生日願望

生日願望

卡拉OK房內歌聲高揚，Fanny拿着咪，充滿感情，投入地唱。她唱的歌正是王馨平的《想你親口說愛我》：『♬~~看四週一雙一雙開開心心每日在路上擦身過，為何獨要剩你獨要剩我孤孤單單得太多？看昨天一點一點清清楚楚每夜在夢內再溫過，如何又會令你親口講聲愛戀我？~~♬』還有五分鐘便踏入午夜12點正。

＊　＊　＊　＊　＊　＊

Fanny於紅磡一間大學就讀工商管理學系，同班中有一位男同學叫Andy，外表俊俏，夾band攝影揸車。深受女同學歡迎，對他傾慕的女同學為數不少，當然包括Fanny在內。

Fanny自year one開始已經暗戀Andy，無奈自覺生得唔靚、又無身材，沒有勇氣向Andy表白。加上身邊很多比自己漂亮的女同學向Andy示愛後，都遭Andy婉轉拒絕。
Fanny只好收藏起自己這份心意，離遠望吓Andy就已經心滿意足。

這一個學期，Fanny和Andy被編成一組做group project，Fanny和Andy因此開始熟絡。在一次group discussion時，Fanny終於首次目睹Andy女朋友的廬山真面目。她是一名年輕model，經常可以在雜誌上見到她的風采。Fanny自愧形穢，他們郎才女貌，才稱得上一對絕配。

＊　＊　＊　＊　＊　＊

兩個月後，Andy和女朋友分手，原因是model女友搭上一名揸法拉利的集團太子爺，知道這消息後的女同學，施盡法寶想親近Andy，希望利用這個空檔，乘虛而入。可惜Andy寧缺勿濫，把身邊的追求者逐一拒絕。Andy回復單身，決定給自己一個假期冷靜一吓。

這個星期三是Fanny的22歲生辰，星期二晚同學們與Fanny一起到卡拉OK慶祝生日。Fanny邀請Andy一起來唱K，Andy悶悶哋也想以唱K來散一散心，所以一口答應。一行13人來到卡拉OK，一邊食buffet一邊唱K。

＊　＊　＊　＊　＊　＊

卡拉OK房內歌聲高揚，Fanny拿着咪，充滿感情投入地唱，她唱的歌是王馨平的《想你親口說愛我》： 『♬~~看昨天一點一點清清楚楚每夜在夢內再溫過，如何又會令你親口講聲愛戀我？~~♬』 還有五分鐘便踏入午夜12點正。

Fanny唱完這首歌後，電視螢光幕播出《Happy Birthday》，侍應生把生日蛋糕推進房內，大家叫Fanny許願。

Fanny面對着蠟燭，心想：「呀？許乜願好呢？唉！橫掂年年許乜願都唔靈，今年一於玩大佢！……我希望Andy會鍾意我！」

呼一聲後，蠟燭被吹熄，蛋糕被侍應生帶出去分切。Fanny對剛才許下的願望，其實沒有抱著什麼期望。

Fanny繼續拿着遙控器，對着電腦感應器點歌，瀏覽每張電腦版面，看着各位歌星的容貌，聚精會神地按鍵選歌。

坐在距離Fanny六呎以外的Andy，突然向Fanny說：「愛妳！」Fanny聽後如遭電擊般，嚇到連remote也掉落地下，當場目瞪口呆。

Fanny不相信自己的耳朵，以為因為K房環境太嘈雜而聽錯，她特地向Andy再問多一次：「吓？你講乜？」Andy都知道環境太過嘈雜，所以特別提高聲線，重複多一遍大聲說：「Fanny，愛妳呀！」

Fanny清清楚楚聽到Andy的示愛說話，她一時間整個人呆了，不懂如何反應？Andy見Fanny呆若木雞，他無奈地說：「唉！妳聽唔到，咁算罷啦！」

Fanny歡喜若狂，嘩！自己的生日願望，唔使十分鐘就已經實現啦！早知道係咁容易，上年就一早應該許呢個願望啦！

Fanny起身，走近Andy身旁想坐下之時，Andy放下手中剛吃了兩口的生日蛋糕，立即向Fanny道別。原來Andy有點不舒服，早於11:45分已想先告辭，但為了尊重Fanny，禮貌上要等吃過生日蛋糕才離開。

Andy剛剛向自己示愛、為何馬上又要走？ Fanny似乎有所會意，俟近Andy細細聲問：「你送我返屋企吖？」
Andy答：「Sorry！我今晚有啲唔舒服，妳搵第二個送啦！」
Andy一分鐘前熱情、一分鐘後派檸檬，Fanny莫名其妙。只好目送Andy先行告別。

＊　＊　＊　＊　＊　＊

第二天，Fanny在學校走廊遇上Andy，Andy刻意跟Fanny保持距離，如像昨夜什麼事情也沒有發生過。Fanny又沒有勇氣向Andy問過究竟，這是她22個年頭中，最忐忑不安的一個生日。

下午Fanny按捺不住，向一名閨中密友Judy詢問意見。
Fanny問Judy：「我有一個女性朋友，佢暗戀一個男仔，上個禮拜佢生日，一大班人去唱K，個男仔突然……」Fanny把事件人物改名換姓後，和盤托出。
Judy問了Fanny一些環境細節後，具偵探頭腦的Judy立即偵破事情始末：

原來Fanny用遙控器點歌時，剛好去到許志安那一頁。Andy突然見到螢光幕上的song list有《愛妳》這首歌，於是便向Fanny大嗌「愛妳」。原意是想Fanny幫他選播《愛妳》這首歌。

因為Andy的前model女友十分喜愛許志安的《愛妳》。雖然Andy身體唔舒服想走，但當他看到畫面上的《愛妳》，一時衝動想唱，打算插播唱完《愛妳》後，發洩完情感後便離開。

但Fanny聽後呆了，又唔撳選播掣，Andy覺得或者是天意叫他學會放低。於是他放棄唔唱，告辭回家休息吧。

真相大白後，Fanny的心情由天堂插水直落地獄。不過諗真啲，自己這副樣子德性，Andy又點會鍾意自己？ 但在自己生日時獲得Andy親口當眾大聲說：「愛妳！」已是一份千金難買的禮物。

Fanny從22歲的生日開始，《愛妳》便成為她的電話鈴聲。 每當電話響起，Andy那夜迷人的容貌便會浮現在她面前的空氣裏。
　
『♬～愛妳　我管不了是禍　未想過是為何　能愛著妳苦也未去躲　愛妳　最想得妳附和　像這宇宙諧和　求妳像我不要亂去想　為甚麼～♬』

