* 事先張揚的大話 - 商業篇

事先張揚的大話 - 商業篇

繼《交友篇》之後，今次睇吓上班一族講嘅「事先張揚的大話」：

第十位：「唔好意思，我開緊會！」
電話直銷員不停打出cold call，
推銷保險、貸款、美食、除蟲、驗身、
無論你身處K房戲院餐廳商場，或者夜半三更劈緊酒，
你都會答：「唔好意思，我開緊會！」後便立即cut線。
電話直銷員當然唔信你會忙碌得咁交關啦！

第九位：「我明明事先check好哂！點解咁架？」
當工作遇上意外狀況，
例如寄錯文件、遺失電腦file、數據錯誤，
當時人便自辯：「我明明事先check好哂！點解咁架？」
言下之意，把問題責任推向電腦出錯、被其他人陷害或鬼怪作祟。
旁人把這句自辯歸類為「死撐」或「死頂」！

第八位：「真係好啱妳喎！」
時裝店化妝品護膚品sales金句，
「Miss對鞋真係好啱妳喎！」
「呢隻面膜真係好啱妳喎！」
違背sales良心的大話唔怕講，
開到單、收到錢、就最緊要！

第七位：「阻你幾分鐘咋！」
路邊推銷員向路人推銷收費電視、
考車牌、健身、信用卡、寬頻上網，
手執宣傳單張口講：「先生，阻你幾分鐘咋！」
如果你相信的話，又肯停下來聽，
又點會只花你幾分鐘咁少？
幾十分鐘一粒鐘都有可能。

第六位：「你出面再搵唔到平過呢個價錢！」
客人同Sales討價還價，
Sales聲稱已經減無可減：「你出面再搵唔到平過呢個價錢！」
如果客人相信落踏，跟著就付款；
但世事往往就是：客人行出門口後，
轉個彎就搵到另一間更「價廉物美」。

第五位：「入一入嚟我房，傾兩句。」
老細經理喜歡臨放lunch、臨放工前的時候，
才叫staffs入房傾嘢：「入一入嚟我房，傾兩句。」
你無得選擇之下入咗去傾兩句，
結果嗰兩句一講就講咗成個鐘都未返得出嚟！
剝削lunch時間、變相OT！

第四位：「我哋嘅客戶服務主任好快會接聽你嘅電話。」
電話投訴熱線、e-banking、電話查詢、申請服務，
都需要在電話迷宮中按鍵及等候；
電話筒傳出錄音：「我哋嘅客戶服務主任好快會接聽你嘅電話。」
但話咗好多次「好快」之後，仍然都只係得個「等」字。

第三位：「啲餸緊嚟！」
在食肆吃飯，梗有一味餸等咗好耐都未到，
向侍應追問之下，並要求取消order時，
侍應必會答：「啲餸緊嚟！」
其實他才立即寫單入廚房，
大力加一個很大的「快」字！

第二位：「呢單嘢我對事唔對人！」
老細開會，有一單嘢鑊咗爆！要閂門打狗！
大家一輪推卸責任後，找不到真兇。
老細隨手抽出平日心目中最唔妥的staff來狂炳發洩！
老細之後補多一句：「呢單嘢我對事唔對人！」
明眼人一睇就知道老細點會對事唔對人？

第一位：「我幫你問吓經理，睇吓可唔可以同你hold住嗰offer先？」
用優惠價錢吸引顧客幫襯，
但優惠期的deadline則非常之有彈性，
當顧客心裏十五十六之際，sales話優惠期就快expire，
Sales講到機會千載難逢，催促客人快啲confirm。
「我幫你問吓經理，睇吓可唔可以同你hold住嗰offer先？」
Sales神情緊張咁行開咗一陣，之後好似被人鬧完咁嘅樣返嚟，
「我好辛苦同你fight到，嗱！quota有限，經理話你唔要就即刻俾第二個客人啦！」
顧客當然睇穿這場戲，冷冷回應：「你成日同人fight物fight乜？咁辛苦！不如搵過第二份工仲好吖！」

待續