十大俗語 - 2006年

Hong Kong Top Ten - 十大俗語
介紹香港既深層地道文化
第一集係介紹香港最多人講既十句俗語
要了解一個地方既人民精神面貌同心理狀況
可以從當地最流行既俗語出發
我地係呢一集同大家倒數十大俗語
好！去片？

第十位係「有冇Jetso？」
Jetso廣東話既意思係著數。即係利益
香港係一個發達的資本主義社會
叫人幫手做野係需要付出代價、利益
先有人肯幫手
所以有人話香港人奉行實用主義，
舉個例子：
A： Tommy, 你去開老麥，順便幫我買個包？
T：有冇Jetso先？
A：有，請你食杯新地啦
T：OK！殺你
大家記住：第十位「有冇Jetso？」


第九位係「係咪玩野？」
廣東話既意思係唔好係我面前耍花樣，
香港係一個重視強勢既社會
一D帶恐嚇性既俗語往往帶黎著數，
呢句俗語除咗古惑仔睇場時候常用之外
消費者係投訴時候都會用到
政府呼籲：消費權益係你手 據理力爭要開口
店舖通常會優先處理惡型惡相既消費者
舉個例子：
C：先生，我上個禮拜係度買隻DVD
封面名名寫 “斷背心續集”
返去睇點解係卡通片？
J：我地無賣呢隻DVD喎! 有冇單？
C：我明明係度買，單乜野？
「係咪玩野？」快D回水!
J：是但，怕咗你。
大家記住：第九位「係咪玩野？」

第八位係「是但啦！ 你話啦！」
廣東話既意思係你幫我出主意啦，我無所謂
呢句係男女拍拖食飯睇戲常見對白。
無主見既一方 (通常女性) 會由對方出主意
但係去到一D重要決定，例如要乜生日禮物
女方就會立即變得好有主見
知道自己要D乜野
除咗男女關係，
呢句俗語都會用係一D日常重覆小決定
舉個例子：
T：Jeannie 就快生日，請佢食飯囉？
C：「是但啦 你話啦」
T：去邊間食？
C：「是但啦 你話啦」
T：下個禮拜四晚尖沙咀呀？
C：「是但啦 你話啦」
T：你請埋我？
C：請你個頭！
大家記住：第八位「是但啦！ 你話啦！」

第七位係「咁out架！」
廣東話既意思係乜你咁落後？
呢句係愛追潮流男女常用俗語。
香港係一個「先敬籮衣後敬人」既地方，
青少年驚自己唔夠吸引力而緊追潮流
時髦男女一見到稍為老土既人
就會好嫌棄咁講「咁out架！」
從而突出自己係幾咁緊貼潮流脈搏
拒絕成為影響市容既老土人士
舉個例子：
C：Tommy, 你見過我呢隻手錶嗎？
T：哦，有電視睇個隻錶，我都訂咗
C：你錯啦！呢隻手錶除咗電視，仲可以上網
影印同碎紙
T：我聽都未聽過！
C：上季係挪威推出咗！乜你「咁out 架！」
大家記住：第七位「咁out架！」


第六位係「好潮呀！」
廣東話既意思係好追得上潮流尖端
呢句係自命追潮流男女常用俗語。
香港受到東西文化流行潮流的沖擊
愛追潮流男女一見著得時髦既同類
就會產生共鳴，好讚嘆咁講「好潮呀！」
從而鞏固圍內同聲同氣的歸屬感
亙相增加集體安全感
舉個例子：
J：Tommy, 你今日對眼咁綠既？
T：哦，我帶咗對新contact lens ！
J：你咪已經上個月做咗激光糾視手術？
T：係，不過而家又興返帶colour contact lens
你睇真D，contact lens 雕咗兩個英文字！
係「LV」呀！
J：嘩！「好潮呀！」
大家記住：第六位係「好潮呀！」

第五位係「吹水咩？」
廣東話既意思係唔信任對方說話既俗語
香港人資訊發達，時刻都會接收最新消息
當對方說話令人懷疑，就會用呢一句
有時一班人講緊八卦野既時候
如果有人講出一D驚人內幕消息
就會有人講「吹水咩？」
表示自己有一套獨特相反睇法，唔隨波逐流
舉個例子：
C：Tommy, 你知唔知道David 拍拖？
T：哦？David 咁醜都有人吼？
C：係呀！David 個女友好靓女架！
T：係？一朶鮮花插在牛糞上
不如等我搶David 個女友做我女朋友啦！
C：唔使啦！David 個女友咪係你個女朋友囉！
T：嘩！「吹水咩？」
大家記住：第五位係「吹水咩？」