完

愛妳 - 許志安
作曲： 雷頌德
作詞： 周禮茂

世界末日到了麼　問我終結會如何
海天一色似赤火　烈焰中只得妳我
最美麗亦最赤裸　兩顆心最後消磨
好比火花滿天飛播

愛　無限美　無限妳　無限我
再凝聚似天際的銀河
妳對我這夜尚未承諾　願意麼

愛妳　我管不了是禍
未想過是為何
能愛著妳苦也未去躲

愛妳　最想得妳附和
像這宇宙諧和
求妳像我不要亂去想　為甚麼　

世界末日到了麼　別理終結會如何
不必想得那麼多　但願這刻不錯過
妳這夜下了禁鎖　但我不怕被蹉跎
真心終可某天衝破

愛　無限次　無限試　無限錯
妳才是我想要的負荷
妳對我這夜尚未承諾　願意麼

階級鬥爭論

階級鬥爭論

從前有一間公司，
一個早上，有兩個部門主管在走廊上相遇，
他們沒有牙齒印，兩人都算「有計傾」一類。
Ａ部門主管先嘆一口氣，
Ｂ部門主管問佢因乜事咁煩惱？
Ｂ主管請Ａ主管到自己房間，慢慢傾。

Ａ主管入房後坐低，唉聲嘆氣！
投訴自己部門有個staff豬咁蠢！
無哩醒目、踼一踢、郁一郁。
激到自己啤一聲！

Ｂ主管感到Ａ主管「同是天涯淪落人」，
Ｂ主管亦透露自己部門有個staff好鬼蠢！
毫無sense、成日發夢、遊魂咁！
被佢激死好多腦細胞。

Ａ主管同Ｂ主管傾傾吓，想比較一吓哪個staff最蠢？
Ａ主管先打內線電話，叫Ａstaff入房，
Ａstaff入房後，Ａ主管吩咐Ａstaff：「你同我去人民入境事務處check吓，有冇人會老過自己阿媽？」
Ａstaff點頭：「ＯＫ，我而家就去！」
Ａstaff踏出房後，ＡＢ兩主管互望大笑：「嘩！真係傻得交關」！

輪到Ｂ主管打內線電話，叫Ｂstaff入房，
Ｂ主管吩咐Ｂstaff：「你同我返去我屋企，睇吓我喺唔喺屋企吖？」　
Ｂstaff點頭：「好！我馬上就去！」
Ｂstaff踏出房後，ＡＢ兩主管相望狂笑：「嘩！講開傻佬，真係低處未見低」！

Ａstaff和Ｂstaff乘電梯到地下，在大堂遇上，
Ｂstaff：「咦？阿Ａ，做乜唉聲嘆氣呀？」
Ａstaff：「唉～我老細黐孖根架！佢叫我去人民入境事務處check吓有冇人會老過自己老母？」
Ｂstaff：「唉～我老細仲癲啦！佢叫我去佢屋企，check吓我老細喺唔喺屋企喎？」
Ａstaff：「唉～！都黐Q線！九唔搭八！」
Ｂstaff：「咁你而家打算去邊？」
Ａstaff：「咁我去網吧泡到５點幾，返嚟覆老細話check過，冇人老過自己老母！」
Ｂstaff：「我先返屋企瞓到５點幾，再返嚟覆老細話佢屋企無人囉！」
Ａstaff：「唉～收得公司份人工，就要陪老細一齊傻架啦！」

喂！有車，走喇！

完

娛樂新聞台

娛樂新聞台

香港收費電視有24小時新聞台，
方便觀眾隨時候都可以睇新聞，掌握最新資訊。
同樣地，香港也有24小時娛樂新聞台，
全天候滿足香港觀眾對娛樂圈的求知欲。
娛樂新聞的主持通常講乜嘅呢？

第十位：「可唔可以向觀眾透露一吓？」
記者拿着有台徽的咪高鋒，跟追逐藝人做訪問，
當藝人表示唔想回答某些感敏問題時，
記者當然鍥而不捨：「可唔可以向觀眾透露一吓？」
如果藝人再拒絕的話，記者就跟藝人討價還價：「咁透露少少吖？」
當藝人如「細路哥」般氹氹吓，務求完成記者的任務。

第九位：「廣告返嚟之後…」
電視台是商營機構，靠廣告支持，
節目當然要嚟一個commercial break，
最驚就係觀眾轉台，要留着觀眾的收視，
就要用一些吸引預告hook著觀眾。
「廣告返嚟之後，我哋披露邵爵士嘅養生之道，原來竟然係靠…」
「廣告返嚟之後，我哋請咗John Lennon上嚟接受訪問。」
總之開了一張期票先，觀眾有了期待就願意去等。
至於兌現與否？都係「留俾觀眾自己去判斷…」

第八位：「開唔開心呀？！」
當藝人獲國際獎項、封帝封后、銷量破紀錄、喜慶大事、
記者問藝人：「開唔開心呀？！」
都是一些阿媽係咪女人的無聊問題。
唔通藝人答你好痛苦咩？
同樣地，當藝人完成演唱會後或者拍完煞科戲後，
記者問藝人：「辛唔辛苦呀？！」
都有異曲同工之妙。

第七位：「我哋真係熱切期待…」
藝人有新戲新唱片新個唱新project做宣傳，
主播報導最後嗰一句：「我哋真係熱切期待佢嘅新唱片！」
「我哋真係熱切期待佢嘅新戲上演！」
係咪真係咁熱切先？無電影贈卷無CD送，都肯自行掏腰包？

第六位：「同電視機旁邊嘅觀眾講…」
每逢佳節，記者都要求藝人向觀眾講幾句恭賀說話，
「今日大年初一喎！同電視機旁邊嘅觀眾講幾句恭賀說話吖？」
或者拉近藝人跟觀眾的距離，製造藝人與觀眾直接對話感覺，
「恭喜你得獎！同電視機旁邊嘅觀眾講吓而家嘅感受吖？」
「嘩！妳煮啲嘢好好味呀！同電視機旁邊嘅觀眾分享妳嘅心德吖？」
「妳丈夫有外遇，佢都無同妳離婚！同電視機旁邊嘅觀眾分享妳嘅方法吖？」

第五位：「留俾觀眾自己去判斷…」
如果遇上藝人們互相駡戰，各執一詞，針鋒相對，
公說公有理、婆說婆有理。
主播就持平講句：「留俾觀眾自己去判斷。」
好似啲「鬼古節目」咁，
播完鬼古後，主持好陰寒咁講一句：「呢啲嘢：信則有不信則無！」

