成也科技 敗也科技

成也科技 敗也科技

(這篇是新寫的)

張先生婚後生活十分乏味，抵不住誘惑，手電安裝了「溝女APPS」，方便自己跟附近範圍的女生勾搭。結果張先生成功用APPS溝到個妙齡少女。

一個下午，張先生在地鐵站拖著新女朋友仔，張先生突然大驚！他在人群中離遠見到太太正迎面向自己方向前行。恐怕今次在車站內會有家庭糾紛發生，甚至會被途人拍低過程放上網。

怎料張太太一邊行一邊垂下頭玩手機，跟張先生擦肩而過都懵然不知，張太太全程專心玩電話，事後張先生抹一額冷汗。

張先生靠科技去「溝女」，險些釀成家變，也好彩全靠科技，才能免他陷於家變。

完

二少爺說︰邊行邊玩電話，減慢了步速，對後面趕時間的乘客來說，十分激氣。

噢雪！

噢雪！

「噢雪！」是英文「Oh！Shit！」的廣東話音譯。

「Oh！Shit！」的意思是「糟糕！」、「弊傢伙！」、「死喇！」、「大劑！」、「大鑊！」等等。都是當人遇到嚴重問題時，衝口而出的感嘆語。今次數一數在什麼情況之下，會經常聽到「噢雪！」呢？

第十位：送車尾

旅客去機場，由於地點離機鐵站太遠或者的士費太貴，需要搭機場巴士到機場，而機場巴士是15至20分鐘一班車，錯過呢一班就要當街罰企20分鐘。如果旅客已經趕緊時間，仲要送埋機場巴士尾，真係好激氣：「Oh！Shit！」

又或者排隊搭小巴，當你準備上車之際，車門「砰」一聲關上，16位乘客剛坐滿，開車走人，你在車門外大叫：「Oh！Shit！」之後唯有死死地氣，繼續留喺街上吸塵。

第九位：海景被阻

靠海置業的業主，很自豪地依窗眺望180度無敵海景，樓宇價值隨著面前的璀璨海景而升值。突然電視新聞公佈：露台外面的海景，將會被另一個地產新項目興建所阻擋，業主呆座在電視機面前，大叫：「Oh！Shit！」海景變樓景，樓價將會下降，身家貶值。

第八位：忘記帶護照

離港出埠，無論是興高采烈去旅遊，抑或跟老細戰戰兢兢去公幹，當到達機場航空公司的check in counter前，才發覺自己的護照遺留在家中。而飛機又快要起飛，你擺明「失魂累街坊」。在眾人怒啤之下，你不禁徠心裡大嗌：「Oh！Shit！」！

第七位：考試貼錯題

香港學生考試，邊個會戇居居讀哂成個考試範圍吖？梗係要貼試題啦。補習天王嘅貼題，當然可信性高啦。但唔係個個學生都俾得起昂貴的補習費，咪要自己貼題囉！如果開考時一翻開試卷，發現貼錯題，學生第一個反應便是：「Oh！Shit！」可以考慮立即舉手離開試場。

第六位：玩Surprise接放工

男朋友「玩驚喜」，唔聲唔聲去女朋友公司樓下，等女友放工。結果喺女朋友公司樓下，見到女友和另一個男人手拖手行出嚟。這時候，妒火中燒的男友通常會先講：「Oh！Shit！」再講：「呢條死仆街！」

第五位：廁格無廁紙

人有三急，或者肚痛難頂，要幫襯公廁。一入到廁格內，山洪瀑發咁解決完畢之後，才發覺廁格內無廁紙，大嗌：「Oh！Shit！」叫天不應叫地不聞，點算好呢？唔通真係要用手？

第四位：食提款卡

當一個人急需要現金購物、享樂、救急或找數，他到自動櫃員機「撳機」取錢，排完條長龍之後，終於輪到自己。點知張提款卡「被食」，無錢救急之餘，仲要立即想其他辦法，而且第二日又要花時間去銀行補領返張卡，費時失事，真係：「Oh！Shit！」

第三位：早上七點前落8號風球

打工仔喺夏天最希望打風掛8號波。如果中午掛8號波，打工仔拍爛手掌，Lunch之後順便放工。Call齊腳打通宵牌、劈酒睇波，諗住可以無端端多一天假期休息。點知翌日早上7時前，天文台宣佈除下8號風球，打工仔須於兩小時內回公司，如常於九時準時開工。全港打工一族，齊心一聲：「Oh！Shit！」死死地氣落床換衫返工，十分沮喪啊！