第四位係「閃啦！」
廣東話既意思係毫不猶豫立即離開
香港人趕時間，分秒必爭
對於無興趣的事物就會立即產生離開意圖
並且有呼籲同伴一齊走而不抗議
或者一班人OT既時候
有人會趁老細視線離開既時候
就會向同事講「閃啦！」
呢一句同光撐撐既鑽石或者天上星星無關係
舉個例子：
C：Tommy, 今晚個場好悶，無靓女既？
T：都唔係，果面有個女仔，背住我地幾靓！
C：背住我地跳舞都知道佢靓？
T：係，我既直覺好準，佢轉身勒！
C：吓？有喉核既？
T：弊！佢仲向我地笑淫淫咁行埋黎呀！
C&T：嘩！「閃啦！」
大家記住：第四位係「閃啦！」


第三位係「e俾你！」
廣東話意思係用電腦e-mail一D資料俾人
香港平均每人擁有2部電腦
無論商業交易或者朋友聯誼都靠e-mail
商業文件、朋友相片、趣味短片
都靠e-mail傳送
當人承諾e-mail一D資料俾人既時候
就會講「e俾你！」
呢一句亦同時變成大量Junk mail 既兇手
舉個例子：
C：Tommy, 可唔可以15分鐘內e份預算俾我？
T：唔得，我要等會計部e條數俾我先俾得你！
C：咁會計部幾時e俾你？
T：營業部未交數俾會計部！你問營業部先啦！
C：吓？我咪營業部囉！
T：係呀？咁你快D交數！e埋俾我呀！
C：好！一於「e俾你！」
大家記住：第三位係「e俾你！」


第二位係「電聯！」
廣東話意思係用手提電話聯絡
係一種客套話
已經取代咗「得閒飲茶」
香港平均每人擁有2 .3部手提電話
大大提高「電聯！」呢句說話既流行程度
普通相識係街度撞到，兩三句寒暄後
就會講「電聯！」黎終止對話！
或者同朋友相約係某地方約會
又未確實時間、地點同人物既時候
就會講「再電聯！」
呢一句亦同時變成大量放飛機既幇兇
舉個例子：
C：Tommy，食飯之後去唱K囉？
T：唔得喎！要幇朋友整電腦！
C：吓？聽晚先整啦！
T：唔得！應承咗朋友好耐，推唔甩
C：唱一陣囉！
T：唔得！我份人最講信用！最重友情！
C：係呀？Carmen都去喎！
T：吓？靓女Carmen！正喎！
一於去！邊度唱？
C：未定地點，十點鐘「電聯！」
大家記住：第二位係「電聯！」


能夠擊敗「電聯！」成為第一位既俗語
一定好具份量
各位既觀眾
Hong Kong top ten 十大俗語
第一位係「 超低能！勁搞笑！」
廣東話意思係「嚴重蠢鈍，非常滑稽」
係一種青少年愛用既輕量級攻擊性助語詞
係無惡意既「共同語言」
香港人出名壓力大，精神緊張！
所以渴望遇到「勁搞笑」既人物
用黎舒緩自己既壓力
或者取笑身邊人「 超低能！」
將自己既歡笑建築係人地既痛苦上！
另一方面
「 勁搞笑！」亦會形容一D可愛既人物
而講呢D俗語既人通常唔會大過16歲
舉個例子：
C：Jeannie，聽講你去咗小學教書喎？
J：唔！
C：班小學生點呀？難唔難教呀？
J：「 勁低能！」囉！
C：咁D同事點呀？夾唔夾呢？
J：「 超搞笑！」囉！
C：吓？咁校長點呀？
J：「 超搞笑！勁低能！」囉！
C：吓？咁D家長點呀？
J：「 超勁低能！勁超搞笑！」囉！
大家記住：第一位係「 勁低能！超搞笑！」

好啦！我地Count down 完香港十大俗語
大家係咪對香港文化加深咗認識呢？
好啦！我地預告下集節目精釆內容
下集我地帶大家Count down
香港十大拍拖勝地
拜拜

二零零六年四月