口是心非

口是心非

「口是心非」並不是女人的專利，男人講嘢，一樣可以無句真。今次數一數男士 「口是心非」的說話。

第十位：「嘩！好靚呀！」
大家初相識，首先學習如何欣賞對方；或者將彼此缺點看成優點。目的是讓她覺得有人明白自己和賞自己。女友了新買的衣衫鞋袋、整了新髮型、做了漂牙、纖體或剪髮，問男友 ：「靚唔靚？」，男友見到立即睜大對眼說說：「嘩！好靚呀！」當然呢句說話通常是反話。

第九位：「唔使急，我等得！」
女性要兼顧儀容的範疇，比男性的較多。男友因女友化妝換衫需時而在街中呆呆乾等。遲了成粒鐘，打個電話追吓，女友話就快得！男友只好扮無事：「唔使急，我等得！」實則有怒氣！人人每日都係只得24小時，點解男友要為女友浪費時間？如果把等女友的時間加起來做運動，應該可以fit瘦過鄭多燕。

第八位：「我唔係嬲妳，我嬲自己之嘛！」
男友俾女友激到彈起，女友見到兩眼噴火青筋暴現的男友，慰問：「你嬲我呀？」男友又要死頂扮大方夠量度，晦氣回應：「我唔係嬲妳，我嬲自己之嘛！」咁答法罷明唔妥面前的女友，又要死忍。其實男友沒有口是心非，因他真的在嬲自己：嬲自己點解會有啲咁嘅女友？

第七位：「就當係我衰囉！」
如果男友知道激嬲了女朋友，自己將要用十倍氣力才能氹返掂個撐雞女友，為了息事寧人和不讓事情鬧大惡化，錯不在己的男友都會肯先認衰。當女友向男友無理取鬧時，男友死死地氣說：「就當係我衰囉！」男士硬食了這種顛倒是非。但這句並非100%口是心非！因為男友自嘆：搵個咁嘅女朋友 =「就當係我（自己攞嚟）衰囉！」

第六位：「我唔係玩玩吓！」 
為了讓魚上釣，真係幾肉麻骨痺的說話都講得出口。雄性天生擁有唔專一的DNA（因為要廣為繁殖下一代），能厚顏無恥講出一句：「我唔係玩玩吓！」或者「我係認真架！」其實心裡擺明就係玩厭就撇。講時仲要用堅定的眼神，一旦鬼祟閃縮就會露出心虛的馬腳。 

第五位：「我無事呀！」
面對面，口黑面黑，身為女友一定心知不妙，想為男友分擔一吓。戰戰兢兢慰問一吓：「你有咩嘢事吖？」男友基於自尊心，萬事自己一人扛。目無表情地回應：「我無事呀！」 不過繼續黑面。那一句「我無事呀！」背後應該已經惹了一身蟻。

第四位：「講你都唔識佢啦！」
這個答案，多數用來掩飾男士跟豬朋狗友約會的真正身份。女朋友不認識這些男朋友的死黨，但肯定不是什麼正經人家。平日話約了蛇明、阿榮、喪輝去行電腦商場踢波。女朋友問多兩句阿邊個係乜嘢人，換來男士一句：「講你都唔識佢啦！」這個死黨的背後真相身分，應該係一個妙齡少女。

第三位：「你鐘意啦！」 

講「你鐘意啦！」時，晦晦氣氣，無尾音，聽落掘雷搥。多數配合皺眉頭動作。例句︰女問：「你話買黑色呢件好？定係買白色呢件好呢？」男回應：「你鐘意啦！」女問：「不如我哋去食剌生囉？」男回應：「你鐘意啦！」 明明就唔想買，唔想食，但係偏偏要話「你鐘意啦！」，表面好似好就得人，但係語氣已經表達咗強烈嘅不滿，叫女友知難而退。

第二位：「我做緊嘢呀！」
男人以事業為重，尤其在香港這個資本主義社會之中，普遍的女性都會為努力工作的男士加分。所以，為咗做嘢，遲收工、出外應酬、出埠工幹，就是最佳隱瞞藉口。明明跟同事Happy Hour、或者同另一位靚女吃飯，都可以話：「我做緊嘢呀！」加多句：「遲啲call妳！」身為女性，最慘嘅就係唔可以表現出懷疑的語氣，否則換來男友一句：「我搏命賺錢都係為咗妳咋！」叫女士無話可說。 

第一位：「我知錯喇！」
出現頻率最高的「口是心非謊言」，就是呢一句：「我知錯喇！」或者「我一定會改過架！」幾時男士會真係知錯吖？犯錯認錯再犯錯再認錯。男士口中的「我知錯喇！」指知道自己今次行動不夠完美，從錯誤中檢討，汲取教訓，下次就要更加小心行事，無咁容易露出馬腳。

完

二少爺說︰犯錯要花心機，認錯要有演技。