消聲匿跡 - 下集

消聲匿跡 - 下集

阿飛唔埋一切，冒著被汽車車死的危險，衝過馬路，口中大叫「Kelly！Kelly.......」怎料Kelly耳戴ipod，充耳不聞。

正當阿飛奔跑到對面馬路時，Kelly剛好截停一部的士，登車而去。阿飛想追，但環顧四周，揾一部的士睇吓都無。「難得個天肯俾我遇番Kelly，唔好咁玩我啦！」急如鍋上螞蟻，這時一部電單車正迎面駛來。

阿飛無計可施之下，路中心「大字型」截停了這部「薄餅速遞電單車」，硬著頭皮，問電單車司機可唔可以車佢一程？

阿飛問完都自覺荒謬，人哋開緊工，點會肯幫自己？ Pizza哥哥望著情急的阿飛，沉默了兩秒：「上車啦！」

阿飛千多謝萬多謝Pizza哥哥，阿飛戴上spare頭盔後，成世人首次登上「薄餅速遞電單車」的後座，踩油狂追。

阿飛緊張地說：「唔該追住前面架的士！KT2592嗰部！」Pizza哥哥點一點頭：「坐穩啦！」全速追逐100米前那部的士。

Pizza哥哥一邊追的士，一邊大聲向後面的阿飛講：「你好彩啦！我上個月同我「掃把」嗌交，遞信resign。今日啱啱last day，送Pizza遲咗？我專登架！佢吹得我脹咩？！」阿飛只是傻傻地附和Pizza哥哥：「啱嘅！.......係嘅！.......」

五分鐘追逐後，目標的士停在火車站前，Kelly下車，入閘轉乘火車。阿飛多謝完Pizza哥哥後，除下頭盔，跳下電單車，直追入閘口。

突然Pizza哥哥在阿飛身後大聲嗌：「喂！」阿飛以為對方要攞錢作酬勞，回頭望見Pizza哥哥，笑說：「喂！攞盒Pizza去食啦！」
阿飛：「但係.......你咪會.......俾客人投訴囉？！」
Pizza哥哥：「理得佢呀！.......記得要追到女朋友返嚟呀！」
阿飛點頭道謝：「一定會！」Pizza哥哥駕電單車離去。

阿飛在火車入閘機前，伸手入褲袋取出銀包中的八達通時，Shit！剛才在茶餐廳門外抽煙，銀包和電話仍留在茶餐廳內。阿飛現在身無分文。

阿飛情急之下想跳閘進入，突然被一名閘內穿黃藍色制服的站務員喝止：「喂！你做乜呀？！」
阿飛：「Sorry！我唔記得帶銀包，通融一次呀大佬！俾我入閘呀！」
站務員：「呢位先生，你買飛啦！我唔可以俾你入架。」
阿飛：「呢度有個Pizza，仲熱架！你收咗佢！當我買飛吖！」
站務員：「先生，我幫唔到你！你快啲賣飛啦！」

阿飛只好向其他準備入閘的乘客埋手：「小姐呀，唔該！借幾蚊俾我，妳攞走個Pizza！無毒架！」、「太太呀，唔該！借幾蚊俾我，我要入閘追返我女朋友呀！」
結果乘客們當阿飛精神有問題，擰歪面唔埋他，急急入閘。阿飛擔心火車隨時會載走Kelly，十分徬徨。

阿飛無計可施之際，面前的閘突然發出「嘟」一聲。一名40歲西裝男士，手拍八達通，向阿飛示意：「入啦！」
阿飛十分感激：「多謝哂！俾個pizza你吖！」
西裝男士：「使乜客氣，幾蚊雞算得乜？快啲去追返個女朋友先講啦。」
原來西裝男士之前也有與女朋友追逐的相同經歷，十分理解阿飛這刻的焦急心情，故出手相助。

阿飛入閘後，究竟上「往羅湖」的月台？還是「往尖東」月台？二分一機會，阿飛最後選擇了跑上「往羅湖月台」。弊傢伙！唔見Kelly喎。

阿飛反而見到對面「往尖東」月台上，Kelly正一邊看愛情小說、一邊等候火車。這時往尖東的火車，剛好駛入月台，阿飛遙遙地大叫：「Kelly！Kelly！」可惜Kelly戴著headphone，充耳不聞。Kelly被火車遮擋了阿飛的視線，車廂內乘客太多，阿飛看不見Kelly蹤影。阿飛很失望，掩頭蹲下，花了這麼多工夫去追她，最後還是功虧一簣。

當火車站發出「嘟…嘟…聲」後，火車駛離月台，對面月台上剩下Kelly站於原地，她望見6米以外滿頭大汗的阿飛。兩人遙遙對望，恍如隔世。

阿飛狂揮手，全速拆返到Kelly那邊月台。原來剛才站在Kelly旁的一位中學生，見阿飛向這邊大聲呼叫。中學生好奇地問Kelly：「小姐，對面嗰位先生好似叫妳喎。」Kelly直覺告訴自己：對面的人是阿飛。多得這一位中學生一攔，火車閉門駛離後，兩人終於在火車站的兩邊月台再次相遇。

阿飛奔到Kelly跟前，唔理咁多，先向Kelly說：「妳嫁俾我啦！」Kelly臉上沒有半點輕奮，向阿飛搬出一段從愛情小說裡看回來的理論：「我憎你唔敢承擔，愛情好似劃火柴咁，最初劃嗰一吓最光最熱，之後慢慢變暗變弱，當火柴燒到尾，你覺得痛覺得灼熱，就立即放手，咁樣、段感情咪冇咗囉！你明唔明？」

Kelly的說話一針見血，阿飛一時言塞。Kelly見阿飛無言，轉身背向阿飛，大步走遠。
行了幾步，背後的阿飛大聲叫：「Kelly！」

Kelly回頭望阿飛，他已從袋中取出火柴，「咔嚓」一聲點著火柴。當火柴燒到最尾時，阿飛忍痛唔放手，咬緊牙關：「鳴～唔～」火柴雖然熄滅、燒成灰燼，但殘渣仍被挾在阿飛的食指和母指之間。

阿飛苦笑說：「我無放手喎！」Kelly見狀立即走上前，檢查阿飛手指的傷勢，甜絲絲說：「正傻佬嚟架！」 兩人冰釋前嫌，阿飛心中默唸：「我會遵守諾言，從今會好好對待Kelly。」

兩人隨後坐在火車站月台的長櫈上，互相交換這三個月的近況，Kelly去了什麼國家？阿飛如何鍥而不捨地找尋她？ 一面傾、一面分享Pizza哥哥送的微溫pizza。

阿飛右手手指灼了個水泡，放在膝蓋上休息，左手緊握著Kelly的右手，Kelly用左手把Pizza一口一口餵到阿飛嘴裡，這個Pizza份外好味。令到這Pizza的味道昇華，除了面前有吐露港的日落景色作伴碟之外，還因為有一份失而復得的真摰感情在烘托著。

Fade out

情有獨鍾 - 張宇
作詞：十一郎
作曲：張宇

在妳的門前　我看到另—雙鞋
猜測妳跟誰　在狂吵之後的夜
妳是否流淚　哭訴和我的決裂
在他面前　輕易贏得安慰

妳怪我忽略　妳想透露的疲倦
妳視而不見　我努力做的體貼
我們的差別　在於對愛的感覺
妳要濃烈　我要細細如水

我以為我的付出妳懂　愛卻出現裂縫　
怪我沒有他溫柔
用一夜去守候　可能失去的妳　
認真的心是否有用

我以為我的付出妳懂　愛卻出現裂縫　
情到谷底才肯說
留下驚慌的我　沒有機會重頭　
破碎的心　還是對妳　情有獨鍾

消聲匿跡 - 上集

消聲匿跡 - 上集

Office Receptionist對阿飛說：「Kelly？佢已經resign咗。」 阿飛聽後，不相信自己的耳朵，目定口呆.......

