多餘口頭禪

多餘口頭禪

廣東話中有好多加強語氣的口頭禪，但這些口頭禪其實無乜實際意思和用途。日常講嘢時，就算省去這些口頭禪，都唔會影響句子的意思和完整性。如果你某日喉嚨痛、或者唔夠氣，可以考慮唔講以下的多餘口頭禪：

第十位：「就係咁囉！」
當敘述完一宗事件經過後，臨尾加一句：「…就係咁囉！」作為概括的總結。
例句：「落車之後就唔見咗嗰銀包啦！唉～就係咁囉！」
就算省去「就係咁囉！」，亦不損原本敘述事件的完整意思。

第九位：「好話唔好聽！」
「好話唔好聽」有「忠言逆耳」的意思，苦口婆心的說教說話，通常較難入耳。
「好話唔好聽」通常用作一段有教誨性說話的引子。但現代人唔理乜情況之下，想幾時講就幾時講。
例句：「唉～好話唔好聽：原來『好話真係唔好聽』架！」

第八位：「講真吖！」
可能現代人講得謊言大話太多，所以喜歡加一句：「講真吖！…」來加強說話的真實性和肯定性。這是「此地無銀」的心虛表現，或者是慣性的心理條件反射，旁人不會因為你說話前有講到「講真吖！」而提高你說話的真實性。
例句：「講真吖！邊個會講真嘢吖？」

第七位：「嘩！真係吖…」
當人描述完一件事情後，會加上一句感嘆句子，表示該情況之嚴重程度。但講完「嘩！真係吖…」之後就留白。讓聽眾自己去聯想「真係吖…」之後是什麼形容詞。
例句：「挑！佢份人出名衰格啦！仲升佢職？唉！真係吖…」
既然「真係吖…」之後沒有再詳述或補充，咁講唔講都無乜所謂！

第六位：「咪話我話吖！」
現代人喜歡逃避責任，連講說話也不想負上說話的責任。所以有「咪話我話吖！」的出現。有人擺明切切實實講咗一些說話出嚟，講完又叫旁人聽咗之後，又可以當唔係佢親口講過，邏輯上好多餘，變成純粹廢話了。
例句：「咪話我話吖，佢講嘢出哂名講咗又唔認有講過！」

第五位：「計我話呢…」
「計我話呢…」同「I think」一樣，都是表述自己的意見的開場白。當你論述自己的意見時，旁人當然明白你正講出你的想法，所以這句「計我話呢…」便變成「畫蛇添足」般多餘。
例句：「計我話呢…我都係答唔知道會好啲！」

第四位：「話時話，」
「話時話」和「講開又講」一樣，意思是「既然話題扯到這一點，不如就這一點再講多一些吧！」其實無乜實際意思，又沒有附加新意義或額外價值。而且「話時話」的語氣十分中性，說了也沒有加添任何感嘆或語氣！
例句：「話時話，人幾時講嘢唔係講開又講吖？！」

第三位：「吓嘛？！」
「吓嘛？！」是反問詞，來至「係咪？！」但香港人多懶音，慢慢由「係咪？！」讀歪演變成「吓嘛？！」或者讀「吓化？！」。表面是詢問其他人意見，實際是用反問句來肯定自己的想法。想人表態支持自己與否。
例句：「呢個係顧客權益！吓嘛？！」、「咁你識做喇！吓嘛？吓嘛！」
好多人喜歡連續使用，成為一種說話的節奏，吓嘛？！

第二位：「你知啦！」
未講說話之前，早已預先假設對方已經知道咗，咁講出嚟仲有乜嘢意義價值呢？唔通真係揾嘢嚟講？定係驚對方一時醒唔起，要提一提醒佢？
例句：「你知啦！你係男人嚟架喇！」
如果對方早已知道他是男兒身，咁又何須冗贅？

第一位：「唔講你唔知！」
「唔講你唔知！」是「你知啦！」的龍鳳胎，「唔講你唔知！」重複著一個十分淺白的邏輯因果道理：「我唔講出嚟，你又點會知呢？！」將這個因果關係，好直接好簡單咁講出嚟，雖然多餘，但很多人喜歡掛在嘴邊，真係唔講你唔知！
例句：「嘩！唔講你唔知！原來我唔講呢，你真係可能唔知架！」

例句示範：「喂！唔講你唔知！原來阿邊個咩咗呀！唉！真係吖…你知啦，呢啲嘢，好話唔好聽，可大可小嘛！哼！就係咁囉！計我話呢，唔好埋咁多啦！咦！講開又講，佢同你都叫friend喎！咪話我話吖！佢實搵你！講真吖！你要同自己打算呀！吓嘛？！」

完