公文袋

余若薇： 好高興今晚能夠出席「香港記者協會週年晚會」！

湯家驊： 今晚冠蓋雲集，衣香鬚影，聽「記協」講，往年d嘉賓鍾意打煲呔出席晚宴。有人以為佢地受到煲呔曾所影響。

吳藹儀： 實當然唔係，佢地打煲呔只不過想反映出記者精神！

梁家傑： 你知啦，新聞要「煲」架嗎！

余若薇： 吓！Alan，你話記者朋友做d「煲水新聞」出黎？

梁家傑： 唔係呀！我講係「捕」！記者要括料，就要24小時「捕到實」，捕得耐就會tired，所以「煲呔」其實係記者既dress code黎架！

吳藹儀： 講開記者既dress code，我記得以前d記者鍾意著件好多袋既背心外套，愛黎裝「鏡頭」、紙筆、電芯等等！

湯家驊： Margaret我知你講乜，果件衫叫「袋背心」。 但係而家好多記者唔再著係出面羅！

梁家傑： 係呀Ronny！佢地唔著出面，著喺心入面！

湯家驊： 即係學李安話齋：『每個人心裡面都有一件（袋背心）』。

吳藹儀： Audrey，不如講吓妳既近況聽吓。

余若薇： 哦！我d朋友知道我加入左公民黨之後，都替我高興！

湯家驊： 但係我d朋友擔心公民黨曲高和寡，俾人叫做「大狀黨」、「富貴黨」。好難獲得基層支持喎！

吳藹儀： 我地邊度係「富貴黨」？我地籌款籌咁耐，都唔過200萬！

梁家傑： Margaret講得啱！個個以為做律師大把錢，又唔知生意難做，我d伙計又話要跟公務員爭取五天日工作！

余若薇： 籌款有阻滯唔奇呀！我聽聞好多機構受到上面既壓力，唔可以捐錢俾公民黨。

湯家驊： 咁又係既，鬼叫我地叫做「公民黨」咩？

吳藹儀： 點解呢？

梁家傑： 我地d黨員大多數受西方教育，英文叻啫，普通話就麻麻地，咪用普通話誤將「公民黨」讀成「國民黨」羅！上面梗唔妥我地啦！

湯家驊： 咁不如改名做「香港共同互撐黨」呀？簡稱「香港共撐黨」！一定掂！

余若薇： 叫「香港共撐黨」？咁咪同「保皇黨」既路線混淆？唔得！

吳藹儀： 講開政黨，我聽聞香港有一班知識分子都有興趣組織政黨噃！

梁家傑： 邊班知識分子呀？

余若薇： 咪係班「補習天王」羅！

湯家驊： 嘩！「補習天王」月薪百幾萬，資金充足，又有大班會考生鐵票，好有潛力喎！

吳藹儀： 我又唔係咁睇喎！你投過票都知，投票站入面分開一格格，選民投票既時候要熄電話，但係d會考生一入格就會情不自禁咁開電話上網，佢個票立即變成廢票！

梁家傑： 又係喎！咁「補皇黨」，啊sorry講錯！「補習天王黨」就算有錢都難有作為。

余若薇： 講開錢，我地「公民黨」有乜辦法去籌募更多經費呢？

湯家驊： 我提議拍賣我地d私人物品籌款。

余若薇： 呵！例如Ronny支木結他、

湯家驊： Margaret 既law 書、

吳藹儀： Alan 既金絲眼鏡同襯色袋巾、

梁家傑： Audrey 既名牌衫褲珠寶咁。

吳藹儀： 但係咁快就抵典家擋，好似山窮水盡咁，唔好咁得大體噃。

梁家傑： 我諗到條好橋：拍電影，將所有收益撥入經費。

余若薇： 拍乜好呀？

梁家傑： 特務動作片，戲名叫MP3！

吳藹儀： MP3？聽歌個d呀？你係咪講緊MI3呀?

