娛樂新聞

娛樂新聞

香港人的資訊生活要娛樂化，
24小時娛樂新聞台、
娛樂八卦雜誌洛陽紙貴、
大報港聞版頭條娛樂化、
其實娛樂新聞百變不離其中，
現把娛樂新聞作以下十種分類：

第十位：同性戀
讀者對藝人「係唔係」已有主觀意願推測，
希望由雜誌代為證實自己的觀點，
邊個係？邊個唔係？
邊個係但扮唔係？邊個唔係但又扮係？
狗仔隊深入同志派對、老蘭、南灣清邁三藩市、
有些藝人直認不違、認認地、發毒誓打死都唔認！

第九位：鬼神撞邪
藝人其實是「撈偏門」，
（只要沒有固定收入的工作就叫撈偏門），
「撈偏門」多數迷信，求神拜佛。
狗仔隊偷拍藝人拜乜神教、教會扮告解、
搵白龍王、養鬼仔、借運、改名催運、
飾物轉運、風水擺陣、點廷命燈、拍戲撞鬼！
讀者當「明星版怪異集」咁追睇。

第八位：刑事犯法
50-70年代藝人享有高尚社會地位，有派頭有排場。
到今天藝人則親民化（平民化平庸化）得多了！
所以讀者對於藝人犯法不會大驚小怪。
藝人頂包案、吸毒藏毒、高買、賣淫、
刑事打鬥、行賄、商業罪案、走數等等。
讀者會戴「幸災樂禍、睇人落難」的眼鏡，
欣賞藝人受審收監的落寞落難神情；
體驗「有咁耐風流法，有咁耐折墜！」的精神。

第七位：出世病危逝世
平凡人的「生老病死」都極之平常，
但藝人的「生老病死」就有新聞價值。
新出世BB：幾重？改乜名？似邊個？契爺係邊個？
病危床上：有無身家剩？有幾瘦？仲有幾耐命？乜遺言？
受傷入院：拍戲受傷還是意外？會唔會殘廢？留疤痕？
自殺：原因？過程？先兆？推測？搏宣傳？
藝人逝世就睇佢係「天王巨星」定係「甘草」，
「殿堂級巨星」就講佢顯赫輝煌，奉獻一生給演藝事業、
「甘草演員」就講佢幾咁折墜坎坷老倒（或者直情唔報）。

第六位：緋聞情變復合結婚離婚
藝人的「男歡女愛故事」是讀者最咬牙切齒的新聞，
「一早睇出佢地有路！」、「佢地邊度襯呀？」、
「一早就應該離婚！」、「好心佢啦！返兜再返兜」、
「佢咁窮！點可能追到手呀？」、等等。
戲假情真、愛情紋身、偷賦同居、世紀婚禮、
婚外情、婚姻紅燈、離婚再婚、三角四角戀、
返兜復合、地下情曝光、閃電結婚、同高層有路，等等。
讀者用每對藝人的離合來引證自己的眼光是否獨到。

第五位：揭人瘡疤私隱起底
讀者喜歡看到藝人不光彩的一面，
平衡自已得不到明星光芒的「酸葡萄心理」。
讀者和記者就一起極盡能事去刮料。
未紅前做小姐、曾拍過裸照、被富商包起、
酗酒傷人、濫藥、大食（性慾或胃口）、爛賭爛蒲、
曾遭人虐打、笑藝人賣平衫食平嘢、私生子起底、
藝人爭人錢、幫父母還賭債、喝駡助手空姐售貨員，
記者影相就有咁樣衰影咁樣衰！
專揀藝人矇眼、藐嘴、嗡鼻、撩鼻、
雙下巴、青根暴現、大食樣等。
讀者就越睇就越大發人心！（原來藝人都係咁醜樣啫）。

第四位：整容豐胸禿頭暴肥
藝人的身材外貌就是他星運的戰場，
也是讀者嘴裡的吹氣娃娃（講嚟發洩或獲得滿足）。
邊個割雙眼皮抽脂？邊個打羊胎素？
邊個去豐胸升cup？邊個去隆鼻磨面骨？
邊個纖體後又暴肥？邊個其實禿頭要植髮？
邊個整容後面部凹陷？邊個成日拉面皮？
讀者把藝人的外在美歸咎（歸功）於「後天人造工程」，
明星沒有什麼值得馨香！

第三位：神經錯亂自殺躁狂失控崩潰食藥
香港人精神緊張皮質醇偏高，
藝人擔心自己人氣下滑而承受巨大壓力仲最後黐咗線！
陳寶蓮（已逝）、蔡楓華、藍潔英、洪朝豐等要服藥，
還有一些躁狂表現：羅兆輝、萬梓良、陳小春、何超儀，
鄭秀文、林夕、林建明、患有情緒病，
讀者有些是關心、有些是「睇你點折墮」，
有些則同情之餘帶絲絲心涼。

第二位：明爭暗鬥杯葛駡戰
有人嘅地方就有是非，
娛樂圈正是「是非圈」的放大版。
電視姐仔爭排位、拍劇遲到遭圍攻、
大婆新歡隔空駡戰、組合口和心不和、
選美佳麗互爆陰私、歌星爭唱大show壓軸、
師徒為錢反面、子女爭產反目成仇、
歌星經理人互數對方不是、砲轟高層徇私！
讀者利用自己應有的「知情權」，
為平淡生活添加戲劇元素。

第一位：性感照片 / 走光
在街上有少女走光，已經引人偷窺，
何況是公眾人物走光？
以前走光照片分「專登」和「無心」兩種，
到了今天，無論對於當時人或讀者來說；
走光已難分「有心定無意」。
你越影，我越見報！
露底露Bra、表演時露乳甩褲、踎低身擘骴、
選美泳衣露毛見橙紋、電影大膽演出率先披露，
還有偷拍泳池邊推油、藝人家中親熱照、
荒淫迷幻派對、野戰車震、自拍床照。
讀者當「明星版龍虎豹」咁爭住買。
一書價錢，兩種享受，一紙風行，火速售罄！

其他報導有：「揚威海外影展」、
「明星搞生意開張（倒閉）」、「Ball著幾貴衫（幾cheap）」、
「環保 / 慈善探訪大使」、「片酬比拚」、
「直擊慶功宴」、「收咗幾多錢做代言人」、
「藝人留宿夜聚」、「買零食買煙買雜誌影碟」、
「嫁人退出娛樂圈從良」、
「嫁人退出娛樂圈從良，但臨尾遭反對婚事告吹」等等。