第二位：臨尾Hang機

工作需要用電腦，埋頭苦幹一番後，差少少就可以宣佈大工告成之際，突然電腦Hang機，將所有前工盡費！當時人將個Mouse猛拍張枱！先嗌：「Oh！Shit！」見電腦無反應，再在keybroad上瘋狂拍打來洩怒！大嗌：「有無搞乸錯！」、「點解個天要咁對我呀？！」

第一位：遺失電話

都市人唔見咗銀包，最多唔見現金、報失credit card補領ID card，但係唔見手提電話就嚴重好多！不單止部電話幾千蚊，仲無哂班friend的電話號碼及whatsapp紀錄，立即舉目無親。如果電話入面有「私人情慾短片」或「珍藏裸照」，咁好快就會喺網上面爆光流傳！失主就會立即講句：「Oh！Shit！」，火爆的失主就會立即爆粗。

完

二少爺說︰你沖涼時有無用過「澳雪沐浴露」呢？

夢飛翔

夢飛翔

(這篇是新寫的)

Johnny和Roy一齊坐喺酒吧Bar枱，已經飲咗好多杯，兩個都醉醺醺。

Johnny︰「我尋晚發咗一個夢。」(註1)

Roy︰「我尋晚都發咗一個夢，咁你發夢見到乜嘢吖？」

Johnny︰「我發夢去咗美國旅行。咁你又發夢見到乜嘢吖？」

Roy︰「我發夢自己去咗disco，我被好多靚女包圍著。」

Johnny︰「咁多靚女，點解唔call我趕嚟？」

Roy︰「夢中我有打電話俾你，不過你話你去咗美國旅行囉。」

Johnny︰「哈哈….」

兩人大笑幾聲後，醉了，昏睡於Bar枱上。

Johnny的電話響起，鈴聲把他弄醒，Johnny連忙接聽電話，是Roy打來的。

Roy︰「喂Johnny…喂Johnny呀？」

Johnny︰「係呀，點呀Roy？」

Roy︰「你後面咁嘈，你而家喺邊呀？」

Johnny︰「我而家喺美國旅行。喺旅遊車瞓著咗，啱啱你打電話嚟先嘈醒我之嘛！」

Roy︰「噢，sorry…」

Johnny︰「喂Roy，你後面都好嘈喎，你而家又喺邊呀？」

Roy︰「香港而家夜晚，我喺disco，好多靚女呀。」

Johnny︰「可惜我嚟唔到…..喂Roy，我尋晚發夢見到你呀。」

Roy︰「咁啱嘅Johnny，我尋晚發夢都見到你噃。」

Johnny︰「咁你夢見我做緊乜呀？」

Roy︰「我夢見我哋坐喺酒吧嘅Bar枱，已經飲咗好多杯，兩個都醉醺醺。之後，你就開口講︰『我尋晚發咗一個夢。』」＊

＊【請回到故事第一段的(註1)，繼續Loop下去….】

完

二少爺說︰我真係無話可說了。

金曲頒獎典禮

金曲頒獎典禮

每年年尾，香港電視台電台紛紛搞金曲頒獎禮。表面上是總結當年歌手們的成績，實際是各大唱片公司和電台間利益交換的爭鬥。歌手上台攞獎，感動致謝交足戲。今次數一數金曲頒獎典禮最常聽到的十句說話：

第十位：「香港樂壇，每年新人輩出。」

每年金曲頒獎禮，設有「最佳男女新人獎」，而大會司儀介紹頒發新人獎時，例必說：「香港樂壇，每年新人輩出。」唱片公司簽埋啲無乜歌藝的青春model做歌手，捧唔紅就解約，唔怪得每年咁多「一曲歌星」，一閃即逝。

第九位：「我會繼續努力，答謝我嘅歌迷！」

得獎歌手走上台，應承歌迷會繼續努力。歌手知道唱片大賣會替自己帶來財富和知名度，所以啲歌手唔使咁虛偽講「乜嘢答謝歌迷」喇，不如直接啲講：「我會繼續努力，賺哂我歌迷啲錢！」仲誠實坦白喇。

第八位：「你哋話係邊個呀？吓？大聲啲！」

嘉賓要揭曉得獎者是誰，撕開手上信封後，望一望，先碌大對眼，再帶笑面對鏡頭：「你哋話係邊個呀？吓？大聲啲！」搞搞氣氛，等觀眾嗌出自己偶像的名字；一輪擾攘之後，嘉賓：「係啦！係你啦！上台啦！恭喜哂！」攝影機close up得獎歌手的茫然樣子。

