恐嚇說話

恐嚇說話

在我們的成長過程中，確實聽過很多言帶恐嚇性的說話。恐嚇說話只是一種意識，無實際行動，希望把對方嚇窒繼而屈服，讓我數一數印象最深刻的十句。

第十位：「如果你搞唔掂？你聽日唔使返工！」

火爆老細常用的威脅說話，用「打爛飯碗」來恐嚇下屬一定要完成艱巨任務，如果不成功，便成仁，立即炒魷。好彩香港有平機會，如果妳有身孕或者你是同性戀者，你都可以用你的特殊身份來保住份工。

第九位：「唔好行埋嚟！如果唔係我跳落去！」

企圖跳樓自殺者危坐天台邊，見到警察消防員走埋嚟，大聲嗌：「唔好行埋嚟！如果唔係…我跳落去！」自殺者的企圖是尋死，但竟然用自己條命做威脅，勒令警員唔好接近。究竟佢真係想自殺？定係想做場大龍鳳引人注意呢？真係當事人先清楚。

第八位：「我爛命一條，最多咪攬住一鑊熟！」

所謂「趕狗入窮巷」，「好佬怕爛佬」，爛佬唔怕爛命一條，「缸瓦撼陶瓷」。所以喺貧富懸殊的社會，低下層邊緣人常用呢句來恐嚇有錢佬。電視劇/電影中見到演員要引爆石油器或放火，就大嗌：「我就爛命一條，最多咪攬住一鑊熟！」「一鑊熟」是屬於80年代，現今，就算打邊爐都好少聽到「一鑊熟」。

第七位：「我做人仲有乜意思呀！我死咗去好過囉！」

遭拋棄的怨婦、失戀被遺棄情人，常用此句。對方突然提出分手，失驚無神毫無心理準備下，情緒失控，捶胸頓足！呼天搶地！「我做人仲有乜意思呀！我死咗去好過囉！」邊講邊作狀爬窗、攞刀、飲滴露。希望以死嚟威脅對方，收回分手的決定。另外，不孝子女激親阿媽，阿媽都會喊著講呢句。

第六位：「我就爆你大鑊！」

每個人都有秘密，分別在於「見得光」定「唔見得光」？假如知道別人的一些不光彩的秘密，可以藉以要脅。「如果你唔俾一百萬我，我就爆你大鑊！」由娛樂圈爆料、商業犯罪、桃色醜聞、謀財害命，到政治陰謀，此句都適用。「爆大鑊」已是上一代的用詞，如今好少用。改用：「篤爆、踢爆、揚開佢」。

第五位：「你做到咁絕？我做鬼都唔放過你呀！」

中國人比較迷信，相信有鬼神、超自然力量。所以如果要威脅人，要借靈界鬼魅來嚇唬對方最work。「你做到咁絕？我做鬼都唔放過你呀！」著紅色衫去自殺，化成怨氣沖天的厲鬼，纏身報復。撈偏門及撈家，比較信邪，會容易屈服。

第四位：「信唔信我port你呀？！」

政府拍宣傳短片：「今時今日，咁嘅服務態度係唔夠。」釀成投訴風氣，「消費權益在你手，據理力爭要開口。」結果服務員稍一怠慢，顧客立即破口要投訴，抄低Staff number：「信唔信我port你呀？！」從而獲得通容著數：快啲有檯、舊貨換新貨、無限次維修、送物送乜…服務員為保飯碗或免麻煩，唯有叫經理出嚟處理投訴顧客。

第三位：「咁…我哋不如分手啦！」

男女關係，外弛內緊，寸土必爭。如果一方提出的要求，未獲對方接納支持，被拒絕一方只好出絕招，用整份感情作賭注，女方說：「叫你偷支警鎗俾我玩都唔制，咁…我哋不如分手啦！」結果好多傻事荒謬事，都在這種威脅情況下發生，釀成悲劇收場。當然有些情況下，對方一口氣應承，去開香檳慶祝。

第二位：「你唔應承我，我就跪喺度唔起身！」

弱方哀求強方，不能行硬，只好行軟，死纏唔放。男士求婚、借錢救命、挽留決裂情人、求醫生救人，皆適用。以前「跪喺度」呢一條蹺，仲有人會受，現在只覺好「娘」。男士當眾跪喺度求婚，以為用群眾壓力作脅，但如果女士唔鐘意都唔會work。上一次聽「你唔應承我，我就跪喺度唔起身！」好似已經是看粵語長片/武俠片的時候。想只用誠意來打動對方，在物質掛帥的社會來說，似乎十分戇居。

第一位：「妳試吓行出呢個門口，妳出咗去就唔好再返嚟！」

家庭暴力事件、離婚個案、虐妻虐兒案件，愈來愈多，逼到受害者忍無可忍，執嘢走人。施虐者出言恐嚇：「妳試吓行出呢個門口，妳出咗去就唔好再返嚟！」受害者當然唔受威脅，亦唔想再返嚟呢個破碎的家。呢句都係50、60年代，男尊女卑社會才聽到，現在女性經濟獨立，再無太太會當丈夫是一張長期飯票。就連電視劇中也少聽到這句對白。

完

二少爺說：秋官效應啊！