陰陽路之停屍間

陰陽路之停屍間

我叫Helen，23歲，我是一名實習女護士。我要告訴你一個關於我在醫院內的親身經歷。

我在護士學校畢業後，到政府醫院實習一個月。因為近來政府醫院護士流失嚴重，我被派上前線服務病人。

穿起護士制服的我，對著鏡整理衣履。護士的日常工作十分繁忙，抽血打針派藥量血壓量體溫，我集中精神，減少出錯，因為這是關乎人命的工作。

記得第一天到醫院實習，院方給我們一個迎新tour，帶我們參觀醫院各個部門。最令我不寒而慄的地方，就是冰冷的殮房。雖則做得護士就接觸過屍體，但是我始終不是膽生毛那類堅強女子。

某天下午三時，我拿著X光片回病房，我行到走廊的升降機時，見到升降機門口快要關上，我情急之下，大叫：「唔該！等埋」，邊嗌邊加快腳步跑向升降機。我及時用右手按著正在關上的門，手一碰，lift門便自動彈開，好嘢！被我追到了。

升降機內有一個30多歲的男人，木無表情，直情係面無血色添呀。他穿上便服，但現在又不是探病時間，可能來接親人出院吧。但我心裡最不爽的地方是：為什麼他不幫手按「open」掣？只是站在一角袖手旁觀，好典型的冷漠香港人呀佢！我狠狠地瞄了他一眼，他好像見不到我一樣，佢直情當旁人不存在，好目中無人呀佢！

當lift門再次緩緩關上時，我聽到出面有一把女聲嗌：「唔該！等埋」我見到lift外有一名肥師奶，伸出右手狂揮，正「論論盡盡」跑上前。

素來好心的我，正想按「open」掣時，身後的男人突然出手，他用力撥開我的手，並立即閃電按上「close」掣，是大力急促地按，似乎很緊張。

Lift門順利關上後，升降機中只有我和他，男人用責備的口吻鬧我：「妳新嚟嘅！咁都睇唔到？！」

我唔明，反問：「睇唔到乜嘢呀？」

男人：「頭先個女人呀！佢隻手戴著嗰條手帶呀！」

我：「我睇唔清楚呀….」

男人：「我喺殮房做，屍體嘅右手手腕會綁上黑色嘅膠帶。」

原來呢個男人是醫院同事，正準備到殮房換制服開工。

我：「sorry，我真係新嚟，唔知咩嘢…黑色嘅膠帶呀？」

男人：「妳未見過呀？」

我：「未呀..」

男人緩緩伸出右手：「咪~就~係~咁~嘅~樣~囉~」

我見到他手上一條黑色膠帶，他遞去我面前，嚇到我掩面狂叫！

過了一陣，四周無聲，我放開雙手，lift內除我之外，空無一人。當lift門再打開，我立即奪門狂奔。跑回病房向護士長報告一切。之後，我查清楚醫院殮房內的屍體右手真的要戴上黑色膠帶。嚇到我病了一場。

經一事、長一智，我以後在醫院工作時，會提高警覺，不再好管閒事。

這是我的經歷，多謝你們的聆聽。

＊      ＊　＊　＊　＊　＊

我叫Alan，32歲，我是一名病人。我要告訴你一個關於我在醫院內的親身經歷。

我患有遺傳性糖尿病，需要定期食藥和戒口。5月初，我因為在街上突然暈倒而被送入醫院留院觀察。

我在病房內，望著無聊的電視節目。早上來了一個新來的女護士，幫我抽血。她雞手鴨腳，騰騰雞雞咁在我手臂上找血管，拮了幾針，都未成功。最後搞咗好耐先得。拮到我隻手鬼死咁痛。我鬧佢，佢猛咁sorry！但唔通講一句sorry就可以殺人咩？

我偷看她的名牌，原來是實習護士呀！頂！學護呀學護呀！妳學藝未精就唔該妳返去學校學好啲先出嚟服務社會啦。我認實呢個護士個樣，希望唔好再見到佢。

留醫一晚後，到了第二天下午，醫生批準我可以出院。由於我是長期病患者，經常出入醫院已是家常便飯。所以我出院不需要家人陪同，自己搞掂都OK。我換上便服，我先去醫院出納部結帳，再往藥房取藥，最後才回病房取回行李。

我乘升降機往藥房的途中，突然聽到lift門外有個女人嗌：「唔該！等埋」我望一望：「頂！原來就係嗰個新女學護，真係冤家路窄！」我當然唔會幫她按open掣啦！

吓！點知又俾個女護士追到部lift噃！佢仲怒睥我喎！我當妳透明添呀，吹咩。

當lift門再次關上之時，我又聽到外面有一把女聲嗌：「唔該！等埋」我見到lift外有一名肥師奶，正跑上前。

我突然想出一條計，可以整蠱返呢個護士，嚇吓佢都好吖！我立即用力撥開她的手，再立即閃電按上「close」掣，扮到好緊張咁。

門關上後，我呃她我是在醫院殮房工作。因為我長期出入醫院，從員工口中知道屍體要戴黑色膠帶。我先騙她：我見到剛才追lift的那肥師奶，她手上戴有黑賿帶。再告訴她殮房內的屍體都被綁上黑色膠帶。

碰巧我手上戴上Giordano的黑色橡膠帶，加上我鬼聲鬼氣的龍婆腔口，把黑膠帶遞到她眼前，她在近距離下根本看不清楚條黑帶，她就已經掩面大叫。

我見嚇她的目標已達，心都涼哂！Lift門剛巧打開，我立即逃之夭夭。Lift門再次關上前，我還能聽到她在lift內驚叫未停，今次真係乜仇都報哂。

這是我的經歷，多謝你們的聆聽。

完

二少爺說：人嚇人，嚇死人。