無仇不成兄弟

無仇不成兄弟

Bowie在哥哥的婚宴上，在接待處擔任迎賓，收過來賓的禮金後，告訴來賓的就坐枱號。8時45分，燈光變暗，結婚進行曲響起，哥哥攜著新娘，步入宴會廳，接受大家的祝福。Bowie腦海中，卻想起三個月前的一個寒冬晚上…….

＊        ＊　＊　＊　＊　＊

三個月前的一個寒冬晚上，Bowie的父母出門，去一趟大陸短線旅行，有兩晚不在家。家中只剩下Bowie和他哥哥David兩人。David和Bowie都有女朋友，終於等到父母不在家，仲唔作反咩？David和Bowie趁家中無王管，各自約了女友回家玩。

只得兩晚時間，哥哥David要第一晚、弟弟Bowie要第二晚。David和他女友早已發生關係，Bowie識做，第一晚到朋友家渡宿，David就跟女友在家中happy。

第二晚輪到Bowie，但Bowie女友Jean是虔誠教徒，思想十分保守，自幼家教十分嚴厲。所以Bowie仍未跟Jean有婚前性行為。Bowie只能邀請Jean回家玩「煮飯仔」，晚上11時便要送Jean回她的香閨。

David是一個「時裝精」，願意把成份薪水花在購買時裝上。Bowie就比較願意花錢在電子器材上。兩兄弟會把自己的東西借給對方使用，一物兩份用。舉例：Bowie去朋友生日party時，會問David借Dior Homme窄身西裝穿；David幫女友影靚相時，會問Bowie借部高質素數碼相機。

David最近入手的新衣，是一件幾千元的「猿人迷彩軍褸」。第一晚David穿起這伴猿人軍褸見女友，Bowie望見心中羨慕。第二天，Bowie問David借穿該件潮服見Jean，David沒有托手踭。

＊        ＊　＊　＊　＊　＊

第二天傍晚時份，穿著「猿人迷彩軍褸」的Bowie走在旺角行人專用區，以潮人自居，藐視擦過身邊穿平貨貨的MK仔，沾沾自喜。Bowie在旺角影音店買了一隻宮崎駿的《崖上的波兒》DVD。他知道Jean想看《崖上的波兒》很久，Bowie打算今晚在家中一齊看這套動畫。他把《崖上的波兒》DVD放進軍褸的外袋裡。跟著去旺角港鐵站接Jean。

會面後，Bowie和Jean到屋企附近的超級市場買餸，再回家玩「煮飯仔」。買了兩大袋餸菜後，兩人步行返家途中，Bowie顯出Gentlemen風度，一人拎哂兩袋食物，不捨得讓Jean辛苦。

香港天文台已經預報：傍晚氣溫將會驟降，但Jean沒有留意，衣物單薄，冷風一刮，她打了個冷震。Bowie立即察覺到，為了特顯他的Gentlemen風度，Bowie馬上把身上猿人軍褸脫下，叫Jean穿上它。Jean感到Bowie很鍚自己，報以一個甜蜜的微笑。兩人繼續並肩前行。

快將步回大廈門口時，Jean有點靦腆，對Bowie說：「我肯上你屋企…唔代表…我會…咩呀….」

Bowie點頭微笑，明白嘅。

Jean：「食完飯，等我幫你洗碗啦！」

Bowie：「我點捨得妳去洗碗呀？食完飯，我已經安排咗節目俾妳。」

Jean：「安排咗節目俾我？咩嚟架？」

Bowie：「唔講住，妳一定鐘意！」

Jean輕皺眉頭，好想知道答案，

Bowie因為雙手拎著兩袋餸菜，沒有閒手去攞出DVD，只好叫：「好啦！妳自己伸手入軍褸外袋，自己攞出嚟睇啦！」

Bowie靜候Jean拿出《崖上的波兒》DVD時，會大讚自己細心週到。

Jean伸手入軍褸內一摸，取出來一看，暴跳如雷！

尖聲大嗌：「林保賢！你黐線架！你當我係咩嘢人呀！」

Bowie見到Jean手中拿著一個金色錫紙包裝的安全套，

Bowie：「吓？點解會咁架？妳聽我解釋吖…..」

Bowie 正想走上前，Jean大嗌「非禮呀！」Bowie手足無措。

Jean把軍褸脫下，掉在地上，截停一部Taxi，絕塵而去。

Bowie立即打電話給Jean，Bowie正想解釋，便給Jean一輪嘴打斷，鬧到他狗血淋頭。Bowie只有挨鬧的份兒，變成「挨鬧的Bowie」。 Jean cut線後，從此她再沒有接聽過Bowie的電話。

Bowie呆立在街上，他發覺軍褸的左袋內有《崖上的波兒》DVD、右袋內有安全套，應該是哥哥David昨夜用剩的安全套。穿著軍褸的Jean，自己伸手入袋摷禮物，究竟她先摷左邊袋？還是先右邊袋？便足以改變了這對情侶的命運。

Bowie貪靚問哥哥借潮服穿，不能埋怨別人，但又氣憤難平。Bowie回家後用針在安全套中央拮穿一小孔後，把安全套放回軍褸的右袋內，歸還軍褸給哥哥。

三個月後，David跟父母商量要跟女友結婚，是「奉子成婚」。Bowie聽到消息後，知道自己今次玩大咗，但都已經米已成炊，自首都無謂，不如繼續把這個秘密藏於心底。

＊        ＊　＊　＊　＊　＊

哥哥和新娘子舉杯向各位來賓祝酒，Bowie坐在主家席，乾了半杯紅酒。那晚被挨鬧的情景又湧現。他失去了Jean，但多了一個阿嫂和一個侄仔，失一得二，點都叫做有著數啦。

完

二少爺說︰兩兄弟嘅嘢，在心中啦。