夢飛翔

夢飛翔

(這篇是新寫的)

Johnny和Roy一齊坐喺酒吧Bar枱，已經飲咗好多杯，兩個都醉醺醺。

Johnny︰「我尋晚發咗一個夢。」(註1)

Roy︰「我尋晚都發咗一個夢，咁你發夢見到乜嘢吖？」

Johnny︰「我發夢去咗美國旅行。咁你又發夢見到乜嘢吖？」

Roy︰「我發夢自己去咗disco，我被好多靚女包圍著。」

Johnny︰「咁多靚女，點解唔call我趕嚟？」

Roy︰「夢中我有打電話俾你，不過你話你去咗美國旅行囉。」

Johnny︰「哈哈….」

兩人大笑幾聲後，醉了，昏睡於Bar枱上。

Johnny的電話響起，鈴聲把他弄醒，Johnny連忙接聽電話，是Roy打來的。

Roy︰「喂Johnny…喂Johnny呀？」

Johnny︰「係呀，點呀Roy？」

Roy︰「你後面咁嘈，你而家喺邊呀？」

Johnny︰「我而家喺美國旅行。喺旅遊車瞓著咗，啱啱你打電話嚟先嘈醒我之嘛！」

Roy︰「噢，sorry…」

Johnny︰「喂Roy，你後面都好嘈喎，你而家又喺邊呀？」

Roy︰「香港而家夜晚，我喺disco，好多靚女呀。」

Johnny︰「可惜我嚟唔到…..喂Roy，我尋晚發夢見到你呀。」

Roy︰「咁啱嘅Johnny，我尋晚發夢都見到你噃。」

Johnny︰「咁你夢見我做緊乜呀？」

Roy︰「我夢見我哋坐喺酒吧嘅Bar枱，已經飲咗好多杯，兩個都醉醺醺。之後，你就開口講︰『我尋晚發咗一個夢。』」＊

＊【請回到故事第一段的(註1)，繼續Loop下去….】

完

二少爺說︰我真係無話可說了。

美夢記心中

美夢記心中

(這篇是新寫的)

獨居毒男阿國正在100尺劏房內上網，冷氣機發出轟隆噪音、燈光昏暗，殘舊房間的牆壁上貼滿女優海報。木櫃上放滿漫畫及寫真。他習慣每晚必上「色情網」，發洩一下體內的熱能。

阿國單手上網後，半夜3點，見有點攰，要上床瞓覺了。熄燈後不久，阿國便呼呼入睡。阿國眼皮快速跳動，正在發夢。

夢中，阿國發覺自己身處酒吧內，人頭湧湧，播放著重Beat的Techno音樂，Bar tender在繁忙賣酒。酒吧設有舞池，閃爍燈光照射下，有男有女，隨beat搖擺身體。有人在擁抱、有人在接吻。阿國見到一個穿得很sexy的少女，站在bar枱旁吸煙。她正望著自己，夢境中的阿國一點也不宅男，他充滿自信咁上次搭訕。

阿國未出聲，少女已經先開口︰「kiss me！」阿國沒有半點猶豫，正當阿國想錫少女的咀唇之際…阿國見到劏房的天花板，阿國醒了。

床上的阿國好嬲！好彩佢之前在網上看過一篇文章，教人即使夢醒了，只要記住剛才夢境中的情境，立即瞓返，便可以再續前夢。

阿國集中精神試吓，一分鐘後果然入返夢境中，他老實不客氣攬住少女，成功打了個「茄輪」。少女主動拖著阿國向酒吧廁所方向行去。阿國立即好亢奮，準備進入作戰狀態。兩人入了廁格後，正當阿國脫去自己的牛仔褲時…阿國又見到劏房的天花板，阿國又醒了。

阿國勁嬲！立即閉上眼睛，集中精神瞓返，再續前夢。

阿國果然入返夢中，他脫去自己的牛仔褲後，又成功脫去少女的短裙，正當阿國想有進一步的行動之時…又見到天花板，阿國又再醒了。

阿國嬲到彈起，跳了落床。為了防止再次扎醒，他立即在藥箱內找來那瓶陳年安眠藥。他吞了兩粒安眠藥。阿國脫光自己衣服，再跳返上張床，再續前夢。今次一定可以無後顧之憂，跟少女盡情玩喇！