第四位：「將時間交俾我哋海外特派記者…」
電視台投放資源，派記者遠赴海外採訪：康城、威尼斯、Oscar、金馬獎，
自己拍新聞，唔係用大會提供嘅二手片段，
主播喺節目中時不時都強調：「將時間交俾我哋海外特派記者進行直擊報導…」
經過越洋網絡數碼傳送，留意鏡頭有口型和聲帶的time delay，先至係真貨！

第三位：「我哋台前幕後工作人員都祝你…」
記者和藝人保持至少表面上的正常關係。
所以當藝人生日、生仔、結婚、攞獎，
主播都會話：「我哋台前幕後工作人員都祝你新婚愉快！」
「我哋台前幕後工作人員都祝你生日快樂！」
「我哋台前幕後工作人員都祝你嘅BB快高長大！」
如果藝人患病入院，就講：「我哋祝你早日康復！」
亦曾經聽過有主播講：「我代表電視旁邊嘅觀眾祝福你…」
吓？佢都未得我同意授權委託就講出口？！

第二位：「關心佢嘅觀眾唔好錯過啦！」
當電視台有獨家專訪，勁料要披露，梗要打鑼打鼓話俾觀眾知！
但其實，無論真係關心嗰位藝人嘅觀眾又好，
定係關心嗰位藝人幾時仆街拆墮嘅觀眾又好，
總之主播關心的：只是收視率和廣告商的order！

第一位：「而家就帶大家去現場睇吓！」
睇新聞講究「即時性」、「同步性」，
所以「現場直播」、「live」是娛樂新聞最值錢的地方。
主播「未出發先興奮」，急不及待說：「而家就帶大家去現場睇吓！」
喺異地的現場記者接棒說：「各位！喺我身後面就係…」
「嘩！現場衣香鬢影！」「嘩！呢度好多fans！今朝6點已經聚集！」
「嘩！大會保安高度嚴密！不過我哋都入到嚟！」
務求將現場氣氛帶到電視機螢光幕前。
現場記者報導完畢後，最後一句交波：「好！而家將時間交番俾錄影廠先！」


其他：

「今日頭條係…」、「呢一日，啊邊個嚟到呢度做咩…」
「幾時結婚呀？」、「你隻狗好cute呀！」、「傷勢嚴唔嚴重？」、
「我哋永遠都唔會忘記妳…」、「你幾時復出呀？」、「幾時進軍荷里活？」、
「大聲啲！聽唔到！」、「望一望呢面吖！唔該！」、「祝你旅途愉快！」、
「有冇邊件事令你印象最深刻？」、「導演惡唔惡呀？」、
「唔阻你啦！多謝你接受訪問！」。

完

1996年7月

狂野派對

狂野派對

阿強不愛蒲夜店，因為他怕熬夜， 經過一天工作後，已經筋疲力竭，無多餘體力去支撐。 加上阿強知道「蒲夜店」，就是一場殘酷的「外貌比試」。甫一踏進夜店入口，To see and to be seen。遇到場內打躉的型男索女，他們就像評判團，眼睛會先向自己瞄一瞄，0.1秒內已經扭歪面望向第二面，加送嘴藐藐的表情！如果這裡是「殘酷一叮」，第一關已經俾人叮走咗！自己企埋牆一面，目光四遊，但大家當你隱形，坐完張冷板櫈；最後戇居居一人離開，耳仔被嘈吵音樂搞到耳鳴， 一身殘留的二手煙味，捱眼瞓搭的士回家，第二日無精打釆返工，整件事對於阿強來說：都是十分無癮！阿強當然了解到，如果自己靚仔啲，把口叻啲，cash多啲，咁「蒲夜店」先會係一個好玩的消遣，仲會上癮添！

話雖如此，阿強都曾經在夜店內，經歷過一次「西洋少女的情挑」。話說，阿強經歷過上世紀末的威化派對 (Rave Party) 熱潮，之前，他沒有去過這些狂野派對，報章報導入面污煙障氣、啪丸、打架、警察查牌，分分鐘仲要搞到上差館，總之不去為妙！但阿強心底裏，其實都想去見識一吓這種時尚玩意！

於1998年深秋，阿強有一位男性朋友開時裝店，他收到四張Rave Party的請柬，是一個法國時裝名牌，喺柴灣工廠區一個由工廠改建成的夜場內搞fashion show，只邀請時裝界潮人出席。睇完fashion show之後，就舉行傳言十分狂野的威化派對Rave Party！ 阿強十分高興能夠有機會去見識一吓狂野派對，最緊要是「唔使俾錢入場」嘛！

當晚十時，他們一行四人抵達柴灣， 阿強同行的除了時裝店老闆Dave外，還有兩位fashion designers：Henry和Ray。泊車後，四人黑夜摸到某工廠大廈。見到門口有一大班記者，爭相拍攝入場的明星仔、公眾人物、潮人達人，阿強見到今晚星光熠熠，自己又是嘉賓之一，虛榮心立即急昇上腦，沾沾自喜！

當阿強一行四人走近門口時，娛記本着「有殺錯無放過」的專業精神，舉起相機鏡頭瞄準阿強，阿強以為自己可以一嚐被娛記影相的滋味，等待記者們嗌：「強哥，呢面吖唔該！望一望呢面呀！唔該呀！」 怎料記者睇清楚阿強連二打六、七八線茄呢啡都唔係！原來係路人一名， 娛記立即輕哼一聲：「妖！」，立即轉身追影派對的真正名人。 阿強未入場，先被兜頭淋以一桶冷水！

門口有黑白門神，穿西裝的黑人白人大隻佬收請柬把關， 阿強覺得守衛深嚴，平時一定好多人打架搞事。 入場後，場內強勁燈光音樂節奏，跟電影中場景描述的差不多。
型男索女都好自覺咁擺出super model的超模懶有型pose！大家都當咗自己係吳嘉龍或者Janice Man、Angelababy咁，左手揸煙，右手揸酒，企喺度個頭起勢搖呀搖！個身un 吓un 吓！

每張請柬可以換一杯drink，怕蝕底的阿強第一時間去bar枱換了一杯啤酒，在旁一位rave女換了一杯塋光黃色的cocktail，頂多100ml，阿強斜望她，擔心她如果一啖飲哂，咁點樣捱足成晚？ 飲第二杯酒就要自己俾錢嘛！阿強就唔使驚啦，杯啤酒咁重咁大杯！

