點指兵兵

點指兵兵

黃大仙某茶樓的二樓，晨運客正在嘆早茶，一盅兩件。眼鏡蛇扮成茶客，一人獨坐一張檯。表面上他正睇緊蘋果日報的豪情版，實則用眼尾監視在三米以外的一名茶客︰四十歲男人，一副江湖人物的衣著服飾和打扮，呢位江湖大佬叫「黑鬼德」，身旁坐了一個保鑣。

眼鏡蛇拿著點心紙，行去黑鬼德張枱對開那架點心車，他向點心阿姐講：「唔該一籠蝦…」「砰嘭」一聲！一槍先「辣」低旁邊的保鑣，再舉槍指向黑鬼德個頭，黑鬼德唔係浪得虛名，他極速拔出腰間手槍，向眼鏡蛇還擊，「砰嘭」一聲！眼鏡蛇如Matrix般拗腰，緊緊避過子彈，在鼻尖前擦過，黑鬼德乘機翻枱，發足逃走。

兩吓槍聲巨響，全場茶客恐慌起哄，茶客趁機唔使找數埋單，「嗱嗱林」蜂擁逃走，有人更趁亂，對女伙計、女茶客乘機抽水揩油，場面十分之混亂…但興奮。

眼鏡蛇狂追黑鬼德，跑到人來人往的大街。眼鏡蛇隨黑鬼德跑進一個公園內。公園內樹高又多遊樂設施，一時間失去黑鬼德蹤影。眼鏡蛇立即握緊手槍，提高警覺。因為不知道黑鬼德會在哪一個角落，突然跳出來偷擊自己。

同一時間，警員李Sir一人在黃大仙下邨行「單咇」，突然通訊器召喚：「PC24601，有人報案，目睹一名中國藉男子，手持擬似手槍物體，進入黃大仙公園，你去睇睇，over。」李Sir：「Roger，不過你記得要派多啲增援嚟呀！」李Sir暗自嘆氣：「吓！對方有槍咁大鑊？今晚仲買咗飛睇蔡楓華演唱會添架，千祈唔好有事啊！」李Sir死死地氣向黃大仙公園走去。

眼鏡蛇在公園內尋找黑鬼德，但毫無發現。眼鏡蛇在鞦韆架前遇上一名手持玩具槍的四歲男童，突然聽到背後的李Sir大嗌：「差人咪郁！」嚇得眼鏡蛇失去重心向前仆，撞倒該名小男孩，兩人倒跌在地上。一支真槍和一支玩具槍同時掉在鞦韆下的軟膠塾上。

李Sir拔出配槍，好緊張又口震震叫眼鏡蛇：「舉起雙手，慢慢起身，將地下支手槍踢過嚟！」眼鏡蛇認得李Sir，上個星期在背上臨時紋上「I’M NOT SICK ILLER」後遇上的那個警員。

眼鏡蛇照辦。踢了四歲男童的玩具槍去李Sir腳旁，給他拾起檢查，眼鏡蛇：「阿Sir，我同個小朋友玩『點指兵兵』啫。」

李Sir叫四歲男童拾起地上另一支真手槍傳過來。眼鏡蛇趁他們視線轉移之際，高舉的雙手施展「彈指神功」，兩枚五蚊銀挾勁射出，樹枝上兩隻白鴿被擊中墮地。

李Sir正快要接過男童遞上的真手槍時，眼鏡蛇：「阿Sir，有兩隻死白鴿呀！禽流感呀！H7N9呀！」眼鏡蛇指著地上兩隻昏死的白鴿大嗌。李Sir大驚，心諗︰「嘩！禽流感？死人嗰喎！自己命仔緊要呀！打工啫，唔使搵命搏呀。」

李Sir唔再check手槍啦，立即大步後退，並call台：「黃大仙公園發現兩隻死白鴿，懷疑禽流感呀。」疏散公園內的人。眼鏡蛇趁亂速閃，又一次化險為夷。

眼鏡蛇下一步需要找回男童，換番支真槍。但一時間又唔見咗個男童，突然傳來「砰嘭」一聲……

原來男童喺搖搖板前，一槍隊冧咗黑鬼德。剛才黑鬼德匿埋喺搖搖板打電話班馬時，遇上手持真槍的男童。男童見黑鬼德又揸槍，天真地舉槍大叫一聲「嘭」！怎料眼鏡蛇改裝了自己的手槍作「聲音操控」，聽到「嘭」一聲便會自動開槍。黑鬼德倒地，雙眼睜開，死得不明不白。

李Sir聽到槍聲，趕到搖搖板，需要逮捕男童。男童的爺爺更接近精神崩潰：「點解我帶個孫仔嚟公園打韆鞦，會搞出人命架？！」李Sir更自言自語：「唉！呢份口供有排落呀？今晚實睇唔到蔡楓華演唱會啦！」

眼鏡蛇得意洋洋咁逃離現場，黑鬼德已除。又係到「完成任務signature」的時候，咦？乜銀包內所有現金都用光哂喇？又唔記得撳機添，袋中只有一張茶樓點心紙，一於照撕啦，紙碎四揚。

紙碎四散後，眼鏡蛇聽到背後一把聲音說：「先生，唔該身分證」。眼鏡蛇上得山多，今次終於遇上一名食環署檢察。

完

二少爺說︰點指兵兵，而家啲細佬仔唔識玩囉。