阿國好快瞓著，果然又入返夢中，見到自己在酒吧廁格內，唯一不同的，就是剛才那sexy girl不見了，換來是一個身高六尺、肌肉發達的黑人，兩個男人處於一廁格內，下體都光著，黑人結實的手臂鎖緊阿國，阿國動彈不得。他大嗌救命！越叫黑人就越興奮。阿國同自己講︰「發夢啫，快啲醒返！快啲醒返！」可惜安眠藥正發揮作用。夢境沒有終斷。阿國大嘆倒楣，點解今次會入錯了另一個黑人的綺夢？還返個sexy girl俾我呀！

可憐的阿國，就這樣被黑人侵犯了。期間，阿國一直安慰自己︰「發緊夢啫！乜都係假嘅！」

完事後，黑人走了，廁格內的阿國頭昏腦脹，他只希望這惡夢快發完結，返回劏房那床上，對他來說︰那張床是全世界最安全的地方。

當他稍為清醒過來，方發覺面前身處的夢境才是真實世界。

他開始恢復記憶︰今晚他跟同事趁Lady night落蘭桂芳飲酒。怎料女未溝到，自己就先飲醉斷片，那些「劏房、宅男、睇AV、食安眠藥」的片段才是夢境。被黑人趁醉捉入廁格才是真實。如今屁股傳來的痛楚，也是如假包換的真實。

完

二少爺說︰又是老調重彈︰夢境和真實之分界。

原來的我 – 下集

原來的我 – 下集

(這篇是新寫的)

2034年，即是20年後，科技進步一日千里。人的保養、抗衰老藥物、整容技術已是突飛猛進。40歲人的外表可以整到好似二十幾歲咁。

有一個男仔叫Jacky，Jacky在20歲那年發現了自己有「性別認同障礙」。打後的日子，他十分渴望變成女性。在他30歲那年，即是2024年，他成功做了變性手術，變成一名女子，改名成為Jackie。加上先進的整容抗衰老手術，Jackie外表像一個25歲的少女，她嫁了給一名有錢佬。

又過了10年，即是2034年，發明了時光機，可以讓人回到過去進行「時光旅行」。但客戶需要簽署一份協議書︰回到過去後，不能對任何人透露身份、不能犯法、不能企圖改變歷史、不能洩露秘密、只能做一個旁觀者。

Jackie參加了「時光旅行」，由2034年回到2014年，探望20歲的自己。Jackie變了女性，她扮作Jacky的新加坡遠房親戚。Jackie很開心見到年輕的自己。自己跟自己傾計，唔怪之得佢哋咁夾咁啱傾喇。

怎料Jacky愛上了變了女性的自己。Jacky決定愛上女性後，間接改變了歷史︰Jacky是異性戀者，Jacky將來不會去變性，Jackie便不存在世上，立即消失。難怪她那天早上不辭而別啦。

Jackie從來沒有企圖去改變歷史，但她估不到年輕的自己竟然會戀上未來的自己，間接造成一宗自殺事件。

完

二少爺說︰自己玩死咗自己。

原來的我 – 上集

原來的我 – 上集

(這篇是新寫的)

20歲的Jacky，幾年前父母患癌病，相繼離世。Jacky自己謀生，獨自居住在父母留下的單位。近來他發覺自己經常想念著公司的一位男同事，Jacky更開始懷疑「原來的我」是喜歡同性的。但因為Jacky忙於工作，沒有什麼朋友，所以苦無傾訴對象。

＊　＊　＊　＊　＊　＊

這天晚上十一時，Jacky加班後回家不久，突然有人撳門鐘。Jacky無乜朋友，咁夜有人找上門，當然會驚一驚。

Jacky往防盜鏡一看，一個25歲少女站於門外，幾靚女，微笑著。

Jacky覺得她很親切，不自禁地開了木門，隔著鐵閘。少女自我介紹︰她是Jacky母親在新加坡的遠房親戚，少女能講出Jacky父母的軼事。Jacky相信了她，開鐵閘讓她入屋。

