得個「講」字

得個「講」字

廣東俗語，話人「大隻廣」，即是指那人口輕輕，得個講字，講過就算數。今次數一數邊十項事情，最多人「講就無敵，做就無力」。

第十位：「我要持續進修！」

香港人追求「自我增值」，覺得自己學識不足，需要持續進修，保持自己的競爭力。碩士、學士、文憑、證書、外語、興趣班都大把選擇。但放工後已經身心疲累，有時又要加班，仲邊有力去報讀呢？最後都係：「等公司遲啲無咁忙先算啦。」咁等吓等吓、睇吓點先啦。

第九位：「我搵日帶你去啦！」

父母揍仔女，十歲以下的細佬仔最鐘意扭計，仲要揀喺公共場所先至扭計，眾目睽睽下聲淚俱下，要阻止此情況，父母一係就打、一係就安撫：「我搵日帶你去啦！」、「我搵日買俾你啦！」。小朋友收聲後，過多兩日，父母仲會守諾言咩？立即失憶。一代傳一代，孩子長大後，一樣這般對待他們的孩子：「搵日先啦！」

第八位：「我要同父母去旅行。」

講開父母，近年來電視電影賣「家庭親情」，喚醒我們要對年邁父母報恩。想跟父母去一次外地旅遊，結果因為選擇目的地、旅費、公司忙難攞假、怕跟父母會悶等，搞到難於成行。口就話要去旅行，但得個講字，一直拖著。等到父母逝世後，先至後悔點解唔早啲去。

第七位：「一生總要去一次…」

旅遊熱門地點：東京、曼谷、台北、首爾，人人皆到過咁。但一些鮮有人去過的第三國家，去過就會感覺「超有型」！在朋友面前說：「一生總要去一次復活島、南極、墨西哥城、古巴、平壤…..」講嗰陣真係好型，但又唔去search如何申請visa、乘什麼交通工具。唯有睇National Geographic同Discovery Travel Channel，當自己去過。

第六位：「我會注重身體。」

癌症心臟病年輕化，大家開始注重身體，吃有機食物、服維他命丸、多菜少肉、少油走甜。身體狀況轉差時，對朋友宣佈：「我會戒煙」、「我會戒酒」、「我會早睡」、「我會做身體檢查」…講就係咁講，但當身體狀態好轉返少少的時候，咪繼續食煙、繼續劈酒、繼續夜瞓、繼續濫交。一句「該死唔使病」，大條道理繼續放縱生活下去。

第五位：「食埋呢餐我聽日就減肥。」

香港女士經常高呼「瘦身！纖體！節食！消脂！」不過美食當前，味蕾和嗅覺又好難抗拒面前的色香味誘惑。唔理咁多，大快朵頤。席間向朋友宣佈：「食埋呢餐我聽日就減肥。」結果呢？咪力不從心囉。做運動？聽日嘅事，聽日先算啦。

第四位：「我要炒老細魷魚！」

有邊個打工仔未受過上司氣架？公司有兩類人：第一類：粒聲唔出，在毫無先兆下遞上辭職信，辭職後十分決絕，不會回心轉意。第二類：成日呻話要辭職，但從來唔打辭職信，又無去搵其他工。所以第二類人，一受完老細氣，返回座位大嗌：「我立即遞辭職信！」結果呢？等到公司清盤嗰日，貴為老臣子的他，仍然在公司緊守崗位。

第三位：「我哋搵啲嘢搞吓吖！」

「工字不出頭」，打工仔相信搞生意做老細，創業才可以發圍。但自己獨資搞生意的話，資金不足、膽量又不夠。唯有找幾位朋友或同事一齊合資搞生意，減低投資風險。幾個朋友摸吓酒杯底，一人提議：「不如…我哋搵啲嘢搞吓吖！」結果呢？一諗到搞什麼公司？經營模式？角色分工？資金多寡？回本期長短？….好煩喎，都係算罷啦，還是明天繼續返工比較實際。

第二位：「我應承妳，我以後會…」

情侶或夫妻間，總有嗌交爭執，一方認輸，先道歉：「我應承妳，我以後會溫柔啲…」、「我應承妳，我以後會專一…」、「我應承妳，我以後會關心妳多啲…」。講就係咁講，兩三日後，咪又係故態復萌。「江山易改，品性難移」，呢一句真係不容挑戰呀。

第一位：「如果我中咗六合彩頭獎，我會…」

你有無認識過朋友中咗六合彩頭獎吖？我就無啦，不過，唔知點解，個個朋友都曾經講過：「如果我中咗六合彩頭獎，我會立即辭職去環遊世界」、「如果我中咗六合彩頭獎，我會掃豪宅收租」、「如果我中咗六合彩頭獎，我會捐三份一去做善事」。結果呢？到目前為止，人仍然期期買，期期都俾哂馬會。仍然繼續講︰中咗頭獎之後會如何如何？對這張未兌現的支票繼續發表意見！

完

二少爺說︰有無人未幻想過中六合彩頭獎呢？有無人唔想富甲天下？