執子之手

執子之手

40歲的阿昌，是一個麻甩佬，一個未婚的麻甩佬。有云「男人四十憨居居」，阿昌不善交際，又不懂向別人表達自己的情感。阿昌的職業是貨車司機，因為他愛工作時對貨物多過對客人。

阿昌無拖拍，只有幾個男性死黨老友，久唔久放工後會飲吓啤酒炒幾碟小菜吹吓水。他的朋友都從事基層工作：的士司機、保安員、侍應和速遞員，五人一起吃飯，散發出一股草根的氣味。

阿昌的父親十年前因癌病去世，留下母親要供養。70歲的昌媽總算叫做身體健康，兩人住在黃大仙公屋。阿昌每月都有俾錢阿媽，不過就唔多會氹阿媽開心。有時更會嫌阿媽嘮叨。昌媽想抱孫，但阿昌連女性朋友隻手都未拖過，得個「恨」字。

昌媽閒來無嘢做，會到屋邨的老人社區中心，同老友記們傾吓偈睇吓電視過吓日辰，黃昏回家煮飯，等阿昌回家吃飯。

＊        ＊　＊　＊　＊　

星期六晚，阿昌打電話給阿媽：「阿媽，今晚我約咗朋友食飯，唔返嚟食啦。」

昌媽：「哦，你記得聽日朝早9點鐘，要車我去碼頭呀！」

阿昌這時才醒起，阿媽明天參加了屋邨老人中心的離島旅行，明早9時在中環港外線碼頭集合。剛才阿媽講起，阿昌才記得自己曾應承過會載阿媽去碼頭。

昌媽繼續：「記得早啲返，唔好飲酒揸車呀！」

阿昌咕嚕地敷衍：「得啦！咁大個人，有分數啦！」之後收線。

這晚，阿昌跟死黨們到深水埗吃小菜王，露天一桌五凳，兩打啤酒一枱餸菜，阿昌呼出煙圈，大啖大啖的大快朶頤。席間話題扯到去童年時代，五人想當年。

「的士輝」憶起讀幼稚園時，經常瀨尿，要阿媽拿乾淨褲來更換。

「侍應良」說他最喜歡那個教唱遊的女miss，希望大個會娶佢做老婆。

「保安權」說最懷念幼稚園的生日會蛋糕，因為屋企窮，不會買生日蛋糕給他。

「速遞雄」說他最希望放學時，阿媽會第一時間來接走他，可惜他永遠都是最後一個。

阿昌則記起讀幼稚園時：和他最老友的同學仔叫：「梁錦榮」，坐他隔離。有一天返學，昌媽帶自己到校巴站等校車時，六歲的阿昌見到梁錦榮，拉著媽媽的手走上前，向媽媽說：「佢係梁錦榮，係我好朋友嚟架。」小朋友愛把自己的喜惡告訴給媽媽。昌媽和梁錦榮阿媽打招呼，昌媽認識梁太後，雞啄唔斷，講的都是師奶話題。後來升上小學後，阿昌便和梁錦榮疏遠了。

懷舊時間完畢後，結帳走人。五人感到歲月催人，唏噓不已。

＊        ＊　＊　＊　＊　

星期日早上8時，昌媽叫醒睡夢中的阿昌，昌媽登上阿昌的貨van，穿過紅磡隧道去到中環碼頭。

阿昌和昌媽見到碼頭對開的空地，已有一班老人家和社區中心員工在集合。阿昌陪昌媽行去集合處，一位婆婆輕拍昌媽膊頭，昌媽回頭，笑哂口向婆婆打招呼：「早晨！黃太~」

昌媽向阿昌說：「叫黃太啦！黃太喺社區中心入面，同我最老友架啦！」

阿昌：「黃太~」

昌媽：「黃太，呢個我個仔，叫阿昌。」

黃太：「阿昌哥仔，好靚仔喔。」

昌媽：「哈哈！邊係吖！」

之後昌媽和黃太雞啄唔斷，阿昌在旁想得入神…

34年前一個相似的情景，34年後的今天再度發生，不過角色調換：

昨天的6歲兒子，變了今天70歲的媽媽。

從前媽媽送兒子到校巴站，變了今天兒子揸車送媽媽。

過去兒子介紹同學仔給媽媽認識，變了今天媽媽介紹老友記給兒子認識。

時間巨輪不斷向前推動，終點又轉回起點。

想得入呆的阿昌，被黃太叫醒：「阿昌哥仔，我個女阿芬呀。」

原來黃太個女阿芬也在碼頭，端莊的阿芬橫豎沒有拍拖，便參加旅行陪媽媽一起離島遊。

黃太建議阿昌不如一起去離島玩啦，多個後生仔陪阿芬，唔使身邊全部都係老人家咁悶吖嘛。社區中心員工說臨時加多個人不成問題，十分鼓勵親子活動。

四人登船後，情景更像34年前，那時侯在校巴站，阿昌和梁錦榮係咁傾，昌媽和梁太又起勢咁傾。如今昌媽和黃太喋喋不休，阿昌和阿芬則笑語連綿。

在長洲吃完一頓海鮮餐後，黃昏時候，拉著長長的影子，踏上歸途。

阿昌經過今天的旅程，對媽媽的感情起了正面變化。而昌媽抱孫的心願，亦泛出新的希望。

完

二少爺說：年輕時，媽媽推BB車，年老時，兒子為母親推輪椅。