自助餐

自助餐

自助餐標榜限定一個價錢有大把選擇，
很多精打細算的香港人，是自助餐的捧場客。
到底食自助餐時，人來人往；
會見到乜嘢風景？

第十位：搶高價食物
同樣一個收費之下，更係食得越多貴嘢越化算。
生蠔刺身鵝肝龍蝦係搶手貨，
一推出上枱就引嚟人群，手快有手慢無。
食客會以攞到貴嘢而沾沾自喜！
向攞唔到的食客做出「得戚」的表情。

第九位：隨地見餐巾
因為食客經常要出去攞嘢食，
不斷離座就座，容易令到大脾上的餐巾跌落地。
Waiter就忙於拾起地上的餐巾，
摺好後把餐巾放回枱面上，整晚重複着這動作。

第八位：團體大合照
超過十位家庭成員的大家族，愛選擇吃自助餐，
一張大長枱可容納十幾人，食物又老少咸宜，
結果大枱前面就見到團體大合照，
十幾人前後企兩排，叫waiter幫手揸相機，
記錄今夜的溫馨情景。

第七位：錯用食物夾
每種食物都有專用的食物夾，
但食客一於少理，見夾就用。
夾完咖哩又夾檸檬鴨，
結果甜酸苦辣鹹七味於一支食物夾上大混合。
個食物夾沾上的餸汁紅橙黃綠乜顏色都有！

第六位：枱底鬆皮帶
食buffet就預咗同佢死過，
早餐午餐下午茶唔倀，留肚夜晚食buffet，
結果一輪衝鋒後，胃部極飽！
只好暗暗在枱底下鬆皮帶，
或者行吓舒緩一吓。

第五位：食物盒打包
雖然只是個別例子，
但不能否定它的存在性。
一些習慣帶飯回公司的在職人士，
放工後去食buffet，因為公事包內有飯盒，
會在枱底把食物放進飯盒內，
留待明天中午享用；又可以慳返一餐。

第四位：口含食物排隊
由於怕蝕底的心裡作祟，
令食客有趕住去攞嘢食嘅傾向。
口中含着未完全咀嚼完的食物，
便起身出去再攞過，爭取每一分秒。
邊趙邊攞，份外抵食！

第三位：被人笑食澱粉質
如果你攞意粉、白飯、麵包、薯仔回枱，
你就會被同枱人恥笑點解攞呢啲易飽肚嘅食物？
雖然你可能真心喜歡食澱粉質食物，
但食buffet時則會有人干涉你的口味選擇。
令你身不由己！

第二位：攞咗返去先，睇吓邊個食！
與朋友一起到食物枱揀食物時，
面前花多眼亂，唔知揀乜好？
朋友話：「唔好理咁多啦！攞咗返去先，
睇吓邊個食吖！？」
結果碟食物無人吼，變成浪費食物。
再一次引證「眼闊肚窄」的四字真言！

第一位：昅隔離枱攞乜返嚟！
食客坐在餐桌前不知出面有乜新鮮食物推出？
只好昅住隔離枱啱啱攞乜嘢食返嚟！
「咦？有蠔？去攞！」、「咦？有帶子刺身？go！」
或者見到隔離枱啲食物賣相靚，立即行動！
但係攞咗返嚟又覺得不外如是！
這現象可以引證「隔離飯香」的真實性：
碟餸好味，只因為遠觀，
並且它不是放在自己的枱上而已！

完