~~~~~~~~~~~~~~~~







2007年8月17日 星期五

* 電視劇對白

電視劇對白

近年來本地拍攝的電視劇,
起用同一班演員,
用不同的角色名字,
去演同樣的情節和講同樣的對白。
就像車仔麵的餸料,
自由配搭出看似不一樣,
但其實差不多面口的車仔麵。
無論制服專業系列、家族系列、
辦公室系列、魔幻古裝系列、
都有愛情、死人、煽情、復仇情節。
肥皂劇對白萬變不離其宗,
數一數其中十大常用對白:


第十位
「你哋唔好嘈啦!」

劇情一定會安排有爭吵,
無論夫婦間、情侶間、兄弟朋友同事之間爭吵,
或因為一些意外、難題而互相指責埋怨,
這時候一位較具份量的人見狀,
就會大聲說:「你哋唔好嘈啦!」
通常都會奏效,
然後再分配工作各人行事,
例如誰人去報警誰人去找醫生等,
大家收聲後跟著不歡而散。


第九位
「你聽我解釋先!」

劇情一定會安排有誤會發生,
有人製造誤會就有人需要解釋,
通常一方在逃避時,
另一方就會激動地說:「你聽我解釋先!」
結果通常會換來電話cut線、追車仆親、
兜頭一杯水、或一巴掌。


第八位
「你一定無事嘅!」

劇情會安排有人患重病甚至逝世,
場景是醫院病床,
病者躺在床上奄奄一息,
床邊人流著淚、聲音顫動地說:「你一定無事嘅!」
為了加強悲歡離合的元素(或者演員無期)而安排病者要死,
下一場就見到病者的黑白照片放在石碑上。
伴隨著香燭和哭聲。


第七位
「我哋無可能架!」

劇集中的愛情線,
除了青梅竹馬、日久生情外,
還安排身份地位懸殊、有家仇國恨的情侶邂逅,
或者面對世俗道德標準而投降;
一方就會忍痛說:「我哋無可能架!」
讓觀眾替他們的無奈感到戚戚痛,
但歷盡萬劫的情侶結局時終成眷屬。


第六位
「點解你要咁對我?」

無論親情、愛情、或友情,
只要其中一方做了傷害對方的事情,
受害的一方就會問:「點解你要咁對我?」
除了向人質問之外,
這句對白亦適合主角對天狂嗌!
當主角受到命運作弄之後,
大聲問個天:「點解要咁對我?」
當然連編劇也解答不到這條問題!


第五位
「大家都係女人」

女人在生活中面對家庭壓力、感情糾紛、心理問題,
女人之間當然明白女人之苦。
這句對白指:大家(女性)都是過來人,
不用明言亦心照不宣!
其實這句對白的真正對象(受眾Receiver),
不是劇中對手,
而是電視機旁邊的女性觀眾,
台上台下馬上產生女性集體共鳴。
從此集集追看下去!


第四位
「唔食啦!我返房先」
當一家人在開飯時,
其中一名家庭成員表示不滿,
或者失戀、被炒、情緒低落,
便會無胃口說:「唔食啦!我返房先!」
如果是有錢家庭,
就會說:「唔食啦!我返上房先!」
留意:「返上房先」表示他的住宅至少有兩層或以上。
隨即跟著一聲大力砰門聲!


第三位
「我會離開香港」

劇中的男女主角要分開,
無論是被逼、自願、逃避、尋夢、或者放逐自己,
都想引發起觀眾自己的一些離別經驗回憶。
而另一方會答:「我聽日唔去機場送你機,我驚我會喊!」
而最後當主角臨入閘時都會調轉頭,
駁鏡街頭奔跑及最後傻笑擁抱!
其實觀眾都預咗佢走唔成,益咗航空公司。


第二位
「你走咗就唔好再返嚟!」

少年為了理想或鬥氣要離家出走,
父母就會話:「你走咗就唔好再返嚟!」。
太太要離婚拾行李,
丈夫就會話:「你走咗就唔好再返嚟!」
而呢一句通常會跟「你試吓行出呢個門口」一起使用,
但這句話通常收不到阻嚇作用,
主角一定更堅決地頭也不回大步走,
並換來一下大力的砰門聲!
木搭的佈景牆馬上搖晃。


第一位
「就當我無生過呢個仔!」

劇中最Powerful的一句!
父母子女反目成仇,
最能觸動到倫理關係差的觀眾。
下一個鏡頭是父或母心臟病發作,當場倒地!
同樣地把「就當我無生過呢個仔!」變奏,
變成「就當我無識過你!」
「就當我無嫁過俾你!」
都是希望把一些已發生的事情改變。
而當觀眾花時間看了一齣難睇的電視劇,
就會對自己說:「唉~~ 就當我無睇過呢齣劇!」
亦希望你唔會覺得:「唉~~ 就當我無睇過呢篇文章!」


除了以上十大位置外,
其他落選對白包括:
「媽呀!妳應吓我啦!」、
「醫生,我啊爸點呀?」、
「離(婚)咪離囉!」、
「大家開開心心食飯囉!」、
「我跪喺度求你!」、
「你原諒我一次啦!」、
「你唔好講!我唔想再聽!」、
「我都係被迫!」、
「我唔想幫爹地手,我自己想闖吓」、
「你唔係我,你唔會明架啦!」、
「我係過來人又點會唔明吖!?」等等。
穿插在劇中角色的嘴巴中!

14 則留言:

  1. 無話可說 ... 因已經笑死:)"就當我無睇過呢篇文章!"

    還有:

    1. 第九位「你聽我解釋先!」:
    - 報串的第3者通常會在旁或隱蔽地方得逞地陰笑

    2. 第七位「我哋無可能架!」
    - 他們9成9是一開始時是亙憎或窒對方

    3. 第四位「唔食啦!我返房先」
    - 或奪門而出坐公園, 通常是有"千秋"那種.或去皇后碼頭(而家無咗)坐樓梯,或坐夜晚無人電車樓上的窗口位.

    4. 第三位「我會離開香港」:
    - 男或女會神秘地買到機票突然坐在他/她身旁

    5. 通常會有一幕男或女主角幫對方在臭氣沖天的垃圾桶尋找重要物件,深受感動.

    6. lift門開關之際偶遇朝思暮想的人,四目相投,一方或雙方說:"這樣巧"

    如是伴著我們長大的電視劇 ...

    回覆刪除
  2. 多謝提供!
    情節還有:

    男方千辛萬苦找到絕版東西給女方,
    男方接女方下班時才知道自己有情敵,
    surprise生日派對
    所有專業,醫生, 律師, 機師放工皆蒲吧
    家庭未發蹟出早餐吃白粥油炸鬼, 發蹟後早餐吃腸仔蛋

    回覆刪除
  3. 有空看看我的中學朋友的blog啦!http://youthin20thcentury.blogspot.com/
    我覺得他們寫得蠻不錯的!

    回覆刪除
  4. S,
    嘩果然好介紹
    5位都好堅,
    又學到嘢啦

    回覆刪除
  5. finally see your "real person" saying the dialogues in your "HK TV" show la

    回覆刪除
  6. 用車仔麵形容,好貼切

    唔知睇過邊套戲,用個中藥櫃入住D劇情,跟住執藥咁執

    回覆刪除
  7. I.minor

    《情牽百子櫃》(A Herbalist Affair)是香港無綫電視翡翠台的時裝劇集,於2002年3月11日首播,共20集。監製林志華。主題曲《苦口良藥》由許志安、陳慧珊主唱。此劇於2006年4月重播。...from 維基百科

    8年前囉

    回覆刪除

LinkWithin

Blog Widget by LinkWithin