＊ ＊ ＊ ＊ ＊ ＊ ＊ ＊ ＊

阿飛姓歐，同事給他起了一個度身訂造的花名「Fade Out」，因阿飛做事魂遊、遲早被公司淘汰，所以冠以「Fade Out」。阿飛性格吊兒郎當、做事得過且過、唔爹唔吊、怕承擔責任。他在社會上打滾咁多年，仍是一事無成。33歲仍未學懂替自己好好打算，只知道「做一日和尚、敲一日鐘」。

三年前，阿飛當朋友的戥穿石，婚禮當日結識了新娘子的一位姊妹Kelly。兩人隨後約會，並發展成為情侶。Kelly雖然細阿飛三年，但思想比他成熟。Kelly知道自己命中注定並非大富大貴之人，但求找到一個愛錫自己的男人便可付託終生，「公一份、婆一份」地過安穩生活。

Kelly喜歡看愛情小說，希望自己在30歲結婚，組織一個屬於自己的小康之家。雖然阿飛並非年青有為，但Kelly願意跟阿飛過清茶淡飯的日子。

拍拖期間，Kelly曾多番暗示想結婚，但阿飛都以未有經濟基礎為藉口，顧左右而言他。Kelly知道阿飛是愛自己的，只不過未有心理準備去結婚而已。愛看愛情小說的Kelly信奉浪漫主義，她相信終會有一日，阿飛會向自己求婚。

Kelly在她踏入30歲生辰的晚上，阿飛跟她吃晚飯慶祝。
喝大幾杯啤酒的阿飛，沒有準備生日禮物，隨口笑問：「妳今年想要乜嘢生日禮物呀？」
Kelly笑瞇瞇說：「係咪要你送乜？你都應承？」
阿飛：「哈哈哈！喺我能力範圍之內，一定應承妳！」
Kelly半講笑口吻說：「好！要一個老公！」
阿飛打了個突，今天是Kelly生日，不想掃她興，
望著Kelly堅毅的目光，阿飛心諗她已跟了自己三年，不想令她失望，
阿飛其實有點醉醺醺，好！幾大就幾大！
帶醉半開玩笑式答：「好！我哋……結婚！」
Kelly笑著點頭，今年終於收到一份最好的生日禮物。

阿飛帶醉回家，宿醉後第二天早上，醒來後望著天花板發吽呌，十分後悔。後悔昨夜應承跟Kelly結婚，阿飛不是不愛Kelly，只是擔心自己無本事養起頭家，又驚Kelly跟自己生活只會捱窮，自己不能勝任做一個丈夫。

「逃避責任」是阿飛的陋習，阿飛心想：「不如.......打退堂鼓...」想得入神，母親突然拍打碌架床：「起身啦！發咗達吖？唔使做呀！？」阿飛立即換衫出門口，由屋邨趕返公司上班。

當夜，阿飛害怕直接面對Kelly，最後選擇隔著電話，要求她將婚事暫且擱下，結果換來電話旁Kelly的哭泣聲和大力cut線聲。這是他們最後一次的通話。阿飛嘗試再打電話給Kelly，可惜她已不再接聽。過往嗌交，阿飛會讓Kelly冷靜一吓，待兩三日後她下了口氣，就會再接聽電話。

已經過了三天，Kelly仍然音訊全無，阿飛撥Kelly電話，傳來：「你打嘅電話號碼暫時未有用戶登記，請查清楚再打過啦。」吓！？乜Kelly連電話號碼都改咗？

阿飛終於忍唔住，上Kelly公司找她，Receptionist說Kelly已經resign，「因她已儲了30天大假，所以即時可以離職，聽聞她因私事，要單身去一趟很遠很長的旅行，去流浪散吓心喎。」

阿飛十分震驚，立即上Kelly的家找她。Kelly的父母留在大陸生活，她跟兩個女同鄉同租住一個小單位，女同屋說她幾天前已搬走，Kelly拒絕透露搬去邊。

阿飛致電Kelly的朋友打聽，朋友：「你個衰人咁對Kelly，仲係男人？」cut線！ 原來Kelly鐵起心腸，可以決絕到如此無情的地步。阿飛只好向Kelly的電郵、MSN、Facebook埋手，狂send道歉messages，都是徒然。Kelly從此消聲匿跡，兩人在茫茫人海中，正式宣佈失去聯繫。

阿飛在家中苦起臉，為自己的懦弱感到羞恥，母親估到一二，阿飛都需要一個訴苦對象宣洩一吓。母親安慰：「當初我嫁俾你老豆，佢都無錢架！咪一齊捱囉！唔使死架！我仲記得生你嗰陣唔夠錢，逼住要去當舖『當』咗張棉胎籌錢。雖然窮，但係你出世之後，一見到你笑，我哋就乜嘢辛苦都唔記得哂.......」阿飛的鼻變酸變紅。他對著個天講：「俾我撞番Kelly啦，我一定唔會辜負佢。」

轉眼三個月後，某一個周末下午，阿飛跟死黨在茶餐廳吃下午茶，心情仍未釋懷。阿飛一人步出茶餐廳門口，劃火柴，點香煙，白煙緩緩上升。

阿飛望著藍天一架飛機略過，唔知Kelly而家喺邊個國家做緊乜？目光四遊，突然見到對面馬路，一個熟悉面孔：Kelly正站在對面街，似乎在等的士。

嘩！阿飛眼睛發光！唔埋一切，冒著被汽車車死的危險，以9秒9速度衝過馬路，在汽車響按聲中，阿飛大叫「Kelly！Kelly！.......」

待續

消息 - 張宇
作詞：十一郎　
作曲：張宇

看著被妳　退回的信　燒成了灰燼
一字一淚　灰飛煙滅　我才肯相信
在我們已經僵持的心裡
用同樣的決心　作不同的決定

這樣也好　我的遠行　回程就放棄
一站一站　帶著傷心　一路走下去
讓異鄉我不熟悉的言語
說他們的悲喜　而我再也不必參與

如果說再見　是妳最後的消息
為何我怎麼想也想不起
妳當時的表情　妳當時的心情
有沒有一點痕跡可尋

如果說再見　是妳唯一的消息
我彷彿可以預見我自己
越往遠處飛去　妳越在我心裡
而我卻是妳不要的回憶

越往遠處飛去　妳越在我心裡
而我卻是妳不要的回憶

謎

謎

謎 ~ 這個城市有好多解破唔開嘅～謎，
對於一般香港人來說，可能已經是見怪不怪，
但在我心裡面，呢十個謎，
永遠都一直是個～謎。

第十位：夏天西裝友
全球溫室效應令香港氣溫不斷飊升，
夏天戶外的高溫，足以令人溶化。著住件背心都熱到出哂汗，
但奇就奇在有啲保險代理、地產代理仲可以著住件西裝周街穿梭！
雖然身穿西裝，但面上無乜汗水，
生活逼人，工作需要令到佢哋身體構造同耐熱程度，產生變化、異於常人，
身體基因點解會激變？點解唔見佢哋會中暑？
著咗西裝係咪就一定傾得成生意？
呢個～係一個謎！

