缺德辦公室

缺德辦公室

返office的在職人士，每天平均需要花8小時或以上在辦公室內工作。如果辦公室內有很多缺德的同事，就一定會令自己好激氣。現在數吓辦公室內常見的缺德行為。

第十位：蒸餾水機無水

口渴時侯想去茶水間斟水，怎料蒸餾水機一滴水都無。最後斟水嗰位同事唔肯換水，亦唔打算搵人幫手換水。自己酙完最後一滴水就走人。認真無手尾。

第九位：偷A4紙文具

每人家中都有私人電腦，有些人家中添了printer，需要大量A4紙print私人嘢，結果office影印房，經常有人鬼鬼祟祟出入，滿載而歸。如果有同事晚間讀書進修，自我增值，需要膠file、螢光筆、原子筆、塗改液等文具，他們的筆袋就會久唔久自動變得脹卜卜。

第八位：滿地薯片餅乾碎

同事們下午三四點開始搵嘢食，薯片、餅乾、紫菜、蛋捲、牛肉乾。他們一break的時候，拿着零食去別人的辦公桌relax吓，傾計又食嘢。結果就整到你張枱面、週地零食碎，惹蟻又惹曱甴，認真唔衛生。

第七位：共用file用後唔close

部門各同事需要到 server中用某個「共用檔案」，結果其中一位同事用完「共用檔案」之後又唔「關閉」。令到其他同事想使用時，檔案變成「唯讀的檔案」。要大聲嗌：「邊個開住個file未閂？」當然無人會承認責任，經手人立即暗地裡close file，仲喊賊捉賊，大聲問：「邊個咁無手尾呀？！」

第六位：影印機jam紙

去影印房，發現部部影印機俾人搞到jam紙後，不顧而去。只好落手抽出jam紙，結果雙手都是黑炭粉。另外，影印時如果唔睇清楚就按start，結果影出嚟變成幾十張、用A3紙、size放大縮小。原來上手影印時調教setting後，影完又忘記還原，而下手又無睇清楚啲掣，結果全單照收，浪費大量紙張。

第五位：雪櫃棄置食物

有同事買食物回來，存放於公司雪櫃，但有意無意地忘記了食物的存在。任由它長埋在雪櫃中，讓它過期變壞。結果一打開雪櫃，發出嗅味，要阿嬸清理。食剩的芝士、牛奶、糕點、水果、生日蛋糕，變黑變嗅變壞變型。

第四位：唔接聽他人電話

當某一同事的辦公枱頭，電話響起，其他同事借了聾耳陳隻耳，詐聽唔到，任由電話長響，唔幫人drop低口訊，可能令同事失去一單生意，又可能是客戶的投訴來電，總之各家自掃門前雪。

第三位：飯盒棄置廢紙籮

午飯時，吃完的飯盒有餸汁餸骨，最好棄置於茶水間的有蓋密封垃圾桶內，但係有人貪方便，隨手把飯盒棄置於寫字枱旁的廢紙籮，讓餸汁異味於辦公室內揮發。惹來昆蟲細菌滋生。

第二位：借文具唔還

當某同事的文具唔知放咗喺邊？最簡單直接的方法，就係向其他同事借，但用完之後就據為己有，一借無回頭。同事經常發現自己的文具出現在別人的桌上。又偷返佢，冤冤相報何時了？

第一位：傳播病菌

流行性感冒期間，有同事中招告假。但有一些同事責任心重，照返工，但唔戴口罩，在辦公室內照咳照打噴嚏，發放大量病毒，傳染同事。認真多得佢唔少。

完

二少爺說︰有病最好留在家中抖一抖。