貝爾法斯特

貝爾法斯特

25歲的Manson，父親70歲、母親65歲，還有一位39歲的家姐。母親在40歲那年意外懷孕，誕下Manson。當時14歲的家姐突然多了一個趣緻BB弟弟，家姐十分愛鍚這得意BB，幫母親手餵奶換片呵瞓覺。

光陰飛逝，當天家姐手中的嬰兒，已經25歲。自幼兩姐弟感情要好。雖然年齡相差14年，但家姐常照顧和提攜弟弟。如今，39歲的家姐己經嫁人，有一個3歲女兒，家姐婚後已經搬出。65歲的母親已經退休，專心揍孫。

Manson在城市大學讀攝影，畢業後在studio當攝影助理，因為公司清減人手，Manson被公司裁了出來。閒賦在家中，繼續send求職信。Manson十分節儉，工作期間儲了一萬元，他的一位大學同學去了倫敦深造讀碩士，經email溝通後，Manson只需出機票錢飛去倫敦，住宿由同學包起。Manson決定趁這空檔，去倫敦旅行一個月，影吓相、遊歷吓。

母親知道Manson去英國的計畫，吩咐Manson順道去愛爾蘭探一探舅父。正確一點來說，68歲的舅父住在北愛爾蘭首府貝爾法斯特，在華人社區內開設中國餐館。1989年，因為信心危機，當時43歲的舅父有機會去貝爾法斯特打工，當中國餐館廚師。後來老板怕咗「北愛爾蘭共和軍」的炸彈襲擊，要返回威爾斯。老板用一筆很平宜的「頂手費」，將餐館轉讓給舅父繼續經營。

舅父離開香港那年，Manson只得五歲，而且舅父一去二十年都無返過香港，Manson對舅父印象模糊。只記得他改了一個英文名叫George。

＊        ＊　＊　＊　＊　

傍晚時分，Manson終於抵達了貝爾法斯特國際機場。室外氣溫只有15度左右，Manson乘黑色計程車去舅父的餐館。車窗外的貝爾法斯特市，維多利亞時期的古老建築物和新建築物並肩而立。十年前「北愛爾蘭共和軍」和「北愛自由軍」簽訂「貝爾法斯特協議」後，內戰停火，遊客再重臨這地。在較偏遠的地方，仍可找到佈滿子彈洞的建築物。

Manson找到舅父的中國餐館，待應都是阿叔輩，他們的衣著打扮停留在80年代。Manson：「唔該我想搵老闆。」地中海阿叔用台山口音大嗌：「佐治哥，有個後生仔揾你。」一名秦沛模樣的男人走出來，笑笑口說：「哈哈！你就係文仔啦！咁大個仔啦？」Manson母親事前已經用長途電話知會舅父Manson的到訪。舅父說：「文仔，你叫我佐治叔啦！」

好客的佐治叔先安排一頓豐富中菜晚餐替Manson洗塵。之後安頓他在前舖後居的一間細房內休息。第二天，Manson獨自在貝爾法斯特遊覽，到動物園和博物館。

Manson逗留了三天，明天早上乘機飛回倫敦。佐治叔跟Manson吃晚飯後，帶Manson去酒吧飲酒。愛爾蘭人愛飲酒抽煙，兩人開始對飲長談。酒過三巡，兩人都已經醉了八成，嘻嘻哈哈，胡言亂語。

佐治叔突然停了笑聲，好認真向Manson說：「文仔….我要講個秘密俾你知….其實….你家姐14歲果陣….俾人搞大咗個肚…..又驚到唔敢同人講….過咗幾個月墮胎有危險….先被你媽發現….之後咪生出嚟….由你阿媽認係佢生囉….即係話…你家姐先係你阿媽….」

Manson醉醺醺，聽到佐治叔咁講，竟然哈哈大笑，拍爛手掌話：「哈哈！講得好！講得好！多謝你話俾我知呀！哈哈。」佐治叔跟著也放聲大笑。

Manson不甘示弱，笑笑口說：「佐治叔….我要講個秘密俾你知….其實….你1989年過咗嚟愛爾蘭….3年後…有一個女人叫阿玲…..佢拖住個3歲細佬仔….上嚟屋企揾你….又唔講揾你做乜….阿媽答你去咗愛爾蘭後….佢就好失望咁走咗…臨走佢仲話住喺順天邨….」

佐治叔醉醺醺，聽到Manson咁講，竟然哈哈大笑，拍爛手掌話：「哈哈！講得好！講得好！多謝你話俾我知呀！哈哈。」之後兩人醉到不醒人事。由相熟酒保送他們回餐館休息。

＊        ＊　＊　＊　＊　

第二天黎明，Manson醒來，立即「裙拉褲甩」咁拾行李趕去機場。佐治叔車他一程去機場，車廂內兩人腦裡充滿問號，究竟對方昨夜一番話，熟真熟假？但又唔夠膽問對方一個明白。

直至步入禁區閘前，Manson都無膽去求證，如果屬實，自己無勇氣去承擔這個25年的謊話。Manson殷切地謝過佐治叔這幾天的熱情照顧，之後揮手道別入閘，帶著一個大疑問登機。

在機艙內的十數小時，Manson輾轉難眠，腦裡只盤旋一條問題：「究竟家姐係咪我阿媽呢？」

晚上飛機抵達香港國際機場後，Manson乘機場巴士回家，開門見到媽媽，媽媽迎上。Manson心諗：「究竟妳係我外婆？定係我阿媽？」

Manson整夜思前想後，決定要求個明白，明早起來要問過清楚，是媽好、是家姐好、是婆婆都好，她們都是Manson的至親。第二朝早上8時，Manson醒了，步入廚房，向正煮緊早餐的媽媽，鼓起勇氣，口震震咁將佐冶叔告之的秘密，向母親求証。媽媽聽後，哈哈大笑！

媽媽：「你知唔知係舅父讀過編劇訓練班，寫過電視劇劇本，不過監製唔鐘意佢啲嘢，之後舅父灰心，咪轉行揸鑊鏟囉。呢個『家姐係阿媽嘅故事』咪就係佢二十幾歲度出嚟，不過電視台無用到之嘛！」

Manson如釋重負，原來佐治叔飲醉酒、亂吹水。好彩自己都唔輸蝕，即席胡亂作番個「阿玲帶仔揾老公」嘅故事，回敬返俾佐治叔。Manson知道真相後，在廚房內笑到「咔咔聲」，突然客廳電話響起，母親去接聽，剩下心情輕鬆的Manson，偷食一啖炒麵。

當Manson步出廚房，媽媽呆呆地掛上電話，說：「你舅父打長途電話嚟，問你係咪安全到步。仲有，佢話訂咗機票，下個禮拜返香港，好似話返嚟揾個舊朋友喎。」輪到Manson呆了一呆，心諗：「吓？唔通佢返嚟揾阿玲？我亂作一通咋大佬。」

那晚，酒吧熾熱的氣氛，兩位在酒精的薰陶下，「隨口噏，當秘笈」誤信為真。不過，佐治叔二十年無返過香港，都是時候回來行一轉，探吓親朋戚友。

完

二少爺說︰有時候，真相是很難接受。