第九位：食店門口排長龍
羊群心理作祟，好多食客見到多人幫趁某間食肆，該食肆點會難食吖？
結果門口就出現一大條人龍，愈多人「嗡」喺門口，就愈多人過嚟排隊，
點解啲人肚餓仲要等成粒鐘先可以醫肚？
點解佢哋肯將寶貴嘅時間投資喺排隊上面？
係咪排完一粒鐘之後，企到腳軟，苦盡甘來，
啲食物會變得份外好味？
呢個～係一個謎！

第八位：小巴單人坐孖位
香港人口稠密，人人想要爭取多點私人空間，
小巴在總站上客時，當「四個單座位」被坐滿後，登車的獨身乘客填滿各孖位，
當一對乘客猶豫是否登車分開坐，無人會主動地讓出孖位，
要由司機出聲：「唔該讓個孖位出嚟，快啲開車吖！」
點解乘客係都要被動地等司機出聲先肯讓座？
點解小巴唔整多啲單獨座位呢？
點解政府唔立例防止單獨乘客坐孖位呢？
呢個～係一個謎！

第七位：衝紅燈過馬路
香港人出哂名趕時間，見對面馬路無差佬就會衝紅燈過馬路，
有啲人就算見到架車衝緊過嚟，都誓要同引擎鬥快！喺響咹聲之下抵達彼岸。
不過呢啲勁趕時間的亡命之徒，過了馬路後便立即回復原來緩慢的步伐。
點解佢哋唔係好趕時間之下又要衝過馬路？
點解佢哋要用自己條命去挑戰汽車的性能？
點解佢哋慳咗一分鐘就會覺得自己條命會長咗？
呢個～係一個謎！

第六位：剪頭髮先洗頭
男士到髮型屋剪頭髮，Junior先替客人洗頭，
洗得好耐、好仔細、落哂精華液、護髮素、
之後才去剪，剪完就去沖水，但沖得很快、很馬虎，仍留有髮碎。
點解唔可以將程序調轉？先剪後洗？又例如我剪Skin Head，
那麼之前落的乜素物液落頭髮度，咪全部剪哂，成為浪費？
點解唔可以先稍為弄濕個頭，方便落剪，之後才慢慢洗過徹底？
點解髮型師和Junior穿到全身黑色？
點解髮型從業員很多都是Gay或Lesbian？
呢個～係一個謎！

第五位：街邊垃圾筒出煙
原本空氣已經污濁的鬧市街頭，偶爾傳來燒焦味道，
供人棄煙蒂煙頭的街邊垃圾筒頂部，遭人扔紙巾繼而燒著；冒出白煙。
路人見狀不會call消防隊，等「垃圾筒清潔承辦商」見到才用水撲熄。
點解路人扔易燃物體入垃圾筒頂部？
點解路人見到垃圾筒冒白煙都無動於衷？
點解又唔會有路人扔煙頭入垃圾筒下面嗰格呢？
呢個～係一個謎！

第四位：女sales必抽煙
有人話食煙的原因是舒緩壓力，
時裝店的女sales是否承受很大的壓力呢？
客人閹尖、上司捽數、男朋友唔上進、朋友嫁得好、自己仲無著落、
所以不論中環或深水埗、大label名店或商場舖仔，
見到女sales吃Lunch時一手傾電話，一手掀雜誌，飯後必抽煙。
點解十個女sales有九個愛抽煙呢？
係咪唔抽煙就無資格做sales呢？
點解女sales抽親都係薄荷幼身煙，而唔抽「良友」或「555」呢？
點解女sales唔抽雪茄或煙斗？
呢個～係一個謎！

第三位：小學生超重書包
十二歲以下的小學生，正值發育長高時期，
他們已經沉迷打機唔做運動喇，仲要孭個成噸重嘅書包，點會長高？
雖然有學生使用「空姐feel的有轆書包」，但點解書包要超重呢？
係咪教科書出版社同教育署官商勾結？本書厚啲賣貴啲？
係咪學校無地方安裝locker俾學生放書？
係咪學校編timetable時，要日日都上齊哂咁多科目？
係咪校方專登要學生孭個超重書包後，就無力喺操場上亂跑呢？
呢個～係一個謎！

第二位：教車揼骨時間
小學生都知道一小時有60分鐘3,600秒，
但係一進入骨場，時間空間就壓縮轉移，
一小時變成45分鐘，蒸發了15分鐘。
同樣地，教車師傅教車教一粒鐘，實際只得45分鐘。
他們比常人長得年輕，因為凡人過了10年寒暑，他們面上只留下7.5年的歲月痕跡。
點解佢哋一小時可以蒸發咗15分鐘？
點解係15分鐘？而唔係14分鐘或者16分鐘呢？
呢15分鐘加加埋埋，又去咗邊度呢？可唔可以儲值咁儲起呢？
呢個～係一個謎！

第一位：提款機提款單
政府想提高市民的環保意識，但市民唔領情！
在自動櫃員機前提款，電腦問是客人否需要列印「交易收據」？
很多人按「需要」，print咗張收據出嚟，
睇咗兩眼之後又立即扔落櫃員機旁的廢紙箱。
既然當垃圾，咁點解要print咗張收據出嚟？難道要揸巢張紙過吓手癮？
點解客人只相信hardcopy而唔相信電腦屏幕的數字顯示？
唔通銀行無派利息，所以要print返銀行張收據紙嚟補番返數？
點解銀行唔實施print一張收據會喺戶口扣返五毫？
點解唔用「紙巾料」嚟做「交易收據」？起碼可以抹吓嘢，
呢個～係一個謎！

完

靈異酒店

靈異酒店

阿強於上世紀末，跟當時的女朋友遊埠旅行。
大家選了大阪三天兩夜之旅，順道遊覽神戶京都，
在香港書局買了一本自助旅遊書，訂機票酒店做自由行。
兩人有共識：只會留在酒店房間內僅8小時供睡覺之用，
不如將貨就價，訂了一間不豪華的舊Business Hotel。
貪佢近地鐵站，又近商業購物區，
兩人興高采烈地踏上東瀛旅程。

由機場乘機場鐵路去到大阪downtown。
兩人拿著Travel agent提供的地圖，按圖索驥，加上日本路牌指示足夠，
不需問路人之下，總算靠自己便找到該Business Hotel。
九層樓高的灰色建築物，門口Check in地方狹窄，雖然唔係靚裝但尚算整潔。

Check in後，沒有Bell Boy，自攜行李乘電梯上5樓的房間，
電梯和走廊比較窄和暗，每層樓都設置自動販賣機。
阿強用門鎖咭打開房門後，只見微型房間內僅可容納一張床加小廁所。
隨即放下手上的行李，阿強慣性地打開電視機，讓房間有點聲音。
拉開窗簾，窗外是對面大廈的後巷，
他終於明白Business Hotel是供生意人公幹投宿之用，別遑論什麼享受或景觀！
此時，原本望著窗外的阿強，突然回頭向女友說：「弊傢伙！頭先入房唔記得先叩門添！」
阿強在香港看過電視靈異節目，教人入陌生酒店房間前要先叩門，
讓房內的「靈界朋友」先迴避一吓！
女友安慰：「唔緊要啦！呢啲嘢信則有，不信則無！」
阿強立即作狀向房內四角合十膜拜。補番數！

