港式英語

港式英語

香港人曾受英國殖民地統治，香港人鐘意講嘢半中半英；
以下是「港式英語」的其中十個例子，
港式英語的特色是：抽出英語的部分發音，再加上廣東話一起混合使用，
雖然唔係完整英語，但一講出嚟，本地人就會立即明白！

第十位：Out Bud
Out Bud（音：鈎筆）：是Out of Budget（超出預算）的簡稱。
例句1：去買二手車時，向sales講：「呢架車Out Bud呀！有冇第二架平啲呀？」
例句2：搞婚宴酒席，「呢個菜單Out Bud啦！同我寫平啲吖！」
還有學生必懂的：「Out Sy（音：鈎絲）」，
是「Out of Syllabus」(超越考試範圍)的意思。
例句3：「呢課『明朝交通史』唔使讀啦，考試Out Sy架！」

第九位：Min Pay
Min Pay（音：麵呸）：是Minimum Payment（最低還款額）的簡稱。
指貸款或信用卡的最低還款額，
例句1：「我今個月窮到爆！連Min Pay都俾唔到！」
例句2：貸款公司宣傳句語：「Min Pay幾多自己訂，充滿靈活彈性！」

第八位：Dup多份
Dup（音：耷）Dup多份：指將電腦檔案複製多份（duplicate copy）的意思。
為了安全起見，將電腦重要檔案複製多幾份存底，以防遺失。
或複製多幾份供朋友一起分享！
例句1：「嘩！啲相咁靚！Dup多份俾我吖！」
例句2：「我驚萬一整唔見，已經Dup咗幾份咁多！」
另外，Cup（音：吸），copy複印，和Dup意思相似。

第七位：Cir出嚟
Cir出嚟：是將文件或資料circulate（傳閱）的意思。
經常在公司同事或朋友之間傳閱時使用。
例句1：同事們問：「公司改五天工作？仲未有通告Cir出嚟公佈喎？！」
例句2：朋友們問：「邊個有牛年運程書？有就Cir出嚟大家分享吓！」

第六位：Mon住
Mon（音：芒）Mon住：是monitor（監察）事態發展的意思。
如果要進行一項重要工作，就要有專人Mon住件事，千祈唔好出錯！
例句1：老細對下屬說：「你同我Mon實呢單幾千萬嘅手意呀！唔可以衰呀！」
例句2：下屬歉疚地說：「我已經盡力Mon住呢單嘢！點知最後都揩嘢…唉～」

第五位：Work唔work？
Work唔work？：是指事情可行與否？（Workable or not？）
當考慮某個提案可行性的時候經常使用：
例句1：老細問下屬說：「你呢個suggestion，work唔work架？」
例句2：顧客向店員投訴：「我噚日喺度買咗支生髮水，返去用都唔work嘅！」

第四位：O唔O？
O唔O？（音：噢唔噢？）：是「OK唔OK？」的簡語，
問對方對某事情、人物、安排、效果是否接受或滿意？（Okay or not？）
例句1：同事問同事：「你噚日lunch幫襯嗰間新開嘅餐廳，O唔O呀？」
例句2：裁縫問顧客：「你套西裝我改咗啦，你著上身睇吓O唔O呀？」

第三位：Ur唔Ur？
Ur唔Ur？：是「Urgent唔Urgent？」的簡語，
問對方受委託的事情工作，是否急趕迫切？（Urgent or not？）
例句1：下屬問上司：「你叫我做呢個report， Ur唔Ur架？」
例句2：店員問顧客：「你放低部電腦俾我整，大概要整兩日，你Ur唔Ur架？」

第二位：Un唔Un？
Un（音：奀唔奀？）Un唔Un？跟跳舞無關係。
是「Understand唔Understand？」的簡語，
問對方是否清楚明白？（Understand or not？）
例句1：上司問下屬：「我吩咐你做嗰單job， 你Un唔Un呀？」
例句2：「窮人講嘢，梗係無人理會！你Un唔Un呀？」

第一位：好pro！
好pro！（音：好舖）好pro！：是「好Professional！」的簡語，
稱讚對方擁有專業知識技術操守（Very professional！）
例句1：顧客讚電腦技術員：「嘩！啲files delete哂你都可以復原返！好pro呀！」
例句2：朋友：「嘩！你去玩飛鑣之嘛，都帶咗成喼咁多裝備，好pro呀！」

Anyway，呢啲英語on and on咁出現喺大家身邊。
Actually你無可能feel唔到嘅！right?！
You know，我十分support香港呢個Asia World's city，
係好deserve有呢啲咁special又unique嘅sub-culture！
I meant我哋應該respect呢啲地道文化。
To be honest，我非常proud of it！you see my point?

完