卡拉OK

卡拉OK

佳節生日送行洗塵祝捷慶功升職離職等聯誼活動，
都會在卡拉OK內進行。
數一數在卡拉OK內，
除了顧客的歌聲外，最常聽到的十句說話：

第十位：「房間冧巴係…」
有朋友遲到，由其他朋友先攞房，
再call朋友：「喂！房間冧巴係106號！」
「我 – 話 – 係 – 1 – 0 – 6 – 號 – 房！」（因為房內太嘈吵）
再補多一句：「而家去到邊？快啲到呀！」

第九位：「今日做緊特價，攞半打先吖！」
入房坐低唔使一分鐘，
啤酒女推廣員入房sell啤酒，
「今日做緊特價，攞半打先吖！」
通常客人回覆：「有乜嘢送先？叫夠一打送埋妳電話號碼！」

第八位：「唔該換咪！」
唱兩唱發覺咪(Mic)拆聲或無聲，
按零字到服務台：「唔該換咪！」
但通常服務員進來搞兩吓，咪就正常返；
服務員一離開，咪又立即失靈。

第七位：「要MTV版定演唱會版？」
當remote落在某人手中，
其他朋友叫他順便點歌，
如果該首K歌有兩個以上的版本，
就要問：「要MTV版定演唱會版？」

第六位：「叫杯蔘茶俾佢啦！」
有酒飲的地方，就會有醉酒佬出現。
有朋友飲大咗wing吓wing吓，
就好心講句：「叫杯蔘茶俾佢啦！」
但蔘茶未到，就已經嘔到一地都係！

第五位：「每人要俾…」
唱K埋單時，某人先用信用卡結帳，
再將錢碼跟朋友平均攤分。
把房間燈光調校大，計算之後說：「每人要俾150元」，
跟着一番錢銀交收找續。

第四位：「有冇人識唱…？」
有很多新歌試唱，並非個個識唱。
當有人想試唱某一首新合唱歌時，
就要問房內其他朋友：「有冇人識唱…？」
結果冇人識唱都照點播，
最多按remote的「伴唱」掣，唔聽過唔心息！

第三位：「邊個點架？」
當電視畫面出現的K歌無人攞咪認頭，
就有人大聲問：「邊個點架？」
通常真兇去了廁所或者去取buffet食物或者醉倒，
在場人士手急眼快馬上按delete！

第二位：「Cut呀！」
當朋友以為識唱，發覺其實唔識唱、
播錯歌、播錯版本、或者唱得很難聽的時候，
就有人嗌：「Cut呀！」
或者臨埋單時爭取時間唱多幾隻歌，
就會唱到首歌未完之前，已經嗌：「Cut呀！」

第一位：「咪喺邊度？」
十幾人喺一間房，只得三支咪，
在Demand 大過Supply的經濟理論下，
大家要爭相搶咪。
有些朋友不埋男女歌都唔放過，點都要唱埋一份！
一咪在手就不想再放低！
另一方面，顧客付錢來唱K，
沒有攞咪，就等如白俾金錢，
所以大家都視咪如命。猙獰人性一面大暴露！
打牌睇牌品可知人品，
唱K睇歌品也可知人品。