黃道益活絡油

黃道益活絡油

22歲的Joanna是健身連鎖店的接待員，她在銅鑼灣上班。Joanna長得五官精緻，經常被健身教練「撩」。健身教練中，有醜樣、有自大、有粗鄙、有乸型，結果Joanna在云云健身教練中，揀了樣貌最「四正」的Rocky做男朋友。

25歲的Rocky在銅鑼灣租了一個單位，不久，Joanna為了方便返工，搬入一起同居。兩人一起上班下班，開始甜蜜的情侶生活。

Rocky除了教學生的時候，工餘時都會在健身室內做運動，操到自己肌肉一嚿嚿，省靚自己個body做生招牌。Rocky做運動前後，都喜歡塗黃道益活絡油，舒緩肌肉疼痛。是Rocky的健身師傅教他用黃道益，Rocky沿用至今。

每次Rocky回家，Joanna都聞到黃道益的獨有氣味。起初Joanna極度討厭黃道益陣味，但愛屋及污之下，久而久之，Joanna變得喜歡聞黃道益的氣味。

好景不常，Joanna被調去中環分店工作。因為輪班關係，Rocky和Joanna聚少離多，加上性格不合，兩人終於唔夾，多次商討後，兩人在和平氣氛下分手。Joanna拖著行李喼，離開了Rocky的單位。

＊        ＊　＊　＊　＊　＊

Joanna在中環分店，繼續被四肢發達的健身教練「撩」。Joanna在云云健身教練中，揀了30歲Keith做新男友。成熟的Keith沒有Rocky般有型，不過勝在細心。Keith在上環租了一個單位，不久，Joanna為了方便返工，搬入一起同居，兩人一起上班下班，開始另一段同居生活。

30歲的Keith，為人比Rocky成熟，懂得照顧和關心女友，噓寒問暖。又會給Joanna吃一些健康食品，迫她戒煙，早睡早起，假期捉她一起到郊區踏單車。跟Rocky只自顧打機、睇波和落酒吧不同。但Keith就有時長氣咗少少，令Joanna有點吃不消。Keith始終大自己8年，唔多唔少都有點代溝吧。

健身教練Keith喜歡在做運動前後，塗上曼秀雷敦摩擦膏，舒緩肌肉疼痛。每次Keith回家，Joanna都聞到曼秀雷敦摩擦膏的獨有氣味。Joanna極度討厭曼秀雷的氣味，開始懷念黃道益的氣味。Joanna決定游說Keith用黃道益活絡油，從中可以懷緬一吓跟Rocky一起的日子。

＊        ＊　＊　＊　＊　＊

這晚下班回家，Joanna和Keith看電視，Joanna好不經意咁講：「我睇過今期《選擇》月刊，中國古方嘅黃道益活絡油，含有冬青、樟腦、靈仙、當歸嘅藥材成份，功效好過西方藥廠製造嘅曼秀雷敦，化學嘢真係無益架。」Joanna勸Keith試用黃道益活絡油。Keith為了想Joanna開心，一口答應。

第二晚，Keith放工回家，他在運動袋中取出一支黃道益活絡油，向Joanna說：「我買咗嚟用啦！」Joanna見到Keith咁聽話，心都甜了。Keith說：「我俾錢嗰陣，casher送咗支L'Oreal潤膚霜俾我，話係贈品試用裝。」Joanna接過潤膚霜。Keith繼續補充：「講開又講，其實妳用『雪完美潤膚霜』，對皮膚唔好架，不如改用L'Oreal啦，上兩期《選擇》月刊講過，L'Oreal係最滋潤。」

Joanna想Keith開心，一口答應作為回報。感激地說：「我知你細心。連咁細微嘅嘢都有留意到。」自這晚起，Joanna可以在Keith家裡聞到Rocky的黃道益的氣味。懷念那段通宵打機煲煙飲酒的日子。

＊        ＊　＊　＊　＊　＊

兩星期後，某個早上，兩人上班前先到茶餐廳吃早餐。Joanna突然醒起：「呀！我支潤膚霜噚晚啱啱用哂，一陣買過支先。」Keith點頭。

結帳後，兩人由餐廳步行到健身室，路經「屈臣氏」，Joanna入去買潤膚霜。正當Joanna想步入之際，一個OL模樣的少女向Keith打招呼：「嗨！Keith，乜咁啱呀！」

Keith尷尬地：「係呀！乜咁啱呀！」

OL少女：「我今朝咁啱過嚟呢面見個客之嘛。」

Keith：「最近點呀？……..」

Joanna從兩人的對話內容中，猜想到OL少女是Keith的前度女友。

Keith 介紹Joanna給少女認識，Joanna跟少女握手，Joanna聞到一陣L'Oreal潤膚霜的氣味。Joanna今天早上沒有塗潤膚霜，很明顯，潤膚霜的香味是由OL少女手上傳到自己手上。

終於真相大白，Keith 帶Joanna到郊區踏單車、塗L'Oreal潤膚霜、不吸煙等表面上為她身體好的事情，其實只不過是想將Joanna複製成自己前度女友，找她做替代品。

Joanna沒有很大的情緒波動，畢竟他也有找Keith當Rocky的替身，你找我找你做替身，妳找我找妳做代替品。

Joanna步入「屈臣氏」買了一支「黃道益活絡油」和一支「雪完美潤膚霜」後，繼續如常，和Keith一起上班工作去。

完

二少爺說︰活著受罪但是又離不開。