* 事先張揚的大話–情侶篇

事先張揚的大話–情侶篇

繼《交友篇》及《商業篇》後，
推出最終回 -《情侶篇》：

第十位：「我遲啲得閒就同妳去吖！」
女朋友想光顧某間餐廳、某娛樂場所、或遊埠，
男朋友可能因為嫌太貴而扮忙碌，
安撫女友：「我遲啲得閒就同妳去吖！」
結果等到分手後都無去過，
變成一張未能兌現的期票。

第九位：「我諗花店忙得滯，搞錯啫！」
情人節有些女仔好想收到鮮花威吓，
但唔係個個男仔負擔得起炒到天價的鮮花。
只好向女友說謊話有訂花：「我諗花店忙得滯，搞錯啫！」
在2月15日才補送花，
但回落後的價錢，已跟2月14日的是天壤之別。

第八位：「我哋將來個BB改乜名好呢？」
情侶見到可愛BB，母性大發，
男友見狀，懶sweet說：「我哋將來個BB改乜名好呢？」
兩人最終能否成為夫妻仍是未知之數，
就算結成夫婦，他們那時候的經濟能力、身體狀況，
心理情緒、都成為生BB的關卡，
改BB個名？倒不如幫寵物改名仲實際！

第七位：「同妳父母一齊去？我點會介意！」
男朋友想二人世界，去旅行、去食Buffet，
結果女方叫埋父母一齊嚟，
男方為了大方得體，死頂說：「同妳父母一齊去？我點會介意！」
多啲人仲熱鬧，仲好玩啦！
除非男方自幼渴望重獲父愛母愛，則另作別論。

第六位：「一啲都唔肥！仲好靚添！」
女方久唔久會問男方：「我係咪肥咗？」
如果男方答肥咗，女方立即恕斥：「你嫌棄我呀？你又好好咩？」
所以男方為了息事寧人，耳根清靜，
會毫不猶豫地答：「一啲都唔肥！仲好靚添！」

第五位：「我知道你有嘢瞞住我！」
這一句通常由女方向男方使用，
失驚無神突擊問男友：「我知道你有嘢瞞住我！」
其實女方什麼也不知道，
只是用嚟check吓男友會否「鬼拍後尾寢」，作賊心虛之下自爆衰嘢！
所以男方不要誤墮這大話陷阱中，盡爆姦情。

第四位：「唔講啦！我入lift啦！」
和女友講手提電話，女友雞啄唔斷，唔肯收線。
男友為了禮貌地終止對話，
就只好對女友說：「唔講啦！我入lift啦！」
由於電梯內收不到電話訊號，被迫掛線。
實際上，男友附近邊度搵部lift吖？
（此大話不能應用於視像電話）。

第三位：「我從來都無變過！」
男女情侶嗌交，一方指控對方：「你變咗啦！」
另一方大聲反駁：「我從來都無變過！」
這句大話漏洞處處：
人點會無變？年齡、心態、情緒、
體能、興趣、愛惡、口味、立場，
每分鐘都在變化，
話：「我從來都無變過！」的人一早經已變了心，
只不過想呃得一個得一個、呃得一時得一時！

第二位：「我聽緊架！」
女朋友和男朋友煲電話粥，
女方喋喋不休說三道四，投訴每日身邊瑣碎事，
電話另一邊的男朋友無心裝載，
一邊講電話，一邊上網睇DVD又玩MSN，
女方聽男方長時間無乜反應，
女方爆一句：「你係咪聽緊我講嘢呀？」
男敷衍回答：「我聽緊架！」
女反問：「咁我講緊乜呀？」
這時候，正好考驗男士的推理能力和運氣，
靠記憶中聽到女友最後一句中的Keyword，
推敲她剛才說過什麼。

第一位：「我哋雖然分咗手，但係仲可以做朋友！」
情侶在和平氣氛提出下分手，
主動提出分手的一方，會率先講第一個大話：「妳咁好，係我襯妳唔起，希望妳好快就搵到一個比我更好更錫妳的情人！」
另一方其實都想分手，為了配合氣氛，說出第二個大話：「我哋雖然分咗手，但係仲可以做朋友！」
最後兩人可否做回普通朋友？繼續來往？還是淪為陌路人？
連男女主角兩人也沒有方法去知道答案。
所以這句大話只是一時扮酷的「貪口爽」而已！

事先張揚的大話 – 完