Fashion show開始啦！觀眾圍着runway，人頭湧湧、水洩不通！阿強跟友人被逼散咗，阿強的左手面是一名陌生潮男，右面是一名20歲的鬼妹，由於人多擠逼的關係，阿強當然不介意俟近右手邊的鬼妹。　

當第三個model出嚟嗰陣，阿強的垂下右手，突然被一隻纖纖玉手握着， 阿強立即把頭右轉，望去鬼妹度，同時間，鬼妹個頭左轉，望返阿強，阿強禮貌地向鬼妹點頭微笑，鬼妹又向他點頭報以微笑！ 嘩！乜狂野派對真係咁開放？！隨時進行身體接觸都OK喎！

阿強第一次喺夜場有收穫，一時間都唔知應該點做好呢？ 阿強嘗試輕輕放開那隻手，唔使2秒，鬼妹隻玉手又扣番實阿強隻右手！今次輪到鬼妹先點頭微笑，阿強回禮向她點頭微笑！

嘩！狂野派對真係另舍不同！難道鬼妹食慣西餐？今晚要食中菜？鬼妹審美眼光跟中國人唔同，阿強自問樣貌身材屬「爛茶渣」一類，華人女性唔吼自己唧，估唔到鬼妹反而鍾意？！阿強心諗：電影橋段中，男女主角衝入廁格內，速戰速決！今晚呢幕激烈情節，終於輪到喺自己身上發生喇！

弊！無安全套喺身！廁所有冇得賣？保鮮紙可唔可以代替？ 唔用鬼妹又mind唔mind呢？入男廁定女廁？臭唔臭呢？ 有冇AIDS呢？差佬會唔會突然著燈查牌拉人呢？鬼妹夠唔夠18歲呢？鬼妹會唔會嫌自己短呢？可唔可以之後跟鬼妹結婚再移民外國？……

一大堆內心對話之後，阿強得到一個結論： 呢位係鬼妹喎！一生可能得一次咁嘅機會咋！有得食唔食，罪大惡極！

阿強內心進行一番自我正邪道德爭扎， 最後，獸性戰勝了理性，人終歸總要死一次！
阿強鼓起勇氣，趁這個千載難逢機會，側頭向鬼妹，因音樂太嘈，只好將自己嘴巴貼近她耳邊問：「Can you speak English?」鬼妹大聲答：「Je suis Française, Je ne comprend pas l'Anglais.」 一聽就知佢講緊法文，嘩！法國人出名浪漫、激情、男女關係又好隨便架喎！ 今次夜蒲竟然抽中壓軸特別大獎！終可嘗到正宗地道的French Kiss。

好！既然對方係浪漫法國妹，先調一調情，再趁機拉鬼妹走開，阿強用右手手指頭在鬼妹玉手上溫柔地孺動遊走，一路摸一路掃，咦？點解鬼妹中指隻戎指，個design咁熟嘅？係一個骷髏頭？ Oh No！阿強發覺自己拖著係一隻右手呀！

原來當第二個model出場果陣，Ray（同行的designer）靜雞雞竄到阿強的左手邊，
左手邊的阿Ray用右手繞過阿強身後，拖着阿強的右手！ Ray是一個camp camp地的fashion designer，飲大兩杯後，在酒蒸揮發之下，自我控制能力減低，豁出去觸摸阿強，試探吓阿強係咪自己的「同類」？ 阿強剛才給Dave介紹認識阿Ray時，他手上的骷髏頭戎指令他留下印象，阿強知道那隻「玉手」非鬼妹後，立即甩都甩唔切，馬上消失喺人堆之中。

唉～～乜嘢情挑鬼妹、乜嘢狂野快餐，通通都係自己幻想出嚟！阿強覺得場內音響太嘈，有啲頭暈，同Dave講：要先走一步， 其實阿強患有「人群恐懼症」，見到成班友仔好似標童咁上哂身，係咁猛fing猛搖， 加上阿Ray會隨時再次出現，阿強一早已經想閃。阿強如今告辭，因為他已經見識過什麼是Rave Party！

阿強沒有帶走什麼，除了帶走法國妹側面迷人的微笑，
那一笑更勝Musée du Louvre內的Mona Lisa。
雖然法國妹只虛幻地曾經活在阿強的回憶裡，
但人生有機會狂野過，總好過從未狂野過吖！

完

電話短訊

電話短訊

Rex在書房中密密按出手電短訊，
發出SMS後，隔了一會，手電震動，收到另一面回覆的一條短訊，
Rex看畢短訊後，便甜絲絲笑了出來，
坐在廳中的太太Angie，還懵然不知。

* * * * * * * * *

Rex和Angie婚後，每夜晚飯後，男的入書房上網，女的在廳中看DVD。
Angie是戲劇導師，Rex開燈飾零售店。
近日Rex搭上一名少女Patricia，Rex背着太太搞婚外情。
Patricia也知道Rex是有婦之夫，現代男女已不介意能否天長地久。

Rex躲在書房裡send SMS給Patricia，Patricia又回訊，打情駡俏。
Rex怕太太Angie會發覺，把Patricia的電話號碼存入自己的手電時，用上「Patrick」這個男士名字。
萬一太太翻查自己手電的通話紀錄時，只會見到Patrick這名「男士」經常出現；
Rex可以解釋Patrick是店舖經理，需要定時用SMS報告店舖的營業數目。
Rex更將每段send出及收到的SMS，看完後立即delete，一條也不留下半點痕跡。

但太太Angie有女性的第六感，點會唔知呢排春風滿面的Rex有古怪吖？
有一晚趁Rex去洗澡時，Angie入書房，偷偷地攞Rex的電話翻看通話紀錄，
見到最後撥出的電話屬於Patrick。
不過這些三腳貓的門面功夫，又怎可瞞得過當戲劇導師的Angie？
閱歷豐富的Angie，沒有半點情緒的波動，
返出客廳繼續看Woody Allen的1975年舊作《Love and Death》DVD，但心裡有數。

第二天晚上，Angie偷望到丈夫又在房中玩SMS，心裡盤算著。
趁Rex去洗澡時，將Rex手電「通訊錄」中Patrick一欄的電話號碼按「編輯」鍵，
Delete了原本的號碼，更改為9875 5612後，按「編輯完成」。
9875 5612正是Angie的電話號碼。
Angie將自己的手提電話調校致震機後，坐在廳中等待好戲上演。
她知道丈夫對數字不敏感，他根本記不起Patricia或Angie的號碼。
Rex call朋友時，100%倚靠手電的通訊錄。