阿強和女友不需要休息，急不及待想立即落街醫肚！
正當他們想出門口之際，女友說要先去一去洗手間。
因為他們沒有跟團，女友著阿強先落酒店大堂取該區簡易地圖及地鐵路線圖。
阿強先行一步，女友稍後跟他再在酒店地下大堂會合。

女友入了洗手間後，聽到阿強「嘭」一聲閂門，相信他已離開房間。
女友解手之際，房內原本發出「嘰喱咕噜」日語的電視機，
突然之間，沒有了聲響！死寂一片！

女友以為阿強整蠱自己，大嗌：「阿強！係咪你呀？」
沒有回應之餘，廁所的燈亦突然熄滅！漆黑一片！
女友自幼怕黑，立即驚叫！打開廁所門衝出房外，
頭也不回，裙拉褲甩，拚命走到電梯走廊，
大力按電梯掣，希望有電梯快些到來拯救她！
30秒後，女友跳入電梯，心裡咀咒阿強剛才忘記入房前叩門，
結果得罪了「污糟嘢」！仲報落自己身上！

女友在大堂見到阿強，如怒海中見到救生艇一樣撲前，
將剛才的驚險經歷，口震震咁向阿強和盤托出！
無論如何，不惜代價，她一定要換房，必要時換酒店都要！
又怨阿強無入房前叩門！

阿強聽完情緒有點失控的女友一輪機槍式哭訴後，
好冷靜、又好內疚咁細細聲同女友講：「er.....er.....我頭先出房門口嗰陣.....唔覺意.....順手擝走咗條key，sorry！」
（拔出門鎖咭後，房內電源數秒後自動關閉，慳電設計）

女友不埋自己身處在男尊女卑的日本人社會內，大肆宣揚香港女權主義，
當眾追打阿強！仲係唔留情個隻添！

片尾trailer：

阿強跟女友步出心齋橋地鐵站時，傍晚時分遇上放學下班人潮，人頭湧湧十分擠迫！
女友擔心兩人被人潮撞到走失，俟近阿強耳邊說：「咁多人，會唔會走失架？」
阿強聽後，回頭答：「走失？我『媽柒』妳！」
女友聽後大動肝火！立即原地停步質問阿強：「點解你要用粗口鬧我？」
阿強一頭霧水，心諗幾時用粗口鬧過她？
女友重複：「你話如果走失就『媽柒』我！」
阿強恍然大悟，原來地鐵站太嘈吵，
阿強剛才只是說：「走失？我『mark實』妳！」

唉~ 阿強一日連衰兩鑊，大阪的「八字」跟阿強十成十相沖喇！ 阿強今次在「阿強回憶錄」中，亦難逃過「衰收尾」的宿命噩運。

完

死亡Blog記–(下集)

死亡Blog記–(下集)

Kent知道Edwin將會有幾日唔能夠上網，心底裡閃出一個念頭，
Kent打算於今晚寫一篇文章上載到Blog內，文章內容並非「叮走」秘書Jackie，
而是「Kent升職做助理經理！」

跟Edwin收線後，Kent坐在辦公室對著電腦發呆，反覆思量幾條問題：

1. Kent只試過用Blog去辭退人，從未試過用Blog去將人晉升，究竟這樣做，技術上能否成功呢？

2. 這個Blog給予神秘力量去收服惡人，但用作提昇自己職位，會否產生反效果？反遭報應？偷雞唔到蝕勺米呢？

3. 當初兩人都以俠士自居，警惡懲奸，如果Edwin知道自己利用Blog升職，他會有什麼反應？鄙視自己？定係Edwin一早都有此私心打算呢？

Kent決定要做一次升職測試，這個測試的最佳人選，當然就是自己啦！
好像「變形俠醫」要自己親身接受珈瑪射線，身體突變成HULK！
自己先做白老鼠，如果真係順利升到職，再幫Edwin升職都唔遲。

但Kent又害怕給Edwin知道自己濫用Blog去滿足私欲，所以要趁這數天Edwin未能上網而立即行動。更要在Edwin出院前將升職文章delete，希望神不知鬼不覺。

但萬一Edwin睇唔過眼，突然正義感爆發，而Edwin有Blog 的password，只要Edwin再寫一篇文章，便可以將自己的下場改寫成被公司炒魷！又或者Edwin寫文章升他到更高的管理階層，咁點算好呢？
Kent一念之差，心起魔念，大丈夫做事要狠心徹底，不如將Edwin剷草除根！趕他出公司！Kent念在大家相識一場，Kent安排Edwin出院後，有一間新公司請了Edwin，從此長駐廣西某工廠，再甚少回香港。

當晚回家，Kent在Keybroad上寫故事，結局是：「『獎門人』檢討之後，決定升『K場浩男』做助理行政經理。而『古墓屋邨幫』傷癒後被『迪西欣義和團』招攬，從此駐紮在廣西山寨上，再甚少回省城闖蕩。」Kent不敢寫太高的職位給自己，驚自己「虛不受補」。

文章已經寫完，cursor箭咀在「文章發佈」鍵前，左右徘徊，
擔心此舉會否產生反效果？副作用？弄巧成拙，得不償失呢？
Kent猶豫在「升職加薪」和「失去朋友」之間，最後他選擇了權力和金錢。
深呼吸一口氣，食指一click「文章發佈」，踏上一條網上的不歸路。
他由最初對Blog半信半疑，演變到現在對它深信不疑。
並將自己的前途籌碼也一併壓在這個Blog上。
失眠一夜，究竟明天收工時，自己變成大贏家？還是淪落成大輸家？

第二天他回辦公室，Edwin的座位仍是空的。
Kent回到自己座位，今天他的心情如會考放榜日一樣，七上八落，
終於等到臨放工，人事部新經理「文先生」叫Kent入房，
Kent像攞會考成績通知單般，緊張兮兮，戰戰兢兢走入「文先生」房間。

「對唔住！我哋都唔想！」文先生抱歉地說：
文先生說公司面對生產成本上漲，經濟衰退，
要減省人手，Kent被選中，冇得留低。
Kent垂頭喪氣，勝者為王、敗者為寇、Blog終於要跟自己算帳，
「出嚟行，遇咗還」，願賭服輸，只好返回座位執拾東西走人。

Kent左手一袋右手一袋，跟同事道別，路經Edwin的空座位時，欲告辭也不能，
他很大的感觸：失去工作、失去一位好同事，全因自己一個「貪」字。
他感到羞愧，不想call Edwin，不如將自己離開的消息交由同事們轉告給Edwin吧！