第七位：「多謝大家收睇，明年再見，拜拜！」

金曲頒獎典禮接近尾聲，需要打完場。大會司儀先邀請得獎歌手上台，齊齊向鏡頭揮手道別：「多謝大家收睇，明年再見，拜拜！」之後，字幕極速向上彈出，緊接播出廣告，電視台賺錢要緊。

第六位：「我無諗過會係我架！」

歌手知道自己獲獎後，唔敢相信自己的耳朵！（可能是真？可能假裝？可能對手太強？可能自信心不夠？）獲獎上台時，聲震震：「我無諗過會係我架！」歌手手足無措說：「好緊張！我唔知講乜好？」如果歌手真係無諗過會係自己攞獎，咁不如乾脆留喺屋企唔好出席，慳返啲化妝set頭晚裝等開支啦！

第五位：「我要多謝經理人、大會」

歌手明白自己得獎，背後有一個唇齒相依的人一定要多謝，就是自己經理人。飲水思源，還要鳴謝頒獎給自己的大會，所以會聽到：「多謝Parco！」「多謝鍾珍！」「多謝楊生！」「多謝TVB！」「多謝商台！」「多謝新城！」等等。

第四位：「大家要支持廣東歌！」

可能香港不敵大陸大市場，廣東歌受到國語歌挑戰，廣東話的法定地位也受到挑戰，網民發起保衛廣東話，得獎歌手藉此機會呼籲大家要「撑廣東歌！」提高本土意識，聽歌要聽廣東歌，睇戲唔睇中港合拍電影。

第三位： 「剩番最後一首金曲，由邊位歌手攞呢？」

當九首金曲已經揭曉後，仍有某些偶像歌手未獲獎。這時候，司儀掀起緊張氣氛，問觀眾：「剩番最後一首金曲，你估由邊位歌手攞呢？」此時，攝影機會對準歌手們的大頭Close Up，歌手們強作輕鬆扮鎮定。當結果公佈後，落選歌手還要強顏歡笑，扮大方去拍膊頭或握手，祝賀正在路過上台的得獎歌手。

第二位：「你放低個獎先，麻煩你去嗰邊準備一吓。」

得獎歌手致謝完畢後，連個獎都未摸暖，司儀上前說：「你放低個獎先，麻煩你去嗰邊準備一吓。」歌手微笑點頭後，在「走音」和「忘記歌詞」的心理威脅之下，戰戰兢兢地live唱出他的得獎歌曲。

第一位：「多謝我啲fans！無咗你哋，我無可能企喺呢度！」

歌手的人氣指數高低，全賴一班Fans的支持與擁護。歌手懂得在適當時機冧吓樂迷，乘機收買人心。當歌手講完：「多謝我啲fans！無咗你哋，我無可能企喺呢度！」攝影機立即影場中舉著螢光名牌遮面的fans，響起吹BB聲。歌手感動到眼濕濕，雖然他心裡知道那班Fans是公司請回來的專業Fans。

完

二少爺說︰香港沒有樂壇沒落唔關免費Download事。

無窮娛樂 - 下集

無窮娛樂 - 下集

Moko支持男友Brian後，新搞作陸續有嚟︰
第三天，他們共同向記者高調宣佈閃電結婚。
第四天，Moko解釋因為已有Brian的身孕，被迫奉子成婚。
第五天，Brian澄清BB的經手人是某唱片公司的男高層Pasco。
第六天，Brian和Moko解除婚約，Brian單方面宣佈分手。
第七天，Moko宣佈在電梯滑倒，BB小產。
第八天，Brian高調閃電返兜，宣佈跟Moko復合。
第九天，Brian被影到跟猛男親密買衫。
第十天，Brian承認他是雙性戀者，在外國曾兼職舞男。
第十一天，Brian被發現濫藥及酣酒，並有暴力傾向，正接受治療。
第十二天，Moko出櫃宣佈她其實是Lesbian，要跟Brian解除婚約。
第十三天，Brian在disco大哭大鬧，情緒失控，酒杯玻璃割手，送院醫冶。
第十四天，Brian懷疑被Michael Jackson鬼魂上身，找神父驅魔。
第十五天，Brian懷疑在驅鬼過程中，迷糊中遭人粗獷性侵犯。
第十六天，Brian遇上外星人，給予他超能力，能預知未來。
第十七天，Brian失縱十小時，聲稱自己穿越時空，回到唐朝。