Rex洗澡後，回到書房又靜靜地sent SMS。
Angie在廳中收到丈夫的短訊，是「想念妳」之類的肉麻情話。
Angie用SMS覆Rex：「我們性格不合，還是分手吧！我是認真的！」
Rex大為緊張！不消30秒，Rex覆SMS挽留Patricia，
Angie熄了電話，並立即走入書房，向丈夫說自己身體不適，需要早睡。
被太太殺個措手不及，嚇得打緊SMS的Rex手忙腳亂！電話都跌埋落地下。
因Angie熄了電話，Rex的SMS全部石沉大海，杳無音訊。

這夜，Rex思緒凌亂、輾轉難眠，睡在旁邊的太太當然從心裡笑出來。

第二天早上，Rex早上十時，上班離家後，落到街上第一時間打俾Patricia，
Angie見Rex來電，立即cut線，讓Rex的電話轉駁到「留言信箱」，
「你已經被接駁到9875 5612嘅留言信箱」，
Rex未察覺號碼已改變，在「留言信箱」留下一噸肉麻骨痺的情話，
Angie聽罷後，覺得十分滑稽，好笑多過好嬲！

早上11時，當Patricia主動打電話給Rex，
Rex接聽後，聽到是Patricia的聲音時，
開心到叫了出來：「妳終於肯覆我啦！我哋唔好分手啦！」Patricia莫名其妙？

Rex突然醒起Patricia剛才的「來電顯示」不是「Patrick」，
到這一刻才知道東窗事發！終於出了事！
Rex估計一定是被老婆拆穿，立即sent SMS到9875 5612：「我回太太身邊，我們分手吧！再會！是再也不再會面！」
希望老婆看完短訊後會息怒。
Angie見到Rex的短訊後，咀角輕輕微笑，事情正如她心中預計般發展。
Angie也覆了一個短訊給Rex：「你乖乖回太太身邊吧！我們永別了！」

* * * * * * * * *

傍晚Rex戰戰兢兢回到家中，Angie正在看一套法庭電影DVD，
Rex扮到若無其事，問Angie正在看什麼電影？
Angie答電影內容講一位出名資深女律師跟一名初出茅廬的男律師，
為一個充滿疑點的case對辯，在法庭上各出奇謀，鬥得難分難解！

Rex問：「咁最後邊個律師打贏呀？」
Angie：「套戲我睇到一半啫，女律師贏咗個case。」
Rex：「唔使問，一般電影橋段，男律師一定會再上訴，最後仲反敗為勝！」
Angie：「哈哈！你對男主角咁有信心？！我就覺得個結局都係女主角贏喎！」
Rex：「嘻嘻！好呀！咁我坐低陪妳一齊睇，睇吓最後邊個贏吖！」
Angie：「嗯！個男邊度夠個女鬥吖？」
Rex：「哼！未到最後一分鐘，都未知道結局！」

Rex 和Angie雙雙坐在沙發上，兩人雖然面向電視螢光幕，
但兩人用眼尾互相偷望對方，心裡盤算很多很多電影畫面以外的事情，
室內被電視屏幕照得忽光忽暗。

完

紅綠燈

紅綠燈

Cliff 在黑暗中偷偷輕拖Gigi的手，
Gigi沒有抗拒，也沒有借故鬆開他，
兩人的手指在對方的手心輕輕漫遊，
可以宣佈：他們兩人的情侶關係正式開始。

* * * * * * * *

Cliff在銀行當投資顧問，Gigi是他的一名客戶，
半年前，Gigi步入銀行，Cliff第一眼望見Gigi，便目不轉睛。
在神推鬼擠之下，Gigi找Cliff查詢她那筆熱錢如何投資？
Gigi由顧客，慢慢變成朋友，傾msn，傾電話，更開始單獨約會。

在08年7月6日星期日，下午5點正，Cliff和Gigi兩人坐在電影院內睇戲，
Cliff 在黑暗環境中，偷偷輕拖Gigi的手，
Gigi沒有抗拒，也沒有借故鬆開他，
兩人的手指在對方手心輕輕漫遊，
觸手這一刻，他們兩人正式肯定對方是情人。

Cliff因為他的工作關係，對數字特別敏感，
兩人互相肯定對方的時間是「5678」，（08年7月6日5點正）
他深信這段緣份一定是上天冥冥之中的精心安排。

晃眼半年，愛情仍在蜜月期，
踏入12月，聖誕節快到，是他們的第一個聖誕節．
Cliff希望給Gigi帶來一個難忘的聖誕節，
他心裡計劃請Gigi到北京旅行，彼此渡過一個難忘的白色聖誕。

但自上個星期六開始，Gigi一直神不守舍，心神恍惚，
Cliff這個星期一跟她晚餐時，試探Gigi的鬱結，但Gigi迴避拒答。
晚間傾電話時，Gigi欲言又止，Cliff猜想難道有第三者出現？
他們相約星期四晚上一起晚飯，Cliff打算在當晚告訴她：首份聖誕禮物是一趟北京旅行。

星期四晚飯時，Gigi仍然心不在焉，Cliff再三追問都是不得要領。
Cliff打算用北京旅行逗Gigi開心，怎料Gigi聽後沒有半點高興之餘，
還說年尾工作較忙碌，不能抽身請假去旅行。
一桶北京八達嶺冰山雪水，朝Cliff頭頂淋下！

晚飯後兩人去停車場取車，天氣寒冷，
Cliff駕車送Gigi回家，Gigi家在尖沙咀。
駕車途中，Gigi終於鼓起勇氣向Cliff說出真相，
原來Gigi想在今夜向Cliff提出分手。

半年前，Gigi跟已拍拖三年的男友，因性格不合而分手，隨後才跟Cliff開始。
12月初，前度找回Gigi重修舊好，
其實Gigi對那份三年的感情仍未完全放低，思前想後，決定重投前度的懷抱。
立定心腸，讓這段僅半年壽命的感情劃上休止符。

車廂中的Cliff，十分不甘心；問Gigi有否轉彎的餘地？
Gigi說：「其實…我….兩個都愛！」
Cliff：「哼！兩個都愛，即係兩個都唔愛！」
Gigi：「我個心…十五十六，不如….交俾個天決定！」
Cliff：「吓？點交俾個天決定吖？」
Gigi：「如果我哋架車，連過三盞紅綠燈都係綠燈嘅話，咁我哋就一齊！」
Cliff：「好！一言為定，由而家開始計！」
Cliff雙手握緊呔盤，腳下使力踩油！
感情交由天決定？其實是交給自己手中的呔盤決定。

