無仇不成夫婦
一對丈夫和太太已經結婚二十一年。經歷了三個「七年之癢」，兩夫妻無風無浪地過埋下半生。
53歲的丈夫患了肝癌，一驗已經是末期，無得救，入院等死。
虛弱的丈夫對著太太說：「其實…我有一個秘密瞞住妳，我想喺臨死之前同妳講…」
太太點頭，願意傾聽。
丈夫：「妳知唔知我……床下底收埋咗一個……鞋盒吖？……」
太太：「我知呀！我無意中發現，仲偷偷地打開過嚟睇添……」
丈夫：「係咩？…..原來妳都睇過個鞋盒……」
太太：「鞋盒入面有兩個飲完嘅汽水罐…同埋港幣843蚊零4毫。」
丈夫：「唔…妳真係好記性，咁妳又記唔記得……我最憎飲乜嘢汽水吖？」
太太：「記得！沙士吖嘛！飲完你會好想嘔……」
丈夫：「無錯…鞋盒入面有兩個沙士汽水罐，每當我背住妳跟其他女人上床，事後我好後悔內疚，我就會飲一罐沙士汽水……嚟懲罰自己……仲將個空罐放入一個鞋盒嚟警惕自己……咁…妳可唔可以…原諒我呀？」
太太垂下頭：「嗯，21年嚟，你都係偷食兩次啫，我原諒你。」
丈夫：「多謝妳……」
丈夫眼中閃出淚光，獲得太太原諒之後，流下兩行感恩的淚水。
太太：「咦？！咁個843蚊零4毫呢？」
丈夫：「哦！個鞋盒太細，我咪將擠唔落嘅沙士汽水罐攞去收買佬度賣，二毫子一個，咁慢慢咪儲到八百幾蚊囉！」
太太聽後，如跌入無底深淵……
完
二少爺說︰夫妻都係你瞞我、我瞞妳。
