噢雪！

噢雪！

今次不是講「澳雪沐浴露」或者講「沐浴巨星」，「噢雪！」是英文「Oh！Shit！」的廣東話音譯。

「Oh！Shit！」翻譯成中文是：「糟糕！」、「弊傢伙！」、「死喇！」、「大劑！」、「大鑊！」等等。都是當人遇到嚴重問題時，衝口而出的感嘆語。今次數一數在什麼情況之下，會經常聽到「噢雪！」呢？

＊　＊　＊　＊　＊　＊

第十位：送機場巴士尾

旅客去機場，由於地點離機鐵站太遠或的士費太貴，需要搭機場巴士到機場，而機場巴士是15至20分鐘一班車，錯過呢一班就要當街罰企20分鐘。如果旅客已經趕緊時間，仲要送埋機場巴士尾，真係好激氣：「Oh！Shit！」又或者排隊搭小巴，當你準備上車之際，車門「砰」一聲關上，16位乘客剛坐滿，開車走人，你在車門外大叫：「Oh！Shit！」之後唯有死死地氣，繼續留喺街上吸塵。

第九位：海景被阻

靠海置業的業主，很自豪地依窗眺望180度無敵海景，樓宇價值隨著面前的璀璨海景而升值。突然電視新聞公佈：露台外面的海景，將會被另一個地產新項目興建所阻擋，業主呆座在電視機面前，大叫：「Oh！Shit！」海景變樓景，樓價將會插水，身家貶值！

第八位：忘記帶passport

離港出埠，無論是興高采烈去旅遊，抑或跟老細戰戰兢兢去公幹，當到達機場航空公司的check in counter前，才發覺自己的passport遺留在家中。而飛機又快要起飛，你擺明「失魂累街坊」，在眾人怒啤之下，你點會唔大嗌：「Oh！Shit！」呢？！

第七位：考試貼錯題

香港學生考試，邊個會戇居居讀哂所有考試範圍？梗係要貼試題啦！補習天王嘅貼題，當然100%靠得住。但唔係個個學生都俾得起昂貴的補習費，咪要自己貼題囉！如果開考時一翻開試卷，發現貼錯題！學生第一個反應：「Oh！Shit！」可以考慮立即舉手離開試場！

第六位：玩Surprise接女友

男朋友「搞驚喜」，唔聲唔聲去女朋友公司樓下，等女友放工。結果喺女朋友公司樓下，見到女友和上司手拖手放工。這時，妒火中燒的男友通常不會講：「Oh！Shit！」而是講：「呢條死仆街！」又或者男友背著女友去溝女，在街上給女友的密友撞過正著，男友見事敗斷正，掩面：「今次死乸梗！」

第五位：廁格無廁紙

人有三急，或者肚痛難頂，要幫襯公廁。一入到廁格內，才發覺無廁紙，一聲「Oh！Shit！」唔講悠自可，一講「Shit」就更加肚裏滾滾欲瀉！又或者解決完，才發覺包Tempo已經用哂，一樣要嗌一句：「Oh！Shit！」

第四位：食提款卡

當一個人急着需要現金購物、享樂、還錢或找數，他到自動櫃員機「撳機」取錢，排完條長龍之後，終於輪到自己。點知張提款卡「被食」，無錢救急之餘，仲要第二日花時間去銀行補領返張卡，費時失事，真係：「Oh！Shit！」

第三位：臨尾Hang機

用電腦處理文件，埋頭苦幹一番後，差少少就可以宣佈大工告成之際，突然電腦Hang機，將所有前工盡費！當時人將個Mouse猛拍張枱！先嗌：「Oh！Shit！」見電腦無反應，再驚嗌：「有無搞乸錯！」、「點解個天要咁對我呀？！」在keybroad上瘋狂拍打來洩怒！

第二位：遺失電話

都市人唔見咗銀包，最多報失credit card補領ID card，但係唔見手提電話就嚴重好多！無哂班friend的電話號碼，立即舉目無親。如果電話入面有「私人情慾短片」或「珍藏裸照」，咁好快就會喺網上全面爆光流傳！斯文的失主就會講句：「Oh！Shit！」，粗魯的失主就會講句：「今次死X梗！」

第一位：早上七點前落8號風球

打工仔喺夏天最希望打風掛8號波。如果臨放工前掛8號波，打工仔拍爛手掌，Call齊腳打通宵牌、唱Karaoke劈酒睇波，諗住可以無端端多一天假期休息。點知翌日早上7時前，天文台宣佈8號風球除下，即打工仔須於兩小時內回公司，如常於九時準時開工。全港打工一族，齊心一聲：「Oh！Shit！」更甚者會怒氣沖沖說：「個風有無搞乸錯？！」死死地氣落床換衫返工，絕對沮喪啊！

完