大隻Boy band –上集

大隻Boy band –上集

某間大型鏈鎖健身店即將結業的傳聞，早已囂於塵土。結果這一個早上，健身院的大閘從此長期關上，閘外結集一批被欠薪的員工，集體向勞工處求助。

這班新晉失業大軍中，有四位Body Combat（拳撃式帶氧運動）教練，同病相憐，他們在炮台山分店一起工作而認識。他們分別是：Manson、Jason、Kison和Hanson，他們都有女朋友，間中八人一起食飯夜蒲睇波遊船河。

四位大隻年輕人，考有健身教練牌，手頭上有一班忠實學生喜歡上他們的Body Combat堂，本應失業後過檔去另一間健身院教Combat，搵工應該無難度。但無奈遇上金融海嘯，另一間健身院也在收縮皮費，沒有職業空缺。四位教練只能望門輕嘆，暫時在家裡踎躉量地。

＊    ＊　＊　＊　＊

有一晚，Manson在whatsapp群組通知Jason、Kison和Hanson，告訴他們有「有工做啦」！四人當晚立即出來，在茶餐廳見面，共商大計。

原來Manson有一次在中環夜蒲時，場中有一名中年男子主動上前遞上咭片結識Manson。Manson正想回答：「我係直架….」中年漢說：「唔好誤會，我搵你講公事咋。」那名中年漢叫Ricky，在鯉景灣開設一間西式餐廳。Ricky替這餐館起一個主題特色，就是所有waiters都要是「大隻佬」，餐廳制服是少布緊身tee，目標顧客是18歲至50歲消費能力高的專業女性。Ricky正招募大隻佬做侍應。

Manson打蛇隨棍上：「我仲有三個大隻佬朋友，我諗佢哋都會有興趣。」Ricky約Manson帶同另外三人，後天上辦公室見面。四人戶口乾涸，為了搵工，見吓Ricky都無妨吖。

＊    ＊　＊　＊　＊

跟Ricky的見面過程十分順利，一拍即合，四人成為餐館的侍應生，底薪雖不及教練高，但貼士就可以靠自己爭取，下星期一晚返工，點都好過零收入。

四人見工後，到餐茶廳慶祝失業兩周後，咁快就搵到新工，四人碰杯。

Jason飲下一啖涷檸茶說：「其實…我哋同…鴨..有無分別呢？」

Kison答：「梗係唔同，我哋賣藝不賣身嘛！」

Hanson說：「不過，如果佢係富婆，又肯包我，我一定制呀！」

其餘三人立即：「妖！你係咪男人呀？」、「挑！無呢志氣！」、「呸！靠女人！」

四人口裡雖這樣說，但其實心底裡，都希望在餐館內，結識到有錢女，從此入贅豪門唔使做。四人趁weekend到健身室狂操一番，希望以最佳狀態出現在女客人面前。

＊    ＊　＊　＊　＊

到了星期一，他們於黃昏5:30，約埋喺港鐵站，一齊返鯉景灣的餐館。

四人到達餐館了，吓！乜間舖入面啲裝修擺設咁gay架？！大隻裸男的poster、雜誌架上放了很多外國的gay magazine、燈光又暗、音樂又迷幻，四人心知不妙。

餐館內已有兩名大隻佬侍應，他們雙眼電力十足。見到四人立即溫柔地打招呼：「嗨！靚仔~」Ricky叫四人換上緊身tee後，向四人解釋餐館工作細節。原來那晚Manson在夜場中向Ricky表明自己是「直佬」後，Ricky唯有騙他們專做女客，他們才會落踏。如今四人騎虎難下，唔嚟都嚟咗，只好做一晚侍應，睇睇情況先。

七時開始，男性客人陸續來幫襯，真係一個女客都無。男客人的飢渴眼光在四人身上游走，對於「直畢甩」的直佬來說，顧客的目光令人渾身不自在。溝有錢女的美夢立即粉碎。男客人主動調笑搭訕，四人都垂低頭，詐聽唔到，很辛苦才捱完一晚。

收工後，三人捉了Manson入幽暗的後巷內，二話不說便圍揼他，是狠狠地、拳拳到肉地揼。

待續

二少爺說︰想唔想知間餐館怎樣？這首歌可見一點端倪。