當時他們的房車正在太子，沿彌敦道往尖沙咀方向駛去，
第一盞紅綠燈豎在旺角道，Cliff輕而易舉衝過去這盞綠燈，
工業貿易署就在房車的左邊擦身而過，
第一關過了。

第二盞紅綠燈在亞皆老街，房車距離交通燈尚餘30米，正亮著綠燈，
Cliff估計當房車到達燈前，綠燈便會轉黃再轉紅，
Cliff情急之下，連指揮燈都唔打就cut入左線，急扭抽頭扖過前面架Civic後，
踩盡油門，衝過面前的黃燈，如奧運短跑手壓線，
引來車後Civic發出的震耳響按聲！
第二關僥倖過了。

只剩下最後一盞燈，Cliff便可以跟Gigi一起，手心冒汗。
第三盞紅綠燈在登打士街，嚴陣以待，房車距離交通燈尚餘100米，
當時交通燈亮著紅色，Cliff從心裡笑了出來，
因為他略為減速，估計當房車到達燈前，紅燈便會轉成綠燈，
第三關一定可以順利通過！

不出所料，Cliff在擋風玻璃前見到他這生中最亮麗的綠色，
在面前亮著，勝券在握。

怎料，有一位行動不便的阿伯，在剛才綠燈尾，一拐一拐地橫過馬路，
轉燈後，仍只橫過咗馬路的四分三，尚有四分一路程。

而左線有一架雙層冷氣巴士，令 Cliff不能cut入左線避開，
Cliff在擋風玻璃見到這位阿伯，有兩個選擇：1，撞過去；2，停車。

人命攸關，Cliff的反射神經令他踏break，在信和中心旁的綠燈前急速剎車。
幸而他們早已扣上安全帶，沒有受傷。
用一條路人性命來換取一份感情，代價實在太過轟烈！

Cliff垂下頭嘆氣，撫著呔盤，輸了！最後還是輸了！
後面的貨van響按，響按的對象是這位行動緩慢的阿伯，
阿伯舉起右手致歉，但Cliff終生都不會接納這位阿伯的道歉。

房車繼續向前行，Gigi說了一些道別和多謝說話後，在金馬倫道下了車。
Gigi湮沒在夜幕的街角裏，
Cliff望一望手錶，分手的時間是晚上10時9分。
由5 6 7 8 開始，9 10 11 12終結（12月11日10時9分）
想起這堆數字密碼的巧合，Cliff只好認命。
如果上天安排他們一起是緣份，那麼，分開也算是天意。

Cliff望著周遭閃爍的聖誕燈飾，看到歡天喜地的途人，痴纏的情侶，
自己孤獨呆在車廂內，西褲的膝蓋位置，
被雨花沾濕了好幾點。

Gigi and Cliff
（5 6 7 8 – 9 10 11 12）

後記
打後的日子，每當Cliff認識新朋友或新客戶時，Cliff都會問他們：「你記唔得喺2008年7月6日星期日下午5點正，你做緊乜嘢吖？」

完

文字靈感取於《少女的祈禱》

情人話…

情人話…

情侶之間情話綿綿，
肉麻、讚美、安慰、承諾、挑逗、調情、認錯......
時下香港人拍拖都幾公式化，幾電視劇feel，
以下十句情侶之間最經常講嘅說話：

第十位：「你有冇理吓我感受？」
如果男女其中一方是比較「自我中心、我行我素」
只想對方遷就自己，自己想點就要人哋點做！
沉默一方終於佛都有火！忍無可忍！
爆炸大反攻：「吓吓要我就哂妳！妳有冇理吓我感受？！」

第九位：「咁你即係唔信我啫？！」
男女情侶之間建立的信任，終於要面臨考驗，
如果一方的誠信遭到挑戰，有冤無路訴，
老羞成怒！或者「惡人先告狀」，
惡言相向：「咁你即係唔信我啫？！」
希望把對方嚇倒，繼而收口，息事寧人。

第八位：「你仲想呃我？！」
一方知道另一方在欺騙自己，
不即刻拆穿對方西洋鏡，還出言試探，
如果對方露出馬腳後，仲想死頂死撐，
結果換來怒火一句：「你仲想呃我？！」
或者：「你仲想呃到我幾時？！」

第七位：「當係為咗我！」
情侶相處要學習如何「為對方犧牲」，
例如：男友討厭shopping，女友堅持一起去購物，女方說：「去啦！當係為咗我！」
女友討厭男友吸煙，勸男友戎煙，女方就會說：「戎煙啦！當係為咗我！」
女友親熱時，想男友用安全套，女方就會說：「用套啦！當係為咗我！」
女方想分手，向男方說：「跟你都無幸福，分開啦！當係為咗我！」

第六位：「你記唔記得…？」
情侶之間有很多數字和共同經歷，
其中一方會突擊考對方的記憶力，從而評估對方對自己的重視程度！
「你記唔記得今日係乜日子？」
「你記唔記得我哋五年前點樣慶祝情人節？」
「你記唔記得我之前個電話號碼係乜？」
「你記唔記得我同你喺364日前下午3點講過乜嘢呀？」

第五位：「鐘唔鐘意呀？」
男女喜歡製造驚喜俾對方，逗對方開心！
親手做禮物、親手落廚、摺幾百朵紙玫瑰花、搞surprise party、
自己付出一番苦心後，然後問對方：「鐘唔鐘意呀？」
期望獲得對方正面的回應，「妳開心，我就開心！」。

第四位：「你鍾意點講就點講！」
當一方講了一些負面、指控性的誨氣說話，
另一方採取消極的回應態度，「無你咁好氣」地表示不同意！
男：「妳咁講，即係話我小器啫！」，女：「你鍾意點講就點講！」
女：「你咁講，即係話我自我中心啫！」，男：「妳鍾意點講就點講！」

第三位：「去邊度好？」
男女經常見面去街消閒，
考慮去邊度消費，但又唔想揸主意，
便先問對方：「今日去邊度好？」
通常得到的答案：「你話啦！」
「不如去農莊？」「不如去探孤兒院？」「不如去赤柱？」
問完傾完一輪之後，結果咪又係去返最常去嘅地方！

第二位：「你喺邊呀？」
男女雙方無時無刻，都想知道對方的行蹤，或有事相求，
電話一接通，便問：「你喺邊？」
例句：男問：「我企喺地鐵站度，等咗妳成粒鐘！妳喺邊呀！？」
女問：「點解我聽到你身後面有女人聲嘅？！你喺邊呀！？」
男問：「妳喺邊呀？…哦！咁就啱啦！妳同我買半打啤酒上嚟！」
女問：「你喺邊呀？…哦！咁就啱啦！你而家過嚟我公司，接我放工！」

