陰陽路之「鬼同屋」

陰陽路之「鬼同屋」

中午一時，張太正在家中餵她四歲的兒子吃午飯。兒子叫俊俊，今年剛入讀K1。幼稚園中午放學後，張太接俊俊回家。俊俊是那種唔多扭計的乖BB。父母對他如珠如寶。

張先生在某中型公司當經理，收入尚可，張太可以不打工，專心照顧孩子。一家三口在九龍塘區租住某500尺單位，其實都是為了名校校網，俊俊現在就讀英文幼稚園。父母希望俊俊將來可以在九龍塘區就讀名校，一條龍直升大學。

＊　＊　＊　＊　＊　

這個下午，張太如常在家中餵俊俊吃午飯。張太把飯送到俊俊口邊，俊俊突然皺起眉頭，向牆角方向說：「我唔玩啦…唔玩啦…」

張太個心突一突，問：「俊俊…你同邊個講嘢呀？…」

俊俊：「同哥哥講囉…佢叫我去玩….我唔想玩呀….」

張太口震震：「咁…哥哥喺邊？」

俊俊指住空空的牆角：「企喺嗰邊囉…」

張太嚇到將碗粥仔跌落地，立即抱俊俊入睡房。隨即call張生，告之一切。

當晚張生回家問俊俊，確定那個「朋友仔」唔肯走。他跟張太商量後，決定明天請一名法師上來睇睇。當晚三人同床，互相壯膽才勉強入睡。

第二天，法師上門。法師說：有些小朋友的陰陽眼未閂，長大後就自然會睇唔到靈體。法師在家中貼了一些靈符，擺放了一些風水物，口中唸唸有詞後，向張生講已經搞掂哂。張生張太鬆一口氣。

第三天中午，張太問俊俊有沒有見到哥哥？俊俊說沒有，張太心中一寬。俊俊再說：「無哥哥啦….不過有個紥孖辮嘅姐姐…黐咗喺天花板度…仲笑笑口…」張太嚇到大叫，立即抱俊俊入睡房。隨即call張生，告之一切。

當晚，俊俊還說在幼稚園裡，很多「白色人」慢慢行入牆壁內。張生跟張太商量後，決定搬走。放棄名校校網。張生尋找租盤時，特地找師傅睇過，確保單位「乾淨」後才租住。張家從九龍塘搬去大角咀。俊俊在大角咀讀中文幼稚園，做插班生。

＊　＊　＊　＊　＊　

一個月後某個晚上，當張太替俊俊洗澡時，俊俊突然難為情耷低頭：「唔好睇住我啦….」

張太知道唔妥，再問：「邊個睇住你呀？」

俊俊答：「好多公公婆婆呀…企哂喺妳後面呀…」嚇到張太將個花灑射到一地都係水。

夫妻慨嘆：點解俊俊咁「惹鬼」？既然都搬咗一次，唔爭在搬多一次，兩人決定又要搬啦。最後張生決定搬回佐敦，跟媽媽同住。家裡有神主牌有香爐有灶君有地主，乜鬼都唔使驚。

嫲嫲知道有鬼搞個孫，所以對俊俊特別痛鍚，買玩具買零食給他。嫲嫲住的唐樓，鄰里觀念仍重，嫲嫲介紹鄰居陳婆婆的四歲孫女「瑩瑩」給俊俊，兩孩一見如故，一起玩耍。俊俊重拾往日笑臉。俊俊再沒有見到怪異靈體了。

俊俊在油麻地就讀一間普通幼稚園，父母輕嘆「名校夢碎」，不過張生以前在蘇屋邨長大，讀普通中文中學，靠自己後天努力，都能夠擁有今天的成就。況且就算俊俊讀到名校，如果日日與鬼為伴，命仔都難保啦，未必過到五歲呀。

＊        ＊　＊　＊　＊　

某個星期六早上，俊俊和塋塋由嫲嫲帶到九龍公園玩耍。塋塋向俊俊講了她的尿床的一個小小秘密之後，她要求俊俊講出他的一個小秘密，以作交換。

俊俊左望右望之後，悄悄告訴塋塋：他最討厭讀九龍塘的英文名校幼稚園，上堂老師講英文、功課多、壓力大，所以俊俊回家扮見到鬼，希望父母會搬屋。之後搬到大角咀，那間幼稚園裡，有個類似「技安」的大嚿男同學，成日「蝦蝦霸霸」，欺凌俊俊，告發給老師只換來更嚴厲的報復。俊俊重施故技，繼續扮見鬼，促使父母再搬屋。

如今搬到佐敦，這間幼稚園沒有讀書壓力、沒有同學「蝦蝦霸霸」、嫲嫲又錫自己、仲認識到塋塋添。俊俊認為終於可以安定下來，停止再扮見鬼，在這裡安定下來。塋塋聽後，呆了。

估唔到年紀輕輕的俊俊，已經從電視劇中學到如何操控父母，仲如願以償。果然一代新人勝舊人。

完

二少爺說：《I Don't Like Mondays》，睇怕無乜邊個返工返學的人喜歡星期一。