唱K回憶錄

 

唱K回憶錄

第一次唱K

我第一次唱K，應該是1988年吧。那年聖誕節前夕，我跟中學同學去旺角火車站上蓋的一間酒廊餐廳吃晚飯。因有一名男同學之前去過，大讚好玩，叫我們一起去玩。

現時位於旺角火車站的美心快餐店，27年前是一間酒廊餐廳，餐廳中央置有一座電子琴。菜單是多款「扖餐」，枱上有紙筆，填上枱號和想唱的歌，交給侍應。8時許，琴師出現，他的外貌有點像「大L」，是那種喉沙煙酒夜鬼Feel（當然我知道他不是大L）。他開始叫枱號，顧客便興高釆烈走上枱，由電子琴伴奏，顧客引聲高歌。

第一首K歌

當我飲緊忌簾湯時，琴師叫我們的枱號。第一次唱K喎！我唔多唔少都好緊張啦！我怕醜唔夠膽獨唱，我一行三人走上台，琴師按琴鍵，音樂引子起。是齊秦的《大約在冬季》。這首歌在那個年代十分火紅，國語歌再打入本地市場。沒有它，就沒有後來的張洪量、趙傳、陳淑華、李宗盛和滾石。

講返唱K，有人壯膽下，唱完最後一句：「♪ 會是在….冬~~季 ♫」之後，台下同學們鼓掌，我沒有自我放大扮歌星的投射，只像初中生上音樂堂的感覺。我返回位繼續飲涼了的忌簾湯。這就是我第一次唱K的印象。

K歌養大我

踏入90年代，卡拉OK如雨後春筍，由借LD入房唱、到DJ入歌、到電腦自動化。由K Buffet、K Lunch、睇英超、打遊戲機到K房獨立廁所，卡拉OK經歷過幾次脫變。

唱K最瘋狂的時候是大學時代，放學放假走堂去唱K。一百幾十元買一個私人空間供我們唱歌發洩。我成長的愛情觀，也是由K歌中汲取，所以難免會偏向悲觀。林振強、林夕、黃偉文、周耀輝就是神父，K房就是教堂，K歌就是聖詩，培養虔誠的K教徒。

時代再壞 時代再好 也只是唱一種悲歌

卡拉OK的光輝不再，以前生日過節迎新送舊升職洗塵annual dinner，都去唱K，好難訂位。現在則隨時都有位。年青人唔出街唱K，在家中上網就可以消磨整個晚上，經互聯網一樣可以跟朋友聯誼。難怪卡拉OK邁向末路。加上商場租金昂貴，卡拉OK經營艱難下，不斷收縮。以前有Big Echo、第一、Energy、加州紅等，現在只剩下一間集團式卡拉OK。

我上次去唱K已經是2010年的舊事，我的K腳早已變得心歸。我的唱K時代已成歷史，所有唱K的片段，都變成回憶。

完

二少爺說︰以前唱通宵都得，而家12時已經打喊路。