第一位：「如果有人咩就好啦！」
向對方提出要求的婉轉說法，無咁直接之餘，而另一方又會領悟到意思。
男問：「唉！好攰！如果有人同我揼吓骨就好啦！」
女答：「唉！今日Annie話佢男友請佢去日本旅行呀！如果有人請我去遊埠就好啦！」
男答：「唉！我無錢呀！如果我有錢請人去遊埠、我不如攞筆錢去揼邪骨仲好啦！」

完

朋友話…

朋友話…

朋友可以當作：水泡、擋箭牌、玩伴、老師、敵人、
免費工人、貸款公司、反面教材、心理醫生、等等，
朋友之間經常會講啲乜嘢呢？

第十位：「如果阿邊個去，我就去！」
朋友搞聚會，搞手打電話去約人，
朋友唔係一口答應，好無菱兩可咁回覆：「如果阿邊個去，我就去！」
擺明他心中只想見某一位朋友而已，
如果這一位朋友唔到，自己不出席也罷！

第九位：「講笑啫！」
朋友之間吹水，有時得意忘形講咗啲唔應該講嘅過份說話，
例如：他人秘密、攻擊性說話、會傷害人的心底真話，
呢個時候，就要補一句：「講笑啫！」嚟化解。
將已講出口的說話，來過軟性否定，叫聽者不要當真，
但撥出的水，又如何能收回？

第八位：「咪扮嘢啦！」
朋友有秘密，點知俾另一位朋友當眾揭穿，就會講：「咪扮嘢啦！」
例句1：「我知你升咗職，咪扮嘢啦！」
又或者朋友怕醜、口是心非，
例句2：「我知你鐘意食，食多啲啦！咪扮嘢啦！」

第七位：「我撐你呀！」
如果朋友的行動或決定，連帶為你帶來好處、合乎你的利益，
你就會對朋友的決定，堅定不移咁說：「我撐你呀！」
表面上給予朋友精神上的支持，實質多謝他帶給自己的好處！
甚至加強語氣：「今次我撐硬你呀！」

第六位：「見係你咋！」
朋友之間肝膽相照，
所以當給予朋友一些甜頭、方便、幫助之後，強調是為對方。
例如你定下的原則，特別為對方破例一次，你就強調：「見係你咋！」
以表示你對該位朋友的特別關照對待。
而對方就會回答：「果然夠friend！」

第五位：「Friend還friend」
朋友之間都有底線，不能過界！
如果朋友間相處出現火藥味，或者利益受到傷害，
某一方就會說：「Friend還friend，都唔可以咁過份吖？！」
「Friend還friend」的另一個意思就是：「數還數、路還路」
朋友借錢唔還，債主追問：「喂！Friend還friend，你幾時肯還錢呀？！」　

第四位：「唔使講咁多！」
朋友之間心靈相通，不用明言而盡在不言中！
例句1：朋友去酒吧遲到，正想解釋，朋友已說：「唔使講咁多！你自隊一杯先！」
或者朋友有誤會發生，
例句2：朋友：「唔使講咁多！唔使解釋！我估唔到你係咁嘅人！」
或者朋友需要幫忙，
例句3：「唔使講咁多！你快啲攞啲錢去深圳公安度，救返妳老公先啦！」

第三位：「電聯！」
朋友們相約去街，但時間地點仍未確定，
只好一句：「到時電聯！」
或者聚會完畢後，朋友們結集在Karaoke門口或酒樓門口前，
互相講：「第日再玩過，電聯！」
你電聯前，我電聯後，朋友們久久亦未能散去。
日後有冇電聯？就不得而知。

第二位：「你唔係咁同我講嘢吖？」
朋友之間互相對對方有寄望，
如果某一方說了一些令人失望或者火光的說話，
對方就回應說：「我無得罪你喎！你唔係咁同我講嘢吖？」
相反地，如果對方太過客氣太客套！客套到有點見外，
朋友就說：「多咩謝吖！我哋咁熟？你唔係咁同我講嘢吖？」

第一位：「係咪friend先？」
政府防止濫藥宣傳短片名句：「係咪friend先？」
向朋友提出請求或要求時，需要打出的人情牌，
「係咪friend先？係就借二十萬俾我！」
「係咪friend先？係就介紹啲Model俾我識！」
「係咪friend先？係就揸車順路兜我返屋企！」
「係咪friend先？係就同我一齊去劈友！」
「係咪friend先？係就唔好柴我台啦！」
咁，大家識做喇，唔好噓我吖！

完

員工話…

員工話…

繼《老細話…》之後，
為了持平起見，今次輪到講「打工仔」，
我作為打工仔的一分子，
數一數身邊同事愛講乜？

第十位：「新人靚唔靚呀？」
同事與同事，每日要相對大約8-10小時，
梗係想同事個様好啲靚啲！
所以當一聽到有新同事上任，
同事們第一時間爭相打聽：「新人靚唔靚呀？」
「吓？個女新人之前做過modeL？！」
男同事一聽到，立即執乾淨自己張工作枱，同埋執一執自己個outlook。

第九位：「佢行開咗！」
無論有客來電，抑或有人親身過嚟揾人，
如果嗰位同事咁啱唔喺個位度，
隔籬位同事就話：「佢行開咗！」
再追問：「咁去咗邊吖？」同事答：「唔知喎！」
唔通咁老實話俾你聽：佢遲到仲未返到公司，其實去咗蛇王落街食煙咩？

第八位：「幾時掛八號？」
打風季節的其中一個熱門問題：「幾時掛八號？」
早上收音機一話下午可能掛八號，
同事即刻約人下晝去街，唱K睇戲篤波，
Lunch返嚟立即問「幾時掛八號？」
當電台一聲公佈：掛八號之後，
同事們一早已經執定袋，頭也不回，如走火警般逃跑！

第七位：「老細今日心情唔好！」
其實老細日日心情都唔好架啦！見怪不怪。
但同事們都慣咗將呢句說話掛喺嘴邊，
提醒同事唔好行差踏錯，收歛一吓，
「老細今日心情唔好！你唔好咁揚喺度刨波經啦！」
否則就有可能被老細就地開拖片鑊金！