少女叫Jackie，從新加坡來港渡假，酒店訂房出了問題，無家可歸。她循地址前來投靠幾天。Jacky見大家親戚一場，就收留了她。Jacky弄了點宵夜，他們在客廳談天，Jacky覺得跟她很投契，口味喜好又接近。這夜，Jacky瞓睡房Jackie睡沙發。

第二天，Jacky一早返工，Jackie外出旅遊。傍晚6時，Jacky向上司訛稱家中有急事，不能加班要趕回家。其實Jacky想找Jackie一起晚飯。Jacky今天腦海裡只有Jackie，再沒有那男同事。

Jacky帶Jackie遊香港夜市，Jacky暗戀上Jackie。兩人玩得十分開心。回家後，Jacky仍舊瞓睡房、Jackie睡沙發。Jacky經過一晚考慮後，決定明早起床後向Jackie表白。

第二朝清早，廳中的Jackie和行李早已不辭而別。Jacky十分後悔沒有向她表白，他再也找不到Jackie。簡直如同人間蒸發。

＊　＊　＊　＊　＊　＊

幾個月後Jacky結識到另一個少女，幾年後Jacky跟她結婚生仔。不過，Jacky偶爾也會想起Jackie。

待續

二少爺說︰霧水情緣，最叫人難忘。

做我命運符號

做我命運符號

(這篇是新寫的)

我名叫Jennifer，23歲，大學畢業後在一間灣仔金融機構上班。我自中學時代就喜歡閱讀、電影和音樂。

我大學時代喜歡的作家是三島由己夫和卡夫卡。電影導演就一定是FrançoisTruffaut、小津安二郎和WoodyAllen。音樂方面就是Philip Glass和Michael Nyman。我避免同學們說我孤高，所以我沒有跟同學們分享這些大師巨匠。

我每天下班後，會順道到銅鑼灣逛吓，誠品書店和Physical都可以找到我的影縱。我喜歡的嗜好都是一人進行的。因我喜歡獨自的感覺，不需作無謂應酬。每年電影節，我都會買一大堆戲票，自己去戲院，哪怕別人說我怪。

我有儲蓄計劃，除了家用和必須開支外，我把每月薪金儲下。計畫年尾一人去肯亞旅行。旅行攝影是我的新嘗試。另外我計畫進修，修讀碩士課程。

我不喜歡化妝，化妝品對皮膚唔好，又唔環保，找小動物實驗又殘忍。為了工作關係，我極其量只會塗一點點口紅。我多喝水吃生果有充足睡覺就是我的美容心得。省下來的化妝品錢，捐給國際慈善組織來得更有意義。

我有上網的習慣，我經常看一位Blogger的文章。他高大靚仔、懂術數、文學修養又高，寫故事引人入勝。我是他blog的粉絲。我暱稱他為「斯文Blogger」。

前天「斯文Blogger」發表了一個故事，講平行時空下，兩個一模一樣的男人相遇，情節十分吸引。我有看過村上春樹的《1Q84》，我也相信「平行時空」的學說，希望有一天，我能遇上「另一個我」。看她活得怎樣？命運會一樣嗎？

今天傍晚8時，我在銅鑼灣行街時，我的上司突然whatsapp我，急於問我一個project上的問題，我立即垂下頭，邊行邊覆whatsapp。

所有最預料不到的事情，往往都在最沒有心理準備的情況下發生。

當我覆完上司的whatsapp時，我抬頭一望，見到迎面有個女仔行緊埋嚟，我望一眼，嚇了一跳！

她竟然……跟我……是 一 模 一樣 ！

她跟我的樣貌五官如同複製，髮型、身材都是一樣。

太好了！我證實了平行時空真的存在！我竟能遇上另一個我。「斯文Blogger」所講的是千真萬確的！

我立即向「另一個我」點頭微笑，釋出善意。同時間，「另一個我」也向我點頭微笑作為回應。

咦！乜角度和動作timming一樣嘅？

唓！原來面前是商場內的一塊鏡牆，我剛才垂下頭聚精會神專注望電話屏幕的細字時，令我眼睛focus一時未能調節，誤把面前的自己當作「另一個我」。

可能我成日都希望遇到「另一個我」，導致我捕風捉影，真過份呀。

噢，多失望啊，咦！我諗到了，可能平行時空中的「另一個我」，是活在鏡中世界內。我要立即通知「斯文Blogger」這好消息啊。我終於找到了！

完

二少爺說：卡臣擺明呃blog之作。

命運是否這樣

命運是否這樣

(這篇是新寫的)

