敷衍回應

敷衍回應

有時候，朋友、情侶、同事、家人跟你講嘢，長篇大論，吟吟沉沉，你無心機聽，只想敷衍回應。最經典的，應該是：「是但啦！」、「你鐘意啦！」、「哦！」、「係咩？」、「咁都得？」、「知啦！」、「得啦！」等等。

今次揀選了另外十句「百搭敷衍回應」，可在不同的情況下使用，但其實，求其亂咁交叉使用都無問題，因為對方都知道你正在敷衍他。

第十位：「我點知吖？」
當對方問了一個正常人很難解答的問題時，例如複雜的政治時局、外星人侵略地球，深奧難明，聽到對方第一句，知道是一條難答的問題，自己的大腦已經可以熄機，繼續扮聽，Skip去所有內容，待對方講完，只需敷衍回應一句：「我點知吖？」對方便知道你無能力提供答案。

第九位：「我明你講乜！」
當對方陳述緊一件複雜事情或者解釋一個深奧道理，對方都驚你聽唔明白咁複雜的事情，你只需繼續扮聽，Skip去所有內容，待對方稍為停頓，你敷衍回應一句：「我明你講乜！」對方便知道你follow到。

第八位：「唔係呀嘛？」
當對方講緊一單匪夷所思，但又未能引起你絲毫興趣的事情，你點頭之餘，對方更口沬橫飛，你只需繼續扮聽，Skip去所有內容，待對方講完，你敷衍回應一句：「唔係呀嘛？」對方便知道你也覺得unbelievable。有人喜歡將「唔係呀嘛？」讀作「唔係呀化？」增加其可愛性。（雖然有懶音之嫌疑）

第七位：「係咁架啦！」
當對方講緊一宗日常生活見怪不怪的平常事情，將一件無關痛癢甩東西無限放大，對方少見多怪，但聽到你打呵欠，你只需繼續扮聽，Skip去所有內容，待對方講完，你敷衍回應一句：「係咁架啦！」對方便知道你已經對該事情痲目了。

第六位：「人之常情啫！」
當對方談論緊別人的是非，無論讚或彈，對方細訴這人的是非好壞、黑白錯對，但你唔識那人。你只需繼續扮聽，Skip去所有內容，待對方講完，你敷衍回應一句：「人之常情啫！」咁無論對方讚或彈某人，都是正常之人性驅使。可加多一句：「人之常情啫！俾著係你，你都會係咁啦！」撫心自問又係喎。

第五位：「真係無嘢好講！」
當對方投訴緊一單好激氣的事情，滿肚子怒氣！叫人感到冤屈，不滿和憤怒，但事情跟你無關係。你只需繼續扮聽，Skip去所有內容，待對方講完，你敷衍回應一句：「真係無嘢好講！」等於你對這些離譜事情無話可說。其實表達了你對「事不關己」的事情「No Comment！」而已。

第四位：「呢啲嘢話唔埋！」
當對方講緊一些「無稜兩可」的道理時，正所謂「世事無絕對！」結論可以是正確、也可以是錯誤，你只需繼續扮聽，Skip去所有內容，待對方講完，你敷衍回應一句：「呢啲嘢話唔埋！」表示你對那些「公說公有理、婆說婆有理」的事情，無絕對答案，無明確立場可言。

第三位：「你有你嘅道理。」
當對方發表緊一些「自己認為正確」的偉論或大道理時，把自己的決定和行為合理化、講到自己的做法有大條道理。你只需繼續扮聽，Skip去所有內容，待對方講完，你敷衍回應一句：「你有你嘅道理。」表示你明白：他的說話中包含了他的邏輯，不過，該邏輯是否合乎情理，則見人見智。

第二位：「咁搞嘢？！」
當對方講緊一些違反常理、出人意表的事情或經歷時，而對方眼中這些離奇事情，並未能引起你的興趣，你只需繼續扮聽，Skip去所有內容，對方講完後，要求你講出意見，你敷衍回應一句：「咁搞嘢？！」這句「咁搞嘢？！」三個字包含了強烈的驚嘆情緒，「咁搞嘢？！」等於你認同該事情的荒謬性，不能置信。

第一位：「睇你點睇啦？！」
當對方遇上問題，要求你提供睇法和觀點時，對方首先將整件事情由始至終，每個細節都娓娓道來，成份口供咁詳述悶爆你。你只需繼續扮聽，Skip去所有內容，對方講完事情經過後，要求你講出你的立場意見，你敷衍回應一句：「睇你點睇啦？！」將對方的問題，立即變成自己的問題，反問返對方。好似打網球咁，球來一擋，隨手一抽，打番過去佢嗰邊，慳水慳力。成為敷衍回應說話之首位。


完