小學雞說話

小學雞說話

今次選了十句我在小學時聽過和講過的「小學雞說話」，現在已經無人會再講。若你年紀跟我相若，大家可一起懷舊一番。

第十位：「係咁先，唔係咩呀！」

源於無線電視劇《親情》中，周潤發飾演綽號「木嘴暉」的車房仔，他的口頭禪是：「係咁先，唔係咩呀！」那個年代，電視劇具有巨大的媒體影響力。小學生最叻模仿，有樣學樣。在學校裡同學之間講：「係咁先，唔係咩呀！」蔚然成風。

第九位：「拜拜你條尾！」

譏笑同學是動物，是小學雞最喜歡捉弄同學的其中一種方法。道別時跟同學講聲「拜拜」，原本是有禮貌的表現，但加多三個字「你條尾」，把對方貶作是「有尾巴的動物科」，來突顯自己是人類的優越地位。

第八位：「講大話甩大牙！」

父母教子女唔好講大話，但他們先用一個「無科學根據的大話」來教導/恐嚇子女唔好講大話。從醫學角度看：講大話和甩大牙怎會有直接關係呢？小學同學們之間交換情報時，如一方感到懷疑，要求另一方講真話，便會說：「嗱！講大話，甩大牙吖！」希望另一方會會坦白。

第七位：「捉得到，俾個錢你買紅棗！」

小學時代物質生活不似今天般豐裕，一粒紅棗已經好矜貴，值成個錢。小學生精力旺盛，喜歡玩「捉」：一個捉一個跑。逃跑一方會說：「捉得到，俾個錢你買紅棗！」但從未有人俾過錢，亦無人去買過紅棗。

第六位：「走得摩，無鼻哥！」

小學生百厭，結黨去搞破壞。如果破壞咗公物，眾人驚會受罰作鳥獸散。呢個咁危急嘅時候，竟然有一個同學仲有心情，大聲說：「走得摩，無鼻哥！」或者「契弟走得摩！」加強逃跑時的緊張氣氛。

第五位：「唔講你知，等你心思思。」

當年家計會的宣傳口號：「心思思、有件事，遇疑難，話我知。」心思思指令人忐忑不安。小學生故作神秘，拒絕告知答案或真相，讓人「吊癮」，便要說出呢句：「唔講你知，等你心思思。」。

第四位：「速速磅，唔好兩頭望！」

小學生也有金錢瓜葛：去合作社幫同學買嘢食、借錢買模型等。債主追債仔還錢，會大聲催促說：「速速磅，唔好兩頭望！」至於點解「磅水」解作「還錢或付錢」？我都唔清楚。

第三位：「地上執到寶，問天問地攞唔到！」

「路不拾遺」只是一個理想信念，現實生活好難達成得到。貪心的小學生，見到地上有失物，立即據為己有。只需說出一句：「地上執到寶，問天問地攞唔到！」便可將這罪行合理化，變成天經地義。

第二位：「閘住！反彈！無回頭！」

小學生嗌交鬥嘴，互相指摘對方，跟住就會變本加厲，說出一啲咀咒性的說話。另一方就會啟動他的防禦系統，說出：「閘住！」之餘，還要「反彈！」讓對方受返啲咀咒。最後就「無回頭！」防反彈，自己就唔會受返啦。

第一位：「我閹！」

男性小學生有一個玩兒，叫「閹」。就是把五隻手指一合，成為一個尖型的「鶴咀」（即是虎鶴雙形拳中的鶴咀），伺機向男同學的下體偷襲，用力一轉，稱之為「閹」。玩「閹」時，同學需要配以口訣，就是嗌：「我閹！」。還有一個玩法是「校園集體欺凌」的始祖，叫「圍閹」。顧名思義，一名較孱弱的受害者，慘遭數名同學「圍著嚟閹」。玩「閹」時一定要嗌：「我閹！」把這侵犯動作合理化，否則就會被同學稱為變態佬或同性戀。

完

二少爺說：如果時光可以倒流的話，我希望回到中學時代，日日玩到癲！