殺局

殺局

這天中午，金融管理局費局長出席一間金融機構主辦的周年午餐聚會。近日全港市民和傳媒的矛頭都直指向費局長，他成為眾矢之的。

事源上週一間新加坡銀行出現恐慌性擠提，費局長站出來呼籲市民要鎮定，保證該銀行運作絕對正常健全。部份存戶信以為真，唔去提款。結果兩日後，這間新加坡銀行真的倒閉了。幾萬名存戶的血汗錢化為烏有。

結果有部分苦主懷恨在心，集資揍錢聘請殺手暗殺費局長，以洩心頭之恨。眼鏡蛇接了這單生意。今天就要在眾目睽睽之下，置費局長於死地。

＊    ＊　＊　＊　＊

酒店的宴會廳內擠滿記者和賓客，攝影機和相機鏡頭對準台上預備祝酒的「費局長」。眼鏡蛇早已混入會場。他的左手拿著香檳酒杯，腰間藏了一柄改細size的手槍，暗殺的目標，就是距離他十米以外的費局長。

當費局長高舉酒杯之際，一顆銀色子彈，朝他的頭部射去。「嘭」一聲，局長右手高舉的香檳酒杯咁啱擋了子彈的去路，酒杯應聲爆裂粉碎，酒花四淺。

費局長被襲，嚇至雙腳一軟，伏低在地上。在旁的警察立即擁上，包圍著費局長。眼鏡蛇見行動失敗，立即混入慌亂的人群中離開宴會廳。

由於費局長呢排太惹火頭，出入都遇上示威者抗議，向局長指罵扔蕉加身體碰撞。所以警方特別安排了一批警員給費局長，維持秩序。一位戴著耳朵通訊器的持槍威猛警員，拔槍朝眼鏡蛇逃走方向追出去。可能佢睇得電視劇太多，該名貌似馬德鐘的勇探一邊追眼鏡蛇、一邊大嗌：「企喺度！咪走！」的無聊多餘對白。看來勇探馬德鐘已深受香港電視劇的荼毒。

馬德鐘緊隨眼鏡蛇，追到酒店存放雜物的地牢內，幽暗的地牢四周無人。眼鏡蛇躲在木箱後，伺機制服馬德鐘。眼鏡蛇靜靜雞兜路到了馬德鐘背向，兩人相距只是一米，這一刻正是眼鏡蛇制服馬德鐘的最佳時機。

突然響起歌聲「♫ 在世間　遮風擋雨有一種愛 從六歲到八十也不更改 ♪」原來眼鏡蛇的電話好唔生性，竟然喺呢個超級關鍵時刻響起。而眼鏡蛇又忘記行動前校震機。呢部電話是太太Jessica新送給眼鏡蛇的，ringtone歌聲也是Jessica替他揀選的，所以絕對唔襯殺手的冷酷形象。

馬德鐘立即回頭，旋身用腳踢走眼鏡蛇手上的槍，右手用槍指正眼鏡蛇的眉心。眼鏡蛇又衰一鑊。兩人freeze對峙咗三秒。

「♫ 在世間　遮風擋雨有一種愛 從六歲到八十也不更改 ♪」電話鈴聲仍未停…

馬德鐘拉開手槍的保險掣，眼鏡蛇閉上眼晴迎接死亡，不過他真的真的很想在死之前，知道那個索命電話是那條「仆街」打來的？

眼鏡蛇問︰「可唔可以喺我臨死前，睇下邊個打俾我？」

馬德鐘冷笑，

馬德鐘移開手槍：「你走啦…」

眼鏡蛇問：「點解放我走？」

馬德鐘：「因為……我都係倒閉銀行嘅苦主…..你同我殺咗個狗官！」

眼鏡蛇：「咁…點解你頭先咁搏命追我？」

馬德鐘：「因為我下個月見broad，我咪要喺上司面前爭取表現囉！所以我頭先要大聲嗌：『企喺度！咪走！』驚死無人知我去追你吖嘛！」

眼鏡蛇點頭同意，原來面前這個明辨是非的人才，並沒有中電視劇毒。

馬德鐘從他的耳朵通訊器取得情報：「個狗官而家喺B2-A出口，你快啲去啦。」

眼鏡蛇：「B2-A出口？會唔會係一個陷阱？我點解要信你？」

馬德鐘：「哈哈！因為如果我要殺你，一分鐘前我已經可以殺死你喇。」

眼鏡蛇向馬德鐘交出一個感謝和肯定的眼神後，向B2-A出口跑去。

＊    ＊　＊　＊　＊

眼鏡蛇行動前，早已熟讀酒店的各個出入通道的藍圖，趕來B2-A出口見到一眾警員護送費局長上房車。費局長背向著眼鏡蛇，相隔10米左右，在射程範圍之內，眼鏡蛇正想一槍解決他。

眼鏡蛇舉起手槍瞄準費局長的後腦，開槍之際電話又突然響起「♫ 在世間　遮風擋雨有一種愛 從六歲到八十也不更改 ♪」Oh my God！擾亂心神，「砰嘭」一聲，子彈飛歪誤中費局長身旁一名穿制服警員後腦，當場斃命。噢！錯手殺咗個無辜市民添，可惡的來電呀。

眼鏡蛇知道今天欠缺運氣，兩顆子彈都落空，又有兩個黐線來電，行動注定失敗。眼鏡蛇立即跳入冷氣糟逃走，逃離酒店。

＊    ＊　＊　＊　＊

走在街上的眼鏡蛇，神情落寞，殺不到應殺的人，反而誤殺一名警員，製造孤兒寡婦，不免受到良心責備。

前面有一班路人駐足看商場牆上的戶外大電視，特別新聞報導：「20分鐘前，費局長於酒店遭獨行殺手槍殺，送院途中，證實不冶。」吓？乜唔係誤殺側邊位警員咩？眼鏡蛇心裡一堆問號。

原來費局長愛睇荷里活電影，他逃走時突然想起某一套電影橋段，他用局長權威勒令一名警員把制服跟自己的西裝對調更換，分散殺手注意力 (其實想搵替死鬼) 。

結果眼鏡蛇錯有錯著，誤殺副車變命中紅心。費局長唔衰攞嚟衰，聰明反被聰明誤，死於命運的作弄。而街上的部分路人是銀行苦主，知道這好消息後，紛紛對身邊陌生人互相握手、擁抱、甚至親吻，大陸遊客唔知道內情，仲以為香港提早除夕倒數，紛紛拍低這奇景，嘖嘖稱奇。

眼鏡蛇知道費局長死訊後，心情大喜！此時此刻，是時候做「完成任務signature」。環顧四周沒有警察，眼鏡蛇隨手在口袋中取出一張家居電器宣傳單章，把它撕碎，手一揚，碎片四飛。自己freeze咗個pose，好型啊！

這時候，他才醒起要找出打那兩個索命電話的真凶。來電顯示是太太Jessica打來，眼鏡蛇又不能向她表露殺手身份，只好心平氣和地回電給Jessica。太太提醒他今天放工回家前，要到信用卡禮品換領中心，換部抽濕機回來。眼鏡蛇答應了。

咦？頭先撕爛嗰張好似係「信用卡禮品換領通知書」喎！

雖然眼鏡蛇返去被老婆鬧，但能夠符符碌碌咁完成一單驚險的任務，總算執返身彩。

全文完

二少爺說︰唔知有無網民發起集資，騁請殺手暗殺政要呢？