 快!

    回覆刪除
  120. 我認真地提議、建議,不如卡臣喇埋陳大文,開番塲幻海奇情洞篤笑,包保座無虛席(首演塲館係卡或文家裡)。又或者,一齊寫劇本,拍番套 好笑、諷刺、生鬼、益智、嘅好片,進軍康城!
    再認真問兩位,你地,會唔會係失散多年嘅表兄弟?
    外面D雨暫時停落黎,我要揾番50年代個對紅色水靴出嚟著,今晚有個懷舊party!

    回覆刪除
  121. 醫生醫生,不得了呀,呢三位病人,唔知點解,我地D護士一行埋去,佢地就又嘔又賴晒屎,神志不清咁猛話,唔好行埋黎呀,我好驚你地呢D白衣天使。。。

    回覆刪除
  122. 巴黎:

    [ 不如卡臣喇埋陳大文,開番塲幻海奇情洞篤笑...]...?


    唔係呱,咪玩啦,開左好耐啦! 1975 年果時,李小龍都有嚟捧場架。( 但李小龍 1973已經死左喇喎 )

    其實我地係一班隱形富豪嚟既,玩世不恭,七個一皮、亂咁嚟架嘛。

    我地啲網誌都唔係我地寫喎,請人寫架嘛,秘書囉!

    你睇下卡兄佢呢,成日扮乞兒,體驗生活嘛,佢o岩o岩至放左架遊艇,唸住買波音飛機 Model -767 玩下囉,放飛機好玩架。

    我呢,我啲網誌,其實係騙局嚟嘛,大佬我小學畢業,炒【他媽哥池】電子寵物起家既,同人講就乜乜新聞【蟲葉圓】,講咋!係我既心理發洩咋。



    醫生:阿陳生,不如咁啦,你叫叫你屋企人嚟探下你,開解下你啦,你又唔食藥,咁唔得架,成日攪啲護士,中女喇你都啱.....

    回覆刪除
  123. 巴黎旅客

    我同大文自1975年後重組回歸
    好似軟硬咁開show

    於紅館隔離紅磡波地搭棚開鑼鼓
    我卡神做嘅戲叫「神功戲」俾靈界睇
    免費入場,請備香

    無錯,我啱啱放咗隻遊艇.
    隻遊艇係大文燒俾我
    我仲想要一部ipod,ironman咁.
    燒俾我呀

    巴黎旅客,除咗妳對紅色水靴,我估妳細個果陣, 電視機頂必有一座巴黎鐵塔擺設
    記得攞埋出嚟

    回覆刪除
  124. 差人呀差人,不得了呀,
    有個叫Eric嘅擬似醫生,
    唔知點解,拐走哂我地全院啲白衣天使走人,

    不過你唔使追啦,我地好行夾唔送,
    仲要去慶祝添,阿sir,一齊吖!

    回覆刪除
  125. 喂!

    你知唔知! 真事! 10000% Real !

    I-book 出左【紙扎】架!!!!

    仲有【紙製】既藍牙配件架!!!!!!

    回覆刪除
  126. 我放學多數由彌敦道轉入柯士甸道返金巴利道屋企。柯士甸路有個小公厠,给的士阿哥方便。http://hk.myblog.yahoo.com/jetaime-toujours/article?mid=4630

    回覆刪除
  127. 其實呢段係回應纪漢醇-03,唔知點解會走咗嚟呢度?????

    回覆刪除

LinkWithin

Blog Widget by LinkWithin