Kiss Me Goodbye

Kiss Me Goodbye

日本靜岡市的某間商務酒店大門前，一輛豐田房車停下，車內坐了一對中年男女，女的做司機、男的做乘客，他們似是情侶，又似是普通朋友。

男的叫Danny，已婚，娶了一位香港太太。Danny在香港某製衣廠工作，公司派Danny到日本公幹七天，在靜岡市某機械生產商學習操控某部先進毛線編織機的技術。他住在商務酒店，每天的工作就是去該生產商學習，技術交流。

女的叫田中小姐，已婚，嫁給一位日本先生。她在日本做傳譯工作。田中小姐的父親是日本人、母親是香港人，所以雙語都十分流利。這七天以來，田中小姐就貼身跟著Danny，做翻譯工作。下班後，田中小姐會駕她的豐田汽車，順道載Danny回酒店。

今晚就是他們最後一次告別，明天一早，Danny便起程乘飛機回香港。

這七天以來，Danny和田中小姐之間，怎會只得工作咁簡單？兩人雖然是第一次見面，但已經像相識了很久。眉目之間存在一點曖昧，但兩人都有太太和先生，怎能越雷池半步呢？只好把這份好感藏在心裡。

現在Danny和田中小姐獨處在車廂中，夜幕低垂，下了一場雨。大家明白這一分鐘之後，可能呢一世都唔會再遇上，難掩依依不捨。

Danny睇過不少愛情日劇，都見過呢一幕溫馨場面。Danny和田中小姐四目交投，察覺有電力交流。兩個鼻樑之間，只有幾寸距離，嘩！點先？Danny要把握呢個千載難逢的黃金機會。

Danny心諗：自已是代表香港人，不可以在日本人面前失禮。Danny要選擇一個最佳的吻別位置，如果錫錯位置，就會令女方留下壞印象，成件事「禍」哂！絕對唔可以立亂就咀埋去咁魯莽架！

Danny再諗：『唔～ 如果輕吻田中小姐的嘴唇邊，就會係「more than friend less than lover」。呢個位置幾啱個處境，唔錯喎，可以考慮考慮。

唔～ 如果輕吻田中小姐的額頭呢？咁就太pure太純情啦！似daddy臨瞓前錫個5歲囡囡咁，但係cute cute地喎，可能日本女仔受喎，可以考慮考慮。

唔～ 如果輕吻田中小姐的手背呢？咁就好似對待皇室人員咁啦！香港女仔就多「公主病」啫，唔知日本女仔崇唔崇拜日本天皇呢？可以考慮考慮。

唔～ 如果輕吻田中小姐的嘴唇呢？嘩！可能乾柴烈火，一發不可收拾喎！酒店房在樓上噃，唔知田中小姐會唔會同我一樣，瞞著我哋嘅老婆老公，成為終生嘅秘密呢？呢個真係要認真考慮考慮。

咁點算呀？！咁多選擇，Goodbye kiss揀邊個位？先至啱呀？』

終於……

「砵～砵～砵～」

Danny猶豫不決之際，浪漫溫馨的氣氛被後面架Benz的大聲響咹打破了。

原來Danny優柔寡斷的性格，Dead air咗成分鐘，田中小姐的房車阻住後面Benz的去路。無耐性的Benz司機響咹。田中小姐好似警醒咗，突然想起自己有老公，立即點頭：「輸免媽些」，靦腆地、禮貌地鞠躬答謝和告別。

Danny尷尬地怱怱下車，望著汽車駛遠。乜嘢fantasy都無唒，連美麗的回憶都無埋。唉～衰在自己三心兩意，拿唔定主意。而家乜都無啦，唯有將呢一幕放在心裡，久唔久攞出嚟回味一吓。

完

後記：故事靈感來自以下呢首歌。


吻別的位置 - 李克勤
作曲：梁詠琪
填詞：黃偉文

這幾個月　天天見面
彷彿共你　碰上幾年
車廂裡面　終於獨處
無奈將要到終點

下了車　下半生未必可遇見
護送歸家　溫馨場面
眉目就像　接近傳電　但擦肩

誰不想　繼續片刻的暖昧
但還是　必須告辭
其實我　也想知　這禁戀可有開始
臨走我　若然是　吻你一次
吻在唇上　我會否很造次
情願你　提示我知　吻別的位置

下半生　就算再次街中遇見
沒有今晚　這種條件
矇矓慾望　乍滅還現　未看穿

誰不想　繼續片刻的曖昧
但還是　必須告辭
其實我　也想知　這禁戀可有開始
臨走我　若然是　吻你一次
吻在唇上　我會否很造次
情願你　提示我知

唇邊輕吻是友好的表示
額頭上　不只友誼
還是吻　你的手　情願拘緊似君子
如今世　沒緣份　再吻一次
趁著離別　你會否都願意
瞞著我們另一半　有心事
還讓愛情定格於　吻別的位置