極速

極速

阿偉在銅鑼灣茶餐廳做侍應，每晚凌晨2時才下班。家住元朗的阿偉，喜歡搭「亡命van」返屋企，貪佢夠快。由開車到落車，只需25分鐘。

在小巴車廂內，有乘客喜歡玩電話、打機、睇漫畫、聽歌等等。但阿偉一定會選擇瞓覺。因為阿偉覺得他始終有一天會「命喪在亡命小巴手上」，如果他在神智清醒的情況下遇上車禍，他會承受極度的驚恐和身體痛楚，折騰一番才死去，十分恐怖。但如果阿偉是在睡眠中遇上車禍，他便會在無知覺無痛苦中死去，既然要死，死都要死得舒服嘛。

加上阿偉工作勞累，一坐低便可以瞓著。阿偉是在元朗小巴總站落車，通常阿偉會被司機叫醒佢落車。阿偉在小巴睡覺的習慣，十年如一日，到目前為止，Touch wood講句，他都未遇過任何交通意外。

＊　＊　＊　＊

阿偉這晚放工，深夜2時半踏上「亡命小巴」。阿偉通常會望一望司機，評估一吓佢手車會有幾辣。是晚這個後生司機剷punk頭又紋身，周身穿滿金屬環，加上一件鍋釘爛皮背心。這名司機列入「三級危險人物」。阿偉坐下，閉上眼晴，等了幾分鐘後，感覺到小巴開車離站了。

司機選播的勁歌是鄭伊健的《極速》，司機突然扭大聲：「♪ 誰敢來踩界 ♫」車廂內瞓緊的阿偉被佢嘈醒咗。唔知點解今晚阿偉失眠，想瞓都瞓唔返。阿偉雖然閉上眼晴，但聽到路速器「咇咇聲」狂叫，應該有140米。阿偉產生莫名的恐懼，唔通個天暗示俾我知：今晚會炒車？命喪公路上？唔通冥冥之中自有主宰？

阿偉張開眼晴，想望一望架小巴去到邊？原來小巴已經駛出大欖隧道，還有五分鐘車程便可回家，希望無驚無險啦！阿偉正想再閉上眼晴時，突然「砰！」一聲巨響！小巴失控高速撞埋石壆，反彈翻車越過對面行車線，一間貨車迎面撞埋小巴。十六位乘客加埋司機在車廂內如骰盅內的骰一般，亂成一團，無戴安全帶的乘客撞向玻璃窗，血肉橫飛，痛苦嘶叫。阿偉最唔想發生的事情，今晚終於發生在自己身上，自己被夾在前後兩排座位之間，肋骨拆斷，大量出血，真係好痛呀！阿偉昏迷了。

＊　＊　＊　＊　

阿偉再次甦醒過來，天花板不是醫院病房，身上沒有插上喉管。只見到小巴車廂頂的昏暗黃燈，小巴司機：「喂！總站啦！落車呀！」原來阿偉上車後便睡著，司機播鄭伊健《極速》那段情節，全是夢境。自己已經安全抵達元朗小巴總站。

嚇得阿偉全身冷汗，立即執返身彩落小巴。阿偉心忖：「頭先好恐怖呀！嚇死我！」口乾頸涸，他想到7-11買嘢飲，要定一定經。

當阿偉行到便利店門前，突然一間房車以高速剷上行人路，「砰嘭」一聲！直將阿偉撞倒，他被夾在車頭和便利店外牆之間，肋骨拆斷，大量出血，真係好痛苦呀！

阿偉希望這一幕也是夢境，可惜痛楚比剛才所受的痛苦大10倍。真是痛到入心入肺，真的假不了！今次嚟真。阿偉臨死前見到擋風玻璃內的金毛司機，鼻頭染有白色粉末，那名呆滯的索K司機，誤將油門當Break，剷上行人路撞倒阿偉。阿偉垂死前說：「唔通冥冥之中自有主宰？」

阿偉原本以為可以死得舒服，結果他一生人中要前後經歷「兩次死亡折磨和痛楚」後才可以死去。命運總愛跟世人開玩笑。

完

二少爺說︰是禍躲不過。