陰陽路之「天開眼」- 下集

陰陽路之「天開眼」- 下集

(這篇是新寫的)

在辦公室內的Ben經天眼見到睡房中的壽衣男人靈體，嚇到噴咖啡！

他關心太太的安全，本能地立即call她。Nancy站在家中露台外，利用周遭環境雜音扮自己外出在街上。Ben知道Nancy安全後，叫她千祈唔好獨自返屋企，叫Nancy五時去公司找Ben。

Nancy收線後和Samuel笑到碌地。Ben監視太太反遭嚇倒，兩人得意洋洋，既然上了來，兩人在客廳親熱吓先。

＊　＊　＊　＊　＊　＊

Ben正在考慮：家中有鬼，應如何處理是好呢？最後Ben決定今夜跟Nancy在酒店過夜，明天請茅山師傅回家捉鬼。

5時許，Nancy來到Ben公司。Ben為了隱瞞安裝「天眼」一段，說謊指有相士算出他家中有靈體，暫時不適合回家，今夜兩人在酒店渡宿，明天早天找茅山師傅幫手。

Nancy聽後，立即交戲，扮成很驚慌的樣子，其實心裡笑到咔咔聲。

＊　＊　＊　＊　＊　＊

當晚，兩人入住一間三星級酒店。酒店房內不可吸煙，Ben十一時外出抽煙，剩下Nancy一人在酒店房。她確保丈夫離開後，立即偷偷地打電話給Samuel，想告訴他事態最新發展，怎料打了幾次，都係傳來「你打嘅電話未能接通，請遲啲再打過嚟…」

Nancy氣憤地收線，心諗唔通Samuel又去搞搞震？(雖則她自己也背著老公搞搞震)。胡思亂想之際，Ben抽完煙回房間。

＊　＊　＊　＊　＊　＊

第二天早上，Nancy跟丈夫在酒店吃過早餐後，丈夫出發去見茅山師傅。Nancy返回酒店房間後，立即打電話給Samuel，點知仍然係「你打嘅電話未能接通，請遲啲再打過嚟…」

她十分激氣，坐在床上，順手開了電視。新聞台報導：昨晚十一時，一架房車在紅磡天橋翻車，男車主送院後身亡，事主就是……Samuel。Nancy睇到新聞後，呆嚇到跌下電話在地上。

＊　＊　＊　＊　＊　＊

Ben去到茅山師傅的神壇。Ben播放錄影帶給師傅過目。電視畫面中，清楚見到一名穿草帽、壽衣的男子慢動作行過，他身後有一對穿清朝服裝的男女隨後。

Ben對師傅說：「我噚日就係見到呢三件『污糟嘢』喺我屋企。」

師傅說：「唔係三件，係兩件咋，第一個穿唐裝嗰個係男人嚟架。後面兩個清朝人先係靈體。佢哋要搵兩個替身。」

Ben剩係聽到師傅的第一句，已怒火中燒！原來老婆出面真係有個男人，Ben立即打電話給Nancy，要三口六面問過清楚，如果搞離婚，通姦就唔使俾贍養費吖嘛。

怎料Ben打了幾次電話給Nancy，都係傳來「你打嘅電話未能接通，請遲啲再打過嚟…」

完

二少爺說：唉！Nancy妳去咗邊呀？