親密 By 阿權

親密 by 阿權


帶住眼鏡o既 阿輝 係個普通o既白領，o係荔枝角一家出入口公司工作，團隊小隊目，經理仔一個。人到中年，人生中o既最大成就，就係買o左公司附近一個大型樓盤o既一個七百呎o既單位。月供兩萬，同太太一人一半。有時走落 Club House「hea」睇下報紙雜誌，咁又過日晨。

阿輝 o既太太叫做 Catherine，Catherine 同 阿輝 同齡，一樣都係 38 歲。o係附近屋村開o左間蚊型美容院，做附近師奶o既生意，雖然又未算「賺錢買花戴」，但總算衣食無憂。佢o地結婚七年，Catherine 怕肥唔肯生仔，阿輝 亦樂得清靜。雖然家中兩老有時會稍有微言，問點解唔肯生幾個孫比佢地抱下。不過又好在 阿輝 有個阿哥，阿哥有對孖仔，老人家弄孫為樂，都唔係好得閒理會 阿輝 夫婦唔生小朋友。

同好多o既中年男士一樣，阿輝 都有佢o既「婚外情」，與其話係「婚外情」，不如話係「婚外性」。

阿輝 搭上o左公司新o黎o既文員 Suki。請 Suki 亦係阿輝o既主意，Suki 見工當日一身《ViVi》look o既打扮，成個老翻傅穎咁，拍埋公司果堆返工著衫仲隨便過去街市買菜o既中女，都唔止係眼前一亮，直情係久旱逢甘露。所以雖然 Suki 返工猛傾電話玩 MSN，不事生產，一樣唔炒魷。

Suki 鐘意買衫買手袋跟潮流，不過做文員人工唔多，去做援交咩? 咁佢又唔敢。唯一辦法就係溝多幾件仔，嗲兩嗲，又有個新手袋。但同 Suki 同齡o既男仔賺錢一樣唔多，於是 Suki 就打起阿輝 o既主義，諗住佢係經理仔，都應該有兩個錢。就襯有一晚 OT 夜o左收工，叫 阿輝 陪佢去飲酒，幾分酒意之後，就發生o左關係。

點知 阿輝 份人工八成都比o左老婆! 阿輝 可以花o係 Suki o既身上唔多。講真，阿輝 都係貪 Suki o既幾分姿色幾分青春氣息，無可無不可，他愛o既依然係屋企個老婆 Catherine，只係結婚多年，行房之事都變成節日特備節目，平日可免則免，叫佢納悶。Suki 則心諗始終 阿輝 都係個經理仔，公司有人照應，比人裁員都無咁易裁到自己，加上 阿輝 口花花甜言蜜語又「乙水」得自己幾開心。目標不同o既呢兩個人，就由得呢段關係繼續落去。

於是 阿輝 同 Suki 就開展o左佢o地o既「偷食關係」，都係一個禮拜一兩次，襯 阿輝 老婆返去黃大仙娘家或者去o左打麻雀，就同 Suki 上自己屋企「Happy Hour」幾粒鐘。而呢一段關係，一直維持o左大半年。

直到有一日，阿輝 返到屋企見到一個奇異o既境像為止......

呢一日傍晚六點，阿輝同平時一樣步行返屋企。扭開木門「o卡嚓」一聲之後，發現屋企所有傢俬都比人搬走曬!! 打開入牆衣櫃，入面一件衫都無曬!! 全屋只剩低七年前o個輯宮廷式結婚相，仍然掛o係牆上面。阿輝即時 feel 到可能 Catherine 發現o左佢有外遇，嬲嬲地掉o左所有衫同傢俬。

於是佢 手羅 起手提電話，打o左個電話比 Catherine......

「唔好意思，你所打o既電話號碼現時未能接通。請你遲o的再打過啦!

Sorry, the number you have dial cannot be reach at the moment,please try again later......」

多左幾次，都係一樣。阿輝成個呆o左，不過呆o左 5 分鐘之後，佢就諗到跑去美容院揾 Catherine。

而各位聰明o既讀者都會知道，美容院亦都無開門啦。

問隔離 boutique 仔老闆，原來 Catherine 已經將美容院甩o左手，賣o左比其他人。即是話， Catherine 係有心避開 阿輝 o既。阿輝落寞，呢個時候就諗起嬌俏可人o既 Suki，就諗住打個電話比佢想話訴下苦。而其實，呢次亦都係阿輝 同 Suki 一齊半年以來，首次唔係為o左性而打比 Suki o既電話。

點知，連 Suki o既電話都打唔通......

「唔好意思，你所打o既電話號碼現時未能接通。請你遲o的再打過啦!

Sorry, the number you have dial cannot be reach at the moment,please try again later......」

阿輝難過，有苦無路訴，唯有死死氣行返屋企，再作打算。

可惜o既係低處未算低，當 阿輝 返到屋企，發現多o左一對陌生男女。原來呢對男女，就係 阿輝 屋企o既新業主!! 諗唔到 Catherine 賣o左佢盤生意，連佢地o既屋企都一次過賣埋。原來當年結婚 o個陣，阿輝為搏紅顏一笑，層樓寫o左老婆個名。Catherine 襯 阿輝 返工，帶人上o黎睇樓，佢都懵然不知。

當 阿輝 慌失失到不得了o既時候，收到一個 MMS......係 Catherine send 比佢o既，裡面有一個短訊同一張相。短訊內容話：「阿輝，Sorry，我揾到我o既真愛，我唔愛你啦! 你自己照顧自己，唔洗搵我。」。至於張相，打開之後，竟然係一張合照......






一張 Suki 同 Catherine o既合照。

原來 Suki 係 Catherine o既美容院熟客。

有一次，Catherine 幫 Suki 做 body massage，一邊傾下閒偈。傾多兩傾，Catherine 講到懷疑老公有外遇，一邊講一邊喊，Suki 安慰 Catherine，Catherine 攬住赤裸o既 Suki 哭訴。情不自禁之下，Suki 竟然同 Catherine 嘴起上o黎...... 之後o既事唔洗多講，Suki 成為 Catherine o既入幕之賓。 Catherine 好少同 阿輝 歡好o既原因，唔係因為 阿輝 性能力差，唔係因為厭o左對方o既身體，係因為 Catherine 鐘意o既其實係女人。當年同阿輝結婚只係想要o的安穩o既生活，估唔到外表老實o既阿輝都會有外遇。
至於 Suki，Catherine 賣樓賣生意比佢過新生活，有人照顧，有人錫有人愛，有人買 LV 比自己，係男係女又有咩所謂? 不過，呢兩位女子，其實並唔知道原來大家之前o既男人就係阿輝，並唔係存心報復，只係事有湊巧而已，有咁o岩得咁橋o者。

人財兩空o既阿輝，茫茫然咁行o左落街，猛隊苦到澀o既黑啤。而留o係 阿輝 身邊o既，就只係剩返佢部手提電話，同埋o個個毫無意義o既 MMS 了。

完