梁家傑： 我無講錯！MI3 指 Mission Impossible 3，我既MP3 係指 Mission Possible 3，由靚佬湯做主角。

余若薇： 嘩！你知唔知Tom Cruise 既片酬幾貴？

梁家傑： 我指既靚佬湯係 ~ 湯家驊，套戲講佢喺西九、啟德、天馬艦d爛地度同恐怖份子大戰，大字型咁吊高吊低，其他精釆情節仲有辦公室反竊聽，爭奪機密文件等等……

湯家驊： 嘩！承蒙錯愛！但係拍戲行唔通！而家無人俾錢入戲院睇戲，我手頭上已經有幾單BT cases 要defense。

吳藹儀： 雖然Ronny唔做特務片主角啫，其實佢過緊特務既生活，例如「俾人竊聽」同埋「爭奪機密文件」！

余若薇： 妳係咪想講前排有本週刊公佈左我地既黨員名單？仲俾佢地大造文章。

吳藹儀： 係呀！其實份名單我地一早研究過收係邊度最安全。

湯家驊： 我地將份名單好巧妙咁拆散放入份「A45報」入面，好似「達文西密碼」咁！

梁家傑： 點知本週刊有本事成功解碼！功虧一簣！唉~~~~

余若薇： 仲有竊聽呢；以前我細個，阿媽會偷聽我講電話，擔心我識埋d壞男仔，而家阿爺就偷聽我講電話，擔心我群埋d外國壞人。

湯家驊： 佢地仲查緊我地「公民黨」既辦公室地址，想裝偷聽器。

吳藹儀： 等我係度公佈：我地辦公室唔係喺灣仔，而係北角渣華道。

梁家傑： 點解係渣華道？Tong Jia Hwa (湯家驊國語) 梗係揀渣華道！

余若薇： 咁有乜方法對付竊聽呢？

湯家驊： 有！第一招：飛鴿傳書。

吳藹儀： 但係d飛鴿中左H5N1，俾漁農署捉哂！

梁家傑： 第二招：將A-Z變成音符，用口哨吹出黎再解碼。

余若薇： 點知煲呔唔使一個上晝就喺錦鯉魚池邊破解哂我地d密碼！

湯家驊： 最後一招：我地發明左一個袋去裝d機密文件，要好複雜既方 法先打得開。

吳藹儀： 呢個「公民黨」既「袋」，簡稱「公民袋」！

梁家傑： 可惜唔使幾日就俾上面dup左，上面連法拉利都dup到，俱俱一個公文袋又點會難到佢地？

余若薇： Alan，你咁講，算唔算洩漏國家機密？小心捉你坐監。

湯家驊： 唉！程翔先生咪就係咁羅！

吳藹儀： 仲有！有記者朋友係上面採訪PAAG時俾人毆打！

梁家傑： 梗係啦！採訪PAAG係洩漏國家機密。

余若薇： PAAG係上面stand for：「騙案愛滋」 (用國語讀)。

湯家驊： 「騙案」同「愛滋」係上面係唔可以亂咁報導架！

吳藹儀： 咁報導新聞既時候，點樣分辨乜野先係國家機密？

梁家傑： 好簡單！好多人想知既就係「國家機密」，無人想知既就唔係「國家機密」！

余若薇： 咁果期三千萬六合彩既攪珠結果，都好多人想知，唔通又叫做「國家機密」？

湯家驊： 咁駛唔駛成立一個獨立調查委員會去研究一下？

吳藹儀： 唔駛啦！d報告結果都係「遺憾」、「非人為錯誤」、「無人要負責」。無用架！

梁家傑： 唔怪得有人要求特首要正視吓呢個問題羅！

余若薇： 講開特首，下屆特首點睇？

湯家驊： 我有個識測字既朋友，我問佢：曾蔭權連任機會大唔大？

吳藹儀： 大唔大呀？

湯家驊： 曾蔭權，即係有上面極大既權力庇蔭住。

梁家傑： 咁佢咪實成功連任？

湯家驊： 唔係喎！因為「曾」字係廣東話中除左讀「曾」字外，仲可以讀「曾經」既「曾」字。「曾經」即係過去式，past tense啦！

余若薇： 咁邊個最有機會呢？

湯家驊： 邊個最有機會？就要靠各位記者朋友，不辭勞苦咁去搵料報導俾我地知。

余吳梁湯： 各位辛苦哂！

完

二零零六年五月