我叫Suki，22歲，鍾意化妝扮靚買衫拍拖行街咁囉。我在灣仔返工，放工多數會落銅鑼灣hea吓，買衫買化妝品食嘢行街。

好彩我同父母住在勵德邨，唔使交租，我份人工奀吖嘛，連家用都無俾父母。份糧勉強夠我娛樂消費。我嘅衣著打扮主要跟隨韓流日本風路線。每天我都會上日本韓國時裝網頁，了解最新styling同make up潮流，上淘寶網bid嘢。跟我啲姊妹交換扮靚情報心得，其實我唔使「扮」，我本身都生得咁靚架啦！

為咗靚，我會做facial、水晶甲、纖體、採光、升cup等等，成份糧就咁fing哂。好彩我條仔會津貼吓，每逢生日佳節時，名牌手袋鑽飾就當然走唔甩。

平日我搭車返工時，跟其他乘客一樣玩電話消磨時間，facebook、whatsapp、instagram、聽歌、打機。我經常自拍，跟朋友分享我食乜買乜著乜睇緊乜嘢show。

噚日我用電話上網時，唔覺意link吓link吓，睇到某個blog，有個傻佬寫故事，講乜嘢平行時空，兩個一模一樣嘅男人相遇，都黐線架！無鬼聊聊，現實世界點會遇到另一個「我」架？個作者真係要捉去驗吓個腦先得。

今日我返工唔太忙，喺辦公室check吓去韓國嘅平價機票，咁就check咗個下午。放工後，我去銅鑼灣買護膚品，有間新開張的化妝店，mask做緊特價。

傍晚8時，我一個行經百德新街時，迎面有個女仔行緊埋嚟，越行越近，我望一眼，嚇了一跳！

佢竟然……同我……係 一 模 一 樣 ！

她跟我的樣貌五官如同複製，髮型衣著身材都好相似。

Holy Shit！乜平行時空真的存在？我竟然遇上另一個我。我從她的眼神，也知道她跟我一樣感覺驚訝。時空交錯，我而家應該點做好呢？

唉！等我仲錯怪咗嗰個騎呢Blogger，原來佢寫嗰啲嘢係堅架。

「另一個我」有一個女性朋友同行，她的女性朋友拉著她手臂，加快步伐，跟我擦身而過。我立即回頭，唔覺意聽到她們的對話。

「又會撞衫撞妝咁邪？」

「妖！我已經好慶啦！仲講？」

噢！原來大家都咁啱用同款嘅「大眼仔」、假眼睫毛、唇彩和眼蓋。大家都用相同的化妝方法，化對大眼、間尺鼻同尖尖下巴。兩人都在H&M、Uniqulo同Forever 21買衫，結果變了兩個倒模公仔。

唓！原來撞妝！今次認真瘀到爆！等我仲以為嗰個戇鳩Blogger係堅嘅添。我好激氣呀！chok住度氣，我要立即call條仔，鬧佢一鑊金，搵佢出吓氣先，係咁。

完

二少爺說：太多女仔開始樣貌單一化了，演變成單一世界。

命運是否這樣 - 林憶蓮

作詞：潘源良

作曲：F.Wildhorn/C.Jackson

曾經我對情狂

曾經我癡心相向　而原來他只管說謊

遺留只好得創傷　曾經我懶洋洋

求忘懷相愛與相欺苦況

情和癡不敢再想　和人群互隔一道牆

你偏偏趕上　濃情又再失方向　Oh...

命運是否這樣　我永遠不懂觀看

沒法戰勝徬徨　沒有必準的秘方

人命運是否這樣　永沒法偷窺真相

人遇上每段情　就似將真心作本賭一仗 *

Woo...　如何能將以往埋藏

如何猜中心的方向　如何逃開癡心眼光

如何預算測量　回頭時一切也尋常

然而此際往那一方　情和癡應否再想

還是再躲藏　你此刻相向

誰能讓我知方向