Brian跟Moko兩人鬧得全城熱烘烘。兩人的戲劇性發展，當然是依Brian的創作劇本進行。兩人每晚的娛樂，就是欣賞各大媒體和網友如何咬牙切齒地指罵或談論兩人。見到全城市民的情緒都被他們操控。要他們笑就笑，要他們嬲就嬲。這迴響給予Brian前所未有當導演的滿足感。

但觀眾亦對這對是非男女的興趣慢慢遞減：由特刊報導、封面頭條、淪為副題、半版、四份一版至一小格，報導篇幅越縮越小。一版變半版變一格再變半格。Brian眼見noise越來越少，急於推高劇情至高潮：上演服藥自殺。

到了第十八天，根據劇本，下午三時，Moko上Brian家。兩人先在家中劇烈吵架，跟著Moko奪門而去。剩下屋內情緒激動的Brian，他用紅酒啪哂成樽安眠藥（當然不是安眠藥喇），Brian倒地，報警求救，送院洗胃。兩人明白劇情後，Action！開始演戲。

Brian和Moko高聲吵鬧，等鄰居聽到，Moko亂扔嘢。碎片滿地，Moko「砰」一聲閂門走人。Brian服下數粒安眠藥後，咦？呢隻安眠藥有料到喎！服後立即手腳乏力倒地，Brian在袋中取出手提電話，想打999。

Brian打了個突：「吓？！點解手提電話無哂電？！我明明有『差電』架！」Brian躺在冰冷的地板上，望著天花板，屋內很寧靜，他的眼皮很重，漸漸失去知覺。

＊    ＊　＊　＊　＊

Moko離開Brian的住所後，乘的士去酒吧跟朋友會合happy hour，她要慶祝Brian的離世。

原來Brian真的有酣酒習慣及暴力傾向。Moko吃過Brian不少拳頭。她亦不想繼續被Brian操控下去當傀儡，日日做騷，陪佢癲實在太累啦。加上Lawrence對Moko暗中展開追求；Moko將計就計，順水推舟送Brian踏上他生命的最後一程。

Moko跟Brian用同型號smart phone，她下午到Brian家時，趁他不覺，替Brian的手提電話換上無電的電池。再將藥樽內的藥丸換上特強力的安眠藥。

Moko去到酒吧，在朋友面前交足戲，哭訴跟Brian剛才吵過交。Moko飲到醉醺醺又唔願走，晚上7時電話響起，是警方來電。原來傍晚6:30助手上門找Brian，方發現Brian倒斃家中，立即報警，但已證實死去。Moko趕到醫院殮房，在記者和警方前交足戲，垂頭痛哭。記者的相機閃燈閃呀閃。不少記者們替Brian的逝世，心裡有「抵你死喇」之感。

＊    ＊　＊　＊　＊

Lawrence陪Moko出席Brian的葬禮，Brian在生命中最後的半個月，故弄玄虛，弄假成真。他終能一償當導演之素願，可惜賠上生命。Lawrence和Moko把兩朵白菊花，放在Brian的棺木內，最後一次在Brian面前交戲，兩人黯然神傷。

完


二少爺說：自己就是自己生命的導演。 )

娛樂無窮 - 上集

娛樂無窮 - 上集

Brian在香港影圈曾經閃亮過，他是美國竹昇仔。三年前一次回港渡暑假時，在銅鑼灣街頭遭星探發掘；繼而進入影圈。首部電影已經替Brian贏取「最佳新人獎」。可惜他只是一閃即逝，無以為繼。

Brian之後拍過幾部爛片，票房仆直。由主角淪為配角到客串至大茄。Brian的人氣已經跌到谷底。在Brian最失意的時候，他結識了一位女朋友，叫Moko，她是影圈三四線女奀星，她和Brian隸屬於同一間經理人公司。兩人半紅不黑，載浮載沉，大家都有同病相憐的感覺。

常通影星遇到事業無起色的困境，便會考慮轉型：做電視、幕後或轉行搞生意。但Brian對電影圈始終有留戀，咁啱Brian在一個飯局，識到一位獨立電影導演，叫Lawrence。呢個導演滿腦子怪主意，飯局中，他們一拍即合，Lawrence構思Brian的復出電影，雖然係無乜budget的小本製作，但一定可以製造到noise。Brian自己也有興趣當導演，向Lawrence提出不如合導此片，但Lawrence婉轉拒絕，叫Brian還是專心做好演員先，演而優則導，磨練好演技成為日後當導演的階梯。

Brian將這個可能是事業轉捩點的好消息告訴Moko，Moko戥男友開心之餘，鼓勵Brian日後一定可以當導演。Brian想了一夜，決定在復出前替自己造勢，一嚐當導演的滋味，自編自導自演一齣真人Show。

