電視勸喻

電視勸喻

二十年前，當互聯網仍未普及，電視具有最大的傳媒影響力。那個年代，在電視作出的勸喻或呼籲，最具效益。今次我就選出十句在電視機經常聽到的勸喻。（註：是次數榜並不包括政府宣傳短片的口號）

第十位：「提防假冒，請認明鐳射商標。」

假貨偽品充斥市面，魚目混珠，舉例：Tempo紙巾好賣之後，出現Tampo、Temper、Tempa。而一些搶手的特效藥品，經常出現假貨冒充。所以生產商發明「鐳射商標」，分辨真偽。生產商在電視廣告中，對目標觀眾勸喻：「提防假冒，請認明鐳射商標。」但須知鐳射商標都有得假冒架喎。

第九位：「大病梗係要睇醫生！」

傷風喉痛頭暈肚痾的成藥電視廣告，sell自己藥力最有效。服一粒，睡一晚，便藥到病除。一般簡單的頭暈身熱，成藥仲可以幫到手。但一遇上嚴重大病，都係揾醫生穩陣啲。所以廣告出現：「大病梗係要睇醫生！」身體緊要，幾百蚊去睇醫生，唔慳得架！

第八位：「大家快啲打嚟『匯應通熱線』！」

90年代，TVB發明了「匯應通熱線」，用作反映觀眾意見、參加遊戲或投票。「匯應通」廣泛使用於勁歌金曲、籌款節目、資訊節目等。電視節目主持人向觀眾呼籲：「大家快啲打嚟『匯應通熱線』，電訊公司將收取一蚊手續費。」

第七位：「以下節目含成年人內容，敬請家長留意。」

當電視內容包含色情或暴力成份，兒童不宜。螢光幕出現Parents Guide：PG家長指引，叫家長多加留意。不過互聯網咁發達，父母都唔知仔女上網睇緊X級喇。電視台要遵守電訊管理局的指引，於晚上9:30後，才可滲入不適合兒童的情節。勸喻觀眾：「以下節目含成年人內容，敬請家長留意。」

第六位：「夜深啦，請將音量盡量收細。」

呢一句應該有幾十年歷史，細細個已經聽到而家。好多居住擠迫的環境，鄰居因電視聲浪而引致糾紛或暴力事件。12時後，電視台呼籲：「夜深啦，請將音量盡量收細。」不過而家都無乜人睇電視，觀眾早已關上電視。而呢句呼籲近年來已經停播了。

第五位：「100條熱線，大家快啲打嚟，踴躍捐輸啦！」

香港人出名最有善心，每年的慈善節目，都共襄善舉。鄭裕玲、曾志偉、鄧梓峰向電視螢光幕旁的觀眾呼籲。主持人齊聲唸出：「100條熱線，大家快啲打嚟，踴躍捐輸啦！」鏡頭即轉向幾排接緊電話的工作人員，密密接聽。後面電子顯示器打出上升的善款數字。

第四位：「我哋俾啲熱烈嘅掌聲…」

一些佳節綜藝節目或者籌款節目，請了歌星嘉賓，或請了名人頒獎，主持人知道以下呢位嘉賓好有份量，先帶動氣氛，向現場觀眾說：「我哋俾啲熱烈嘅掌聲…」以前有「罐頭掌聲」，現今有「專業fans」，都能夠製造出熱烈嘅掌聲同氣氛。

第三位：「廣告返嚟，大家千祈唔好走開！」

商營電視台靠廣告維生，每十五分鐘出一次廣告。節目主持人擔心廣告後，觀眾會轉台，流失觀眾。為了防止觀眾轉冶，主持人預告下一節有什麼精彩節目，呼籲：「廣告返嚟，大家千祈唔好走開！」但觀眾點會咁忠心？無興趣就轉台熄機或者上網好過喇。

第二位：「經過長時間嚴格訓練，小朋友切勿模仿！」

慈善籌款節目，藝人飛車潛水吞刀心口碎大石，這些高難度的危險表演，驚小朋友有樣學樣，節目主持人會呼籲：「佢哋經過長時間嚴格訓練，小朋友切勿模仿！」而家資訊發達，小朋友乜都睇過，無上一代咁單純，又點會輕易模仿呢？

第一位：「信則有、不信則無。」

靈異鬼怪風水玄學的電視節目，講一些科學解釋唔到的東西。為了釋去電視台「鼓吹迷信」之嫌，主持人講完一單靈異事件後，向觀眾煞有介事咁講：「信則有、不信則無。」，信唔信就悉隨尊便了。

完

二少爺說︰電視都已經越來越少人睇，我們下一代不再是睇電視大，而是上網大打機大。