第六位：「夠鐘食晏！去邊度食好呀？」
每日Lunch前，大家都頭痛今日去邊度食飯好？
唔想揸主意或懶得諗嘢的同事，先發制人問：「今日去邊度食好呀？」
「街市魚蛋粉？」、「茶餐廳？」、「泰國嘢？」
大家最初都話：「你話事啦！」、「無所謂！」
結果最後就嫌呢間難食嗰間污糟！
「一早都話咗唔嚟呢間架啦！」、「早知就唔嚟！」
爭先事後孔明一番！

第五位：「今晚放工去邊？」
接近放工的時候，同事們特別精神！
執嘢準備走或者在lift口等電梯時，
同事問：「今晚放工去邊？」
啱路就一齊夾錢坐taxi，或者揸車隨便兜埋。
另外，如果某同事那天穿得特別隆重，同事都會八卦問：「今晚放工去邊？約咗邊個吖？」

第四位：「咁耐都未出糧嘅？」
除非是即時支取時薪的自僱人士，
否則月尾最常聽到的一句說話，就是「咁耐都未出糧嘅？」
「我窮到就快連電話都要cut！」、「我窮到就快連條底褲都要當！」
反映同事們很少有儲蓄習慣，發窮惡！
又或者，其實是他們扮窮，
以防止其他「真係窮的同事」問佢哋借錢。

第三位：「搞緊！差啲咋！」
老細催促下屬完成工作，或查問工作進度，
下屬口震震地回覆：「搞緊！差啲咋！」
其實十劃都未有一撇，
拖住老細先，再諗吓有乜辦法搵其他人幫手！

第二位：「我諗我有啲唔舒服，今日返唔到。」
假期翌日，玩樂過度，十分疲累，不如攞病假蛇王一吓！
壓低把聲，扮痛苦致電回公司：「我諗我有啲唔舒服，今日返唔到，」
留意：「我諗我」（I think I am…）有推測的意思，
意思是：自己可能一時估計錯誤，以為自己有病，
所以不算是存心欺騙公司。

第一位：「最多咪唔撈！」
打工仔受了老細氣或者客人的怨氣，
激起把火！大嗌：「最多咪唔撈！」
但嗌完又無辭職者，大有人在。
唔通為咗即時走人，大拿拿攞錢出嚟補返俾老細咩？！
嗌咗出嚟！渲洩完股怒氣！咪乖乖地返回坐位繼續做嘢！
但隨着經濟好轉，都有人嗌完之後，就跟手打辭埋封職信。
而「最多咪唔撈！」中的「唔」字和「撈」字之間，
通常會加多一個「L」音的廣東助語詞來加強語氣。

完

老細話…

老細話…

香港人鍾意叫顧客做「老細」，
「老細幾多位？」「老細mark開邊位小姐？」「多謝哂老細！」
打工仔又習慣叫公司管理階層做「老細」，
「老細有乜吩咐？」「老細又發癲！」「老細都無面俾！」
不如數吓「老細」最常講乜說話：

第十位：「今日放工前放喺我檯面！」
老細叫下屬做嘢，set了 deadline，
例如「今日放工前要」、「今日lunch前要」，
下屬死趕爛趕之下完成工作，
把工作文件放到老細檯面時，
才發覺老細已經晨早走咗！

第九位：「去邊度食？你哋話事！」
每逢佳節或公司慰勞下屬，老細請同事食飯。
老細話：「去邊度食？你哋話事啦！」
七嘴八舌，當眾同事投票，取得共識後，
最終，當然去幫襯老細想食嗰間食肆！
「吓？全世界都贊成去酒店食buffet喎，老細話決定咗去食日本菜！」
咁出錢嗰位當然大聲啲！

第八位：「不如我幫你做埋？好唔好呀？」
老細吩咐下屬做嘢，
下屬唔記得做，或者唔想做，藉詞推搪，
獲得老細當眾人面前，大聲一喝：
「不如我幫你做埋？好唔好呀？」
老細仲會補充多一句：「不如你份糧出埋俾我呀！？」
下屬聽後只好死死地氣，唯命是從！

第七位：「單嘢睇緊啲！唔好爆鑊！」
老細有啲大project不容有失，擔心有所差池。
跟下屬講：「單嘢睇緊啲！唔好爆鑊！」
或者恐嚇下屬：「如果單嘢爆咗鑊，你就唔使再返工嚟！」
做下屬，最重要就係識得補鑊。

第六位：「check真啲！覆我！」
老細失驚無神，突擊問下屬一條問題，
下屬無心理準備之下，猶豫不決，唔肯定答案之際，
老細一句：「check真啲！覆我！」
下屬如小學生般，慌失失走去找出答案，
盡快回覆老師。

第五位：「你喺度做咗幾耐？」
無論老細想升一個staff或想炒一個staff，
他的開場白都是：「你喺度做咗幾耐？」分別是笑笑口定嚴詞厲色？
或者下屬天資差劣，不斷重覆犯錯，講嘢無point仲遊花園，
老細聽完下屬胡扯一輪之後，緩緩放下手中PDA：「你喺度做咗幾耐？是但一個新人都醒過你多多聲啦！」

第四位：「我無講過！係你聽錯！」
除非被下屬偷偷錄音，
否則老細知道死無對証，愛出爾反爾，
老細更理直氣壯：「我無講過！係你聽錯！」
其他欺善怕惡的擦鞋同事見狀，落井下石，
立即撲出幫拖：「老細都無講過囉！梗係你聽錯或者記錯啦！」

第三位：「咁你有乜嘢solution？」
當下屬遇上工作的難題時，入房問老細如何處理？
老細先發制人：「咁你有乜嘢solution？」
下屬腦海一片空白之際，老細叫：「咁你諗到再返嚟見我！」
下屬門後輕嘆：「唉~ 如果我有solution，我使鬼嚟搵你咩？！」
老細打發下屬出房後，繼續上網。

第二位：「我唔理！總之你同我死掂佢！」
老細金句：我請你返嚟係幫我解決問題，唔係增加我嘅問題！
所以老細唔會埋你有乜嘢難處限制，
大石責死蟹：「我唔理！總之你同我死掂佢！」
注意句中的「死」字，延續中國傳統君主臣子的殺頭習俗。

第一位：「呀邊個邊個！」
老細腦部的RAM用來記一些對他有意義的資料，
例如：客戶資料、市場消息、生意大計，交稅財務，
但員工的名字對他來說，卻是無乜意義！
老細見到任何一名員工，都冠以：「呀邊個邊個！」
「呀邊個邊個！同我Book張機票，」、「呀邊個邊個！同我過嚟！」
對於老細來說，除了靚女staff之外，
每個員工的面孔都是糢糊不清。

完