始終會消失去–下集

始終會消失去 -下集

 2011年2月18日 天陰

 嘩！使唔使凍成咁先？！「拉尼娜」現象呀？氣溫反常，應該就快世界末日啦。咁都好，我爭嗰啲卡數唔使還啦！唉~邊個發明返工架？勁唔想起身囉。8點鐘啫，瞓多陣先。

點解地鐵啲人可以咁醜樣？個個都瞓未醒咁嘅死樣。所以地鐵要派免費報紙囉，等啲人睇報紙就唔使望人嘛。出閘後，梗有個阿婆企喺度收報紙去賣，真折墮！妳後生嗰陣唔儲定啲錢，老咗仲要拋頭露面捱世界，唉~獻世咩。哼！份報紙我睇完唔愛都唔會俾妳，吹呀？

買早餐嗰陣，賣嘢嗰個阿嬸好似發緊夢，戇居居咁款。睇死佢一定係炒濃股票定嘞。返到公司樓下，哎呀，見到公司條大陸妹同事，我立即耷低頭，望報紙扮睇佢唔到。條女好似…姓余，打扮勁「娘」，免得過 我都唔想同佢打招呼。

弊！條女行埋嚟say hi，是但啦，敷衍吓佢。條女話：「巧撚啊！」挑！啲廣東話講極都講唔正，係「好 - 冷 - 啊 -」。同佢做同事，真係俾佢映衰埋我添呀。

返到公司，諗著一路睇動新聞一路食早餐。屌！點解我order蛋冶，個阿嬸俾份牛冶我呀？！睇相佬叫我戒食牛，食牛行衰運呀！乜咁大整蠱呀！

我將件牛冶遞比Eddie食，Eddie話飽唔食。佢叫我不如將件三文冶比條大陸妹食。又係嘅，條大陸妹可能住喺偏遠山區，擔水都要行三粒鐘嗰隻囉。哈，比件三文冶佢食，當積吓陰德，上天保佑我賭錢要贏呀。

中午，同事吹雞去飲茶，頂！糧尾窮過鬼，有鬼錢咩！今日是但求其食碗雲吞麵算啦。我一入舖頭，嘩！幾邪呀！條大陸妹竟然坐咗喺入面，佢昅到我添呀。全舖得返一個位，就係佢側邊個位，我而家閃人好小家啫，唉~ 唯有頂硬上坐落去啦。佢問我點解唔去飲茶？屌！妳想我點答妳呀？唔通答：「我全副身家剩番60蚊，食得飯嚟就搭唔到車呀！」我咪側側膊唔答佢囉。

下晝開會，好悶囉！都唔知老細講緊乜，又唔俾人開會玩iPhone。我周圍昅，唔覺意望到條大陸妹，哈哈！有條菜攝咗喺佢條牙隙度，好核突呀。PK！佢突然望過嚟，我立即望第二度先，繼續扮思考、扮專心開會。

7點幾，大部分同事走咗。聽日先出糧，今晚無局，不如上吓網，Hea到8點鐘先走，返到屋企啱啱好開飯。既然聽日出糧，聽晚一於去砵蘭街「出出火」。上網入man169.com揀吓囡囡先。嘩！件件都咁索，睇到我對眼噴火咁滯！快啲出糧呀唔該！

咦，我眼尾昅到條大陸妹放工囉喎，好行夾唔送。佢好似想走埋嚟喎！等我運用念力先，心裡面唸：「走開、走開、走開…」。哈哈！佢就係調頭走喎！原來念力真係work果喎！等我又唸：「中六合彩、中六合彩、中六合彩…」

8點鐘啦，上網都上到眼勊。頂！經理call我，唔係呀化！臨走先叫我做嘢？你好做唔做，做隻欄路狗？原來經理吩咐我，叫我send條SMS俾大陸妹余小姐，叫佢聽日一返到大陸廠就send幾個samples落香港。哦！簡單任務啫，嚇得我吖！

我用英文send SMS，打了頭幾個英文字，突然鼻哥痕，打了個大乞嚏！呀！手指撳錯掣，send埋出街添！

我睇返「寄伴備份」，仆街啦！我原本想打「Miss Yu」，點知我個腦諗住聽晚去旺角happy，竟然串錯英文字，打咗「Miss You」，仲send埋出街。俾大陸妹誤會我，我就真係唔使做人嘞！快快趣補send返條正確嘅SMS俾大陸妹先。希望佢咪搞錯啦！比同事知道，笑足我一世，永不翻身架。

五分鐘後，我電話響起，咦？無「來電號碼顯示」喎！十成係推銷貸款寬頻嘅cold call電話啦！我梗係唔會聽，由佢飛去mail box算罷啦。

…咦！對方有留言喎，聽吓邊範先？….嘩！條留言無人講嘢嘅？剩係得把女聲喺度嘆氣！之後一粒聲無出就收線。咁快又盂蘭節呀？咪嚇Q我呀！唉！等聽日出糧，快啲買啲嘢燒吓先。

落到公司樓下，屌！架小巴啱啱上夠客開走！送車尾，真係行衰運。

完

改編自小克漫畫《科學寓言之高科技誤會》



幻影 - 譚詠麟
作曲：林敏怡
填詞：林敏驄

怎去開始解釋這段情
寫一首關於你的詩
胡言亂語心思交瘁 仍未帶出合意字

假若可接觸鏡中影像
也許一切可以留得住
紫色的小盒子裡 盡藏著許多未了事
燦爛的晶瑩 代表絲絲愛意
暗裡隨著閃閃光輝 映照得奪目耀眼

幻像似的愛情 始終會消失去
那幻影卻一一再現 我心底

怎去開始接觸這段情
彷彿知道不會容易
睡夢裡 追憶裡 在尋覓你的影子
你在我的心靈 泛起絲絲愛意
你卻無法停留讓我 捉摸 留住你

幻像似的愛情 始終會消失去
那幻影卻一一再現 我心底

幻像似的愛情 埋藏我心深處
每個冷冰的晚上 那溫暖都在我心

幻像似的愛情 始終會消失去
那幻影卻一一再現我心底
幻像似的愛情 埋藏我心深處
叫我每一個晚上 也可抱擁著你