＊    ＊　＊　＊　＊

第二天早上，Brian跟Lawrence先溝通一下：將會有一連串的煲水新聞出現，叫Lawrence作好心理準備。Lawrence的性格向來離經叛道，仲叫Brian有咁盡去到咁盡添呀。Brian跟Moko商量後，決定開拍這場「操控觀眾集體情緒的娛樂真人Show」。

當晚Brian在夜店高調跟wet妹打茄輪又摸又摷，搏記者影相。咁啱呢排無乜娛樂大新聞，記者見「偷食Brian」都有啲新聞價值，不妨報導吖。Brian順利做到娛樂版一天頭條，替他起了個名叫「偷食Brian」。

第二天，Moko被記者包圍追問，Moko高調支持男友話應該是一場誤會。記者的相機閃燈閃呀閃，Moko一嘗當大明星的滋味。

待續

二少爺說：娛樂圈乜都有。

)

夢中見

夢中見

(這篇是新寫的)

Nancy和 Mathew是大學同學，畢業後各自找到工作，投身社會。他們偶爾會相約食飯，交換近況。

說穿了，其實Nancy暗戀Mathew。她經常借啲意找藉口打電話給Mathew寒暄一下。Nancy每次傾完都滿足地收線。她希望有一天可以成為Mathew的女朋友，可惜Mathew從不察覺到。

正所謂「日有所思，夜有所夢」，有一晚Nancy發夢見到Mathew。

夢境中，Mathew和Nancy坐在餐廳中。Mathew要告訴Nancy兩個消息。一個好消息、一個壞消息，Mathew要Nancy選聽那個消息先。

Nancy想先聽好消息，Mathew說他中了六合彩三獎，贏了83,000元。Nancy戥他高興。

那麼壞消息呢？Mathew收起笑容，說自己證實患了肺癌，剩低一年命。Nancy聽後震驚，醒了。

Nancy有不祥預兆，望一望鬧鐘，半夜3點。她不想擾人清夢，等到第二朝九點鐘，Nancy立即致電Mathew。

Mathew的電話forward去秘書台留言。他去了新加坡公幹，兩星期後才回港。Nancy留言叫Mathew回港後找她。她擔心之餘，安慰自己夢境只是腦部潛意識活動，怎會有預言的能力呢？

＊    ＊　＊　＊　＊　＊

兩星期後，Mathew回覆Nancy，Nancy約他見面。Mathew說明晚有空跟她晚飯。

在餐廳中，Mathew坐低便高興地告訴Nancy︰「哈哈！呢餐我請客，盡情點菜！」Nancy問︰「做乜咁闊佬？」

Mathew興奮地說︰「我昨夜中咗六合彩三獎，贏了83,000元！」

Nancy心裡一驚！ 乜個夢咁準嘅！

Nancy心裡掙扎一會，決定不告訴他患癌的夢境。一來無科學根據，二來有時候病是由自己嚇自己滋生出來。Nancy問Mathew呢排有無咳嗽？提議他找醫生照吓X光，又勸他戒煙。Mathew聽到一頭霧水。

這次晚餐後，Nancy間中致電Mathew，問候他的健康。Mathew工作超忙，公幹加班。身體累透了。當他收到Nancy的電話留言，開始嫌她有點煩，索性唔覆。Nancy見Mathew唔覆電話，開始胡思亂想，唔通他真的患上肺癌？入了醫院？

＊    ＊　＊　＊　＊　＊

一個月後，Nancy真的按耐不住。她見Mathew唔覆電話，唯一能做到的，就是去Mathew公司樓下，扮路過，希望有機會撞見Mathew。

傍晚6時半，Nancy來到Mathew公司樓下，碰下運氣。結果….皇天不負有心人，Nancy見到Mathew迎面而來。Mathew面容憔悴，面無血色。

Nancy扮不經意路經，上前打招呼︰「Mathew咁啱嘅，呢排點呀？」

Mathew眉頭緊皺︰「我就快死喇…」

Nancy心裡大驚！ 乜個夢真架！

Nancy關心地說︰「有乜嘢我可以幫到手呀？」

Mathew︰「無人可以幫到我…」

Nancy︰「咁醫生點講？」

Mathew︰「乜嘢醫生點講？我話我就快死喇，我下午見完客，而家6點半都要返公司做Report，聽日仲有個presentation要做，後日飛去越南開會….妳話我係咪就快死吖？！」

唓！誤會一場。

完

二少爺說︰同人講嘢都係少啲用個「死」字比較好。

)