＊　＊　＊　＊　＊　＊　＊　＊　＊　＊

Edwin辦完出院手續，由司機攙扶上一部平治房車，駛回大坑住所。
Edwin在車廂內，望著東區走廊給黃昏漂染成金黃色，不禁搖頭嘆息～

事情的經過是這樣：

1. Edwin是公司老細「大黃」的兒子，由11歲起便送到加拿大讀書，雖然其間曾回港放假，但沒有上過公司露面或出席公司年夜飯，所以21歲的太子爺，公司內無人知道Edwin的太子爺身份。

2. Edwin這個暑假回港渡假，「大黃」擔心嬌生慣養的Edwin他朝工作謀生時會吃虧，叫兒子到自己公司當營業代表，又驚同事們對太子爺千依百順，所以要Edwin隱藏自己身份，由低做起，吃吓苦頭，鍛鍊一吓。

3. 溫室長大的Edwin，不懂人情世故，無人會俾面呢個隱身太子爺，Edwin一做錯就炳！一唔醒就鬧！

4. Edwin每日返工受盡冤屈氣，打算向爹地辭職，猶豫尚未有機會開口。

5. 幸而在Pantry中遇上Kent，Kent教曉自己很多東西，仲分享自己寫的Blog，Edwin找到返工的樂趣，決定繼續留低喺公司。

6. 那段亂碼留言只是電腦技術字碼出錯，純粹巧合。

7. 由於所有員工在「大黃」面前都恭恭敬敬，「大黃」分辨不到「邊個係人？邊個係鬼？」Edwin向父親陳述員工罪狀和證據，剷除了「坤哥」和Ryan。替公司清洗瘀血。

8. 人事部「江叔」年事已高，去年起心臟曾出現毛病，退休都是遲早的事情，人事部副經理文先生又是最佳接班人選，可以委以重任。Edwin向父親提議不如補一筆錢給「江叔」退休，當是多謝他對公司的多年來的貢獻。

9. Edwin週未騎馬時意外墮馬，跌斷右腳，騙Kent搬衣櫃時弄傷，叫Kent不要來探病，難道叫Kent來一間高級私家醫院頭等病房探自己嗎？

10. Edwin在病房中用notebook電腦上網，赫然發覺Kent利慾薰心，想升自己職，仲要將自己逼走返大陸？！

11. Edwin看錯了Kent，極度失望！原來他想出院後，向父親提議升Kent做助理經理，無奈Kent「利慾薰心」的歪念，只差一步亦告功敗垂成，Edwin被Kent出賣而感到憤怒，叫父親辭退這個心術不正的Kent。大黃遲早把這盤生意交給Edwin，兒子的建議當然被接納，大黃辭去一個微不足道的小職員，眉也不會皺一皺。

在這一刻，於東區走廊上，Edwin坐的平治房車，
跟Kent坐的冷氣巴士剛巧在公路上的對行線擦身而過，
重疊一秒之後，一輛向東、一輛向西，越駛越遠越遠越遠.........

兩個身份懸殊的後生仔，曾經一同平起平坐，
在茶餐廳內吃飯傾計吹水講笑寫blog，
兩人的心跳聲曾經是何等的貼近。
只可惜因一念之差，
這些光景只能成為兩人各自回憶中的某堆退色的片段。

完

死亡Blog記 - (中集)

死亡Blog記 - (中集)

「The first number is 7.....」
弊！張飛無買7號！跟著愈睇愈心傷，
結果無一個字中，兩人極度失望，預咗有錢收，點知個Blog唔靈，
以為可以明天起退休嘆世界，結果空手而回，心情跌落谷底。

Kent望著枱面上的半杯已經唔涷的奶茶，
首先開腔：「唔通個Blog嘅預知能力，只限於公司範圍之內？」
Edwin：「咁…我哋今晚一於再試試個Blog！」
Kent：「好呀！我知道會計部「掃把」Ryan好鹹濕，成日『借啲咦』對女下屬摸手摸腳，一於懲戒吓佢！」
Kent繼續說：「我寫佢揩油事敗，經理要佢降職做返Clerk，阿Ryan唔制，自己resign！」
Edwin：「好呀！我哋又睇吓聽日靈唔靈先！」

當晚Kent依計寫「壞淫」被女下屬告發佢性騷擾，經理「左青龍」降佢職做Clerk。
第二天早上，Kent回公司見到Ryan，佢仍然色迷迷咁昅著女同事的胸部及臀部，
究竟個Blog今次work唔work呢？

結果臨放工，會計部女同事April，call阿Kent通風報信，話Ryan入完經理房傾咗好耐，跟著自己執包袱走人。
Kent心怔：「唔通呢個Blog真係擁有改變事實嘅神奇力量？！」
Kent立即打電話通知Edwin，相約放工後一起到公司附近的茶餐廳相量一吓。

兩人叫了晚餐A和晚餐B之後，Edwin先說：「綜合兩次事件，我覺得呢個Blog的力量只限於公司範圍之內，如果想攞嚟賺錢就唔靈！」
Kent若有所思：「我諗緊…會唔會係我哋老細「大黃」睇到呢個Blog，跟住照做炒邊個燉邊個呢？！」
Edwin：「吓？但係「大黃」係打金師傅出身，盲字都唔識多隻，鋏就識揸！60歲人，mouse邊度識撳呀？仲有！佢辦公室入面無電腦架！佢只係得支筆，簽吓cheque、批吓design之嘛！」
Kent點頭同意。

Kent：「咁…如果唔係「大黃」，唯一可能性就係人事部老頂「江叔」，唔通佢無意中睇到我哋個Blog？」
Edwin：「但係，阿江叔無必要跟我哋兩條small potato一齊癲呀！」
此時，侍應將晚餐A和晚餐B送到餐枱上，兩人繼續邊吃邊講，

Kent：「好！我決定要試埋最後呢一次，試完之後，我就會100%相信呢個Blog有超自然力量！」
Edwin：「咁…你想點試呀？」
Kent：「我要寫…江叔辭職。」
Edwin：「吓！？江叔係好人嚟架！你唔好害佢老人家啦！」
Kent：「放心！我都知江叔係好人，佢都快60歲，我會寫佢自願食公司肥雞餐，攞完筆pension之後，退休弄孫為樂。」
Edwin同意這個安排。

當晚，Kent寫Blog：人事部「長江一號」自願食公司肥雞餐，退位讓賢。
Kent和Edwin等待明天的最後測試結果。

傍晚5:45分，Edwin枱頭的電話響起，是Kent打來，
Kent：「嘩！今次真係唔到你唔信，江叔真係攞咗筆錢，啱啱宣佈退休！」
Edwin：「嘩！個Blog真係咁堅！？」
Kent：「小心有人偷聽到，放工後茶餐廳見面先慢慢再講！」

當晚於茶餐廳內，Kent：「唔～撇除咗兩個最關鍵人物嘅可能性，呢個Blog真係唔講得笑！既然個Blog有超自然力量，不如我哋攞嚟警惡懲奸！一齊討論吓，睇吓要『叮走』公司邊個衰人？！」
Edwin：「咁即係好似…你扮蝙蝠俠、我扮羅賓，日間隱藏身份、夜晚先出動，踢走公司入面啲衰人同惡人！哈哈！」

他們下一個目標是設計部女秘書Jackie，她專搞公司分化、製造仇恨、超級是非精。
但公司幾日之內已經有三人離職，為免引起老細懷疑，兩人決定等過咗個weekend先行動，
等風聲無咁緊先至落手，剷除邪惡秘書Jackie。
週末兩天，公司休息，Kent沒有跟Edwin聯絡，也沒有新文章發表。

星期一早上，Kent買了早餐回辦公室，一邊吃一邊上網看新聞。
Kent吃完早餐後去斟茶，在pantry見到秘書Jackie和她的同黨正在交頭接耳，
細聲講大聲笑！Kent心諗：「趁仲有「是非」講，妳就盡情講啦，就快無得講啦！」

