大隻Boy band –下集

大隻Boy band –下集

四名大隻佬在餐館內很辛苦捱完第一晚。收工後，三人捉了Manson入幽暗的後巷狂揼。

第二晚，除了Manson照常上班，其餘三人寧願唔要第一晚的人工，劈炮唔做。Manson為了錢交租和找卡數，繼續上班。

＊        ＊　＊　＊　＊　

第三晚，Manson經whatsapp通知Jason、Kison和Hanson又有「新工做啦！」約四人當晚出來見面，共商大計。當然立即遭到三人狂鬧，見過鬼都怕黑。

Manson的誠信早已破產。最後三人都因為銀包無錢，向現實低頭，也想知道Manson「乜嘢葫蘆賣乜嘢藥」，結果三人都肯出嚟見面。Manson約他們到茶餐廳見面，三人深夜赴約。

Manson說他在餐館工作時，有一男客主動遞上咭片結識Manson，他叫Jeff，是一間小規模模特兒公司的經理人。Jeff正想捧一隊「大隻仔四人Boy Band」，試探吓市場反應。Jeff講明公司budget很少，只是「刀仔鋸大樹」式搏一搏。問Manson有無興趣試吓？

Manson立即預埋其餘三位兄弟，三人聽後，眼睛立即發光「嘩！入 娛 樂 圈 呀！」三人流露感激的目光，Manson終於可以帶罪立功，將功補過。

＊        ＊　＊　＊　＊　

第二天，四人到Jeff公司會面，過程十分順利，一隊樂壇新Boy Band便告誕生。Manson辭退了餐館的工作，全力向樂壇發展。四人腦裡是「One Direction」、「Westlife」、「Take that」一堆樂隊名字，錢呀女呀車呀樓呀！

第三天，四人再上公司開會，商討隊Boy band的名字和形象。四人講出自己心目中的名字，都被marketing同事反對。四人認為不如叫「Brother」啦，四人親如兄弟。Marketing同事和Jeff都是不斷搖頭。

經Marketing同事和Jeff商量後，一致通過，宣佈樂隊名字叫「Zister」，四人一齊「O咀」！原來大老細的風水師傅早已改好樂隊名字，只有叫「Zister」才能紅起來。Jeff只是扮民主叫四人開吓會，扮聽吓意見咁啫。四人除非唔做啫，唯有超無奈地接受。

＊        ＊　＊　＊　＊　

Jeff在演藝學院搵到一個讀音樂系的學生，出幾百蚊叫佢包辦作曲填詞編曲，用電腦合成音樂一腳踢，製成Zister首支主打歌，歌名叫《打出個QQ宇宙》，是一首快Beat跳舞歌。之後Jeff再求其搵個「和音」錄埋首歌的demo，用電腦加工變成四把男聲。總之一切要用最少budget完成。Zister第一首派台歌完成了，下一步就是要拍MTV。

電視台約了Zister星期日早上十時到舊機場那遍空地，拍攝他們首個MTV。由於衣服沒有budget，Zister穿回以前健身院的教練制服，只是剪走對袖、車多塊布遮著公司logo、加多條腰帶，便成為首件樂隊制服。

MTV導演認為《打出個QQ宇宙》這首快歌最好有舞蹈畫面，問經理人Jeff有無準備排舞老師？由於無budget關係，Jeff當然請唔起排舞老師。幸而Manson先開聲：「無問題！我哋可以跳body combat當舞步。」MTV導演只想快些收工，對建議無意見。

MTV導演roll機，拍了Zister夾口型唱歌、戶外跳body combat的鏡頭。外境拍攝完畢後，下一個shot是移師到北角某dance studio內拍攝，他們需要乘van由啟德去北角。臨離開前，MTV導演問Jeff有無準備dancers？得四條友齋跳似乎冷清咗啲，由於無budget關係，Jeff當然請唔起dancers嚟伴舞。

＊        ＊　＊　＊　＊　

半小時後，大伙兒抵達北角某dance studio，當那隊crew 打好燈後，正準備拍攝之際，有十二男女及時趕到，他們聲稱是Zister的dancers。

原來剛才Zister趁在車程中，各自call了幾位跳combat的忠實學生，話免費送一堂combat，仲可以上電視，結果找到十位學生願意趕來湊熱鬧。16人在鏡頭前，好齊好合拍咁跳combat，效果仲好過dancers，唔使夾一take過。MTV導演趕收工求其收貨，其實最滿意的應該是Jeff，零budget便有服裝、有編舞、有伴舞，表現出「以小搏大」的香港精神。

＊        ＊　＊　＊　＊　

正如一般新晉組合，每年有幾隊殺入歌壇，但又無聲無色fade out殞落。Zister當然亦逃不過這個宿命，半紅不黑。模特兒公司唔再投資繼續玩，四人又恢復失業狀態。

有一晚，Manson又經whatsapp通知Jason、Kison和Hanson，告訴他們又有新機會。約四人當晚立即到茶餐廳見面，共商大計。三人都因為山窮水盡，乜都要做，都肯出嚟見面。

原來Manson經朋友介紹下，被中山某新開張娛樂城的健身院聘請成combat教練。因為國內乜都要大要誇，那健身院規模很大，需要多聘三至四名教練，Zister始終都叫出過一隻EP，叫做歌星仔，在大陸很Buy這些帥哥仔。四人北移到中山做教練，招攬到很多當地學生報名。四人搵到食，決定從始定居國內。

正所謂：「魚唔過塘唔肥」，Manson、Jason、Kison和Hanson，唔離開過香港炮台山，又點可能過檔到大陸中山闖一番呢？做人真係「今日唔知聽日事」、「呢步唔知下一步」。

後記

這裡上下兩集加埋共2,916字，都是因為我2010年某天，一個唔覺意睇咗以下呢個MTV而成。（注意：開始時間始於0:28秒）

二少爺說︰我向大家推介，拍得住「天堂鳥」。