無謂勸諭

無謂勸諭

政府經常勸諭市民：戒煙、戒賭、親子、滅蚊、做運動、多菜少肉、定期驗身、選民登記、防止虐畜、環保意識、駕駛安全、工業安全、戴安全帶、戴安全套。以下是十個「無謂勸諭」，講咗出嚟盞嘥氣，左耳入右耳出，無人聽咗會去理會。

第十位：「唔好抄啦！」

駕車時觸犯了交通條例，又被交通警察捉到。司機向阿sir求情：「阿sir，俾次機會，唔好抄啦！」難道阿sir會被你一句簡單求情說話感動到，收番張牛肉乾嗎？結果咪始終都係要抄牌。

第九位：「唔好搞住哂啦！」

當同事同學專心工作溫書，一定有啲友仔行埋去「搞搞震」，騷擾專注中的朋友。被騷擾者可能趕緊功課或趕工中，被人搞住哂當然十分嘮氣，大喝︰「唔好搞住哂啦！」很明顯，搞搞震的人不會因為這個勸諭而卻步，相反，只會更加變本加厲，加多幾分力量去倒亂。

第八位：「唔好食啦！」

父母老一輩經歷過戰火，對食物特別珍惜。如果兒子見到母親吃隔夜飯餸，就會勸諭：「唔好食啦！」對身體無益。但要令到長輩將食物倒入垃圾桶是一件十分艱鉅的任務。母親一句：「食得唔好嘥！」，轉眼就已經將隔夜嘢放哂入口，咀嚼並吞埋。

第七位：「唔好喊啦！」

朋友被愛人撇甩，宣佈失戀。見朋友失戀後眼濕濕或想喊，上前安慰：「唔好喊啦！」唔講猶自可，一講對方就立即淚線崩潰。越勸對方就喊得越勁。另外，中學公開試放榜日，考得差的同學打開成績通知單一看，立即眼濕濕，同學安慰：「唔好喊呀！」同學聽後立即哭了出來。

第六位：「唔好打呀！」

小朋友百厭搞搞震，父母見狀，唔打唔鬧都唔得。如果小朋友闖下大禍，激到父母彈起，非重手打仔不可，孩子先出眼淚，再求情：「唔好打呀！」父母見個仔反抗仲打多兩吓。不過今天「怪獸家」絕對不會施行體罰，另一個極端︰就是虐兒虐妻虐老個案，繼續發生。聽到鄰舍傳出絕望的呼叫：「唔好打呀！」

第五位：「唔好亂諗嘢啦！」

情侶夫妻相處多年，其中一方疑似有外遇，掀起茶杯裏的風波。被懷疑的一方作出解釋：「唔好亂諗嘢啦！」結果另一方聽後，不但不會就此收貨罷休，仲會越諗越猜疑，越入牛角鑽。釀成離婚收場、家庭暴力、或血案收場。

第四位：「唔好講俾人知！」

朋友同事情侶夫妻之間，有秘密要分享。披露者講秘密之前鄭重聲明：「千祈唔好講俾人知！」突顯秘密的機密程度之高。最後，個秘密咪又係揚開哂，通街都知。所以這句「唔好講俾人知！」欲蓋彌彰。

第三位：「唔好死呀！」

醫院病房急症室內，病人彌留之際，親友愛人跪在床邊，緊握病人的手哭求：「唔好死呀！」但生老病死是人生必經的自然定律。難道你叫唔死，就可以阻止到死亡來臨嗎？最諷刺就係呢頭講完「唔好死呀！」，嗰頭病人就立即喺你面前斷氣死埋。

第二位：「咪走！」

警察捉賊，一路跑一路嗌：「咪走！」唔止嗌一聲，仲要一邊跑一邊嗌：「咪走！咪走！」試問邊個賊佬會咁聽差佬話，聽到「咪走！」之後，就會跟著乖乖地停低，然後舉高雙手，等差人拉呢？

第一位：「唔好飲啦！」

朋友失戀、失意、生意失敗、親人去世，玩頹廢，借酒澆愁。作為好朋友的你，勸他重新振作做人，搶走他手上的酒杯，大力搖晃他的肩頭：「唔好飲啦！」但要叫一個飲到醉醺醺的人「唔好再飲啦！」是一件非常艱難而無成效的事情。慳返啲力扶佢返屋企好過喇。

完

二少爺說︰廣東俗語︰「越撳越出屎」，壓力越大、反彈越大。