回到座位，Kent打內線電話給Edwin，想告訴Edwin於今晚落手剷除Jackie，
怎料Edwin沒有接聽電話，改由另一位同事接聽，說Edwin告了一星期病假。
吓？乜事呢？嚴重嗎？Kent立即撥Edwin的手提電話，慰問病況。

Edwin接聽，現在於聯合醫院留醫，星期日Edwin幫他外婆手，將一個舊衣櫃由唐樓六樓搬去地下垃圾站棄置。
怎料在四樓樓梯轉角位失去平衡，碌落三樓，跌斷隻右腳，要留院幾日。

Kent知道Edwin無乜大礙之後，感到安心。Kent想到醫院探訪，
Edwin好言拒絕：「唔使嚟啦！我隻腳唔嚴重，心領啦！」

Kent好奇問Edwin瞓喺政府醫院咪會好悶？Edwin說自己沒有手提電腦、NDS、PSP乜都無，隻腳又打哂石膏，唔方便走動，所以都幾悶，只靠睇報紙雜誌渡日。

Kent知道Edwin將會有幾日唔能夠上網，心底裡閃出一個念頭……

待續

下集（結局）於10月13日星期一晚上張貼

小瓶子

告訴妳十件關於我的事情：

1. 初中的花名是：黑仔（因為暑假後曬到嚿炭）
2. 初中最愛戴walkman，自己搭巴士四處遊車河
3. 中學下課後，愛獨自去戲院看電影
4. 初戀年齡14，對象是同班女同學
5. 第一次醫院留醫（1986）因為右面部神經發炎麻痺
6. 第一次乘搭飛機（1990）是國泰航空公司，目的地是大阪
7. 第一份暑期工（1985）是觀塘製衣廠當雜工
8. 如果我是一種食物，我會選雞蛋
9. 以前衣櫃內只有黑白藍灰，而家七彩
10. 每年於生日前都會去捐血一次，證明自己存在這世界還有丁點價值

死亡Blog記 - (上集)

死亡Blog記- (上集)

晚上12時，Kent在睡房內，十隻手指在電腦鍵盤上「霹靂啪嘞」，
他一邊寫一邊嘴角陰陰笑，滿足地完成一篇網誌後，按下「發佈」鍵，
一篇講Office的諷刺文章便上載到他的網誌上，
Kent習慣每晚臨睡前寫私人網誌，藉此抒發個人對公司的不滿情緒。
寫完網誌後，便倒頭大睡，翌日7:30分起床，到紅磡上班。

Kent上班的地方位於紅磡區一座工業大廈，一間僱有70位員工的珠寶製造工場。
公司分為寫字樓、設計部、配石部和鑲嵌工場四個部分。
辦公室再分人事部、會計部、營業部和電腦部。
這裡人人都叫老闆黃先生做「大黃」，他由「紅褲仔」出身憑雙手打天下，獨資創辦這間公司。
雖然「大黃」今年59歲，但他仍十分有魄力，每天在公司內批閱珠寶設計款式、揀選寶石、監督師傅的手工水準、親身接見一些大客戶等等。

在辦公室內，阿Kent坐在辦工桌前，正把珠寶的版單分門辨類，之後再filing，
Kent的銜頭是辦公室行政(Office Admin)，他是去年才畢業的商業副學士；
經學校的職業介紹處，找到這份工作，由低做起，什麼雜務都由他跟頭跟尾。
基於工作關係，Kent跟公司各部門的同事都有接觸，交過交手，
對於珠寶的製作工程，由設計、配石、做模、鑲嵌、打磨至品質檢查整個過程，他都瞭如指掌。在上司眼中，Kent是一名盡忠職守的標準員工。

雖然公司只得70位員工，但有人的地方就有人事鬥爭問題的存在，
Kent在一年時間內，由於跟各部門工作上接觸的關係，
他已清楚了解到公司內「邊個係人？邊個係鬼？」
見到好相遇的同事，就傾多兩句偈、交吓心、
見到麻煩的同事，就響起防範警報，敬而遠之。
公司內各人脾性、蠱惑陰濕定正直磊落，他都心裡有數。

Kent一遇到公司有激氣嘢，就愛寫下來，用文字發洩一吓！
他開了一個Blog，替公司每個員工起了一個花名代號，
將不滿事件改頭換面寫成短篇故事，搬到Blog上去，
踢穿邊個同事專篤背脊、邊個假公濟私、邊個以大欺小等等。
把鬱結寫出來，人也舒服許多，他不計較有否讀者看他的文章，
至目前為止，仍然是「零回應」，但Kent唔介意，
因為他明白他的文章主要功能是拿來自娛和發洩而已。

這個星期，公司來了一位年輕的新同事叫Edwin，職位是Sales Executive，負責到零售商推銷珠寶及接珠寶訂單。
Edwin是21歲初出茅廬的畢業生：父親早死，家境清貧，住在深水埗屋邨，
Edwin剛畢業，不懂人情世故，戇直魯莽，又唔識講說話嘅藝術，成日撞板。

Kent因要幫補家計，十四歲起，已於課餘時間到快餐店便利店當兼職，社會經驗、待人接物、鑑貌辨色，說話得體，一點也不輸蝕！
Kent見到Edwin咁「弱雞」，回想起自己以前也是「無嚟老醒」嗰類人，幸而當時有一位supervisor對他愛護有加，肯提點新人，否則幾年後自己仍是一嚿飯。

有一次Kent在Pantry碰巧遇上Edwin，Kent看見入世未深的Edwin，
想起自己當年也是年少無知。Kent同情心起，忍唔住主動向Edwin提點兩句，
從此兩人便熟絡起來，經常一起相約吃Lunch傾偈。

Edwin經Kent提點後，人也醒目咗，不像以前經常撞板捱鬧。
Edwin十分慶幸能交上像Kent這樣的朋友，Kent和Edwin吃飯時，Kent簡單地告訴Edwin在公司裡，哪個是奸？哪個是忠？哪個要提防？哪個可靠？
Kent更將他的Blog跟Edwin分享。Edwin看到文章抵死啜核之處，都在電腦屏幕前笑到拍爛手掌！
Edwin表示有興趣一齊寫公司故事，Kent把Blog的password告訴給Edwin，
之後，Edwin寫過兩篇關於Sales Department的辦公室趣事。

某一晚十時半，Kent在家中開啟電腦check網誌時，咦！有一個留言喎！
Kent寫了幾個月網誌，終於首次有讀者回應喇！
如在沙漠上流浪了幾個月，第一次遇上另一個沙漠旅客般興奮！
心諗唔通係Edwin給自己留言？馬上click開留言查看是誰？心裡極希望是一位女讀者！

「¤@­Ó³£¤£¯à¤Ö¶º§½¤@­½Ð°Ý02/05 ¦³®É¶¡ / ¿³½ì¥X®u¶º§½¶Ü?」

竟然是一名匿名者寫出一堆沒有意思的亂碼，Kent隨即致電Edwin問他有否留言給自己？Edwin回答沒有。
一時間兩人都唔知道呢堆亂碼的來源。不經不覺，已經傾到十二時，
Kent有點眼睏，決定今晚唔寫，休息一晚。

