卡媽

卡媽

介紹咗卡爸咁耐，公平起見，當然要講吓卡媽。

卡媽是一個勤力慳家的主婦，煮嘢一流。如果我填表時，在「我最喜愛的食物」一欄，我必定寫：媽媽煮的食物。真係架！

卡媽由义燒包、鮮竹卷、蝦米腸粉、馬豆糕、糯米糍到水餃，她都是自學而成，達食肆的水準。如果她做食店師傅，升任有餘。而卡媽整的年糕蘿白糕裹蒸糉，朋友吃過都讚不絕口。我有一個在銅鑼灣開飯館的朋友，嚐過我媽的手勢後，都話好味！證明卡媽好強呀！最近卡媽怕市面的麵包有反式脂肪，實行自己焗麵包。

我每次回家吃飯，卡媽都煲好靚湯，煮好多好多好多餸。每次回家見她煮咁多，辛苦了卡媽。叫她煮少啲，結果都係擺滿成枱。我心諗：我應該多回家？或是少點返，讓她無咁辛苦呢？最後：我選擇了「失驚無神走上去」，卡媽唔使煮咁多，我又可以跟雙親吃飯。

卡媽另一個特色：就是節儉。很多東西用上幾十年都不掉，有晚我回家吃飯，卡媽問我衣櫃內有些恤衫仲著唔著？我一睇，嘩！我二十幾歲的恤衫，仲keep到今時今日。我見到一件起哂黃點的恤衫，感覺仿如從地下掘出「時間囊」，再重見天日。又似發現古代出土文物咁。

不過上一代慳家的好處是：慳吓慳吓慳出幾層物業囉！呢一代就儲首期都遙遙無期。上一代的社會氣氛，肯做肯捱就可以有成。如今就肯做都無機會。

卡媽勤力的性格，十年不變，唔知點解家中有做不完的家務。卡媽又唔喜歡消費，叫她過年過節外出晚膳，卡媽實反對話：有味精又貴又唔飽！一定堅持要自己煮。希望卡媽可以停一停、抖一抖。享受一吓啦。

完

二少爺說：在眾寫親情的廣東歌之中，呢一首都算是最經典。

念親恩 - 陳百強

作曲/作詞：楊繼興

長夜空虛使我懷舊事
明月朗　相對念母親
父母親愛心柔善像碧月
懷念怎不悲莫禁
長夜空虛枕冷夜半泣
遙路遠　碧海示我心
父母親愛心柔善像碧月
常在心裡　問何日報
親恩應該報
應該識取孝道
唯獨我離別　無法偎親旁
輕彈曲韻夢中送
長夜空虛枕冷夜半泣
遙路遠　碧海示我心
父母親愛心柔善像碧月

常在心裡　問何日報