緣分永遠要避開我 – 上集

緣分永遠要避開我 – 上集

Frankie望着辦公枱上的電話發呆，等待心目中的女主角來電，無奈打來的電話都是男聲和跟工作有關。但Frankie仍未絕望，期望下一次電話響起，電話筒會傳出她的聲音……

＊　＊　＊　＊　＊　＊

Frankie在旺角信和中心地庫的玩具店內，他從銀包抽出現鈔買心愛的Ironman action figure。他將1,300元交到店員手上，Frankie十分之興奮。

他是一個典型的本地「御宅族」。每月份人工花在電子遊戲、漫畫、DVD和模型玩具。拍拖…則抱着「積極性悲觀態度」，等待一個可以陪他打機睇漫畫上網的女朋友。但這一等已經過八個寒暑，他上一次拍拖，已是中五暑假，因女朋友一次無心整爛他心愛的「福音戰士模型」而宣佈分手。

Frankie在長沙灣一間製衣公司做Merchandiser。公司算是大模規，辦公室佔商廈全層二萬呎。由於公司員工眾多，所以公司設有兩個pantry放設雪櫃微波爐蒸餾水機。分別叫「Pantry A」和「Pantry B」。

Frankie為了慳錢買電玩，加上他不善交際，所以Frankie每天都有帶飯回公司的習慣。早上他把便當盒放進雪櫃內，午間到pantry用微波爐加熱後，一邊上網一邊吃飯。

Frankie雖然樣子平庸、不善詞令，但他心地人品好，有一位在版房的男同事阿Don是Frankie的好朋友。

上個星期，阿Don逛百貨公司時，見到有一個「便當盒」款式幾靚，決定買下送給Frankie，但百貨公司大酬賓，買兩個便當盒就享有半價優惠。結果阿Don買下兩個同色同款的便當盒；分別送給「針織組」的Frankie，和「梳織組」的Sophie。Sophie是一個喜歡運動的開朗型陽光少女。

因為阿Don的關係，Frankie和Sophie雖隸屬於兩個不同部門，互不認識，但兩人卻用着同一款式的便當盒。

＊　＊　＊　＊　＊　＊

星期一早上，Frankie如常把便當盒放進Pantry A的雪櫃內。Sophie則把便當盒放進Pantry B的雪櫃內。

怎料到了上午十一時，Pantry B的雪櫃突然失靈，雪霜溶化成一灘水。清潔阿嬸因要清理，就把所有Pantry B雪櫃內的便當盒搬進Pantry A的雪櫃內。Frankie和Sophie的兩個同款便當盒，終於有機會擠身於同座一雪櫃內。

1時正，Frankie到Pantry A的雪櫃內取回自已的便當盒便放進微波爐「叮」熱。

5分鐘後取回便當盒後返回座位，打算一邊睇電腦動晝一邊吃飯。

Frankie打開便當盒一看，咦？點解今日啲餸咁清淡咁齋嘅？是西蘭花、南瓜、荳苗和帶子，唉！唔埋咁多，大啖大啖食，Frankie一口氣吃完整個便當盒後，仍未飽肚下繼續看動畫。

＊　＊　＊　＊　＊　＊

忙碌趕寄貨的Sophie到1:35分，才有空Pantry B去「叮飯」。有一張A4紙貼在雪櫃上：「雪櫃壞了，請到Pantry A雪櫃找回你的飯盒。」

Sophie去Pantry A把便當盒加熱後，帶回自己座位享用。一打開，吓？點解點餸咁變成咁？兩隻雞翼、兩塊牛扖豬扖、一條雞肉腸和一大盒白飯！嘩！好似BBQ之後食剩嘅嘢加碗白飯咁。

Sophie見到都無哂胃口，埋怨點解阿媽煮咁多肉，又無菜蔬？因為Sophie一向唔食紅肉，無理由阿媽會咁樣整蠱自己？Sophie諗都唔使諗，便把這堆BBQ掉落Pantry的垃圾桶。Sophie吃朱古力頂肚算數。

＊　＊　＊　＊　＊　＊

3:45分，Frankie的媽媽來電，叫Frankie今晚放工回家前，到日本城買一支地拖回家。Frankie順便問阿媽：「今日個飯盒啲餸好齋啫！」

阿媽反駁：「咪都係雞翼牛扖豬扖之嘛！」

Frankie看得日本偵探漫畫多，終於推敲到自己食錯別人的便當盒。憑餸菜的清淡程度，Frankie推測便當盒的主人是一位女性。Frankie覺得緣份終於找上門來。

當日下午4點鐘，Frankie立即把便當盒洗得乾乾淨淨，把一張紙條放入便當盒中，再放回Pantry A的雪櫃內。

紙條上寫著：「對不起！吃了妳的便當盒，請致電內線3487找Frankie。」

他用「妳」字，主觀地相信對方是一名女同事。既然大家都不約而同用同一款的便當盒，口味和喜好應該相似。冥冥之中，她應該是緣份早已安排好，希望的女主角見紙條後會盡快致電找他。

＊　＊　＊　＊　＊　＊

那邊廂，Sophie從媽媽的電話通話中，推斷到自己的荳苗便當盒給別人吃了。憑BBQ食物推測，便當盒的主人是一位食肉獸的粗獷核突男士。Sophie只好把便當盒洗乾淨，於當日下午5:15分放回Pantry A的雪櫃內，希望物歸原主。

兩個便當盒又再次碰頭，只不過其中一個便當盒是空的，而另一個便當盒則藏著一張充滿盼望的紙條。

＊　＊　＊　＊　＊　＊

臨放工前，Frankie望着檯頭上的電話發呆，等待心目中的女主角來電，無奈打來的電話都男聲是和工作有關。但Frankie仍未絕望，期望下一次電話響起，電話筒會傳出她的聲音…

終於到晚上6:25分，Frankie的電話再次響起，Frankie急不及待接聽，電話筒另一端傳來一把甜美的女聲：「喂！你係唔係3487…」

待續

二少爺說：追尋愛情需要勇氣同運氣。