自從這一晚，這一堆亂碼出現之後，怪事就開始陸續發生！

第二晚，Kent如常臨睡前寫Office故事，內容講配石房主管「坤哥」的惡行。
坤哥是老闆年輕時的同門師弟，所以老闆對坤哥十分信任，怎料坤哥向寶石supplier私下收取回佣，
間中採購一些低品質的鑽石，從中收回佣，袋袋平安，這內情是配石部師傅偷偷爆俾Kent知道。
Kent將「收回佣事件薄」改名換姓寫下來，故事的最後結局是自己加上去：「『邪棍』被『獎門人』發現收回佣，獎門人勸邪棍自動辭職，斗零都無補俾佢！」發佈文章後，抒發完情緒後，Kent便上床瞓覺。

第二天傍晚，臨收工之時，Edwin打內線電話給Kent，
Edwin好緊張咁講：「喂…喂…你噚晚嗰篇文…竟然…竟然…發生咗！阿坤哥被老闆…勸佢自動辭職…仲即時生效添！」
Kent張到嘴巴成Ｏ型：「吓！咁邪！又會咁準嘅！？」

Kent在電話中，輕聲說：「唔通……唔通…個Blog……有預知未來嘅能力？」
Edwin：「吓！咁神奇！唔通…嗰堆亂碼…係外星人或者靈界…？」
Kent：「喂！唔好講咁多，我哋即刻買條六合彩，我將嗰六個冧吧寫喺Blog度，話係下期開嘅！嘩！我哋今次發梗啦！」

Edwin舉腳贊成，當天放工後，兩人一齊去投注站買六合彩，當晚把「中六合彩情節」寫進Blog內，等待星期二公佈攪珠結果，兩人下半世發唔發達？寄望在這次開彩啦！

到了星期二晚上，兩人放工後相約在茶餐廳，緊張地握實獎卷，盯實電視機攪珠直播：

「The first number is 7…」

待續

中集於10月11日星期六晚上張貼

恐嚇說話

恐嚇說話

80年代的港產片中，
常聽到一句對白：「想拋我？我嚇大架！」
在我們的成長過程中，確實聽過很多言帶恐嚇性的說話。
恐嚇說話只是一種意識，無實際行動，希望把對方嚇窒繼而屈服，
讓我揀選印象最深刻的十句。

第十位：「你搞唔掂？你聽日唔使返工！」
火爆老細常用的威脅說話，
用打爛飯碗來恐嚇下屬一定要完成艱巨任務，
如果不成功，便成仁，立即炒魷！
例句：「你通頂搞咗三日三夜，都仲未做好？你仲搞唔掂？你聽日唔使返工！」

第九位：「唔好行埋嚟！如果唔係我跳落去！」
危坐天台邊的企圖跳樓自殺者，
見到警察消防員走埋嚟，大聲嗌：「唔好行埋嚟！如果唔係…我跳落去！」
自殺者的企圖是尋死，但竟然用自己條命做威脅，勒令警員唔好接近。
究竟佢真係想自殺？定係想做場大龍鳳引人注意呢？
真係當事人先清楚。

第八位：「我爛命一條，最多咪攬住一鑊熟！」
所謂「趕狗入窮巷」，「好佬怕爛佬」，
爛佬唔怕爛命一條，「缸瓦撼陶瓷」！
所以喺貧富懸殊的社會，低下層邊緣人常用呢句來恐嚇有錢佬。
例句：「你身驕肉貴，我就爛命一條，最多咪攬住一鑊熟！」 ，「一鑊熟」是屬於80年代，現今，就算打邊爐都好少聽到「一鑊熟」。

第七位：「我做人仲有乜意思呀！我死咗去好過囉！」
遭拋棄的怨婦、失戀被遺棄情人，常用此句。
對方突然提出分手，失驚無神自己情緒失控，捶胸頓足！呼天搶地！
「我做人仲有乜意思呀！我死咗去好過囉！」
邊講邊作狀爬窗、攞刀、飲滴露，
希望以死嚟威脅對方，收回分手的成命。
另外，不孝子女激親阿媽，阿媽都會喊著講呢句！

第六位：「我就爆你大鑊！」
每個人都有秘密，分別在於「見得光」定「唔見得光」？
假如知道別人的一些不光彩的秘密，可以藉以要脅。
「如果你唔俾一百萬我，我就爆你大鑊！」
由娛樂圈爆料、商業犯罪、桃色醜聞、謀財害命，到政治陰謀，此句都適用。
同樣「爆大鑊」是上一代的舊有「動名詞」。
如今多用「篤爆、踢爆、揚開佢」。

第五位：「你做到咁絕？我做鬼都唔放過你呀！」
中國人比較迷信，相信鬼神、超自然力量。
所以如果要威脅人，要借靈界鬼魅來嚇唬對方，
你做初一？我做十五！「你做到咁絕？我做鬼都唔放過你呀！」
著紅色衫去自殺，化成怨氣沖天的厲鬼！纏身報復！
撈偏門及撈家，較信邪，會容易屈服。

第四位：「信唔信我port你呀？！」
政府拍宣傳短片：「今時今日，咁嘅服務態度係唔夠！」
釀成投訴風氣，「消費權益在你手，據理力爭要開口！」
結果服務員稍一怠慢，顧客立即破口要投訴，
抄低Staff number：「飲香檳，無免費魚子醬送？信唔信我port你呀？！」
從而獲得通容著數：快啲有檯、舊貨換新貨、無限次維修、送物送乜…
服務員為保飯碗或免麻煩，唯有暗啞底硬食！

第三位：「咁…我哋不如分手啦！」
男女關係，外弛內緊，寸土必爭！
如果一方提出的要求，未獲對方接納支持，
被拒絕一方只好出絕招，用成份感情作賭注，
「叫你偷支警鎗俾我玩都唔制，咁…我哋不如分手啦！」
結果好多傻事荒謬事，都在這種威脅情況下釀成發生，悲劇收場。

第二位：「你唔應承我，我就跪喺度唔起身！」
弱方哀求強方，不能行硬，只好行軟，死纏唔放！
男士求婚、借錢救命、挽留決裂情人、求醫生救人，皆適用。
以前「跪喺度」呢一條蹺，仲有人會受，現在只覺好「娘」！男士當眾跪喺度求婚，以為用群眾壓力作脅，但如果女士唔鐘意都唔會work！
上一次聽「你唔應承我，我就跪喺度唔起身！」好似已經是看粵語長片的時候。
想只用誠意來打動對方，在物質掛帥的社會來說，似乎十分戇居。

第一位：「妳試吓行出呢個門口，妳出咗去就唔好再返嚟！」
家庭暴力事件、離婚個案、虐妻虐兒案件，愈來愈多，
逼到受害者忍無可忍，執嘢走人！
施虐者出言恐嚇：「妳試吓行出呢個門口，妳出咗去就唔好再返嚟！」
受害者當然唔受威脅，亦唔想再返嚟呢個破碎的家。
呢句都係50、60年代，男尊女卑社會才聽到，
現在女性經濟獨立，再無太太會當丈夫是一張長期飯票。
如男性講此句，只覺得Camp到爆而已，
恐嚇成份只變成搞笑成份！

