見家長

見家長

Kevin從加拿大留學回流，在香港一間銀行工作。他的父母留在溫哥華定居。每年聖誕節，Kevin也會回溫哥華跟父母歡渡聖誕節。Kevin已屆適婚年齡，恨飲新抱茶的父母，著Kevin帶女朋友回家給他們過目。Kevin唯唯諾諾，12月帶女朋友去攝氏零度的溫哥華渡冬假。

Kevin帶著女朋友，由機場返家，母親正在家中準備豐富晚餐替他們洗塵。Kevin按門鈴，父母殷切開門，女朋友首次拜見Kevin父母。

媽媽見女友後，面色一沉：「Kevin，你入一入嚟廚房幫幫我手吖！」

Kevin入廚房後問：「媽，點呀？幫手整火雞呀？」

媽媽：「哼！你女友咁醜樣，你唔飛咗佢，唔好認我做阿媽！」

Kevin最鍚父母，唯命是從，回港後，不久就甩了這女友。

＊　＊　＊　＊　＊　＊

半年後，Kevin找到一個更靚的model女友。12月又帶新女朋友去溫哥華見父母。今次Kevin充滿信心，希望媽媽會鐘意呢位模特兒女友啦。

怎料媽媽見新女友後，面色一沉：「Kevin，你入一入嚟廚房幫我手吖！」

Kevin入廚房後問：「點呀？呢個女仔OK啩？」

媽媽：「哼！你新女友咁醜樣，你唔飛咗佢，唔好認我做阿媽！」

Kevin雖然失望，但他最聽父母的話，回港後，不久就甩了這新女友。

＊　＊　＊　＊　＊　＊

Kevin極度氣餒，不知道什麼女友才可以取悅到父母？Kevin的同事David獻計教路：「嗱！Kevin，你一於根據你媽媽年輕個樣，揾個女友同你阿媽一模一樣，信我！你阿媽一定唔會詐型！」

Kevin照板煮碗，又竟然俾佢咁好彩喺人海之中，揾到一個跟媽媽年輕時一模一樣的女友。

＊　＊　＊　＊　＊　＊

12月，Kevin帶最新女友去溫哥華見父母。Kevin今次真的充滿信心，媽媽一定會鐘意呢位新女友。

不出所料，媽媽一見這位新女友，面色大悅，當場大讚：「Kevin，你呢位女朋友真係fabulous！」好開心咁仔細上下打量這位未來新抱。

此時，父親叫：「Kevin，你入一入嚟車房幫幫我手吖！」

Kevin入車房後問：「爸，點呀？剷雪機又壞咗呀？」

父親：「哼！你新女友咁醜樣，你唔飛咗佢，唔好認我做阿爸！」

Kevin：「吓……？」

完

二少爺說︰呢對父母真係一對鬥氣冤家。