尋回犬

尋回犬

Jack住在西貢村屋，是家族祖傳物業。地下有個小花園，愛狗的他飼養了一頭一歲的金毛尋回犬，叫Woody。Jack放工回來，帶Woody行山行沙灘。人狗之間，孕育出真摰情誼。

好景不常，Jack要跟女朋友結婚了。女朋友在鴨脷州返工，如果要跟Jack住在西貢，就會令她返工長途跋涉。最後兩人妥協，決定搬到西營盤區居住。

他們在西營盤區搵樓，因Budget關係，只得很少選擇。最後他們選了一個450尺小單位。問題來了：那大廈不容許養狗。那麼應該怎樣處理Woody呢？

在新婚太太強烈要求之下，Jack忍痛做了一個殘忍的決定：把Woody送給朋友吧！Jack有一個朋友叫「肥仔輝」，之前經常到Jack西貢家玩耍，肥仔輝很喜歡Woody，Woody也很喜歡肥仔輝，Woody每次都熱情地舐濕肥仔輝塊面，十分電視廣告的場面。

Jack把搬屋一事告訴肥仔輝，碰巧肥仔輝住的私人屋苑可以養狗，Jack問肥仔輝可否收養Woody？其實肥仔輝一直都想養寵物，隨便做個順水人情，幫朋友自己又有狗玩，兩人一拍即合，Woody要搬去肥仔輝位於柴灣的屋企了。

Jack搬離西貢之日，肥仔輝來西貢接走Woody，人狗之間生離死別咁樣，Jack更眼濕濕，Woody十分有人性，依依不捨舊主人，吠聲中告別了Jack，車遠去人漸細，十分電影感的場面。

＊　＊　＊　＊　＊　

Jack搬到西營盤後，間中都有去肥仔輝柴灣屋企探Woody。每次Woody見到Jack都興奮到癲咗一樣。Jack離開時，Woody又唔捨得，亂跑亂吠。

Jack覺得咁樣對Woody的情緒不健康，正所謂：「賣仔莫摸頭」，走了就走不要再留戀。Jack鐵起了心腸，決定不再探訪Woody，讓Woody跟新主人肥仔輝開始新生活吧。

＊　＊　＊　＊　＊　

個多月來，Jack沒有再去探Woody，可能新婚關係，Jack的焦點轉移去了太太身上，漸漸淡忘了Woody的可愛模樣，睡房門長關，要有一套，十分政府宣傳短片的場面。

某個星期一晚上8時許，氣急敗壞的肥仔輝致電Jack：「弊傢伙！我今晚放狗嘅時候，Woody突然癲咗咁，扯甩條繩 走失咗呀！」

Jack聽後，差點淡出腦海中的Woody狗樣，立即湧現回來。Jack二話不說，立即趕去柴灣，在街上會合肥仔輝之後，在附近一帶搜索，沿途大嗌：「Woody~ Woody~」十分日劇的場面啊！

可惜最後都係無發現，肥仔輝十分內疚，Jack反過來安慰肥仔輝，說有時Woody的情緒都會幾波動。Jack回家後，徹夜難眠，擔心Woody留落街頭，又餓又凍…

兩天後，星期三傍晚，當Jack放工返回西營盤住所時，在大廈地下門口見到一隻流浪狗背影，正在垃圾桶中找食物來吃。Jack定眼一睇，「吓！係Woody呀！」Woody渾身污糟、個肚凹哂，流浪了街頭兩天。

Jack走上前，Woody見到舊主人，歡喜若狂，尾狂擺！Jack諗起許多外國新聞，靈性的狗憑第六感和嗅覺，千里迢迢，隻身找回舊主人。如今Woody用了兩天，由柴灣步行到西營盤，找回Jack，人狗重逢，十分韓劇的煽情場面，賺人熱淚。

Jack立即call肥仔輝，告訴他已經尋回Woody這尋回犬。這時身在深圳東門的肥仔輝，戥Jack高興，一天光哂！Jack把Woody帶去獸醫診所檢查身體，Jack太太到診所會合他們。碰巧有位新聞副刊記者帶寵物到診所治療，聽到Jack描述呢單料，認為可以在寵物版報導一吓，即場影相加訪問。Woody飽食一頓和清潔後，是夜在狗酒店過夜。

第二天報紙副刊真的報導了Woody的事跡。Jack太太被靈犬Woody「千里尋主人」感動到，決定讓步，由西營盤搬回西貢祖屋，最多返工遠啲。Jack十分高興太太這個寬大決定，夫妻跟Woody在西貢村屋裡，樂也融融地生活，十分像人壽保險廣告的場面。

肥仔輝喜見他們人狗團圓，但他對Woody沒有半點不捨得，因為這動人一幕是由他一手策劃出來。

肥仔輝的性格貪新鮮，見到別人的狗仔，攬頭攬頸好過癮，玩完放低拍吓籮柚走就得。一旦要負上照顧牠的責任：餵飼、放狗、洗澡、打針等瑣碎工作，肥仔輝便耍手擰頭。如像玩人家個BB仔就好地地，叫你養大佢，供書教學，你又唔制。肥仔輝十分後悔收養了Woody回家，引證了「照顧佢一生，停停要諗真」的現實道理。

一個月後，肥仔輝疏於打理，Woody變得污糟又瘦弱。肥仔輝又不能把牠交給愛護動物會，想出一計：星期一晚肥仔輝告訴Jack：「Woody走失了」。其實Woody一直關在肥仔輝家中，兩人在街上高聲大叫，又點會搵到呢？

過了兩天，肥仔輝趁Jack大慨回家的時候，把可憐兮兮的Woody送到西營盤Jack屋企樓下，把食物放在垃圾桶旁，飢餓的Woody狂吃不走開，五分鐘後，Jack便出現，人狗團圓。Jack致電肥仔輝，在後街轉角暗處的肥仔輝，說自己身在深圳，製造自己不在場證據。肥仔輝知道他這樣做，Jack便會對Woody終生不離不棄。十分偵探電影的交待事情來龍去脈的畫面。

一段靈犬千里尋主的動人故事，拆穿了，其實只是一個「狗隻再遭遺棄」的殘酷故事。無奈Woody不能說人話，將肥仔輝的奸計拆穿。Jack信錯了肥仔輝這個損友，但肥仔輝的行動，換來Jack太的甘願犧牲，寧願自己每天搭2小時車返工，也不想拆散Jack和Woody的人狗情誼。總算是一個happy ending，十分TVB電視劇結局的畫面。

完

二少爺說︰年輕夫婦寧願養狗都唔生仔，因為對這地方的未來存疑。