實習教師



實習教師

本文內容含粗言穢語，敬希教長留意。

又係我阿強呀！今次唔講遊埠嘞，回憶一吓我的中學生活。

我讀中二那一年，是我整個中學時代玩得最癲的一年，不須面對中三淘汰試或會考，簡直置學業於不理，瘋狂地玩。成績差被編入2E那班，是中二全級成績排尾二的那垃圾班。我在那裡結識一班奇人異士，他們語不驚人誓不休，每天返學都是娛樂，我從未試過如此喜歡返學。

如果學校是一座監獄的話，那麼2E班可說是一個「重犯倉」，集合留班生、曳人惡人寸人乜都有。雖然好似三山五嶽咁，但其實他們只是反叛和百厭，沒有黑社會人士。其中一個男同學，花名叫「咸良」，他是留班生，較我們年長一歲，是我們那一黨的「領導人」。

＊　＊　＊　＊　＊

中二放暑假前的學期，大約五月的時候，2E班來了一個「實習男教師」，廿二三歲左右，個樣好young，叫「潘Sir」。他穿恤衫西褲，笑容掛面。他在私範學院畢業前，派到我校實習，教我班地理科。

「潘Sir」跟我們上地理科，你有你講、我們有我們玩：睇《好時代》雜誌、睇《中華英雄》、聽walkman、吃零食、瞓覺、抄歌詞…（咪噓住先，old school係玩呢啲嘢架啦！）我哋完全當「潘Sir」透明，其實「蝦」實習老師唔敢發火。

當時，地理科教南美州國家，「潘老師」把一張南美州地圖掛在黑板上，指著南美州某些國家，要求同學們跟他一起讀出該國家的名字。某些坐前排較乖的同學，細聲含糊地發音，敷衍「潘Sir」。

當「潘Sir」讀到其中一個國家名時，我們全班一怔，放下手頭上的玩意，把視線移向潘Sir。因他剛讀出一個南美國家名，發音竟然跟東話「呢個龜頭」十分相似。發育期中的男同學，對於鹹濕嘢特別敏感。跟著成班男同學立即好齊心大聲朗讀「呢個龜頭」！跟著笑到碌地。

「潘Sir」怔一怔，可能唔知點處理，唯有扮若無其事，繼續教其他國家。我們的「咸良」在座位上發號司令，把它改成鹹濕嘢。無論「潘Sir」讀出什麼都好，我哋都唔理，只是齊聲讀出「咸良」講的「鹹濕口號」，齊讀：「呢個鳩頭」、「呢個jer頭」、「呢個柒頭」、「呢個乳頭」….我們就一路讀一路狂笑！

原本同學們已經笑到肚痛，怎料突然見到「潘Sir」正在痛苦地忍笑，嘴唇顫抖，仲忍到面紅面綠。佢突然「咔」一聲！連「潘Sir」都忍唔住笑咗出嚟，嘩！我們成班學生見到阿Sir笑，不得了啦，成班人直情好似缺堤咁，拍枱拍櫈咁喪笑，震撼二樓全層。

畢竟「潘Sir」只是大我們幾年，大家都是年輕人，男仔聽到鹹濕嘢，又點忍到笑吖！

經此一役，我們覺得「潘Sir」是玩得之人，拉近師生距離。上堂俾吓面佢、尊重吓佢。小息仲一齊打吓籃球。到學期尾，有考官到課室sit in，評估他的教學表現時，我們十分合作，安靜又扮留心，仲交戲俾反應答問題添呀，認真唔話得呀。

大考前，「潘Sir」便完成實習，離開學校。我們2E班都唔捨得呢個阿Sir。之後再無遇過他了。我諗「潘Sir」現在仍執教鞭啩？希望他生活安好，仍記得那年夏天，2E那班癲仔。

完

二少爺說：呢首歌已經是31年前，MV內的學生哥們，他們的子女應該做緊學生哥。MV中還有新落成的太空館和海洋公園。


每事問 - 許冠傑
作曲： L.Reed/G.Stephens
填詞：許冠傑

學野必須肯多去發問，問吓 古今遠近，
無論數學或地理天文，唔信問人。
若要高分，應該每事問，問吓 不懂好快問，
唔問最笨，求合格好文。

世界事物有千萬萬，科學日新兼月異怎去分，
答案點樣去搵，你每事問會有好學問，
經驗累積可辨別假與真，憑不斷去問人。

莫要天天等，今天每事問，問吓 虛心去問，
唔明白再問，人就更聰敏。