紀漢醇外傳

紀漢醇外傳

晚上11:30，大型屋苑的外牆，萬家燈火。
細心觀看，各單位亮起不同顏色光暗的燈飾，還有電視機跳動的畫面；
紀漢醇和淑芳就是住在這座可容納三千戶的大型私人屋苑內。
今晚他們出席完親友的婚宴後，回家休息。

紀漢醇和淑芳已經結婚二十一年，沒有小朋友，兩夫妻已懂得相處之道，
什麼時候放鬆？什麼時候收緊？給予對方適當的自由度、恰當的關懷鼓勵；
經歷了三個「七年之癢」之後，兩夫妻無風無浪地平穩過渡。

接近午夜的關係，電梯大堂內只有兩人在等候升降機，
「叮」一聲，升降機門徐徐打開，兩人步入電梯內，按下52字。
當電梯的樓層顯示器，跳到48樓時突然「轟隆轟隆」！跟著停頓了。
淑芳大叫！紀漢醇安慰：「無事嘅！等我撳警鐘先！」
正當紀漢醇的食指按動黃色的警鐘之際，電梯又突然「轟隆轟隆」向下急墜！
強烈離心力令兩人尖叫，失去平衡倒跌在電梯地上。電梯在37樓停止跌勢。

紀漢醇見淑芳沒有受傷，爬起身按動警鐘，管理員回答馬上召消防員。
紀漢醇安慰淑芳說：「唔使驚！電梯故障，好正常啫！」
紀漢醇表面扮作鎮定，心底裡也十分惶恐，
因為電梯隨時斷纜，兩人飛墜三十層樓，九死一生！
兩人面面相覷，估唔到兩人能夠於同年同月同日逝世，
除了殉情外，夫婦於同日死忌，是十分難得！

淑芳口震震說：「阿醇，我想喺臨死前…親口講過…秘密你聽…如果唔講出嚟，我驚我會去得唔安樂…」
好奇心強烈的紀漢醇，也想知道淑芳有什麼秘密瞞着自己半生，洗耳恭聽。
淑芳說：「其實…我只係愛…你阿哥…紀漢郁…當我發覺佢係Gay之後…我好傷心…既然我嫁唔到俾我最鐘意嗰個男人……我就求其嫁俾你…咁樣做…起碼可以同你阿哥做親戚嘛…你唔好怪我吖！」
淑芳一講完，電梯突然「轟隆轟隆」向下墜多十層，
紀漢醇驚叫，一半是怕死、一半是知道太太秘密後的強烈反應！
終於在27樓停了，今次連電梯內的照明都完全熄滅，兩人在黑暗中再次呼嗌！
紀漢醇的呼叫除了害怕之外，還夾雜着一份21年的憤怨！

紀漢醇知道死期近矣，一切仇恨應該放開，在黑暗中向淑芳說：「唔緊要！俾著我係妳，我諗我都會咁做！」
紀漢醇：「其實我都有一個秘密瞞住妳，既然大家咁坦白，我想喺死之前同妳講…」
淑芳：「你即管講啦！講咗…真係會舒服好多架！」

紀漢醇：「妳知唔知我……床下底收埋咗一個……鞋盒吖？……」
淑芳：「我知呀！我仲偷偷地打開過嚟睇添……」
紀漢醇：「係咩？…..原來妳都睇過個鞋盒……」
淑芳：「鞋盒入面有兩個飲完嘅汽水罐…同埋港幣843蚊零4毫。」
紀漢醇：「唔～妳真係好記性，咁妳又記唔記得……我最憎飲乜嘢汽水吖？」
淑芳：「記得！沙士吖嘛！飲完你好想嘔……」
紀漢醇：「無錯！鞋盒入面有兩個沙士汽水罐，每當我背住妳跟其他女人上床，事後我好後悔、內疚，我就會飲一罐沙士汽水……嚟懲罰自己……仲將個空罐放入一個鞋盒嚟警惕自己……咁…妳可唔可以…原諒我呀？」
淑芳：「嗯！21年嚟，你都係偷食兩次啫，我原諒你！」
紀漢醇：「多謝妳……」

黑暗中的紀漢醇，眼中閃出淚光，獲得太太原諒之後，流下兩行被救贖的淚水。

淑芳：「咦？！咁個843蚊零4毫呢？」
紀漢醇：「哦！個鞋盒太細，我咪將擠唔落嘅沙士汽水罐攞去收買佬度賣，二毫子一個，咁慢慢咪儲到八百幾蚊囉！」

紀漢醇一講完，電梯又「轟隆轟隆」！由27樓沿電梯糟插水直墮！
但是今次電梯並沒有停止的跡象，連同淑芳的心窩，急速向下墜，
一直向下墜，
跌入無底深潭……

完