完

缺德辦公室

缺德辦公室

在職的白領人士，
每天平均需要花8小時或以上在辦公室內工作。
如果辦公室內有很多缺德的同事們，一定會令自己好激氣！
現在數吓辦公室內常見的缺德行為。

第十位：蒸餾水機無水
口渴時侯想去茶水間斟水，
怎料蒸餾水機一滴水都無！
最後斟水嗰位同事唔換水，
亦唔打算搵人幫手換水。
自己酙完最後一滴水就走人！

第九位：傳播virus到server
同事於辦公時間上網消閒，
Download歌曲電影相片software，
不慎中了virus，並傳染到公司的中央server；
結果累街坊，導致全公司down機！
更甚者，某些重要file遭到破壞。

第八位：滿地薯片餅乾碎
同事們下午三四點開始搵嘢食，
薯片、餅乾、紫菜、蛋捲、牛肉乾，
但他們一break的時候，拿着零食去別人的辦公桌relax吓，
又傾計又食嘢。結果就整到你張枱面、週地零食碎，
惹蟻又惹蟑螂，認真唔衛生！

第七位：共用file用後唔close
部門各同事需要access某個share file，
結果其中一位同事用完file之後又唔close，
令到其他同事想使用時，file變成「唯讀的檔案」。
要大聲嗌：「邊個開住個file未閂？」
當然無人會承認責任，不過經手人馬上暗地裡close file，
仲喊賊捉賊，大聲問：「邊個咁無手尾呀？！」

第六位：影印機jam紙
去影印房，部部影印機俾人搞到jam紙後，不顧而去！
只好落手抽出jam紙，結果雙手都是黑炭粉。
另外，影印時如果唔睇清楚就按start，
結果影出嚟變20張、用A3紙、放大縮小200%！
原來上手影印時調教setting後，影完又忘記還原，
而下手又無睇清楚啲掣，結果全單照收。
浪費紙張！

第五位：雪櫃棄置食物
有同事買食物回來，存放於公司雪櫃，
但有意無意地忘記了食物的存在。
任由它長埋在雪櫃，等佢過期變壞！
一打開雪櫃，發出嗅味，要阿嬸清理。
食剩的芝士、脫脂奶、麵包、水果、生日蛋糕，
變黑變嗅變壞變型！

第四位：唔接聽他人電話
當某一同事的辦公枱頭，電話響起，
其他同事借了聾耳陳隻耳，詐聽唔到，
任由電話長響，唔幫人drop低口訊，
可能讓同事失去一單生意！
各家自掃門前雪！

第三位：飯盒棄置廢紙籮
午飯時，吃完的飯盒有餸汁餸骨，
最好棄置於茶水間的有蓋密封垃圾桶內，
但係有人貪方便，隨手把飯盒棄置於寫字枱旁的廢紙籮，
讓餸汁異味於辦公室內揮發。
惹來昆蟲細菌滋生！

第二位：借文具唔還
當某同事的文具唔知放咗喺邊？
最簡單直接的方法，就係向其他同事借，
但用完之後就據為己有，一借無回頭。
同事經常發現自己的文具出現在別人的桌上。
又偷返佢，冤冤相報！

第一位：偷A4紙文具
每人家中都添置了電腦（更可能是一部以上）！
有些人家中添了printer，需要大量A4紙print私人嘢，
結果office影印房，經常有人鬼鬼祟祟出入，滿載而歸。
如果有同事晚間讀書進修，自我增值，
需要膠file、螢光筆、原子筆、塗改液等文具，
他們的筆袋就會久唔久自動增值，脹卜卜。
員工大聲話：「伙計終身學習，老細最支持！」

完

喂喂喂！

喂喂喂！

港鐵車廂內，一名20歲中國藉年輕男子，
他的電話響起，他望見來電顯示後，急不及待接聽：

＊「喂！.....喂.....大聲啲！.....喂......」
△「喂！.....喂......好窒呀！.....喂！聽唔聽到呀？！」
...........

「喂.....而家好啲啦，......咩話？......我部電話最新款，唔關部電話事！
.....係呀！搭地鐵過緊隧道嗰陣，好容易斷線嘛，
吓？關我咩事呀！.....妳問吓電話公司點解啦！......
.......我唔係串妳！我意思即係......我都好想問吓電話公司點解咁易斷線囉！......喂！......喂！唔係嬲吖？咁易嬲？乜妳咁小器架！......
......我唔係咁意思，但係妳有時.....唉～～算啦算啦！
唔好講啦.....哦！......好～係妳叫我講架咋！我聽妳話，我先講咋！

嗱！唔講遠，就講嗰次我哋上Yuki屋企玩佢新買嗰隻狗仔，Yuki叫我幫手一齊餵狗仔，無理妳一陣之嘛，妳就跟住成晚黑面。我認衰仔專登遞支可樂妳飲，
妳就當住我班friend面前，鬧我零醒目！做乜隊支甜嘢俾妳飲！
想落我面吖嘛！OK！跟住輪到我黑面啦，咁妳就成晚「柄」埋一面喪煲電話粥，當我哋全部透明，第日我仲俾班friend串我「削」，嗰鑊我真係灰爆！
我有冇怪過妳呀？！係無呀！我仲借埋部PSP過妳，等妳看舖嗰陣打，驚妳悶親！

仲有嗰次，我哋行旺角，妳話想出過部新電話，行咗一陣，
我話口渴想入「七仔」買啲嘢飲，妳就話唔好！
想正正經經坐低飲杯嘢「Hea」一陣，咁好啦！我成日都就哂妳，妳知架！
好啦！妳就由街頭行到街尾，唔係嫌呢間污糟、就嫌嗰間多麻甩佬，嗰間嫌人多唔想等位。結果無間肯入，渴到我P哂K！
最後咪幫趁太子間Circle K！妳有冇諗吓我嘅感受吖？…

吓？......唔係！....我唔係咁嘅意思！.....我無話過妳唔愛我！ 不過有時妳真係好飄忽囉！
嗰晚我契妹約我一齊落中環「北京」玩，佢都有叫埋妳一齊去玩架！
我叫埋妳去，妳就扭轉塊面行開，眼濕濕話唔想阻住我哋，我聽完之後超搲頭！
我話我同佢無嘢啦，佢條仔阿Van妳都識架！妳剩係識得喺度勁嘆氣，
仲話一個係咁、兩個又係咁！點解條命生得咁坎坷？！
最後我話唔去玩囉！妳又話妳唔係啲咁小器嘅人！我當堂O哂嘴！
咁我話一於去啦！妳又話去咗就返嚟幫妳收屍，我真係超無奈！
俾着係妳，我諗妳都會當堂撻低喺地下度啦！

仲有上次.....我......喂！hold hold先，我有電話入，
.................................
『喂！......吓？家居電話優惠？無嘢呀你！？唔好再打嚟呀！』.....

喂！.....妳仲喺唔喺度吖？.......唔係我契妹打嚟，啲傳銷電話之嘛！.....我做乜要呃妳唧！......都話唔係我契妹打嚟囉！.......我頭先都未講完，
嗰次妳話一個人睇舖好悶，叫我落嚟銅鑼灣揾妳，陪妳一齊看舖，
又話好恨食雪糕夾餅，叫我買，OK！我咪去到無雷公咁遠嗰度買囉！
我一句都無怨到！仲驚佢溶，跑返嚟，好啦！買咗返嚟啦，
妳先至話要「薄荷石板街」雪糕！仲叫我山長水遠再去買過？！.......
妳有冇理吓我嘅感........喂！......喂!.......
喂！....喂.......大聲啲！......好窒呀！......喂！」
Repeat ＊ 2 次
Repeat △ 3 次

完