中史百搭詞

中史百搭詞

我中學時代讀中國歷史科，考試改卷時，老師根據「Model Answer」去評分，見到一些「Keyword」出現就會俾分。其實答邊個朝代嘅問題都好，只需答一堆「中史百搭四字詞」，改番啲歷史人物名，咁就雖不中亦不遠。今次數一數那些中史四字詞。（我讀中史時已經是成個世紀前，如有偏差，多多包涵。）

第十位：「自封為帝」

人人都幻想做皇帝，「大地在我腳下，國計掌於手中」。財富權力，享之不盡，既然人人想做皇帝，出現大把「謀朝篡位」的血腥弒君情節，勝者自封為帝；庶民趁飢荒時起義，「自封為帝」；將軍趁兵變時起義，「自封為帝」。另外，皇帝駕崩後，要寫一句「立乜宗為帝」、「乜宗繼位」。新人葬舊人，改朝換代。

第九位：「外族入侵」 

中國東南西北都被外族包圍：東夷、南蠻、西戎、北狄，對中國虎視眈眈。中國積弱時便壓境侵入，答題時要寫「外族入侵」。點解中國唔揮軍打外族返塞外？當然因為國內本身有問題，天災人禍，國庫空虛，所以雙管齊下寫「內憂外患」一定可以攞分。

第八位：「平定內亂」

有人話中國人是一盤散沙，唔團結齊心之餘，仲會趁火打劫。中國一亂、四分五裂、分崩離析，群雄割據。結果由最有實力嗰位收拾殘局。就要寫由他「平定內亂」，之後再加多一句：「一統天下」，開創一個新局面。經過內戰連年，「滿目瘡痍」、「百廢待興」國家需要重建，休養生息，這些附加詞都唔會錯。

第七位：「勵精圖治」

講咗咁多負面嘢，終於有一些正面嘢可以講，就是只佔歷史極少數的「太平盛世」。為數唔多的「生性皇帝」有heart去做啲嘢，考評局送「勵精圖治」四字牌匾給他們以示鼓勵。其餘金漆四字牌匾包括：「勤儉治國」、「國泰民安」、「勤政愛民」、「國富強兵」等等。無奈呢啲咁積極進取的四字詞，不是經常出現於歷史裡。

第六位：「使節往來」

中國有衰運時亦有當旺的時候，中國威嗰陣真係好威！鄰邦都會俾面，派人過嚟中國進貢吓。這時就要寫「使節往來」，鄰國好識咁做派使節到中國，皇帝又派人回禮，雙方行吓行吓，就行出幾條交通路線，就要另一句：「商賈僧人，絡繹不絕」。有錢揾喎，中國人幾遠都唔怕，照去可也。

第五位：「窮兵黷武」 

數咗一輪好嘢，無奈又要講返負面嘢，有「暴力傾向」、「野心勃勃」、「也文也武」的皇帝，登上帝位後立即自我膨脹，實行武力擴張。先寫佢「好大喜功」、「大興土木」，再寫佢「窮兵黷武」，最後加送「窮奢極侈」。咁一個嗜殺暴君的形象便活靈活現在試卷上，評卷員立即俾分。

第四位：「宦官弄權」 

中國人對權力渴求，所謂「權力令人腐化」，當有權掌握在手中，仲唔玩嘢咩？宮中的公公，成日在皇帝身邊團團轉，公公贏到皇帝信任後，玩弄權勢。就要用「宦官弄權」這四字詞。除了宦官外，外戚進入權力核心後，都忍不住弄吓權，抽吓水，出現「外戚專政」。宦官外戚兩派爭相在皇帝面前爭寵或詆毀對方，諗落都替皇帝對耳朵感到辛苦。

第三位：「嚴刑苛政」 

歷史的其中一項功用，是讓現世人「前車可鑑」、「鑑古辨今」，歷史書紀錄了亡國的其中一個原因，就是朝廷實施極權統治。就要寫「嚴刑苛政」，同義詞的還有「貪污腐敗」、「橫徵暴斂」。每個朝代都會由盛轉衰，冶亂世就用重典，所以「嚴刑苛政」這四字詞出場率很高，寫得「嚴刑苛政」，就可能要寫埋「官迫民反」和「揭竿起義」了。

第二位：「荒淫無道」 

一國之君是國家權力最高的人物，擁有最多宮女妃子，所以很多皇帝都不務政事，掛著去玩，不早朝。描寫呢班昏君，最典型的四字詞是「荒淫無道」，一寫到「荒淫」兩字，就聯想到皇帝有「後宮佳麗三千」夜夜筀歌。而「驕奢淫逸」都有「淫」呢個字，也可聯想到皇帝淫笑的衰樣。如果皇帝又淫又蠢的話，就用「庸碌無能」、「貪圖安逸」。

第一位：「民不聊生」 

有人說「中國人是一個苦難的民族」。中國人在亂世時，性命朝不保夕，最常用的四字詞是：「民不聊生」。民不聊生導致民心思變，希望改朝換代。除了「民不聊生」外，還有其他的選擇：「飢荒旱災」、「土地兼併」、「繁賦苛斂」、「戰禍連年」等等。都描述了中國百姓的悲慘命運。無奈中國的亂世多過盛世，「民不聊生」的出鏡率最高，成為「中史百搭詞」的第一位。

完 

二少爺說︰中國領導人何時才懂學會汲取歷史教訓呢？