小巴聲音

小巴聲音

香港其中一個地方特色是「亡命小巴」。你在小巴車廂內除了聽到汽車引擎聲外，你會聽到什麼聲音呢？現在就數一數小巴內聽到的十種聲音

第十位：收錢先

司機為了縮短行車時間，避免乘客落車時才慢慢摷銀包及找錢，乘客一上車，司機就要乘客先付款找續後才坐低。尤其乘客手持一百或五百的紙幣。搭開搭熟的乘客會自動自覺先俾車費，先俾錢才享用服務。

第九位：前面有薄絡（Block）扣安全帶

政府實施「小巴設置安全帶，乘客上車需配戴」後，十個乘客中只得兩一兩個會戴，話之你罰5000蚊及坐監3個月。司機亦懶得理會貴客自理。但如果前面遇上警察路障，司機都會好心提乘客一句：「未扣快扣！」霎時間乘客立即找椅上安全扣，快而不亂，又快手又齊心。（不過通常有警方臥底早坐在車廂內）。

第八位：經唔經邊度？

通常有些中年人或長者未登車前問：「司機，經唔經邊度呀？」為什麼是中年長者發問而很少後生仔會問司機呢？因為年輕人除了比較醒目之外，他們由於怕瘀而不敢隨便開口問人。最多坐錯車後再駁其他車輛。司機為了做生意一般都會回答：「經，不過要行多幾步。」例如：「經香港公園！我喺威靈頓街落俾你，行幾步就到。」

第七位：乘客對話

16位乘客，怎可能會個個都係啞？婦人學生妹OL上車啄唔斷，或者趁乘車時間跟朋友用手電聯誼。不過近來多人用了whatsapp，靜了不少。「乘客對話」也有「繁忙時間」和「非繁忙時間」之分，早上返工時大家爭取時間瞓覺，全車靜默，除了司機聽電台晨早phone-in節目的收音機聲音，下午5時後至深宵則是「繁忙時間」，乘客講是非、談心、訴苦、嗌咬等等。

第六位：Walkie Talkie對話

路面交通情況對於司機十分重要，能否走多幾多轉賺多啲錢。所以司機們裝有Walkie Talkie設備，交換路面情況之餘，邊度塞車邊度映快相，仲會吹吓水以解開工時的苦悶。對話內容有時都幾精彩，包括：那舖食唔出的麻雀大牌、深圳的骨妹、部車嘅油箱要睇睇、今晚邊度宵夜？邊個醫生醫風濕最叻等等。有時司機對話互窒之精彩，比大巴的Roadshow更具娛樂性。

第五位：強勁音樂

如果見到司機位已改裝成跑車seat位，加上一支螢光波棍，就一定配上兩座鴨寮街大喇叭，播放的一定是disco快bit勁歌。司機一聽勁歌就如「標童」般踩油加速。爬頭、抽頭、cut雙白、搶街客。相信不少「貨van」司機客串（改行）揸「客van」，將貨van司機「fung機」文化引入16座小巴。

第四位：有落！

乘客需要嗌「有落！」司機才會停車落客。有時因為音響太嘈或乘客太細聲，司機聽唔到而導致雙方發生爭抝。有些女乘客不想大聲嗌失儀而等待其他乘客叫落，如果無其他乘客叫落則自己要頂硬上試嗌，有時因為雙層巴士埋站而小巴司機貪方便唔cut入，就會在中間線叫乘客落車，乘客驚問：「喺呢度落車咁危險？」司機答：「咁大個人識唔識睇車呀？慢慢落咪得囉！」

第三位：坐喺車頭先，好快有人落車！

在繁忙時間乘客求過於供，他們務求盡快乘車上班或回家，只要能鑽上車就不介意坐邊度。16個座位之外，有2個「臨時位」後加喺車頭車尾。如果客滿又有人截車，司機就對客講：「坐喺車頭先，下個街口就有人落車。」乘客如果唔介意便會偷雞坐低！（但已造成小巴超載）。

第二位：讓個孖位，快啲開車！

香港人不喜歡跟陌生人共坐，如果小巴的孖位被先登車的單客獨坐。想登車的情侶見到沒有連坐便想改乘下一班，司機為了快啲開車就對其中一個單仃乘客講：「呢位哥仔，唔該讓個孖位，快啲開車！」通常大家想快啲開車都會知情識趣；讓出孖位給情侶繼續痴纏傾偈。但也有客人打死都唔肯讓出孖位。

第一位：時速計提示聲

超速小巴換來「亡命van仔」的美譽。小巴車廂內安裝「時速計提示器」。一過80咪就咇咇叫。提示器指示80、90、100直線上升，咇咇聲就越叫越急越大聲。引擎聲、車軸震動聲、車呔磨擦聲、乘客心跳聲、司機呼吸聲、強勁音樂聲，咇咇警告聲，構成一曲「本土環境音樂」。

其他小巴聲音包括：「後數」、「司機，有冇兩個位呀？」、「唔該燈前」、「唔該轉車向前面架van」、「落車先找錢俾你」、「有冇碎紙呀？」、「嘩！炒埋一堆咁大鑊！」、「無人落就上天橋。」、「紅隧而家靚仔哂！」等等。

完

二少爺說：20分鐘由銅鑼灣到元朗，堪稱一個出色車手。